कांग्रेस राष्ट्रीय अध्यक्ष
अखिल भारतीय कांग्रेस कमेटी के नवा अध्यक्ष के घोषणा होगे। चुनई के बाद आज आय नतीजा म मल्लिकार्जुन खड़गे ह सात हजार आठ सौ संत्यानबे वोट पाके पार्टी अध्यक्ष के चुनई जीत गेहे। उंहें शशि थरूर ल एक हजार अठहत्तर वोट मिले रीहिस।
जानबा के अनुसार कांग्रेस के राष्ट्रीय अध्यक्ष बर चुनई होय रीहिस अउ एमा करीबन नौ हजार वोट पड़े रीहिस।
भाजपा बैठक
राज्य म अवइया विधानसभा चुनई के तियारी ल लेके आज भारतीय जनता पार्टी के संभाग जिला अउ विधानसभा प्रभारी के रायपुर म एक ठिन महत्वपूर्ण बइठका होइस । एमा पार्टी के प्रदेश अध्यक्ष अरूण साव क्षेत्रीय संगठन महामंत्री अजय जामवाल अउ संगठन महामंत्री पवन साय ह पार्टी पदाधिकारी मन ल चुनाव के रणनीति बनाय बर मार्गदर्शन दीन।
बइठका म पार्टी पदाधिकारी मनले कहे गीस कि ओमन ह केंद्र सरकार के योजना के लाभार्थी मनले संपर्क करय। संगेसंग योजना के क्रियान्वयन के बारे म घलो जानकारी लीन। उंहे हर काम ल तय करे गे बेरा के भीतरी पूरा कर बर केहे गीस। बाद म प्रदेश अध्यक्ष अरूण साव ह मीडिया ले गोठबात करत एला महत्वपूर्ण बताइन । ओमन कीहिन कि एमा पार्टी के चुनई तियारी के संगेसंग मतदान केंद्र तक पहुंचे के रणनीति उपर चर्चा होइस। उंहे अवइया ग्यारा नवंबर के बिलासपुर म होय वाले महतारी हुंकार रैली उपर घलो गोठबात होइस।
भाजपा जिलाध्यक्ष
भारतीय जनता पार्टी म प्रदेश म तेरा ठिन नवा जिला अध्यक्ष के नाव के सूची जारी कर देहे। जयंती पटेल ल रायपुर शहर के जिलाध्यक्ष बनाय गेहे। उंहे भिलाई म ब्रजेश बिजपुरिया, राजनांदगांव म रमेश पटेल, मोहला मानपुर म संजीव शाह अउ खैरागढ़ छुईखदान म धम्मन साहू ल जिलाध्यक्ष बनाय गीस। अइसने सुकमा म धनीराम अउ मनेन्द्रगढ़ म अनिल केशरवानी ल ये जिम्मा दे गेहे।
भेंट-मुलाकात
भेंट-मुलाकात कार्यक्रम के चलत मुख्यमंत्री भूपेश बघेल ह काली ले सक्ती जिला के दउरा म हे। ए बेरा म ओमन ह कोनारगढ़ प्राथमिक शाला के उद्घाटन स्कूली लईका ले कराइन । श्री बघेल ह लइका मनके संग ओखर पढ़ई ल लेके गोठबात घलो करीन।
ए मउका म एक ठिन कार्यक्रम ल संबोधित करत मुख्यमंत्री ह कोनारगढ़, मुलमुला, पामगढ़, कोसा, मेंहंदी अउ भैंसो गांव के विकास बर कतकोन काम के मंजूरी घलो दीन। ए बेरा म मुख्यमंत्री ह माओवादी हमला म शहीद होय टी.आई. रूद्रप्रताप सिंह ल श्रद्धांजलि दीन अउ ओखर पत्नि के सम्मान घलो करीन।
