प्रधानमंत्री रोजगार मेला
प्रधानमंत्री नरेंद्र मोदी अवइया बाईस अक्टूबर के वीडियो कॅान्फ्रेंस के माध्यम ले दस लाख कर्मी मनके भर्ती बर रोजगार मेला के शुभारंभ करही। समारोह म पहिली चरण म नवा भर्ती करे गे पचहत्तर लोगन मन ल नियुक्ति पत्र सौंपे जाही। ए दउरान दक्षिण पूर्व मध्य रेलवे के अंतर्गत, बिलासपुर, रायपुर अउ नागपुर म ए आयोजन करे जाही।
बिलासपुर म केंद्रीय जनजातीय राज्यमंत्री रेणुका सिंह, इस्पात राज्यमंत्री फग्गन सिंह कुलस्ते अउ नागपुर म सामाजिक न्याय अउ अधिकारिता मंत्री रामदास अठावले के मौजूदगी म छै सौ ले जादा नव नियुक्त कर्मी मन ल नियुक्ति पत्र प्रदान करे जाही। जेमा बिलासपुर म दू सौ अठयासी, रायपुर म दू सौ इकतालिस अउ नागपुर म ब्यानबे नव नियुक्ति कर्मी मन ह सामिल हरय।
युवा मन ल रोजगार के मउका देबर अउ नागरिक मनके कल्याण बर प्रधानमंत्री के प्रतिबद्धता ल पूरा करे के दिशा म ए ह एक महत्वपूर्ण कदम साबित होही। श्री मोदी के निर्देश अनुसार जम्मों मंत्रालय अउ विभाग स्वीकृत खाली पद ल भरे बर काम करत हे।
छत्तीसगढ़ राष्ट्रीय पुरस्कार
प्रधानमंत्री फसल बीमा योजना के अंतर्गत राष्ट्रीय फसल बीमा पोर्टल के एकीकरण डिजिटली करे म छत्तीगढ़ ल राष्ट्रीय पुरस्कार दे गेहे। छत्तीसगढ़ म डिजिटल भू अभिलेख डाटा बेस भुंइया म आर्थिक फसल बीमा पोर्टल मनके एकीकरण बहुत कम समय म करे गेहे।
केंद्रीय कृषि अउ कृषक कल्याण मंत्रालय ह केरल के कोच्चि म राखे गे आठवां राष्ट्रीय अधिवेशन म छत्तीसगढ़ ल उत्कृष्ट पुरस्कार दे गीस। छत्तीसगढ़ कोति ले ए पुरस्कार विशेष सचिव अउ कृषि संचालक डॅाक्टर अय्याज फकीर तंबोली अउ संयुक्त संचालक बी.के. मिश्रा ह लीन
भेंट-मुलाकात
मुख्यमंत्री भूपेश बघेल ह कीहिन कि जल जीवन मिशन के अंतर्गत पेयजल योजना मनके काम के गुणवत्ता म सुधार करे के जरूरत हरय। काली भेंट मुलाकात के दउरान जांजगीर चांपा जिला के शिवरीनारायण म अधिकारी मनके समीक्षा बइठका म ओमन कीहिन कि पेयजल मिशन ल लेके ए क्षेत्र के कुछएक गांव मन म शिकायत आय हे। एखर समाधान होना चाही।
मुख्यमंत्री ह डूबान क्षेत्र के किसान मन ल जल्दी मुआवजा देके निर्देश दीन। ओमन अवैध शराब, जुअां, सट्टा, नशीला दवा मनके खिलाफ कड़ा कार्रवाई के निर्देश दीन। भेंट मुलाकात कार्यक्रम के दउरान मुख्यमंत्री ह आने आने संगठन के प्रतिनिधि मनके मांग उपर एक करोड़ सात लाख रूपिया के स्वीकृति प्रदान करे हे। ए मउका म ओमन शिवरीनारायण म उपन्यासकार ठाकुर जगमोहन सिंह के नाम उपर पुस्तकालय बनाय के निर्देश दीन।
