आयुर्वेद दिवस-सोनोवाल
केन्द्रीय आयुष मंत्री सर्बानंद सोनोवाल ह भारतीय परंपरागत चिकित्सा पद्धति के क्षमता, शक्ति अउ प्रभाव के बारे म लोगन म जागरूकता बढ़ाय उपर जोर दीन हे। नई दिल्ली म आज सातवां आयुर्वेद दिवस समारोह म श्री सोनोवाल ह किहीन कि ए परंपरागत प्रणाली न केवल बीमारी के रोकथाम करथे, बल्कि लोगन ल स्वस्थ घलो बनाथे। श्री सोनोवाल ह किहीन कि देसवासी मन ल हजारों बछर ले उपयोग म अवइया भारतीय पंरपरागत चिकित्सा पद्धति के महत्व ल समझाना चाही। ओमन किहीन कि एखर ले देस ल आत्मनिर्भर बने म मदद मिलही। श्री सोनोवाल ह किहीन कि प्रधानमंत्री नरेन्द्र मोदी के समर्थन ले आयुष क्षेत्र ह पूरा विश्व म अपन अलगे पहिचान बनाय हे। ओमन किहीन कि आयुष अउ जनजातीय कार्य मंत्रालय ह देस के दस करोड़ जनजातीय लोगन के फायदा बर काम करे बर एक ठिन समझौता ज्ञापन म हस्ताक्षर करे हे।
ऐति, छत्तीसगढ़ म घलो आज आयुर्वेद दिवस के मउका म कतकोन कारीकरम करके लोगन ल आयुर्वेद चिकित्सा बर जागरूक करे जावत हे। इही कड़ी म जांजगीर-चांपा जिला म आयुष विभाग डहार ले निःशुल्क आयुष स्वास्थ्य सिविर के आयोजन करे गीस, जेखर सुभारंभ नेता प्रतिपक्ष नारायण चंदेल ह करीन।
शहीद पुलिस परिजन-शुभकामना
प्रदेस म माओवादी घटना म सहीद होय पुलिस जवान मनके परिवार वाला मन ल देवारी के मउका म मुख्यमंत्री भूपेश बघेल ह सुभकामना संदेस अउ मिठई भेजे के निरदेस पुलिस अधिकारी मन ल दीन हे। इही कड़ी म धमतरी जिला के पुलिस अधीक्षक प्रशांत ठाकुर ह जिला म सहीद होय पुलिस करमचारी मनके परिजन मन ले मुलाकात करीन अउ ओमन मुख्यमंत्री के सुभकामना संदेस के संग मिठई भेंट करीन। इही दउरान ओमन ह सहीद मनके परिवार वाला मनके हालचाल घलो पूछीन।
ओति, कोरिया जिला म घलो पुलिस अधीक्षक त्रिलोक बंसल अउ दूसर अधिकरी मन ह सहीद हुसनैन अंसारी अउ सहीद संतोष एक्का के घर पहुंच के उंखर परिवार वाला मन ल भेंट दीन।
अइसने, महासमुंद जिला के पुलिस अधीक्षक भोजराम पटेल ह शहीद गौतम पांडेय के घर जाके उंखर पत्नी अउ लइका मन ले मुलाकात करीन। ए दउरान ओमन ह लइका मन ले चरचा करके करियर ले जुड़े मार्गदर्शन दीन।
दीपावली-जवान तैनात
देवारी तिहार ल देखत रईपुर संघरा प्रदेस के आने-आने जिला म पुलिस ह सुरक्षा बेवस्था ल बढ़ा दे हवय। राजनांदगांव जिला म करीबन डेढ़ सौ पुलिस जवान मन ल तैनात करे गेहे। ए जवान मन ह सहर के बाजार, चउक-चउराहा अउ सार्वजनिक जघा म नजर राखत हे। उहें, रात म पेट्रोलिंग गश्त ल घलो बढ़ाय गे हवय। तिहार के दउरान कोनों भी प्रकार के स्थिति ले निपटे बर पुलिस अधीक्षक प्रफुल्ल ठाकुर संघरा बड़े अधिकारी अउ जवान मन ह काली सहर म फ्लैग मार्च करीन।
ऐति, जांजगीर-चांपा जिला म घलो पुलिस ह लोगन ले त्यौहार के दउरान सांति बनाय राखे के अपील करीन हे। पुलिस अउ जिला प्रशासन के अधिकारी मन ह सहर के प्रमुख जघा मन म नजर राखत हे अउ सशस्त्र जवान मन डहार ले पैदल पेट्रोलिंग करे जावत हे।
नरक चौदस
आज छोटे देवारी हरय। एला रूप चौदस अउ नरक चौदस के नाव ले घलो जाने जाथे। रीति रिवाज के अनुसार रूप चौदस म घर के अंगना अउ बाहिर म रंगोली सजाके चौदा दीया जलाये जाथे। राज्य के आने आने जगा मन म रौशनी के ए तिहार म प्रतिष्ठान अउ घर मन म बिजली के झालर ले आकर्षक सजावट करे गेहे।
काली दीया के परब देवारी मनाये जाही। देवारी तिहार ल लेके लोगन मन म बड़ उछाह हे। राजधानी रायपुर संग प्रदेश के सबो शहर अउ कस्बा के बाजार मन म चहल पहल अउ रौनक देखे जात हे।
