बिलासपुर-इंदौर विमान सेवा
बिलासपुर ले इंदौर बर आज ले विमान सेवा सुरू होगे हे। मुख्यमंत्री भूपेश बघेल अउ केन्द्रीय नागरिक उड्डयन मंत्री ज्योतिरादित्य सिंधिया ह बिलासपुर-इंदौर-बिलासपुर विमान सेवा के आज वर्चुअल सुभारंभ करीन। श्री बघेल ह रईपुर स्थित अपन निवास कार्यालय ले अउ श्री सिंधिया ह नई दिल्ली ले हरियर झंडा दिखाके विमान ल बिलासपुर के चकरभांटा स्थित बिलासा देवी केंवट हवाई अड्डा ले रवाना करीन। ए विमान सेवा हफ्ता म चार दिन सोमवार, बुधवार, सुक्रवार अउ इतवार के उड़ान भरही। ए विमान बिहनिया ग्यारह बजके पैंतीस मिनट म बिलासपुर ले रवाना होही अउ मंझनिया एक बजके पच्चीस मिनट म इंदौर पहुंचही। उहें, इंदौर ले ए विमान मंझनिया एक बजके पचपन मिनट म रवाना होके मंझनिया तीन बजके पैंतालीस मिनट म बिलासपुर पहुंचही। आज पचास झिन यात्री मन ल लेके ए विमान ह बिलासपुर ले इंदौरा बर रवाना होईस।
बिलासपुर-इंदौर विमान सेवा के सुभारंभ के मउका म मुख्यमंत्री ह किहीन कि राज्य सरकार ह विमान सेवा के विस्तार बर हरसंभव कोसिस करत हे। मुख्यमंत्री ह केन्द्रीय मंत्री ले रिजनल कनेक्टिविटी योजना के तहत अंबिकापुर ले बिलासपुर अउ रईपुर ल जोड़त तीर-तखार के प्रमुख सहर -वाराणसी, रांची, पटना, भुवनेश्वर बर विमान सेवा जल्दीच सुरू करे के आग्रह करीन।
कारीकरम के पगरइति करत केन्द्रीय मंत्री श्री सिंधिया ह किहीन कि केन्द्र सरकार ह छत्तीसगढ़ म विमान सेवा के विस्तार बर हरसंभव मदद करे बर तैयार हे। ओमन विमान सेवा के सुरू होय म बिलासपुर अउ इंदौर के रहवइया मनल बधाई देवत किहीन कि बिलासपुर अउ इंदौर दूनो सहर के आर्थिक अउ धार्मिक रूप ले बड़ महत्व हवय।
वंदे भारत-ट्रेन
छत्तीसगढ़ ल दू ठिन नवा वंदे भारत ट्रेन के सुविधा जल्दीच मिलही। पहिली ट्रेन बिलासपुर ले संपर्क क्रांति रूट ले होवत दिल्ली जाही। उहें, दूसर ट्रेन गोंदिया ले सुरू होके रईपुर-बिलासपुर होवत झारसुगुड़ा पहुंचही।
खबर के मुताबिक अभी बिलासपुर ले दिल्ली के यात्रा म अट्ठारह घंटा लगत हे। फेर, वंदे भारत ले बिलासपुर ले दिल्ली के सफर करीब चौदह घंटा म पूरा हो सकही। उहें, गोंदिया ले चलइया वंदे भारत ट्रेन रईपुर ले सिरिफ चार घंटा म झारसुगुड़ा पहुंच जही।
निर्वाचन आयोग-मतदाता जंक्शन
निर्वाचन आयोग ह आज ले आकाशवाणी म बछरभर चलइया मतदाता जागरूकता कारीकरम ‘‘मतदाता जंक्शन‘‘ के सुभारंभ करीन। ए कारीकरम म बावन कड़ी होही अउ हरेक के बेरा पन्द्रह मिनट रिहीन। ए कारीकरम हरेक सुक्रवार के विविध भारती, एफ.एम. रेनबो, एफ.एम. गोल्ड अउ आकाशवाणी के प्राइमरी चैनल म प्रसारित करे जाही। देसभर के तेईस भासा म ए कारीकरम के ेप्रसारण होही।
