महंगाई भत्ता-बढ़ोतरी
राज्य सरकार ह दीवाली के पहिली प्रदेस के अधिकारी-करमचारी मनके महंगाई भत्ता म पांच प्रतिसत के बढ़ोतरी करे हे। ए संबंध म आज वित्त विभाग ह आदेस जारी कर देहे। महंगाई भत्ता के बाढ़े दर इही महीना अक्टूबर ले प्रभावी होही अउ एखर नगद भुगतान एक अक्टूबर ले करे जाही। ए वृद्धि के बाद प्रदेस म सातवां वेतनमान ले वेतन पवइया अधिकारी-करमचारी मन ल तैंतीस प्रतिसत महंगाई भत्ता मिलही। महंभाई भत्ता बाढ़े के ए आदेस यू.जी.सी., ए.आई.सी.टी.ई. अउ आकस्मिकता ले वेतन पइवया करमचारी मन बर घलो लागू होही।
उहें, राज्य सासन ह छठवां वेतनमान ले वेतन पवइया मनके महंगाई भत्ता म बारह प्रतिसत के बढ़ोतरी करे हे। अब ओमन ल दू सौ एक प्रतिसत महंगाई भत्ता मिलही।
अंतर्राष्ट्रीय कृषि मड़ई
रईपुर के इंदिरा गांधी कृषि विश्वविद्यालय म आज ले अंतर्राष्ट्रीय कृषि मड़ई के आयोजन करे जात हे। अट्ठारह अक्टूबर तक चलइया एक मड़ई म पहिली दिन अंतर्राष्ट्रीय अउ राष्ट्रीय स्तर के कृषि संस्थान के निदेशक, कृषि वैज्ञानिक, आने-आने कृषि उत्पाद निर्माता कंपनी के वरिष्ठ अधिकारी, स्टार्टअप उद्यमी अउ बड़का संख्या म प्रगतिशील किसान सामिल होईन।
कृषि मड़ई ‘‘एग्री कार्निवाल‘‘ म आज भविष्य बर पर्याप्त भोजन के उपलब्धता अउ एखर बर अपनाय जाने वाला आधुनिक तकनीक के उपयोग ले फसल के उपज म वृद्धि उपर विचार-विमर्श करे गीस। एमा दस अफ्रीकी देस, साउथ एशियन देस समेत लगभग पन्द्रह देस के कृषि वैज्ञानिक सामिल होईन।
छत्तीसगढ़िया ओलंपिक-दूसरा चरण
छत्तीसगढ़ के पारंपरिक खेल मन ल वैश्विक पहिचान दिलाय के उद्देश्य ले प्रदेस म ए दिन म छत्तीसगढ़िया ओलंपिक के आयोजन करे जात हे। एखर दूसरा चरण काली ले सुरू होही। जोन स्तर म बीस अक्टूबर तक होवइया ए स्पर्धा के दूसरा चरण बर दू हजार सात सौ पच्चीस टीम अउ व्यक्तिगत खेल मन म दू हजार चौरासी प्रतिभागी मनके चयन करे गेहे।
बतादन कि छत्तीसगढ़िया ओलंपिक म गिल्ली डंडा, पिट्ठूल, संखली, लंगड़ी दउड़, कबड्डी, खो-खो अउ रस्साकसी जइसन चौदह ठिन पारंपरिक खेल के मुकाबला होवत हे। छत्तीसगढ़िया ओलंपिक बर छह ठिन स्तर निर्धारित करे गेहे।
राज्यपाल-सैनिक कल्याण
राज्यपाल अनुसुईया उइके के अध्यक्षता म काली राजभवन म सैनिक कल्याण बोर्ड छत्तीसगढ़ के राज्य प्रबंधन समिति के बइठका होईस। बइठका म ग्यारह निर्धारित एजेंडा उपर चरचा करके भूतपूर्व सैनिक मनके हित म महत्वपूर्ण फइसला ले गीस। ए दउरान द्वितीय विश्व युद्ध के पेंशनर मन ल प्रतिमाह दे जाने वाला चिकित्सा सहायता राशि सात हजार ले बढ़ाके दस हजार रूपिया करे के स्वीकृति दे गीस। उहें, भूतपूर्व सैनिक मन ल दे जाने वाला आने-आने सहायता राशि अउ सम्मान राशि म बढ़ोतरी ल घलो मंजूरी दे गीस।
उहें, राज्यपाल ह काली पंडित दीनदयाल उपाध्याय ऑडिटोरियम म राखे गे ग्लोबल ट्राइबल कॉन्क्लेव म घलो सामिल होईन। ए दउरान ओमन आदि फाउंडेशन के पत्रिका के विमोचन करे के संघरा तंजानिया, जिम्बाब्वे समेत देस के प्रदेस के दूसर जगह ले आए कलाकार मन ल सम्मानित करीन।
