मुख्यमंत्री ह कीहिन कि राज्य के आने आने गौठान म ग्रामीण उद्योग परिक्षेत्र लगाये जावत हे। जिहां सबो सुविधा दे जाही । ओमन ह ग्रामीण मनले ए योजना के जादा ले जादा फायदा ले जाय के अनुरोध करीन। अपन प्रवास के दउरान मुख्यमंत्री ह स्थानीय युवा मनले चर्चा करीन अउ उंखर समस्या तथा मांग के जानकारी घलो लीन। बातचीत के दउरान मुख्यमंत्री ह युवा मनले जाति प्रमाणपत्र के बारे म घलो पूछताछ करीन। ओमन ह संबंधित अधिकारी मनले कीहिन कि जाति प्रमाणपत्र के काम म कोनो भी प्रकार के देरी नइ होना चाही।
झलमला के बाद मुख्यमंत्री सहसपुर लोहारा म घलो भेंट-मुलाकात कार्यक्रम के माध्यम ले लोगन ले चर्चा करीन। ए मउका म मुख्यमंत्री ह किसान मनले कीहिन कि ओमन ह गन्ना के खेती जरूर करय। अवइया जनवरी महीना म एथेनॉल के कारखाना लगाए के घलो ओमन ह घोषणा करीन। ए दउरान स्वास्थ्य मंत्री टी.एस. सिंहदेव अउ वनमंत्री मोहम्मद अकबर घलो मौजूद रीहिन।मेधावी छात्र सम्मान
स्वामी आत्मानंद मेधावी छात्र प्रोत्साहन योजना म छत्तीसगढ़ माध्यमिक शिक्षा मंडल के ए बछर के वार्षिक परीक्षा म दसवीं अउ बारहवीं कक्षा के प्राविण्य सूची म जगा लेवइया लइका मन ल सम्मानित करे गीस।
मुख्यमंत्री भूपेश बघेल ह अपन निवास परिसर म राखे गे कार्यक्रम म ये विद्यार्थी मन ल सम्मानित करीन। एमा बारहवीं म पहिली स्थान म अवइया रायगढ़ जिला के कुंती साव ल स्वर्ण पदक अउ दूसर स्थान म अवइया बिलासपुर जिला के खुशबू वाधवानी ल रजत पदक दे गीस। कुंती साव ल स्वर्गीय अंकित सिंह परिहार स्मृति पुरस्कार के रूप म ग्यारा हजार रूपिया के चेक घलो दे गीस।
अइसने दसवीं के प्राविण्य सूची म संयुक्त रूप ले पहिली स्थान म रहइया रायगढ़ के सुमन पटेल अउ कांकेर के सुनाली बाला ल स्वर्ण पदक के संग दूसरा स्थान म अवइया कबीरधाम जिला के पंकज साहू ल रजत पदक दे गीस। समारोह म प्राविण्य सूची म जगा लेवइया कुल एक सौ पच्चीस मेधावी विद्यार्थी मन ल डेढ़-डेढ़ लाख रूपिया के प्रोत्साहन राशि घलो दे गीस। मुख्यमंत्री ह ये राशि ये छात्र-छात्रा मनके बैंक खाता म ऑनलाईन बैंकिंग के माध्यम ले जमा कराइन।
अंतर्राष्ट्रीय कृषि मड़ई
रायपुर के इंदिरा गांधी कृषि विश्वविद्यालय म चौदा ले अठारा अक्टूबर तक अंतर्राष्ट्रीय कृषि मड़ई के आयोजन करे जाही। ए मउका म प्रदर्शनी घलो लगाये जाही, जेमा कृषि के नवा उपकरण के प्रदर्शन करे जाही। ए मड़ई के आयोजन म अंतर्राष्ट्रीय चांवल अनुसंधान संस्थान के संग फिलिपींस संघरा अउ कोनो कोनो देश के संस्था मन सहयोग करत हे।
फोटोयुक्त मतदाता सूची
छत्तीसगढ़ राज्य निर्वाचन आयोग डहार ले पंचायत मनके उप चुनाव बर फोटोयुक्त मतदाता सूची तैयार करे बर कार्यक्रम घोषित करे गेहे। खबर के मुताबिक कांकेर जिला के पंचायत म सरपंच के चार अउ पंच के चौरासी पद म उप चुनाव होना हे।काली ग्यारा अक्टूबर तक प्रत्येक ग्राम पंचायत के प्रारंभिक मतदाता सूची म सम्मिलित वार्ड मनके मउका म मिलान अउ सत्यापन करे जाही। दस नवंबर के मतदाता सूची के अंतिम प्रकाशन करे जाही।
खराब सड़क-पदयात्रा
रायगढ़ जिला म भाजपा डहार ले खराब सड़क संघरा दूसर मुद्दा ल लेके पाछू तीन दिन ले पदयात्रा निकाले गेहे। आज रायगढ़ कलेक्ट्रेट के घेराव संग ए पदयात्रा के समापन होइस।
