प्रधानमंत्री-डिजिटल बैंकिंग
प्रधानमंत्री नरेन्द्र मोदी ह आज पचहत्तर ठिन डिजिटल बैंकिंग इकाई मन ल राष्ट्र ल सौंपीन। देस के हर क्षेत्र म डिजिटल बैंकिंग सहुलियत पहुंचाय के उद्देश्य ले एखर स्थापना करे जात हे। ए मउका म श्री मोदी ह किहीन कि ए बैंकिंग इकाई मन ह डिजिटल सेवा ल सशक्त बनाही। संगे देस ल बैंकिंग के सुघ्घर बुनियादी ढांचा घलो दीहीं। ओमन किहीन कि एखर ले बैंकिंग अउ वित्तीय प्रबंधन म सुधार होही। संगेसंग पारदर्शिता अउ पइसा-कउड़ी संबंधी कामकाज ल बढ़वा मिलही। श्री मोदी ह यहू किहीन कि सरकार ह बैंकिंग सेवा ल तय करे हे कि एहर देसभर म पहुंचे।
ऐति, छत्तीसगढ़ म घलो वीडियो कान्फ्रेंसिंग के जरिया ले प्रधानमंत्री नरेन्द्र मोदी ह दू ठिन जिला महासमुंद अउ बालोद म डिजिटल बैंकिंग यूनिट के उद्घाटन करीन। ए मउका म महासमुंद क्षेत्र के सांसद चुन्नीलाल साहू अउ संसदीय सचिव विनोद सेवनलाल चंद्राकर मौजूद रिहीन। महासमुंद आकांक्षी जिला म सामिल अब ए बैंक मन म सालभर चौबीस घंटा बउरइया मन ल देवा दे जाही।
भारतीय किसान सम्मान सम्मेलन
प्रधानमंत्री नरेन्द्र मोदी ह काली नई दिल्ली म भारतीय कृषि अनुसंधान संस्थान म प्रधानमंत्री किसान सम्मान सम्मेलन के उद्घाटन करही। देशभर ले तेरह हजार ले जादा किसान अउ करीबन डेढ़ हजार कृषि स्टार्टअप म ए सम्मेलन म हिस्सा लीहीं। उहें, एक करोड़ ले जादा किसान वर्चुअल माध्यम ले एमा भाग लीहीं। सम्मेलन म शोधकर्ता, नीति निर्माता अउ एखर ले जुड़े पक्ष मन घलो भाग लीहीं।
केन्द्रीय कृषि मंत्री नरेन्द्र सिंह तोमर ह बतईन कि श्री मोदी ह करीबन छह सौ प्रधानमंत्री किसान समृद्धि केन्द्र के उद्घाटन घलो करही।
मनोज मंडावी-निधन
छत्तीसगढ़ विधानसभा के उपाध्यक्ष अउ भानुप्रतापपुर के विधायक मनोज मंडावी के आज बिहनिया हार्टअटैक ले मउत होगे। आज बिहनिया श्री मंडावी ल सीना म दर्द के सिकायत बाद उनला धमतरी के अस्पताल ले जाय गीस, जिहां डॉक्टर मन उनला मृत घोषित कर दीन। राज्य सरकार ह श्री मंडावी के निधन उपर एक दिन के राजकीय सोक के घोसना करे हे। राजधानी रईपुर अउ कांकेर म आज राजकीय शोक रइही। उंखर अंतिम संस्कार पूरा राजकीय सम्मान के संग चरामा तीर के पैतृक गांव नथिया नवागांव म करे गीस। अंतिम संस्कार कारीकरम म मुख्यमंत्री भूपेश बघेल समेत मंत्रिमंडल के सदस्य, सांसद, विधायक अउ जनप्रतिनिधि बड़ भारी संख्या म उपस्थित रिहीन।