उंहें मुख्यमंत्री ह शिवरीनारायण म राखे गे कार्यक्रम म पामगढ़ विधानसभा क्षेत्र बर करीबन तेईस करोड़ रूपिया ले जादा के लागत के आने आने काम के लोकार्पण अउ भूमिपूजन करीन। बाद म पत्रकार मनले गोठबात करत मुख्यमंत्री ह बताइन कि राम वनगमन पर्यटन परिपथ परियोजना के तहत पहिली चरण म कोरिया ले लेके सुकमा तक नौ ठिन जगा मनके चयन करे गे रीहिस। एमा ले शिवरीनारायण अउ चंदखुरी म शुरूआती चरण के काम पूरा होगे हे।
ओमन धान खरीदी उपर चर्चा करत बताइन कि ये दारी समर्थन मूल्य म किसान मनले एक करोड़ मीट्रिक टन ले जादा धान खरीदे के तियारी हरय।
चिप्स/मार्कफेड नियुक्ति
राज्य सरकार ह छत्तीसगढ़ पाठय पुस्तक निगम के प्रबंध संचालक रितेश कुमार अग्रवाल ल छत्तीसगढ़ इंफोटेक प्रमोशन सोसायट-चिप्स के मुख्य कार्यपालन अधिकारी पद के अतिरिक्त प्रभार सौंपे हे। उंहें, खाद्य विभाग के विशेष सचिव मनोज सोनी ल छत्तीसगढ़ राज्य सहकारी विपणन संघ-मार्कफेड के प्रबंध संचालक बनाय गेहे।
बतादन कि अब तक ये पद आईएएस समीर बिश्नोई संभालत रीहिन। जउन ल प्रदेश म ईडी के छापा के दउरान गिरप्तार करे गीस हे।
कांग्रेस राष्ट्रीय अध्यक्ष
कांग्रेस के राष्ट्रीय अध्यक्ष पद म मल्लिकार्जुन खड़गे के निर्वाचित होय ले कांग्रेस नेता मन म बड़ उछाह हे। छत्तीसगढ़ विधानसभा अध्यक्ष डॅाक्टर चरणदास महंत अउ कोरबा सांसद ज्योत्सना महंत ह श्री खड़गे ल दिल्ली म भेंट करके ओमन ल बधाई अउ शुभकामना दीन। उंहें प्रदेश कांग्रेस कमेटी के अध्यक्ष मोहन मरकाम ह श्री खड़गे ल पार्टी अध्यक्ष चुने जाय म बधाई देवत कीहिन कि ए ह कांग्रेस के आंतरिक लोकतंत्र के जीत हरय।
रेलवे डिजिटल पहल
छत्तीसगढ़ ले गुजरने वाला कई ठिन एक्सप्रेस अउ मेमू ट्रेन मन म यात्री मन ल सुरक्षित सफर के सुविधा देबर सीसीटीवी कैमरा लगाये जात हे। दक्षिण पूर्व मध्य रेलवे डहार ले अब तक एक सौ नब्बे ठिन कोच म सीसीटीवी कैमरा लगाये जा चुके हे। जेमा ए सुविधा शुरू करे गेहे। ओमा दुर्ग-निजामुद्दीन एक्सप्रेस, हमसफर एक्सप्रेस, छत्तीसगढ़ एक्सप्रेस, दुर्ग जम्मूतवी एक्सप्रेस अउ बिलासपुर-भगत की कोठी जइसे कई ठिन ट्रेन सामिल हरय।
अइसने बल्लारसाह -गोंदिया, चांदाफोर्ट-गोंदिया मेमू समेत बारा स्पेयर कोच म सीसीटीवी कैमरा लगाये जा चुके हे। एखर अलावा प्लेटफार्म अउ स्टेशन परिसर म घलो कैमरा लगाये जात हे। अब तक बारा स्टेशन मन म लगभग तीन सौ साठ कैमरा लगाये गेहे।
इही बीच दक्षिण पूर्व मध्य रेल प्रशासन ह यात्री मनले अपील करे हे कि ओमन यात्रा के दउरान अपन संग ज्वलनशील अउ विस्फोटक पदार्थ झन ले जावय। अइसे करना दंडनीय अपराध घलो हरय। देवारी ल देखत रेल प्रशासन अउ रेलवे पुलिस डहार ले अभियान चलाके स्टेशन मनके सघन जांच करे जात हे।