ए मउका म प्रदेश भाजपा अध्यक्ष अरूण साव अउ पूर्व नेता प्रतिपक्ष धरमलाल कौशिक संघरा दूसर बड़े अधिकारी मन घलो प्रदर्शन म शामिल होइन। बाद म पत्रकार मनले गोठबात म श्री कौशिक ह आरोप लगाइन कि राज्य म अपराध सरलग बाढ़त हे अउ कानून व्यवस्था बनाये राखे म राज्य सरकार नाकाम साबित होवत हे। ओमन ह आदिवासी मनके आरक्षण के प्रतिशत कम होय के मामला म घलो राज्य सरकार के भूमिका उपर सवाल उठाइन।
महेश गागड़ा आरोप
प्रदेश भाजपा के आदिवासी नेता अउ राज्य के पूर्व मंत्री महेश गागड़ा ह कांग्रेस उपर माओवादी मन ल सहयोग करे के आरोप लगाइन हे। रायपुर म एक ठन पत्रकार वार्ता म श्री गागड़ा ह कीहिन कि बीजापुर जिला के भोपालपट्नम विकासखंड म कांग्रेस के एक झन पदाधिकारी ल कथित रूप ले तेलंगाना म दू झन माइलोगिन अउ दू पुरूष माओवादी मनके संग पकड़े गेहे।
ओमन कीहिन हे कि ए कोनो सामान्य घटना नइ हे । श्री गागड़ा ह कांग्रेस अउ माओवादी मनके बीच सांठगाठ होय के आरोप लगावत केंद्र ले प्रदेश के संवेदनशील इलाका म होवइया घटना मनके जांच के मांग घलो करे रीहिन।
आईईडी बरामद
सुकमा जिला म सुरक्षा बल ह माओवादी मनके एक ठन बड़े साजिश ल नाकाम कर देहे। डिप्टी कमांडेंट सौरभ सिंह यादव के अगवई म तलाशी अभियान म निकले कोबरा बटालियन के जवान मन ह एल्मागुण्डा अउ मिनपा के बीच दू जगा लगाए गे विस्फोटक ल बरामद करीन अउ तुरते निष्क्रिय घलो कर दीन।
ओति कांकेर जिला के बड़ेतेवड़ा गांव म माओवादी मन ह टावर के नीचे तीन किलो के विस्फोटक लगाये रीहिन, जेला निष्क्रिय कर दे गीस।
विश्व मानसिक स्वास्थ्य दिवस
आज विश्व मानसिक स्वास्थ्य दिवस हे। मानसिक स्वास्थ्य के बारे म लोगन ल शिक्षित अउ जागरूक करे बर हर बछर दस अक्टूबर के ये दिन ल मनाये जाथे। ए बछर के विषय हे – मानसिक स्वास्थ्य को सभी के कल्याण के लिए विश्व स्तर पर प्राथमिकता देना।
एम्स के निदेशक डॅाक्टर नीतिन एम. नागरकर ह कीहिन कि बाढ़त आत्महत्या अउ आपसी मतभेद के पीछे घलो मानसिक अवसाद एक ठन बड़े कारण हे। ओमन ह कीहिन कि नवा जीवन शैली अउ सोशल मीडिया के ए दौर म हमन ल योग, संगीत अउ व्यक्तित्व विकास के माध्यम ले अपन मानसिक अवसाद ल दूर करे के कोशिश करना चाही।
इही बीच कोंडागांव म घलो विश्व मानसिक स्वास्थ्य दिवस के मउका म आज नुक्कड़ नाटक संघरा दूसर सांस्कृतिक कार्यक्रम कराये गीस।
राष्ट्रीय खेल
गुजरात के गांधीनगर म चलत छत्तीसवां राष्ट्रीय खेल म आज के दिन छत्तीसगढ़ बर शानदार रीहिस। आज कयांकंग म कौशल नंदिनी ठाकुर ह रजत पदक हासिल करीन। एखरे संग छत्तीसगढ़ ल अभी तक ग्यारा पदक मिलगे हवय।
ए सफलता बर खेलमंत्री उमेश पटेल, छत्तीसगढ़ केनोइंग-कयाकिंग संघ के अध्यक्ष बलदेव सिंह भाटिया संघरा दूसर पदाधिकारी मन ह विजेता खिलाड़ी मन ल बधाई अउ शुभकामना दीन हे।
उंहें जयपुर म राखे गे राष्ट्रीय एमेच्योर किक बॉक्सिंग प्रतियोगिता म मुंगेली के खिलाड़ी अभिषेक तिवारी ह स्वर्ण पदक जीत के छत्तीसगढ़ के मान बढ़ाइन हे।
पुलिस अधीक्षक प्रफुल्ल ठाकुर ह बताइन कि ए दुर्घटना म छै झिन दूसर लोगन मन घायल होगिन हे जेमा ले दू झिनके हालत गंभीर बताये जावत हे । ए गाड़ी छुरिया जावत रीहिस।
ओति बालोद जिला म एक ठन यात्री बस के पलटे ले एमा बइठे चौबीस झन घायल होगीन। एमा ले पांच झिन लोगन के हालत गंभीर बताये जावत हे। ए घटना ओतका बखत होइस जब काली रतिहा बालोद जिला के कुरूर के तीर यात्री बस डिवाइडर ले टकरा गीस। बस म छियांलिस झन बइठे रीहिन। ए मन सबो झन धमतरी ले लहुटत रीहिन।