एखर ले पहिली चंद्रपुर म पत्रकार मनले गोठबात करत मुख्यमंत्री ह बताइन कि राजीव गांधी किसान न्याय योजना, गोधन न्याय योजना अउ राजीव गांधी ग्रामीण कृषि, मजदूर न्याय योजना के चलत करीबन उन्नीस सौ करोड़ रूपिया हितग्राही मनके बैंक खाता म डाले गेहे। ओमन कीहिन कि चंद्रपुर कॉलेज के नाव साहित्यकार स्वर्गीय मुकुटधर पाण्डेय के नाव म करे जाही। मुख्यमंत्री ह चंद्रपुर म अधिकारी मनके बइठका लेके आने-आने योजना के समीक्षा घलो करीन। अधिकारी मन ल निर्देश दीन कि नामांतरण, फौती, बटवारा, समेत राजस्व अभिलेख के दुरूस्तीकरण के काम प्राथमिकता ले करे जाही।
श्री बघेल ह कहिन कि राजस्व रिकॉर्ड अपडेट नइ होय ले कोनो भी मनखे सरकारी योजना के लाभ ले झन छूटय। मुख्यमंत्री ह स्कूली लइका मनके जाति प्रमाणपत्र ल घलो बनाय के निर्देश दीन।
बिजली कर्मी बोनस
देवारी तिहार ल देखत राज्य सरकार ह बिजली कर्मी मन ल बोनस देके एलान करीन हे। एखर बारे म मुख्यमंत्री ह घोषणा करीन हे कि स्टेट पॉवर कंपनी के सबो नियमित अउ संविदा बिजली कर्मी मन ल बोनस के रूप म ग्यारा हजार रूपिया तक के राशि दे जाही। जेखर ले कंपनी के सोला हजार ले जादा अधिकारी अउ कर्मचारी ल फायदा होही। एखर बर मुख्यमंत्री ह कंपनी के अधिकारी मन ल देवारी ले पहिली बोनस राशि के भुगतान करे के निर्देश दीन हे।
अंतर्राष्ट्रीय कृषि मड़ई
राज्यपाल अनुसुइया उइके ह कीहिन हे कि आने आने विश्वविद्यालय अउ अनुसंधान संस्थान म होवत काम बुता के लाभ किसान अउ आम लोगन मन ल मिलना चाही। ये बात काली राज्यपाल ह रायपुर के इंदिरा गांधी कृषि विश्वविद्यालय म होवत अंतर्राष्ट्रीय कृषि मड़ई एग्री कॉर्निवाल के समापन समारोह ल संबोधित करत कीहिन। ए बेरा म ओमन ह कृषि विश्वविद्यालय डहार ले चलाये जात अनुसंधान गतिविधि के जायजा घलो लीन। उंहे ए कार्यक्रम के अध्यक्षता कृषि मंत्री रविंद्र चौबे ह करीन।
पीपीपी-मॉडल कॉलेज संचालन
प्रदेश के अति पिछड़ा अउ दूरिहा जगा तक उच्च शिक्षा पहुंचाय बर नवाचार करे जात हे। एखर चलत अब पीपीपी मॉडल म कॉलेज ल चलाय जाही। ए मॉडल म ए बेवस्था शुरू म ही निजी महाविद्यालय ल दे जाही अउ एमन ल सबो कर्मचारी के वेतन व्यवस्था खुद करना होही। हालेच म होय राज्य मंत्रिमंडल के बइठका म एखर बर प्रस्तावित प्रारूप के अनुमोदन करे गीस।
एंटी हू्मन ट्रैफिकिंग सम्मेलन
