कलेक्टर/एसपी-कॉन्फ्रेंस-01
मुख्यमंत्री भूपेश बघेल ह प्रदेस के छह हजार एक सौ इक्यासी किलोमीटर खराब सड़क मन म जल्द पैचवर्क कर ओला ठीक करे के निरदेस देहे। ओमन किहीन कि दिसंबर दू हजार बाईस तक सड़क मन ल गढ्ढा मुक्त कर दे जाय। रायपुर म आयोजित कलेक्टर-एसपी कॉन्फ्रेंस के दूसरइया दिन आज मुख्यमंत्री ह अलग-अलग विभाग मनके कामकाज के समीक्षा करीन। ग्रामीण अउ पंचायत विभाग के समीक्षा करत हुए श्री बघेल ह किहीन कि खराब सड़क मनके मरम्मत बर प्रत्येक जिला के कलेक्टर मन मॉनिटरिंग करही। ओमन किहीन कि सड़क मनके गुणवत्ता से कोई समझौता नइ होना चाही।
उहें, कृषि विकास अउ किसान कल्याण अउ जैव प्रौद्योगिकी विभाग के समीक्षा के दउरान मुख्यमंत्री ह राज्य म रासायनिक खाद म निर्भरता ल खतम करे अउ जैविक खेती ल प्रोत्साहित करे म जोर देहे। ओमन किहीन कि जैविक खेती ल अलग-अलग पैच म कराय के बजाय कलस्टर म कराय जाना चाही।
मुख्यमंत्री ह ग्रामोद्योग विभाग के समीक्षा के दउरान किहीन कि छत्तीसगढ़ म ग्रामीण अर्थव्यवस्था ल मजबूत करे बर ग्रामीण उत्पाद मन ल प्रोत्सहित करे अउ उनला बाजार मुहैया कराय के जरूरत हे। मुख्यमंत्री ह किहीन कि जेन उत्पाद मनके जादा मांग हे, उंखर उत्पादन बर अधिकारी मन कार्ययोजना तैयार करय।
कलेक्टर/एसपी-कॉन्फ्रेंस-02
मुख्यमंत्री ह राजस्व विभाग के समीक्षा बैठक म किहीन हे कि तीन साल ले एक ही जगह म पदस्थ पटवारी मनके स्थानांतरण करे जाही। श्री बघेल ह राजस्व विभाग के ढीला कामकाज उपर नाराजगी जतईन। ओमन कलेक्टर मन ल राजस्व के कामकाज ल दुरूस्त करे के निरदेस दीन। मुख्यमंत्री ह नामांतरण के लंबित प्रकरण मनके समय-सीमा म निराकरण करे बर घलो किहीन। मुख्यमंत्री ह कलेक्टर अउ कमिश्नर ल नियमित रूप से तहसील कार्य मनके निरीक्षण करे बर किहीन। श्री बघेल ह शहरी क्षेत्र म पट्टा मनके नवीनीकरण शुल्क कम करे के निरदेस दीन। मुख्यमंत्री ह शुल्क के पुनरीक्षण करे बर घलो किहीन। ओमन राजस्व सचिव अउ कोंडागांव कलेक्टर ल जिला म बंदोबस्त सर्वे करे निरदेस दीन। मुख्यमंत्री ह किहीन कि भ्रष्टाचार के सिकायत पाय जाय म सख्त कार्रवाई करे जाही। श्री बघेल ह अतिवृष्टि अउ अल्पवृष्टि से प्रभावित किसान मन ल राहत रासि दिलाय के निरदेस घलो दीन।
मुख्यमंत्री ह कलेक्टर कॉन्फ्रंेंस म राम वनगमन परिपथ म आवासीय व्यवस्था ल कारीकरम म जोड़े के निर्देश दीन। ओमन किहीन कि आवासीय व्यवस्था होय ले पर्यटन ल बढ़ावा मिलही। ओमन पर्यटन स्थल मन म पर्यटक मनके रात्रि विश्राम बर आवश्यक इंतजाम करे बर किहीन। एखर अलावा गंगरेल बांध म आईलैंड ल विकसित करे के निरदेस घलो दीन।
मुख्यमंत्री-प्रतिनिधिमंडल
मुख्यमंत्री भूपेश बघेल ह किहीन कि राज्य सरकार आदिवासी मनके हित अउ उंखर उत्थान बर कृत संकल्पित हे। मुख्यमंत्री ह काली आदिवासी समाज के मंत्री, विधायक अउ सर्व आदिवासी समाज के प्रतिनिधि मन से बत्तीस प्रतिशत अनुसूचित जनजाति आरक्षण के मामला म मुलाकात करीन। ये अवसर म मुख्यमंत्री ह किहीन कि प्रदेस म आरक्षित वर्ग के कोनो प्रकार के नुकसान नइ होवय। ओमन किहीन कि सबले पहिली ये बिसय ल लेके सरकार सर्वोच्च न्यायालय जाही। संगेसंग मंत्रिमंडल के बइठका म ये बिसय उपर चर्चा करे जाही। मुख्यमंत्री ह किहीन कि आदिवासी मनके हित ल ध्यान म राखत हुए ये मामला म जउन भी आवश्यक कदम होही, ओला उठाय जाही।
हाथी-आतंक
धमतरी जिला म ए बखत हाथी मनके आतंक ले किसान रतजगा करत हे। उहें, पाछु संझा हाथी के हमला म एक झिन ग्रामीण के मउत होगे। मिले जानकारी के अनुसार कोहका निवासी ग्रामीण खेती-किसानी के काम से खेत गे रिहीस। इही दउरान अचानक हाथी के हमला म ग्रामीण के मउका म ही मउत होगे।