भूकंप
कोरिया जिला के कुछेक इलाका मन म आज बिहनिया भूकंप के झटका महसूस करे गीस। नेशनल सेंटर फॉर सिस्मोलॉजी के मुताबिक रिक्टर पैमाना म एखर तीव्रता चार दशमलव आठ मापे गेहे। एखर केन्द्र अंबिकापुर ले पैंसठ किलोमीटर दूर अउ जमीन ले दस किलोमीटर अंदर बताय जात हे।
मिले जानकारी अनुसार आज बिहनिया साढ़े पांच बजे कोरिया जिला म बैकुंठपुर ले लगभग सात किलोमीटर दूर गेज बांध-राकया करा भूकंप के झटका महसूस करे गीस। उहें, कटघोरा के राकया क्षेत्र म भूकंप के झटका ले एक किसान के घर के छप्पर गिरे के घलो जानकारी मिले हे। ग्रामीण मन ल लगीस कि माईंस म ब्लास्टिंग के सेती घर के छप्पर गिरे होही। एखर सेती ओमन माईंस के घेराव कर दीन।
बतादन कि कोरिया जिला म पाछु चार महीना के दउरान चार बार भूकंप के झटका आ चुके हे।
आईएएस-रिमांड
रईपुर के बिसेस अदालत ह आईएएस समीर बिश्नोई समेत दूसर आरोपी मन ल आठ दिन के रिमांड म देके फइसला दीन हे। जिला न्यायालय के बिसेस जज अजय कुमार राजपूत के कोर्ट म ईडी के टीम ह बिश्नोई समेत कारोबारी लक्ष्मी तिवारी अउ सुनील अग्रवाल ल पेश करके चौदह दिन के रिमांड मांगे रिहीन। एमा दूसर पक्ष ह ईडी के कार्यवाही म सवाल उठावत विरोध करीन। दूनों पक्ष मन ल सुने के बाद अदालत ह आरोपी मन ल आठ दिन के रिमांड म भेजे के निर्णय सुनईन।
बतादन कि ईडी के टीम ह आईएएस अधिकारी समीर बिश्नोई समेत कारोबारी सुनील अग्रवाल अउ लक्ष्मी तिवारी ल काली गिरफ्तार करके रईपुर कोर्ट म पेस करे रिहीन।
नवीन तहसील कार्यालय
कोरिया जिला के नवा तहसील पोंड़ी-बचरा के आज सुभारंभ होईस। एखर सुभारंभ संसदीय सचिव अउ बैकुंठपुर विधायक अंबिका सिंहदेव ह करीन। कारीकरम म लोक निर्माण अउ जिला के प्रभारी मंत्री ताम्रध्वज साहू घलो वीडियो कान्फ्रेसिंग के माध्यम ले सामिल होईन। नवा तहसील कार्यालय के सुरू होय ले ए क्षेत्र के तैंतीस ग्राम पंचायत के लोगन मन ल राजस्व मामला के निराकरण म सुविधा मिलही। नवा तहसील कार्यालय म एक राजस्व निरीक्षक मंडल अउ पन्द्रह पटवारी हल्का होही।
भाजपा-बैठक
मुंगेली म भारतीय जनता पार्टी अनुसूचित जाति मोर्चा के प्रदेस अध्यक्ष नवीन मार्कंडेय अउ विधायक पुन्नूलाल मोहले ह मोर्चा के जिला कार्यसमिति के बइठका लीन। बइठका म प्रदेस अध्यक्ष श्री मार्कंडेय ह किहीन कि प्रदेस म फेर भाजपा सरकार बनाय बर अनुसूचित जाति मोर्चा पूरा मेहनत करही। ओमन कार्यकर्ता मन ल गांव-गांव अउ घर-घर जाके लोगन मन ले संपर्क करे के संग विद्यार्थी मनके बीच पहुंच के ओमन ल केन्द्र के भाजपा सरकार के जनहितैषी काम के बारे म जानकारी दे बर किहीन।
इही बीच, महासमुंद म भारतीय जनता युवा मोर्चा के कार्यकर्ता मन प्रदेस म कानून व्यवस्था के बिगड़त स्थिति बर राज्य सरकार ल जिम्मेदार ठहरावत बरोंडा चउक म मुख्यमंत्री के पुतला दहन करीन।