राज्य के पुलिस महानिदेश अशोक जुनेजा ह कीहिन हे कि प्रदेश म मानव तस्करी के अपराध म सरलग कमी आय हे। पुलिस महानिदेशक ह रायपुर म एंटी हू्मन ट्रैफिकिंग म होवत राज्य स्तरीय सम्मेलन ल संबोधित करीन। ओमन ह आने आने राज्य ले रेस्क्यू करे गे मानव तस्करी के शिकार होय लोगन मनके पुनर्वास बर सबो हितधारक संस्था मनके संग जुलमिलके काम करे म जोर दीन। कार्यक्रम म अतिरिक्त पुलिस महानिदेश प्रदीप गुप्ता, अउ पूर्व पुलिस महानिदेशक मन ह घलो अपन बात रखीन।
परीक्षा
राज्य व्यावसायिक परीक्षा मंडल डहार ले पुलिस मुख्यालय छत्तीसगढ़ म आठ ठिन खाली पद म भर्ती बर छै नवंबर के प्रारंभिक परीक्षा ले जाही। उम्मीदवार मन काली बीस अक्टॅबर तक ऑनलाईन आवेदन कर सकत हे। पुलिस मुख्यालय म उप निरीक्षक अउ प्लाटून कमांडर के पद म भर्ती बर होवइया ये परीक्षा मंझनियां दू बजे ले सवा चार बजे तक होही।
उंहे उच्च शिक्षा विभाग डहार ले छत्तीसगढ़ लोक सेवा आयोग ले उप कुलसचिव के पद म चुने गे पांच झिन उम्मीदवार मनके पदस्थापना आदेश जारी कर दे गेहे।
रेलवे कार्रवाई
रेलवे सुरक्षा बल ह अवैध रूप ले ई-टिकिट बनइया दलाल मनके खिलाफ जोन स्तर म कार्रवाई शुरू कर देहे। मुखबिर के सूचना म रेलवे सुरक्षा बलके जवान मन ह छापा मारके अड़तीस झिन दलाल मन ल गिरप्तार करे हे। इंखर करा ले दस लाख रूपिया ले जादा के टिकट जब्त करे हे।
रेलवे सुरक्षा बलके टीम ह नागपुर, गोंदिया, अंबिकापुर रायपुर भिलाई के अलावा मध्यप्रदेश के अनूपपुर शहडोल अउ छिंदवाड़ा समेत कतकोन जगा म छापा मारीन हे।
अउ अब थोरकुन समाचार सार म –
– पच्चीस अक्टूबर के देश म आंशिक रूप ले सूर्यग्रहण रीही। भारत म सूर्यास्त के पहिली ये ग्रहण ह शुरू हो जाही। खगोल विज्ञान केंद्र ह लोगन ले अपील करे हे कि ओमन ह ए सूर्यग्रहण ल खाली आंख ले झन देखय।
– रायगढ़ जिला के प्रगतिशील महिला किसान उर्मिला सिदार ल राष्ट्रीय प्रभाकर केलकर पुरस्कार ले सम्मानित करे गीस। भोपाल म होय एक ठिन समारोह म केंद्रीय कृषि राज्य मंत्री कैलाश चौधरी ह ओमन ल ए सम्मान दीन।
– बिलासपुर कलेक्टर सौरभ कुमार ह आम लोगन मनके अवई जवई के
े सुविधा ल धियान म राखत प्रतिष्ठान अउ कार्यालय ले सौ मीटर के दूरी तक रैली, जुलूस अउ धरना प्रदर्शन म रोक लगा देहे।
– प्रयागराज ले बिलासपुर कोति आज एक यात्री बस रतनपुर के केंदाघाट करा अनियंत्रित होके पेड़ ले टकरा गीस। ये हादसा म चार झिन यात्री मन ल चोट आय हे ।
– बेमेतरा जिला कलेक्टर ह नगर पालिका अउ नगर पंचायत क्षेत्र म माटी के दीया बेचइया मनले कोनो भी प्रकार के पइसा नइ लेके आदेश जारी करे हे।
अउ
– नवा रायपुर के बॉटनीकल गार्डन म राज्य योग आयोग के अध्यक्ष ज्ञानेश शर्मा के उपस्थ्ति म क्रिया योग अउ ध्यान शिविर के आयोजन करे गीस।