श्री मंडावी के निधन के खबर बाद पूरा प्रदेस म सोक के लहर हे। राज्यपाल अनुसुईया उइके, मुख्यमंत्री भूपेश बघेल, विधानसभा अध्यक्ष डॉक्टर चरणदास महंत, प्रदेस कांग्रेस अध्यक्ष मोहन मरकाम, पूर्व मुख्यमंत्री डॉक्टर रमन सिंह, प्रदेस भाजपा अध्यक्ष अरूण साव, नेता प्रतिपक्ष नारायण चंदेल समेत मंत्रिमंडल के सदस्य मन, सांसद अउ विधायक मन श्री मंडावी के निधन पर दुख व्यक्त करत अपन श्रद्धांजलि दीन हे।
इहां ए बतादन कि श्री मंडावी ह नवा बने छत्तीसगढ़ के गृह राज्यमंत्री अउ विधानसभा के उपाध्यक्ष समेत कई ठिन मुख्य पद म रिहीन अउ प्रदेस के सेवा करीन। श्री मंडावी छत्तीसगढ़ आदिवासी विकास परिषद के अध्यक्ष घलो रिहीन।
राष्ट्रीय मीडिया अवॉर्ड
भारत निर्वाचन आयोग ह राष्ट्रीय मीडिया अवॉर्ड के घोसना कर देहे। एखर बर मीडिया संस्थान मन ले अवइया तीस नवंबर तक नामांकन मंगाय गेहे। अवॉर्ड बर इच्छुक संस्थान मन अपन नामांकन सोझे भारत निर्वाचन आयोग ल तय बेरा म पठो सकत हे।
इहा ए बतादन कि भारत निर्वाचन आयोग डहार ले मतदाता जागरूकता के क्षेत्र म सुघ्घर काम करइया मीडिया संस्थान मन ल चार श्रेणी म बांटे गेहे। एमा प्रिंट मीडिया, इलेक्ट्रॉनिक मीडिया टेलीविजन, इलेक्ट्रॉनिक मीडिया रेडियो अउ ऑनलाइन सोसल मीडिया इंटरनेट ल राखे गेहे।
माओवादी-ग्रामीण हत्या
बीजापुर जिला म आज माओवादी मन ह जनअदालत लगाके दू झिन गांव वाले मनके हत्या कर दीस। हमर संवाददाता ले मिले जानकारी मुताबिक पेद्दाकोरमा निवासी राजू मोडियम अउ पुसनार निवासी दुला कोडमे के हत्या होय हे। जिला के पुलिस अधीक्षक आंजनेय वार्ष्णेय ह बतईन कि घटना के सूचना मिले बाद पुलिस डहार ले जांच होवत हे। फेर, हत्या बारे म कोन्हों सिकईत या रिपोर्ट थाना म दर्ज नइ होय हे।
उहें, इही जिला के तोयनार-मोड़मेर रद्दा म तलाशी अभियान के दउरान सुरक्षा बल के टीम ह पेरमापारा के जंगल तीर कच्चा रद्दा म तीन किलो वाले आईईडी बरामद करे हे, जेला मउकाच म निष्क्रिय कर दे गेहे।
कोंडगांव-कलेक्टर/एसपी
कोंडागांव जिला कलेक्टर दीपक सोनी अउ पुलिस अधीक्षक दिव्यांग पटेल ह मोटरसाइकिल म जिला के माओवाद परभावित क्षेत्र कुधुर पहुंच के भंवरडीह नंदिया म बनत पुलिया के मुआयाना करीन। संगे आश्रित गांव गुमियापाल म इंद्रावती नदी अउ भंवरडीह नदी के संगम जघा के जायजा घलो लीन। ए दउरान कलेक्टर अउ पुलिस अधीक्षक ह गंवई के मनखे मन ले गोठबात कर खेती-किसानी, राजीव गांधी किसान न्याय योजना के पइसा के भुगतान, लइका मनके पढ़ई, आंगनबाड़ी केन्द्र म महतारी अउ नान्हें लइका ल पोषण आहार मिलई बारे म घलोक जानबा लीन।
हमर बेटी-हमर मान
