प्रधानमंत्री रोजगार मेला-01
प्रधानमंत्री नरेन्द्र मोदी ह आज दस लाख कर्मी मन बर एक ठन विशाल भर्ती अभियान रोजगार मेला के सुरूवात करीन। ए मउका म पहिली चरण म केन्द्र सरकार के आने-आने पद बर पचहत्तर हजार नव नियुक्त कर्मी मन ल नियुक्ति पत्र दे गीस। प्रधानमंत्री ह वीडियो कॉन्फ्रेंंसिंग के माध्यम ले किहीन कि युवा मन ल रोजगार के मउका दे जाय के दिसा म ए ह एक ठन जरूरी कदम हे। ए मउका म प्रधानमंत्री ह किहीन कि ए बखत हमन ह सामूहिक रूप ले नियुक्ति पत्र दे जाय के सुरूवात करे हन। ओमन किहीन कि देस हर क्षेत्र म आत्मनिर्भर बने बर आगू बाढ़त हे अउ विकसित राष्ट्र बने के लक्ष्य ल सबो झन के मदद ले हासिल करे जा सकत हे।
प्रधानमंत्री ह किहीन कि युवा मन ह देस के ताकत हे अउ केन्द्र सरकार ह ओमन ल रोजगार देवाय बर कतकोन काम करत हे। ओमन किहीन कि युवा मनके कौशल विकास म ध्यान केन्द्रित करे के, स्व-रोजगार के पहल के समर्थन, ग्रामीण अर्थव्यवस्था ल बढ़ावा देना, स्टार्टअप व्यवस्था बर माहौल बनाना अउ बुनियादी ढांचा के विकास ह आने-आने स्तर म रोजगार के मउका लाय हे।
प्रधानमंत्री ह किहीन कि कुछेक बरस म देस म अस्सी हजार स्टार्टअप आगू आय हे अउ लाखों लोगन एमा काम करत हे। ओमन किहीन कि मनरेगा ले सात करोड़ लोगन ल रोजगार मिले हे।
प्रधानमंत्री रोजगार मेला-02
प्रधानमंत्री रोजगार मेला म आज दक्षिण पूर्व मध्य रेलवे रईपुर रेलमंडल डहार ले रईपुर स्टेशन म कार्यक्रम के आयोजन करे गीस। ए दउरान रेलवे संघरा आने-आने केन्द्रीय संस्थान म नियुक्त दू सौ बावन अभ्यर्थी मन ल नियुक्ति पत्र दे गीस। कारीकरम म केन्द्रीय इस्पात राज्यमंत्री फग्गन सिंह कुलस्ते ह किहीन कि युवा मन ल रोजगार ले जोड़े बर ए ह केन्द्र सरकार के सुघ्घर सुरूवात हे।
रईपुर म राखे गे कारीकरम म सांसद सुनील सोनी विधायक कुलदीप जुनेजा संघरा रेलवे के अधिकारी-करमचारी मन मौजूद रिहीन।
उहें, बिलासपुर रेलमंडल के स्टेशन परिसर म घलो कारीकरम कराय गीस, जेमा रेलवे के दू सौ नवनियुक्त कर्मी मन ल नियुक्ति पत्र दे गीस। कारीकरम म केन्द्रीय जनजातीय मामला के राज्यमंत्री रेणुका सिंह ह किहीन कि रोजगार मेला के माध्यम ले बेरोजगार युवा मन ल रोजगार के संभावना के संग देस सेवा के मउका मिलही। ओमन नव-नियुक्त कर्मी मन ल पूरा समर्पण के संग देस के सेवा करे बर प्रोत्साहित करीन।
उहें, भारतीय डाक विभाग डहार ले दुरूग जिला के भिलाई के महात्मा गांधी कला मंदिर सिविक सेंटर म घलो कारीकरम कराय गीस। ए मउका म केन्द्रीय स्वास्थ्य अउ परिवार कल्याण राज्यमंत्री डॉक्टर भारतीय प्रवीण पवार ह दू सौ ग्यारह युवा मन ल नियुक्ति पत्र दीन। उहें, रेलवे म पच्चीस अउ भिलाई इस्पात संयंत्र के बारह झन युवा मन ल घलो नियुक्ति पत्र दे गीस। कारीकरम म केन्द्रीय राज्यमंत्री ह किहीन कि पूरा देस म पचास जघा ले एक संघरा पचहत्तर हजार युवा मन ल शासकीय संस्था म काम करे बर प्रधानमंत्री डहार ले नियक्ति पत्र प्रदान करे गेहे। प्रथम चरण म नियुक्ति पत्र लेवइया युवा मन भाग्यशाली हे। अवइया डेढ़ बछर म पूरा देस म दस लाख युवा मन ल रोजगार दे जाही। कारीकरम म दुरूग लोकसभा क्षेत्र के सांसद विजय बघेल अउ विधायक विद्यारतन भसीन घलो मौजूद रिहीन।
