प्रधानमंत्री नरेंद्र मोदी काली रोजगार मेला के शुभारंभ करही। वीडियो कॉन्फ्रेंस के माध्यम ले पहिली चरण म दस लाख नवा भर्ती करे गे पचहत्तर लोगन मन ल नियुक्ति पत्र सौंपे जाही। युवा मन ल रोजगार के मउका देबर अउ नागरिक मनके कल्याण बर प्रधानमंत्री के प्रतिबद्धता ल पूरा करे के दिशा म ए ह एक महत्वपूर्ण कदम साबित होही। केंद्र सरकार के अड़तीस मंत्रालय अउ विभाग मन म देशभर ले चयनित नवा कर्मी मन ल सामिल करे जाही। ए दउरान दक्षिण पूर्व मध्य रेलवे के अंतर्गत, बिलासपुर, रायपुर अउ नागपुर म ए आयोजन करे जाही।
बिलासपुर म केंद्रीय जनजातीय राज्यमंत्री रेणुका सिंह, इस्पात राज्यमंत्री फग्गन सिंह कुलस्ते अउ नागपुर म सामाजिक न्याय अउ अधिकारिता मंत्री रामदास अठावले के मौजूदगी म छै सौ ले जादा नव नियुक्त कर्मी मन ल नियुक्ति पत्र प्रदान करे जाही। एखर अलावा केंद्रीय सेवा के दूसर विभाम मनके घलो नव नियुक्त कर्मी मन नियुक्ति पत्र द जाही। उंहे भिलाई म राखे गे कार्यक्रम म घलो दू सौ पचास लोगन मन ल नियुक्ति पत्र दे जाही।
प्रधानमंत्री आवास योजना-शहरी के तहत दुर्ग जिला के पाटन नगर पंचायत ल बेस्ट परफारमिंग नगर पंचायत के श्रेणी म पूरा देश म तीसरा स्थान मिले हे । गुजरात के राजकोट म राखे गे इंडियन हाउसिंग अर्बन कान्क्लेव म केंद्रीय मंत्री हरदीप सिंह पुरी ह नगर पंचायत पाटन ल ए अवार्ड ले सम्मानित करीन। पाटन के मुख्य नगर पालिका अधिकारी योगेश्वर उपाध्याय, सब इंजीनियर थानेश्वर वर्मा अउ सीएलटीसी शैलेष मिश्रा ह ये पुरस्कार लीन।
आज पुलिस स्मृति दिवस हरय। राज्यपाल अनुसुइया उइके रायपुर के माना स्थित चौथा बटालियन म आयोजित पुलिस स्मृति दिवस परेड म सामिल होइन अउ शहीद जवान मन ल श्रद्धांजलि दीन। ए मउका म राज्यपाल ह कीहिन कि स्मृति दिवस अपन कर्त्तव्य निभावत शहीद पुलिस जवान मनके अदम्य साहस अउ पराक्रम के सुरता करत हे । ओमन भगवत गीता ले लेगे पुलिस के ध्येय वाक्य परित्राणाय साधुनाम के अर्थ ल पुलिस कोति ले सार्थक बनाय के बात कीहिन ।ं
ए मउका म राज्यपाल ह लोगन मनले आग्रह करीन कि पुलिस कर्मी मनके प्रति अपन व्यवहार म संवेदनशीलता लावय अउ मानवीय दृष्टिकोण राखय। सुश्री उइके ह कीहिन कि छत्तीसगढ़ माओवाद के समस्या ले प्रभावित हरय। अइसे म अशांत क्षेत्र मन म तैनात पुलिस जवान कई मउका म अपन साहस के लोहा मनवाय हे।
कार्यक्रम ल गृहमंत्री ताम्रध्वज साहू ह घलो संबोधित करत जांबाज अधिकारी अउ जवान मनके शहादत ल सुरता अउ नमन करीन। कार्यक्रम म राज्यपाल अउ गृहमंत्री ह ए बछर शहीद होय तीन झिन जवान आरक्षक अर्जुन कुड़ियम, सहायक आरक्षक गोपाल कड़ती अउ प्रधान आरक्षक सालिकराम मरकाम ल श्रद्धांजलि दीन। उंहें शहीद पुलिस अधिकारी अउ जवान मनके परिजन ले भेंट करके ओमन के सम्मान करीन ।
मुख्यमंत्री भूपेश बघेल ह घलो पुलिस स्मृति दिवस म वीर शहीद मन ल श्रद्धांजलि अर्पित करीन। ओमन कीहिन कि सुरक्षा बल अउ पुलिस के वीर शहीद अपन कर्त्तव्य के निर्वहन के दउरान सर्वोच्च बलिदान दीन हे। उंखर उपर पूरा देश ल गर्व हे।
केंद्रीय माध्यमिक शिक्षा बोर्ड – सीबीएसई ह केहे हे कि सोलहवां केंद्रीय शिक्षक पात्रता परीक्षा दिसंबर ले जनवरी के बीच ऑनलाईन संचालित होही। परीक्षा के निश्चित तिथि उम्मीदवार मन ल प्रवेश पत्र म दे जाही । ऑनलाईन आवेदन प्रक्रिया ये महीना के इकतीस तारीख ले शुरू होही अउ अवइया महीना के चौबीस तारीख तक आवेदन जमा करे जा सकही। आधिकारिक वेबसाइट सीटीईटी डॅाट एनआईसी डॅाट आई एन म आवेदन जमा करे जा सकत हे।
