छत्तीसगढ़िया ओलंपिक
छत्तीसगढ़ के पारंपरिक खेल मन ल विश्व म पहिचान देवाय के उद्देश्य ले प्रदेस म आज ले छत्तीसगढ़िया ओलंपिक सुरू होईस। मुख्यमंत्री भूपेश बघेल ह राजधानी रईपुर के सरदार बलवीर सिंह जुनेजा इंडोर स्टेडियम म एखर सुरूवात करीन। ए मउका म ओमन किहीन कि छत्तीसगढ़ के संस्कृति, सभ्यता अउ चिन्हारी, इहां के गांव के परंपरा अउ रीति-रीवाज ले हे। एमा पारंपरिक खेल के बिसेस महत्ता हे। श्री बघेल ह किहीन कि प्रदेस म खेल मन ल स्थायी राखे अउ अवइया पीढ़ी ले एखर ले परिचित कराय बर छत्तीसगढ़िया ओलंपिक के सुरूवात करे गेहे। छत्तीसगढ़िया ओलंपिक खेल ले राज्य के हरेक गांव, हरेक ब्लॉक अउ हरेक जिला म स्थानीय खेल मनके आयोजन करे जाही। ए मउका म मुख्यमंत्री ह छत्तीसगढ़िया ओलंपिक खेल के जानकारी देवइया ब्रोसर के घलो विमोचन करीन।
खबर के मुताबिक छत्तीसगढ़िया ओलंपिक म गिल्ली डंडा, पिट्ठूल, लंगड़ी दउड़, कबड्डी, खो-खो, रस्सी खींच जइसन चौदह ठिन पारंपरिक खेल मनके मुकाबला होही। छत्तीसगढ़िया ओलंपिक बर छह स्तर निर्धारित करे गेहे। एमा गांव म सबले पहिली स्तर राजीव युवा मितान क्लब के होही।
किसान न्याय योजना
मुख्यमंत्री भूपेश बघेल ह कहिन हे कि देवारी के पहिली सत्रह अक्टूबर के राज्य के किसान मन ल राजीव गांधी किसान न्याय योजना के तीसरइया किस्त के संग ग्रामीण भूमिहीन कृषि मजदूर न्याय योजना अउ गोधन न्याय योजना के रासि के भुगतान करे जाही। एमा किसान, भूमिहीन कृषि मजदूर अउ गोबर बेचइया मन ल करीबन अट्ठारह सौ करोड़ रूपिया ले जादा के रासि के भुगतान करे जाही। मुख्यमंत्री ह आज रईपुर म गोधन न्याय योजना के हितग्राही मनके खाता म आठ करोड़ तेरह लाख रूपिया के रासि ऑनलाइन जारी करीन। एमा गोबर बेचइया पशुपालक, गौठान समिति अउ महिला स्व-सहायता समूह सामिल हे।
कारीकरम म मुख्यमंत्री ह किहीन कि प्रदेस म किसान मन ले समर्थन मूल्य म एक नवंबर ले धान खरीदी सुरू करे जाही। ओमन अधिकारी मन ल बारदाना समेत धान खरीदी केन्द्र मन म जम्मों जरूरी व्यवस्था करे के निरदेस दीन।
हाईकोर्ट-पीएससी
छत्तीसगढ़ लोक सेवा आयोग-पीएसएसी ह वन सेवा संयुक्त परीक्षा बछर दू हजार बीस बर होवइया साक्षात्कार ल स्थगित कर देहे।
खबर के मुताबिक पीएससी डहार ले छत्तीसगढ़ वन सेवा परीक्षा म दू सौ ग्यारह पद बर बछर दू हजार बीस म परीक्षा ले गे रिहीस। एमा चुने अभ्यर्थी मनके साक्षात्कार अउ दस्तावेज सत्यापन अवइया आठ ले इक्कीस अक्टूबर तक निर्धारित करे जाना रिहीस, जेला आज स्थगित कर दे गीस।
माओवादी-आत्मसमर्पण
दंतेवाड़ा जिला म आज पांच लाख रूपिया के एक इनामी माओवादी ह आत्मसमर्पण कर दीस। ए माओवादी ह पुलिस डीआईजी कमलोचन कश्यप, सीआरपीएफ के डीआईजी विनय कुमार सिंह अउ पुलिस अधीक्षक सिद्धार्थ तिवारी के आगू आत्मसमर्पण करीस। पुलिस के मुताबिक कुर्राम नाम के ए माओवादी मलांगीर एरिया कमेटी सदस्य अउ नीलावाया जनताना सरकार के अध्यक्ष के रूप म सक्रिय रिहीस। एखर उपर हत्या समेत कतकोन माओवादी घटना म सामिल रेहे के आरोप हे।
भारत पेट्रोलियम
भारत पेट्रोलियम कार्पोरेशन लिमिटेड के नवा परिवहन दर ल लेके छत्तीसगढ़ पेट्रोलियम टैंकर ऑनर एसोसिएशन ह अनिश्चितकालीन हड़ताल सुरू कर देहे। खबर हे कि एसोसिएशन ह नवा परिवहन दर ल लेके पन्द्रह दिन पहिली घलो हड़ताल करे रिहीस।
एसोसिएशन के अध्यक्ष विनोद उपाध्याय ह आज रईपुर म पत्रकार मन ले गोठबात करत बतईन कि पेट्रोलियम कार्पोरेशन लिमिटेड के नवा निविदा म परिवहन के दर वर्तमान ले तीस प्रतिसत कम करे ले टैंकर ऑनर ल नुकसान के सामना करना पड़त हे। ओमन किहीन कि अभी तक कंपनी म ढाई सौ टैंकर ले परिवहन होवत रिहीस, जेला नवा निविदा म मात्र एक सौ नौ टैंकर कर दे गेहे। श्री उपाध्याय ह कहिन कि एसोसिएशन डहार ले जल्दीच मुख्यमंत्री ले भेंट करके ओमन ल ज्ञापन सौंपे जाही।