दुरूग जिला के ग्राम पौव्वारा म स्थित शासकीय हायर सेकेंडरी स्कूल म आज पुलिस चौपाल लगाय गीस। ए कारीकरम म पुलिस अनुविभागीय अधिकारी पाटन के देवांश सिंह राठौर ह पढ़ईया लइका मन ल यातायात जागरूकता अउ साइबर अपराध ले बांचे के उपाय बतईन। कारीकरम के सुरूवात म रक्षा टीम प्रभारी संगीता मिश्रा अउ उंखर टीम ह पढ़ईया लइका मन ल महिला सुरक्षा संबंधी अपराध ले बांचे बर अउ कानून म माईलोगिन मन ल मिले सुरक्षा के जानकारी दीन। संगे पुलिस डहार ले बनाय गे मोबाइल बर बनाय गे एप्लीकेशन ‘‘अभिव्यक्ति‘‘ ल सबो पढ़ईया नोनी मनके मोबाइल म डाउनलोड कराय गीस।
आरएसएस-बैठक
राष्ट्रीय स्वयंसेवक संघ के अखिल भारतीय कार्यकारी मंडल के बइठका आज प्रयागराज म सुरू होईस। बैठक के सुभारंभ सर संचालक डॉक्टर मोहन भागवत अउ सर कार्यवाह दत्तात्रेय होसबाले ह करीन। बइठका म संघ के अखिल भारतीय कार्यकारिणी सदस्य, सबो ग्यारह ठिन क्षेत्र अउ पैंतालीस ठिन प्रान्त मनके संघचालक, कार्यवाह, प्रचारक अउ उंखर सह भाग लेवत हे। बइठका म कई ठिन बिसय के संगेसंग सर संघचालक के विजयादशमी के दउरान बोले म अवइया बिसय जनसंख्या असंतुलन, मातृ भासा म पढ़ई-लिखई, सामाजिक समरसता अउ महिला सह भाग उपर चरचा होही। ए बइठका उन्नीस अक्टूबर तक चलही।
एम्स-साइटोनेटिक लैब
अखिल भारतीय आयुर्विज्ञान संस्था-एम्स रईपुर म गर्भस्थ शिशु मन म जेनेटिक अउ क्रोमोसोन संबंधी बीमारी के जांच बर अत्याधुनिक साइटोजेनेटिक लैब स्थापित करे गेहे। ए लैब के मदद ले कई प्रकार के बीमारी के गर्भ म ही पता लगाके इलाज करे जा सकही। लैब के उद्घाटन एम्स के निदेशक प्रोफेसर डॉक्टर नितिन एम. नागरकर ह करीन।
अउ अब थोरकुन समाचार सार म –
– राज्यपाल अनुसईया उइके ह अपन बिलासपुर प्रवास के दूसर दिन काली सत्रह अक्टूबर के छत्तीसगढ़ सर्व आदिवासी समाज डहार ले राखे गे आदिवासी लोक कला महोत्सव म सामिल होही।
– जिला रोजगार अउ स्व-रोजगार मार्गदर्शन केन्द्र डहार ले काली सत्रह अक्टूबर के रईपुर के जुन्ना पुलिस मुख्यालय परिसर म बिहनिया ग्यारह बजे ले मंझनिया दू बजे तक प्लेसमेंट कैम्प राखे जाही।
– मोहला-मानपुर अम्बागढ़ चौकी जिला के डोमीकला बेस कैम्प म पदस्थ आरक्षक वेदराम ह अपन खुदे के सर्विस राइफल ले गोली चलाके आत्महत्या कर लीस। आरक्षक ह बिलासपुर जिला के कोटा के रहइया रिहीस। फिलहाल एखर कारण पता नइ चले हे।
– दुरूग म गंजपारा के चार ठिन दुकान मन म आज बिहनिया शॉर्ट सर्किट ले आगी लग गे। ए आगजनी म करोड़ों रूपिया के नकसान होय के आसंका हे।
अउ
– महाराष्ट्र पुलिस ह करोड़ों रूपिया के जमीनी घोटाला के आरोपी ल दुरूग ले गिरफ्तार करे हे। आरोपी कुलदीप सिंह उपर महाराष्ट्र के पालघर जिला के बसई थाना क्षेत्र जघा म ग्यारह एकड़ जमीन घोटाला के आरोप हे।