ईडी-कार्रवाई
प्रवर्तन निदेशालय-ईडी ह छत्तीसगढ़ म कोयला घोटाला मामला म छापा के बाद धन शोधन निवारण अधिनियम के अंतर्गत बेहिसाब नगदी, सोना अउ बुलियन के रूप म लगभग साढ़े छह करोड़ रूपिया जब्त करे हे। ईडी ह ए जानकारी अपन आधिकारिक ट्वीटर अकाउंट ले साझा करे हे।
बतादन कि रईपुर के विशेष अदालत ह आईएएस अधिकारी समीर बिश्नोई अउ दू अन्य आरोपी मन ल इक्कीस अक्टूबर तक आठ दिन के रिमांड म ईडी ल सौंपे हे।
नेता प्रतिपक्ष-आरोप
छत्तीसगढ़ विधानसभा म नेता प्रतिपक्ष नारायण चंदेल ह किहीन कि प्रदेस म ईडी के छापा अउ उंखर कोति ले जारी प्रेस नोट ह प्रदेस म होवत बड़का भ्रष्टाचार के रैकेट के पोल खोल देहे। श्री चंदेल ह आरोप लगाय हे कि कांग्रेस के सासनकाल म प्रदेस म आदिवासी, किसान अउ आम जनता के मेहनत के पइसा ह भ्रष्टाचार के भेंट चढ़ाय जावत हे। ओमन किहीन कि एक तरफ सरकारी योजना मन बर राज्य सरकार के पास पइसा नइ हे अउ दूसर तरफ सरकारी संरक्षण म भ्रष्टाचार ह अपन सब्बो सीमा ल पार कर देहे।
जेल लोक अदालत
प्रदेस के जिला जेल मन म अब हर सनिच्चर के जेल लोक अदालत के आयोजन करे जाही। रईपुर केन्द्रीय जेल म कैदी मन बर आज राज्य स्तरीय बड़का लोक अदालत के आयोजन करे गीस। जिला विधिक सेवा प्राधिकरण रईपुर डहार ले आयोजित ए जेल लोक अदालत के सुभारंभ छत्तीसगढ़ उच्च न्यायालय के न्यायाधीश न्यायमूर्ति गौतम भादुड़ी ह करीन। श्री भादुड़ी ह जेल लोक अदालत के आयोजन म खुसी जतावत कहिन कि आगू हर सनिच्चर के जेल म अइसनेच लोक अदालत के आयोजन करे जाही।
इहा ए बतादन कि प्रदेस म पहिली पइत निरूद्ध बंदी मनके रिहाई बर अइसन लोक अदालत के आयोजन करे गीस हे।
शिक्षा-राष्ट्रीय पुरस्कार
राष्ट्रीय स्वैच्छिक योजना अउ प्रसासन संस्थान-नीपा नई दिल्ली कोति ले जिला अउ विकासखंड स्तर म स्कूली शिक्षा के क्षेत्र म काम करइया शिक्षा अधिकारी मन बर राष्ट्रीय पुरस्कार के घोसना करे गेहे। ए पुरस्कार स्वैच्छिक गतिविधि मन म नवाचार अउ सुघ्घर अभ्यास उपर दे जाही। ए पुरस्कार बर राज्य स्तर म नामांकन बीस अक्टूबर तक भरे जा सकही।
हाईकोर्ट-एलबी स्थानांतरण
छत्तीसगढ़ उच्च न्यायालय ह सहायक शिक्षक-एलबी के स्थानांतरण म रोक लगा देहे। न्यायालय ह याचिकाकर्ता ल दस दिन म कमेटी के आगू अभ्यावेदन प्रस्तुत करे के निरदेस देहे। कमेटी ह चार हफ्ता म फइसला लीही, तब तक स्थानांतरण आदेश उपर रोक रइही।
अग्निवीर-बैंकिंग सुविधाएं
सेना ह अग्निवीर मन ल बैंकिंग सुविधा दे बर ग्यारह बैंक मन संग समझौता ज्ञापन उपर हस्ताक्षर करे हे। अग्निवीर वेतन पैकेज म दे जाने वाला सुविधा अउ लाभ ह रक्षा वेतन पैकेज के समान हवय। एखर अलावा बैंक मन ह उद्यमशीलता कौशल ल बढ़ावा दे बर सॉफ्ट लोन के पेशकस घलो करे हे। अग्निवीर मनके पहिली बैच जनवरी दू हजार तेईस म सुरू हो जही।
सीआरपीएफ डीजी-सुकमा
छत्तीसगढ़ के पुलिस महानिदेशक अशोक जुनेजा अउ केन्द्रीय रिजर्व पुलिस बल-सीआरपीएफ के महानिदेशक सुजाय लाल थाउसेन ह सुकमा म अधिकारी मनके बइठका लेके माओवाद विरोधी अभियान के समीक्षा करीन। एखर पहिली, श्री जुनेजा अउ श्री थाउसेन ह एलमागुंडा अउ पोटकपल्ली कैम्प म जवान मन ले भेंट करके उंखर समस्या सुनीन।
अंतर्राष्ट्रीय कृषि मड़ई