धनतेरस
छत्तीसगढ़ संघरा देसभर म धनतेरस के तिहार आज बड़ उछाह के संग मनाय जावत हे। धनतेरस के संग पांच दिन तक चलइया दीपावली के तिहार आज ले सुरू होगे हे। आज के दिन धन पाय बर कुबेर के अउ स्वस्थ रेहे बर आयुर्वेद के देवत भगवान धनवन्तरी के पूजा करे जाथे। धनतेरस के परब ल कार्तिक महीना के कृष्ण पक्ष के त्रयोदशी के दिन मनाय जाथे। आज प्रदेसभर के बाजार मन म रौनक देखे जावत हे।
राज्यपाल अनुसुईया उइके अउ मुख्यमंत्री भूपेश बघेल ह प्रदेसवासी मन ल धनतेरस के बधाई अउ सुभकामना दीन हे।
उहें, दीवाली तिहार ल देखत कोंडागांव पुलिस ह आज शहर के मुख्य रद्दा अउ चउक-चउराहा म फ्लैग मार्च करीन।
इही बीच, राजनांदगांव जिला म स्व-सहायता समूह के माईलोगिन मन डहार ले गोबर ले तैयार करे गे दीया के बाजार म बहुत मांग हे। गौठान म महिल समूह डहार ले बनाय फैंसी दीया घलो ए बखत बाजार म बेचावत हे।
मुख्यमंत्री-शहीद शुभकामना
मुख्यमंत्री भूपेश बघेल ह छत्तीसगढ़ के शहीद मनके परिवार वाले मन ल देवारी तिहार सुभकामना देहे। मुख्यमंत्री ह किहीन कि सहीद मनके बलिदान ल हमेसा सुरता राखे जही। मुख्यमंत्री ह अपन कोति ले सबो सहीद मनके परिवार वाले मन ल देवारी तिहार के सुभकामना पत्र अउ मिठाई भेजे हे, जेला संबंधित जिला के उप पुलिस अधीक्षक रैंक के अधिकारी मन ह सहीद मनके परिजन ल ससम्मान भेंट करत हे।
मुख्यमंत्री के संदेस पत्र के संग दीवाली के उपहार भेंट करे बर आज शहीद आरक्षक महिपाल सिंह अउ सहीद सहायक उप निरीक्षक शोभा राम साहू के परिजन के घर बस्तर रेंज के पुलिस महानिरीक्षक सुंदरराज पी. अउ पुलिस अधीक्षक जितेन्द्र सिंह मीणा पहुंचीन। ए मउका म आईजी ह बतईन कि राज्य गठन के बाद बस्तर संभाग के अंतर्गत कुल एक हजार दू सौ बयासी सुरक्षा बल के जवान मन ह अपन बलिदान देहे।
एनजीटी-पटाखा निर्देश
राष्ट्रीय हरित प्राधिकरण-एनजीटी ह दीवाली, छठ पूजा, गुरूपर्व, नववर्ष अउ क्रिसमस ल देखत फटाखा फोड़े के संबंध म निरदेस जारी करे हे। एनजीटी के दिसा-निरदेस के अनुसार राज्य सासन डहार ले दीवाली के दउरान फटाख फोड़े बर रात आठ बजे ले दस बजे के बीच दू घंटा के बेरा तय करे गेहे। उहें, छठ पूजा म बिहनिया छह ले आठ बजे तक, गुरूपरब म रात आठ ले दस बजे तक, नववर्ष अउ क्रिसमस के मउका म रतिहा ग्यारह बजके पचपन मिनट ले साढ़े बारह बजे तक फटाखा फोड़े के अनुमति दे गे हवय।
स्वास्थ्य जागरूकता अभियान
आजादी के अमृत महोत्सव म आज रायगढ़ जिला के पुसौर विकासखंड के ग्राम छिछोर-उमरिया म स्वास्थ्य जागरूकता अभियान के तहत विकासखंड स्तरीय आयुष स्वास्थ्य मेला के आयोजन करे गीस। सिविर म आयुर्वेद अउ होम्योपैथी पद्धति ले निःशुल्क इलाज करके मरीज मन ल दवई दे गीस। सिविर म करीबन पचहत्तर लोगन मनके खून जांच अउ छह सौ ले जादा मरीज मनके इलाज करे गीस।
जिले की चिट्ठी
आकाशवाणी समाचार डहार ले काली संझा छह बजके तीस मिनट ले छह बजके पैंतीस मिनट तक ‘‘जिले की चिट्ठी‘‘ कार्यक्रम के प्रसारण करे जाही। समाचार एकांश के ए कार्यक्रम ल छत्तीसगढ़ स्थित आकाशवाणी के जम्मों केंद्र मन ह एके संग रिले करही। ए बखत के अंक म ‘‘कोरिया‘‘ जिला के गतिविधि मनके बारे म जानकारी दे जाही।