उहें, वन विभाग के अनुसार एकावरी के आसपास के जंगल मन म हाथी मनके झुंड विचरण करत हे। एखर चलत किसान मन समय से पहिली मक्का फसल के कटाई कर देवत हे। गौरतलब हे कि नगरी ब्लॉक के अंतर्गत अरसीकन्हार, खालगढ़, बोईरगांव, संदबाहरा, मादागिरी, उजरावन, रिसगांव अउ खल्लारी गांव म किसान मक्का के खेती करत हे। इही बीच, वन विभाग के टीम ह खल्लारी क्षेत्र मार्ग ल सील कर देहे। वन परिक्षेत्र रिसगांव रेंज के अधिकारी-कर्मचारी हाथी मनके झुंड उपर नजर राखे हुए हे।
पूर्व उपसरपंच-हत्या
कांकेर जिला के कोयलीबेड़ा ब्लॉक के चारगांव म आज बिहनिया माओवादी मन डहार ले पूर्व उप सरपंच के गोली मार के हत्या करे के मामला सामने आये हे। बताय जात हे कि गोली लगे के बाद घायल पूर्व उप सरपंच सियाराम रामटेके ल जिला अस्पताल म भर्ती कराय गीस, जिहां इलाज के दउरान उंखर मउत होगे।
नारायणपुर-सामान्य ज्ञान
गोंडी भाषा ल संरक्षित करे के उद्देश्य ले नारायणपुर जिला म कोया भाषा म सामान्य ज्ञान प्रतियोगिता के आयोजन करे गीस। एमा प्रदेसभर ले तीन सौ प्रतिभागी मन हिस्सा लीन। प्रदेस म अपन तरह के पहलइया ए प्रतियोगिता म प्रथम पुरस्कार के रूप म दस हजार, द्वितीय पांच हजार अउ तृतीय पुरस्कार के रूप म तीन हजार रूपिया विजेता प्रतिभागी मन ल दे जाही।
राष्ट्रीय खेल
गुजरात के गांधीनगर म चलत छत्तीसवां राष्ट्रीय खेल म छत्तीसगढ़ के खिलाड़ी मनके अच्छा प्रदर्सन जारी हे। इही कड़ी म महिला मलखंब टीम ह कांस्य पदक हासिल करे हे। ए उपलब्धि म मुख्यमंत्री भूपेश बघेल अउ खेल मंत्री उमेश पटेल ह खिलाड़ी मन ल बधाई दीन हे।
राजनांदगांव-खेल कुंभ
राजनांदगांव जिला म अवइया चौदह अक्टूबर ले खेल कुंभ के आयोजन करे जाही। वनबंधु परिसर के एकल अभियान के तहत ये राज्य स्तरीय आयोजन म प्रदेस के अलग-अलग जिला के लगभग छह सौ वनवासी लइका मन सामिल होही। प्रतियोगिता म कुश्ती, कबड्डी, ऊंचीकूद, लंबीकूद अउ दउड़ जइसे स्पर्धा खेले जाही। प्रतियोगिता के समापन सोलह अक्टूबर के होही।
मिलाद-उन-नबी
पैगम्बर हजरत मोहम्मद के जन्मदिन ईद मिलाद-उन-नबी आज धार्मिक आस्था के साथ मनाय जात हे। ये अवसर म पैगम्बर मोहम्मद के जीवन अउ शिक्षण उपर मिलाद महफिल अउ सीरत के आयोजन करे जात हे। राष्ट्रपति द्रोपदी मुर्मू अउ प्रधानमंत्री नरेन्द्र मोदी ह मिलाद-उन-नबी के अवसर म लोगन मन ल बधाई दीन हे।
मिलाद-उन-नबी म राजधानी रईपुर म फजर के नमाज के बाद अलग-अलग मोहल्ला मन से जुलूस निकाले गीस। प्रदेस के अन्य जिला मन म घलो ईद मिलाद-उन-नबी मनाय जाय के समाचार मिले हे।
अउ अब थोरकुन समाचार सार म –
– राज्यपाल अनुसुईया उइके काली दस अक्टूबर के रायगढ़ के ओ.पी. जिंदल विश्वविद्यालय के दीक्षांत समारोह म सामिल होही।
– रेल परिचालन म सुधार सहित अलग-अलग मांग ल लेके नागरिक सुरक्षा मंच डहार ले आगामी बारह अक्टूबर के रेल रोको आंदोलन करे के ऐलान करे गेहे। ए आंदोलन बिलासपुर के कटनी, रायपुर अउ चांपा-रायगढ़ रेल मार्ग म करे जाही।
– सासकीय औद्योगिक प्रशिक्षण संस्थान सड्डू रायपुर म काली दस अक्टूबर के अप्रेंटिसशीप मेला के आयोजन करे जात हे। एखर उद्देश्य स्थानीय रोजगार ल प्रोत्साहित करना आय।
– जिला रोजगार अउ स्व-रोजगार मार्गदर्शन केन्द्र रायपुर डहार ले निजी क्षेत्र म रोजगार के अवसर उपलब्ध कराय बर काली दस अक्टूबर के पुराना पुलिस मुख्यालय म प्लेसमेंट कैम्प के आयोजन करे जाही।
– महासमुंद जिला म राष्ट्रीय राजमार्ग क्रमांक-तिरपन म पटेवा अउ झलप के बीच छिंदौली गांव करा अनियंत्रित वाहन के टक्कर ले मोटर साइकिल सवार दू झन सगे भाई मनके मउत होगे।
अउ
– राजनांदगांव जिला के जालबांधा पुलिस चौकी के अंतर्गत पेटी गांव करा दू ठन मोटर साइकिल के बीच होय टक्कर म एक झिन किशोरी के मउत होगे। उहें, एक अन्य युवक घायल होगे।