मुख्य निर्वाचन आयुक्त राजीव कुमार ह आज नई दिल्ली म निर्वाचन आयुक्त अनूप चंद्र पांडे अउ प्रसार भारती के मुख्य कार्यकारी अधिकारी मयंक कुमार अग्रवाल के मौजूदगी म ए कारीकरम के सुभारंभ करीन। ए साप्ताहिक कारीकरम म मतदाता मन ले जुड़े जम्मों पहलु के जानकारी सामिल करे जाही। एखर उद्देश्य मतदान बर पात्र जम्मों लोगन मन ल प्रोत्साहित करना हे। कारीकरम के पहिली कड़ी सात अक्टूबर के प्रसारित करे जाही।
कोविड टीका
छत्तीसगढ़ म कोरोना टीकाकरण के आंकड़ा पांच करोड़ के पार पहुंच गेहे। कोरोना संक्रमण ले बचाव बर प्रदेस म अब तक पांच करोड़ दस हजार ले जादा टीका लगाय गेहे। एमा ले दू करोड़ चौबीस लाख उनचास हजार ले जादा टीका पहिली डोज के रूप म, दू करोड़ दू लाख पैंसठ हजार ले जादा दूसर डोज के रूप म अउ बहत्तर लाख पंचानवे हजार ले जादा टीका प्रिकॉशन डोज के रूप लगाय गेहे।
प्रधानमंत्री छात्रवृत्ति योजना
प्रधानमंत्री छात्रवृत्ति योजना बर ऑनलाइन आवेदन के आखिरी तारीख तीस नवंबर हवय। खबर के मुताबिक ए योजना म हरेक बछर देसभर के पचपन सौ लइका मन ल छात्रवृत्ति दे जाथे। एमा पूर्व सैनिक अउ विधवा मनके बेटा-बेटी ल घलो ए छात्रवृत्ति दे जाथे।
राज्यपाल-राष्ट्रीय संगोष्ठी
राज्यपाल अनुसुईया उइके ह अपन वर्धा प्रवास के दउरान आज महात्मा गांधी अंतर्राष्ट्रीय हिन्दी विश्वविद्यालय डहार ले राखे गे राष्ट्रीय संगोष्ठी म सामिल होईन। अपन संबोधन म राज्यपाल ह किहीन कि संगोष्ठी के बिसय स्वराज्य, सुराज्य अउ स्वबोध के गांधी मार्ग प्रासंगिक हवय अउ गांधीजी के पूरा जीवन ल चरितार्थ करथे। ओमन किहीन कि वर्धा हमर राष्ट्रपिता महात्मा गांधी के कर्मभूमि हवय अउ ए पवित्र भूमि ले गांधजी ह भारत के नव-निर्माण के सपना देखे रिहीन।
ए मउका म राज्यपाल ह हिन्दी पखवाड़ा म राखे गे आने-आने प्रतियोगिता के विजेता मन ल इनाम दीन।
नेता प्रतिपक्ष-गौठान निरीक्षण
छत्तीसगढ़ विधानसभा म नेता प्रतिपक्ष नारायण चंदेल ह जांजगीर-चांपा के भैंसों गांव के गौठान के निरीक्षण करीन। ओमन आरोप लगईन कि ए गौठान म पाछु एक महीना म नब्बे गाय मनके मउत होय हे। उहें, गौठान ले बारह गाय के कंकाल घलो मिले हे। श्री चंदेल ह राज्य सरकार उपर आरोप लगावत किहीन कि गौठान म गाय मनके देखरेख बर चारा-पानी समेत उचित बेवस्था नइ करे गेहे। श्री चंदेल ह गौ-सेवा आयोग के अध्यक्ष अउ शाकंभरी बोर्ड के अध्यक्ष रामकुमार पटेल के गांव म बनाय गे गौठान म होय गाय मनके मउत के मामला उठावत किहीन कि ए मामला के उच्च स्तरीय जांच करे जाय।