राज्यपाल अनुसुईया उइके अउ मुख्यमंत्री भूपेश बघेल ह प्रकाश के महापर्व देवारी तिहार के पहिली संझा प्रदेशवासी मन ल बधाई अउ शुभकामना दीन हे। अपन संदेस म राज्यपाल ह किहीन कि देवारी हमर वैभवशाली परंपरा के अंग हे। दू बछर के कठिन बेरा निकले के बाद लोगन उछाह के संग देवारी मनावत हे। राज्यपाल ह गोवर्धन पूजा अउ भाई दूज के घलो बधाई दीन हे। ए मउका म राज्यपाल ह देस के सुरक्षा म तैनात जवान मन ल देवारी तिहार के सुभकामना देवत किहीन कि देवारी के ए पावन परब म ओमन परिवार के त्याग करके देस के रक्षा के अपन दायित्व निभावत हे। ओमन यहू किहीन कि हमन ल तिहार मनाना चाही, फेर ओखर संग पर्यावरण के स्वच्छता के ध्यान घलो रखना चाही।
पटाखा-सतर्कता
रौशनी के तिहार देवारी देशभर म उछाह के संग मनाय जावत हे। उमंग के तिहार म थोरको लापरवाही ह सेहत म खराब परभाव डाल सकत हे, जेला देखत पटाखा फोड़त खानी सावधानी बरतना जरूरी हे। राजधानी रईपुर के वरिष्ठ नेत्र रोग चिकित्सक डॉक्टर सुभाष मिश्रा ह बतईन कि देवारी म पटाखा के सेती हाथ अउ उंगली जले के संगेसंग आंखी म घलो असर पड़ सकत हे। पटाखा के धुंआ के कारण आंखी म जलन-चुभन के संग लालिमा होय के खतरा रहिथे। एखर अलावा पटाखा से चोट लगे ले आंखी म घाव, खून के थक्का बनना या पुतली ल घलो नुकसान पहुंच सकत हे। डॉक्टर मिश्रा ह तिहार के दउरान खान-पान, दिनचर्या अउ एला बनाय के तरीका ल लेके लोगन ल सावधानी बरत के सलाह दीन हे।
पी.एल. पुनिया-छत्तीसगढ़
कांग्रेस प्रदेस कार्यकारिणी के बइठका इकतीस अक्टूबर के रईपुर के कांग्रेस भवन म होही। ए बइठका म सामिल होय बर अखिल भारतीय कांग्रेस कमेटी के प्रदेस प्रभारी पी.एल. पुनिया ह सत्ताईस अक्टूबर के रईपुर पहुंचत हे। श्री पुनिया पांच दिन के छत्तीसगढ़ दउरा म रइही। ए दउरान ओमन ह जगदलपुर अउ दंतेवाड़ा म राखे गे कांग्रेस पदाधिकारी मनके बइठका म सामिल होही।
आदिवासी नृत्य महोत्सव
राजधानी रईपुर के साईंस कालेज मैदान म अवइया एक ले तीन नवंबर तक राष्ट्रीय आदिवासी नृत्य महोत्सव के आयोजन करे जाही। महोत्सव म नौ देस के जनजातीय कलाकार संघरा अट्ठाईस राज्य अउ आठ केन्द्र सासित प्रदेस के डेढ़ हजार ले जादा कलाकार मन सामिल होही। राष्ट्रीय आदिवासी नृत्य महोत्सव म ए बखत दू ठन थीम राखे गेहे। पहिली थीम हे – ‘‘फसल कटाई पर होने वाले आदिवासी नृत्य‘‘ अउ दूसर थीम हवय – ‘‘आदिवासी परंपराएं तथा रीतिरिवाज‘‘। विजेता मन ल कुल बीस लाख रूपिया के पुरस्कार दे जाही। आदिवासी नृत्य महोत्सव के माध्यम ले न केवल राष्ट्रीय अंतर्राष्ट्रीय स्तर म जनजातीय कलाकार मनके बीच कला के साझेदारी होही। फेर, ओमन ह खानपान, रीतिरिवाज अउ शिल्प शैली ल घलो समझ सकही। छत्तीसगढ़ डहार ले नौ ठन देस ल नेवता भेजे गे हवय। ए सबो देस मन ह पहिली घांव रईपुर म अपन प्रस्तुति दीहीं। ए महोत्सव म मोजांबिक, मंगोलिया, टोंगो, रसिया, इंडोनेशिया, मालदीव, सर्बिया, न्यूजीलैंड अउ इजिप्ट के जनजातीय कलाकार मन हिस्सा लीहीं।
टी-ट्वेंटी वर्ल्ड कप
आस्ट्रेलिया के मेलबोर्न म आज खेले गे वर्ल्ड कप टी-ट्वेंटी क्रिकेट मैच म भारत ह पाकिस्तान ल 4 विकेट ले हरा देहे। विराट कोहली ह नाबाद 82 रन बनाके भारत के जीत म अहम योगदान दीन। उहें, हार्दिक पांड्या ह 40 रन के पारी खेलीन।
एखर पहिली, पाकिस्तान ह पहिली बल्लेबाजी करत निर्धारित 20 ओवर म 8 विकेट के नुकसान म 159 रन बनईन। 160 रन के लक्ष्य के पीछा करत भारत ह आखिरी गेंद म 01 रन बनाके ये मैच जीत लीन। टीम इंडिया के जीत म मुख्यमंत्री भूपेश बघेल ह बधाई दीन हे।
ओति, मालदीप म खेले जावत इंटरनेशनल चैलेंज बैडमिंटन टूर्नामेंट म छत्तीसगढ़ के आकर्षी कश्यप ह जापान के मोही कायाका ल हराके फाइनल म पहुंच गेहे।