आकर्षि कश्यप-गोल्ड मेडल
गुजरात के गांधीनगर म चलत छत्तीसवां राष्ट्रीय खेल म सानदार प्रदर्सन करत छत्तीसगढ़ के बैडमिंटन खिलाड़ी आकर्षि कश्यप ह स्वर्ण पदक हासिल करे हे। आज फाइनल मुकाबला म आकर्षि के सामना महराष्ट्र के मालविका बंसोड़ ले होईस। चवालीस मिनट के ए खेल म आकर्षि ह मालविका ल इक्कीस-आठ, बाईस-बीस, इक्कीस-तेरह अउ इक्कीस-पन्द्रह ले हराके स्वर्ण पदक अपन नाम करीन।
मुख्यमंत्री भूपेश बघेल अउ खेल मंत्री उमेश पटेल ह आकर्षि कश्यप ल गोल्ड मेडल हासिल करे म बधाई अउ सुभकामना दे हे।
खबर के मुताबिक राष्ट्रीय खेल म छत्तीसगढ़ के खिलाड़ी अब तक सात मेडल जीत चुके हे। एमा दू गोल्ड, तीन सिल्वर अउ दू कांस्य पदक सामिल हवय।
राज्यपाल/मुख्यमंत्री-दशहरा उत्सव
राज्यपाल अनुसुईया उइके ह कहिन हे कि स्त्री अस्मिता के रक्षा ह सही मायने म दशहरा के परब आय। राज्यपाल ह काली भिलाई के रिसाली म दशहरा मैदान म राखे गे रावण दहन कारीकरम म सामिल होईन। ए मउका म ओमन किहीन कि आजे के दिन देवी दुर्गा घलो महिषासुर के वध करके आसुरी शक्ति के नास करे रिहीस। एखर सेती ए दिन असत्य, बुराई अउ अधर्म म सत्य, अच्छाई अउ धर्म के जीत के प्रतीक हे।
उहें, मुख्यमंत्री भूपेश बघेल ह काली रईपुर के डब्ल्यू.आर.एस. कॉलोनी मैदान म राखे गे दशहरा उत्सव म सामिल होईन। ए मउका म ओमन किहीन कि दसरहा के परब ह हमन ल अपन अहंकार अउ बुराई ल खतम करके अच्छाई अउ सत्य के राह म चले के सीख देथे। जब तक समाज म बुराई रिही, तब तक समाज आगू नइ बढ़ पाही।
सट्टा-आरोपी गिरफ्तार
रईपुर पुलिस ह महादेव अउ रेड्डी अन्ना ऑनलाइन सट्टा ऐप मामला म अट्ठाईस आरोपी मन ल अंतर्राज्यीय ऑपरेसन चलाके गिरफ्तार करे हे। पुलिस ह भिलाई अउ दुरूग ले टीम भेजके ए आरोपी मन ल झारसुगुड़ा, टिटलागढ़ अउ छिंदवाड़ा ले गिरफ्तार करे हे। आरोपी मन ले पूछताछ म ए बात आगू आय हे कि इंखर खाता म करोड़ों रूपिया के लेनदेन होय हे। जांच म उत्तरप्रदेश, बिहार अउ मध्यप्रदेश समेत देसभर के पांच सौ ले जादा खाता मनके जानकारी मिले हे। पुलिस ह ए आरोपी मनके तीर ले मिले संतावन एटीएम कार्ड के अकाउंट ले करीब चालीस लाख रूपिया फ्रीज करे हे। उहें, इंखर तीर ले चौबीस लैपटॉप, पचहत्तर मोबाइल, चार राउटर, सिम कार्ड समेत आने-आने जिनीस बरामद करे गेहे।
बस्तर दशहरा
विश्व प्रसिद्ध बस्तर दशहरा के मउका म जगदलपुर म ‘‘बस्तर ता माटा‘‘ कारीकरम के आयोजन करे जावत हे। ए कारीकरम म सामिल जम्मों मांझी, चालकी, नाइक अउ आने-आने सेवाकार मन ल पुलिस डहार ले सम्मानित करे गीस। बस्तर रेंज के पुलिस महानिरीक्षक सुंदरराज पी. ह बतईन कि पाछु तीन बछर ले बस्तर दशहरा के दउरान आयोजित करे जावत ‘‘बस्तर ता माटा‘‘ कारीकरम ले पुलिस अउ वनांचल क्षेत्र के जनता के बीच मजबूत अउ मधुर संबंध बनत हवय। ए मउका म बस्तर क्षेत्र म सांति, सुरक्षा अउ विकास बर बलिदान देवइया जवान अउ लोगन मनके सुरता म वृक्षारोपण करे गीस।
साधु-मारपीट
भिलाई के खुर्सीपार क्षेत्र म लइका चोरी करे के सक म साधु के भेष म घूमत तीन झिन मनखे के स्थानीय लोगन मन ह मारपीट कर दीन। तीनों झिन मनखे मन ल अब्बड़ चोट आय हे। पुलिस अधीक्षक अभिषेक पल्लव ह बतईन कि भिलाई के चारोदा बस्ती म काली तीन झिन मनखे मन साधु के भेष म भीख मांगत रिहीन। इही दउरान लोगन मनके भीड़ ह ए साधु मन ल लइका चोर समझके इंखर पिटाई कर दीन। पुलिस अधीक्षक ह बतइग्न कि ये तीनों मनखे राजस्थान के रहवइया हरय।