महाअष्टमी-दशहरा
छत्तीसगढ़ समेत देसभर म आज दुर्गाष्टमी के परब भक्ति भाव के संग मनाय जावत हे। आज के दिन महागौरी के रूप म सक्ति के उपासना करे जाथे। राजधानी रईपुर समेत प्रदेस के आने-आने शक्तिपीठ अउ मंदिर मन म आज हवन-पूजा होवत हे। मंदिर अउ दुर्गा पंडाल के संगेसंग उपास रखइया भक्त मन ह कन्याभोज करावत हे।
मुख्यमंत्री भूपेश बघेल ह प्रदेस के लोगन मन ल अष्टमी के बधाई अउ सुभकामना दे हवय।
बस्तर दशहरा
पचहत्तर दिन तक चलइया विश्व प्रसिद्ध बस्तर दशहरा परब के तहत पांच दिवसीय रथ परिक्रमा काली सिरईस। रथ परिक्रमा के दउरान ए रथ ल हरेक दिन संध्याकाल म जगदलपुर सहर के सिरहासार भवन ले गोलबाजार होवत दंतेश्वरी माई के मंदिर तक ले जाय जाथे। रथ परिक्रमा के पहिली परंपरा के मुताबिक बस्तर पुलिस डहार ले मां दंतेश्वरी के सम्मान म सलामी दे जाथे।
खबर के मुताबिक पाछु दू बछर ले ए सलामी महिला पुलिस बल अउ महिला पुलिस बैंड डहार ले दे जावत हे।
सुकमा-ग्रामीण मौत
सुकमा जिला म कांकेरलंका के रंगईगुड़ा गांव म पाछु दू दिन म चार झिन गांव वाले के अज्ञात बीमारी ले मउत होगे हे। बताय जावत हे कि मउत होय म दू झिन के उमर करीबन सत्तर बछर रिहीस। उहें, दू झिन युवक मनके घलो मउत होय हे। ए युवक मनके हाथ-पांव म सूजन के सिकायत होय के बाद ओमन ल अस्पताल म भर्ती कराय गे रिहीस, जिहां ए युवक मनके हालत अउ बिगड़ गीस।
जिला कलेक्टर हरीश एस. ह ए मामला ल गंभीरता लेवत गांव म डॉक्टर मन ल जांच बर भेजे के निरदेस दे हे।
अउ अब थोरकुन समाचार सार म –
– राज्य सरकार ह बड़ पैमाना म उद्योग अउ सहकारिता विभाग के अधिकारी मनके तबादला के सूची जारी कर देहे।
– स्वास्थ्य विभाग ह रईपुर, धमतरी, गरियाबंद अउ दंतेवाड़ा समेत छब्बीस जिला के मुख्य चिकित्सा अउ स्वास्थ्य अधिकारी के तबादला कर दे गेहे।
– मुंगेली जिला के लोरमी पुलिस ह फटफटी ले गांजा के तस्करी करत दू झिन आरोपी ल गिरफ्तार करे हे। इंखर तीर ले पचास हजार रूपिया के करीबन छह किलो गांजा बरामद करे गेहे।
– दुरूग पुलिस ह भारत-साउथ अफ्रीका के बीच काली होय क्रिकेट मैच म सट्टा खेले के आरोप म नौ ऑपरेटर मन ल गिरफ्तार करे हे।
अउ
– गुजरात के गांधीनगर म राखे गे छत्तीसवां राष्ट्रीय खेल म छत्तीसगढ़ के खिलाड़ी मन ह तलवारबाजी म रजत पदक हासिल करे हे।