प्रादेशिक समाचार एकांश डहार ले समसामयिक विषय उपर आधारित साप्ताहिक कार्यक्रम ‘‘बातों-बातों-में‘‘ ए बखत आयुर्वेद दिवस म डॅाक्टर संजय शुक्ल ले लेगे भेंटवार्ता प्रसारित करे जाही। एखर प्रसारण आकाशवाणी के रायपुर केन्द्र डहार ले काली बाईस अक्टूबर के बिहनिया दस बजके तीस मिनट म करे जाही। एला छत्तीसगढ़ के जम्मों आकाशवाणी केन्द्र एके संगरा रिले करही।
रायपुर के अदालत ह आईएएस समीर बिश्नोई कारोबारी सुनील अग्रवाल अउ लक्ष्मीकांत तिवारी के रिमांड छै दिन बर अउ बढ़ा देहे। मामला के अगला सुनवाई सत्ताईस अक्टूबर के होही।
बतादन कि पाछू सुनवाई म ईडी ह चौदह दिन के रिमांड मांगे रीहिस । जेखर उपर अदालत ह आठ दिन के रिमांड मंजूर करे रीहिन। ए जम्मों मन ल आज कोर्ट फेर पेस करे गीस। ए दउरान ईडी ह ए आठ दिन म अउ सबूत मिले के दावा करत छै दिन के रिमांड अउ मांगीस जेला कोर्ट ह मंजूर करीस।
ओति ईडी के टीम ह आज गरियांबद, कांकेर, नारायणपुर, सुकमा अउ कोण्डागांव म जांच शुरू करीन। बताय जात हे कि ए जांच तीन आईएएस रानू साहू, समीर बिश्नोई अउ जे.पी मौर्या ले जुड़े हे।
राजधानी रायपुर के साइंस कॅालेज मैदान म अवइया एक से तीन नवंबर तक राष्ट्रीय आदिवासी नृत्य महोत्सव के आयोजन करे जाही। महोत्सव म नौ ठिन देश के जनजातीय कलाकार समेत अठाईस राज्य अउ आठ केंद्र शासित प्रदेश मनके डेढ़ हजार ले जादा कलाकार मन शामिल होही। राष्ट्रीय आदिवासी नृत्य महोत्सव म ए दारी दू थीम राख्े गेहे। पहिला थीम फसल कटाई पर होने वाले आदिवासी नृत्य अउ दूसर थीम आदिवासी पंरपराएं तथा रीति रिवाज । विजेता मन ल कुल बीस लाख रूपिया के पुरस्कार दे जाही ।
नई दिल्ली म राखे गे टूरिज्म कॉन्क्लेव म सामिल होय के बाद पत्रकार मन ल ए महोत्सव के जानकारी देवत मुख्यमंत्री भूपेश बघेल ह बताइन कि आदिवासी नृत्य महोत्सव के माध्यम ले न केवल राष्ट्रीय, अंतर्राष्ट्रीय स्तर म जनजातीय कलाकार मनके बीच ओमन के कला के साझेदारी होही, बल्कि ओमन एक दूसर के खानपान, रीति रिवाज अउ शिल्प शैली ल घलो देख अउ समझ सकही। ए महोत्सव म मोजांबिक, मंगोलिया, टोंगो, रशिया, इंडोनेशिया, मालदीव, सर्बिया, न्यूजीलैण्ड अउ इजिप्ट के जनजातीय कलाकार हिस्सा लीहीं।
एखर पहिली श्री बघेल नई दिल्ली के किरण नादर म्यूजियम ऑफ आर्ट म आयोजित टूरिज्म कॉनक्लेव म शामिल होइन।
भारतीय खाद्य निगम-एफसीआई छत्तीसगढ़ स्थित अपन जम्मों कार्यालय अउ भंडार गृह मन म विसेस सफाई अभियान चलावत हे। एफसीआई के छत्तीसगढ़ क्षेत्र के महाप्रबंधक राजेश कुमार ह बताइन कि ए अभियान के तहत दू ले तीस अक्टूबर तक बिसेस सफाई अभियान चलाये जात हे। ओमन बताइन कि काली जम्मां कार्यालय परिसर के साफ सफाई के संगेसंग पौधारोपण घलो करे गीस।
कोरबा जिला के कटघोरा वनमंडल के बनिया गांव म एक हाथी के मउत होगे। ओखर बाद हाथी मन ग्रामीण मन उपर हमला कर दीन। जेखर ले एक ग्रामीण अउ एक मवेशी के मउत होगे।
बताये जात हे कि ग्राम बनिया म एक हाथी के मउत के मामला म कुछ गांव वाला मन ल घलो हिरासत म ले गेहे। उंहें वन विभाग के टीम ह मउका म पहुंच के मामला के जांच करत हे। उंहे दूसर कोति ए घटना के बाद चौंवालिस हाथी मन ह आक्रोशित होके तीर तखार के वनांचल क्षेत्र म उत्पात मचावत हे।
दक्षिण पश्चिम मानसून के आज छत्तीसगढ़ ले विदाई होगे हे। उंहें उत्तर ले शुष्क अउ ठंडा हवा आय के सेती प्रदेश के न्यूनतम तापमान म गिरावट आय अउ मौसम शुष्क रेहे के संभावना हरय। उंहें मौसम विभाग ले मिले जानकारी अनुसार प्रदेश के कुछएक जगा मन म चौबीस ले छब्बीस अक्टूबर तक बादल रेहे के अउ न्यूनतम तापमान बाढ़े के संभावना हरय।