रईपुर के इंदिरा गांधी कृषि विश्वविद्यालय म पांच दिन के अंतर्राष्ट्रीय कृषि मड़ई-एग्री कार्नीवाल दू हजार बाईस के आयोजन करे जावत हे। छत्तीसगढ़ विधानसभा अध्यक्ष डॉक्टर चरणदास महंत अउ कृषि मंत्री रविन्द्र चौबे ह काली ए मड़ई के सुभारंभ करीन।
ए मउका म डॉक्टर महंत ह किहीन कि कृषि मड़ई म भाग लेवइया देस-विदेस के वैज्ञानिक मनके तकनीकी ज्ञान के फायदा राज्य के किसान मन ल जरूर मिलही। अंतर्राष्ट्रीय स्तर के ए आयोजन राज्य के किसान मन ल नवा तकनीक देहे म मददगार साबित होही।
अंतर्राष्ट्रीय व्यापार मेला
इंडिया ट्रेड प्रमोशन आर्गेनाइजेशन कोति ले नई दिल्ली के प्रगति मैदान म अवइया चौदह ले सत्ताईस नवंबर तक भारत अंतर्राष्ट्रीय व्यापार मेला के आयोजन करे जाही। ए मेला म छत्तीसगढ़ पवेलियन बनाय जाही। छत्तीसगढ़ पवेलियन म राज्य के जम्मों विकास परख काम, उद्योग, निवेश, रोजगार, ग्रामोद्योग, वन, कृषि, पर्यटन अउ उद्यमिता ले जुड़े जानकारी अउ उपलब्धि मनके प्रदर्सन करे जाही। ए साल मेला के थीम – ‘‘वोकल फॉर लोकल, लोकल टू ग्लोबल‘‘ राखे गेहे।
मुख्य सचिव अमिताभ जैन ह मंत्रालय म संबंधित विभाग के अधिकारी मन संग बइठका लेके तैयारी के समीक्षा करीन।
छत्तीसगढ़िया ओलंपिक
छत्तीसगढ़िया ओलंपिक के दूसरइया चरण आज ले सुरू होगे हे। एखर अंतर्गत जोन स्तर म आयोजित आने-आने प्रतियोगिता ह बीस अक्टूबर तक चलही।
बतादन कि छह ठिन चरण म होवइया छत्तीसगढ़िया ओलंपिक के पहलइया चरण ह राजीव युवा मितान क्लब स्तर के रिहीस। छत्तीसगढ़िया ओलंपिक म गिल्ली डंडा, पिट्ठूल, संखली, लंगड़ी दउड़, कबड्डी, खो-खो, रस्साकसी, बांटी, भौंरा, बिल्लस, फुगड़ी, गेड़ी दउड़, लंबी कूद अउ सौ मीटर दउड़ ल सामिल करे गेहे।
यातायात-गूगल मैप
दुरूग जिला म कुम्हारी ले अंजोरा तक राष्ट्रीय राजमार्ग क्रमांक-तिरपन म करीबन अड़तालीस किलोमीटर रद्दा म गूगल मैप के माध्यम ले यातायात व्यवस्था उपर नजर राखे जाही। जिला म यातायात पुलिस कोति ले गूगल के मदद से राष्ट्रीय राजमार्ग उपर ट्रैफिक जाम के स्थिति के पता लगाय जाही। आई.टी.एम.एस. म तैनात कर्मचारी मन ह चौबीसों घंटा राष्ट्रीय राजमार्ग म निगरानी रखही। लाल, नीला अउ संतरा रंग के माध्यम ले जाम के स्थिति के पता लगही। एखर बर आई.टी.एम.एस. कर्मचारी मन ल पुलिस नियंत्रण कक्ष म जानकारी दे गीस।
अउ अब थोरकुन समाचार सार म –
– राष्ट्र आज पूर्व राष्ट्रपति डॉक्टर एपीजे अब्दुल कलाम के जयंती म ओमन ल नमन करत हे। राष्ट्रपति द्रोपदी मुर्मू, उपराष्ट्रपति जगदीप धनखड़ अउ प्रधानमंत्री नरेन्द्र मोदी ह डॉक्टर कलाम के जयंती म ओमन ल श्रद्धांजलि दीन।
– कोंडागांव जिला म माकड़ी के मांझी बोरंड म कबड्डी प्रतियोगिता के दउरान घायल शांति मंडावी के आज रईपुर के एक निजी अस्पताल म इलाज के दउरान मउत होगे। मुख्यमंत्री भूपेश बघेल ह उंखर निधन उपर सोक जतात हुए परिजन मन ल चार लाख रूपिया के आर्थिक सहायता मंजूर करे हे।
– दंतेवाड़ा जिला म आज एक लाख रूपिया के इनामी महिला माओवादी ह पुलिस अधीक्षक के आगू आत्मसमर्पण कर दीस।
– मोहला-मानपुर-अंबागढ़ चौकी जिला के मानपुर थाना क्षेत्र के संबलपुर म माओवादी मन ह एक झिन ग्रामीण के हत्या कर दीन।
अउ
– रायगढ़ जिला के छाल वन परिक्षेत्र के अंतर्गत हाटी सर्किल के कोलिहामुड़ा म एक जंगली हाथी के सव मिले हे। वन विभाग के टीम ह हाथी के मउत के कारण के पता लगाय म जुट गेहे।