छत्तीसगढ़ी ओलंपिक
प्रदेश म जोन स्तरीय छै दिन के छत्तीसगढ़िया ओलंपिक के आज समापन होगे हे। दूसरा चरण के समापन दिवस म आज आने आने खेल प्रतियोगिता के विजेता मन ल पुरस्कार दे गीस। छत्तीसगढ़िया ओलंपिक के तीसरा चरण विकासखंड स्तर म अवइया सत्ताईस अक्टूबर ले दस नवंबर तक होही।
मौसम
प्रदेश म सरगुजा, बिलासपुर, दुर्ग, अउ रायपुर संभाग ले दक्षिण पश्चिम मानसून के विदाई होगे हे। मौसम विभाग के अनुसार बस्तर संभाग म अवइया एक दू दिन म मानसून विदा हो जाही। प्रदेश म ए बेरा बंगाल के खाड़ी ले नमी आवत हे, जेखर ले अवइया चौबीस घंटा के दउरान मुख्य रूप ले बस्तर संभाग म एक दू जगा मन म हल्का ले मध्यम बरसा होय या गरज-चमक के संग छींटा पड़े के संभावना हरय।
स्व सहायता समूह
महिला स्व सहायता समूह डहार ले एक कोति गोबर ले वर्मी कम्पोस्ट बनाये जात हे, त उंहे दूसर कोति गोबर ले कई घरेलु अउ सजावटी समान घलो तियार करे जात हे। दीपावली ल देखत महिला समूह डहार ले गोबर ले बने फ्यूजन दीया के अलावा फ्लोटिंग दीया, बंदनवार, मोबाइल स्टेण्ड, हैगिंग शो-पीस, जइसन कई ठिन सजावटी समान बनाय गेहे। ए सामान मनके पुणे अउ नोएडा जइसे शहर ले सरलग मांग होवत हे।
दुर्ग, जशपुर, जांजगीर-चांपा जिला के संघरा नवा बने सक्ती जिला के अकलतरा अउ पामगढ़ क्षेत्र म घलो महिला मन कोति ले बहुत अकन सजावटी अउ घरेलु उपयोग के वस्तु बनाय जाथे। दुर्ग जिला के भिलाई म उड़ान नई दिशा समूह के महिला मन कलेक्टर पुष्पेंद्र कुमार मीणा ल गोबर ले बने फ्यूजन दीप रंगोली भेंट करके ओमन ल देवारी के शुभकामना दीन।
अउ अब थोरकुन समाचार सार म –
– मुख्यमंत्री भूपेश बघेल ह छत्तीसगढ़ म श्रमिक आंदोलन के सूत्रधार अउ सहकारिता आंदोलन के प्रणेता ठाकुर प्यारेलाल सिंह के पुण्यतिथि म आज ओमन ल नमन करीन।
– आबकारी मंत्री कवासी लखमा ह नारायणपुर म जिला अस्पताल म मेडिसिन वेन अउ मोटर बाईक एंबुलेंस ल हरा झण्डा दिखाके रवाना करीन।
– राज्य शासन ह छत्तीसगढ़ हज समिति म पांच सदस्य मनके नामांकन कर देहे। समिति म स्थानीय निकाय के तीन झिन सदस्य ल घलो सामिल करे गेहे। ए सबो के कार्यकाल तीन बछर के होही।
– दुर्ग जिला क अमलेश्वर थाना क्षेत्र म आज दिनदहाड़े एक दुकान संचालक के हत्या करके सोना-चांदी के गहना लूट के मामला आगू आय हे। ए घटना के बाद दूनो आरोपी फरार हे, जेखर तलाश करे जात हे।
अउ
– राष्ट्रीय राजमार्ग तीस के अंतर्गत केशकाल घाटी म सड़क मरम्मत काम होय के सेती अवइया तेइस अक्टूबर तक बीनिया नौ बजे ले रतिहा नौ बजे तक ए रद्दा म मालवाहन अउ ट्रक मनके अवई जवई बंद रीही।