ए मउका म ओमन कीहिन कि राज्य के ग्रामीण क्षेत्र के चुने गे गौठान ल आजीविका केंद्र के रूप म विकसित करे बर उंहा महात्मा गांधी रूरल इंडस्ट्रीयल पार्क बनाये जात हे। प्रदेश के हरएक विकासखंड म दू रूरल इंडस्ट्रीयल पार्क बनाये जाही। चालू वित्तीय बछर के बजट म एखर बर छै सौ करोड़ रूपिया के प्रावधान राखे गेहे। श्री बघेल ह कीहिन कि पहिली चरण म तीन सौ रूरल इंडस्ट्रीयल पार्क विकसित करे जात हे। गौठान मन म वर्मी कम्पोस्ट, मुर्गी पालन, बकरी पालन, कृषि उत्पाद अउ वनोपज प्रसंस्करण के काम करे जात हे। एमा स्व सहायता समूह के माइलोगन अउ युवा मन ल रोजगार के मउका मिलत हे।
ये मउका म मुख्यमंत्री ह महात्मा गांधी रूरल इंडस्ट्रीयल पार्क योजना-रिपा के लोगो के विमोचन करीन। संगेसंग रायपुर के शहीद स्मारक भवन म संस्कृति अउ पुरातत्व विभाग कोति ले गांधी, युवा अउ नये भारत की चुनौतिया विसय म राखे गे कार्यक्रम म सामिल होइन । ओमन ये बेरा म वाटर रिचार्जिंग के क्षेत्र म बने काम करइया लोगन अउ संस्था ल अनुपम मिश्र पुरस्कार देके संगेसंग प्रसिद्ध रंगकर्मी हबीब तनवीर के नाव म घलो पुरस्कार देके घोषणा करीन। उंहे आशीष सिंह कोति ले लिखे किताब सोनाखान अठारा सौ संतावन अउ आमीर हाशमी के लिखे किताब जोहार गांधी के विमोचन घलो करीन।
गांधी/शास्त्री जयंती-02
उंहें विधानसभा के केंद्रीय कक्ष म विधानसभा अध्यक्ष डॅाक्टर चरणदास महंत ह गांधी जी अउ शास्त्री जी के तैलचित्र म फूलमाला चढ़ाके श्रद्धांजलि दीन। ये मउका म गांधी जी के प्रसिद्ध भजन गाये गीस।
इही बीच खादी अउ ग्राम उद्योग बोर्ड गांधी भवन अउ केयूर भूषण स्मृति परिसर कंकाली पारा म राखे गे दू दिवसीय निबंध क्विज अउ भाषण प्रतियोगिता के समापन होइस। ए बेरा म खादी अउ ग्रामोद्योग बोर्ड के अध्यक्ष राजेंद्र तिवारीह कीहिन हे कि गांधी जी के जतका जरूरत आजादी के पहिली रहिस हे वोतके आज घलो हे। उंखर विचारधारा अउ सिद्धांत ल आगू बढ़ाय बर प्रतियोगिता राखे जात हे।
ओति रायपुर के महापौर एजाज ढेबर ह शास्त्री बाजार म नागरिक मन ल कपड़ा के थैली बांटे गीस अउ पॉलीथिन झन बउरौ कहिके अपील करे गीस।
स्वच्छता पुरस्कार
छत्तीसगढ़ ह स्वच्छ सर्वेक्षण ग्रामीण म चार राष्ट्रीय पुरस्कार पाय हे। टॉप परफॉरमिंग राज्य के रूप म छत्तीसगढ़ ह ईस्ट जोन म बाजी मारे हे। एखर संगेसंग तीन आने केटेगरी म राष्ट्रीय पुरस्कार मिले हे। गांधी जयंती म नई दिल्ली के विज्ञान भवन म राखे गे स्वच्छ भारत दिवस कार्यक्रम म राष्ट्रपति द्रौपदी मुर्मू ह छत्तीसगढ़ ल इनाम दीन।
केंद्रीय पेयजल अउ स्वच्छता विभाग जलशक्ति मंत्रालय कोति ले स्वच्छ भारत मिशन ग्रामीण सर्वेक्षण म छत्तीसगढ़ के बने प्रदर्शन करइया जिला म हर दूसर अउ तीसर स्थान पाय हे। संगेसंग ओडीएफ प्लस म दिवार लेखन प्रतियोगिता म सेंट्रल जोन म छत्तीसगढ़ ह तीसर जगा बनाय हे।
आयुष्मान पखवाड़ा
आयुष्मान पखवाड़ा म आज गांधी जयंती के मउका म राज्य के सबो जिला म एके संगरा सायकिल रैली निकाले गीस। ये रैली म उच्चतर माध्यमिक स्कूल म पढ़इया विद्यार्थी सामिल होइन। रैली ले आयुष्मान भारत प्रधानमंत्री जन आरोग्य योजना, डॅाक्टर खूबचंद बघेल स्वास्थ्य सहायता योजना अउ मुख्यमंत्री विशेष स्वास्थ्य सहायता योजना के जानकारी दे गीस। संगेसंग लोगन ल आयुष्मान कार्ड पंजीयन कराय बर केहे गीस।
खबर के मुताबिक राष्ट्रीय स्वास्थ्य प्राधिकरण के निर्देश म देश के सबो राज्य म आयुष्मान पखवाड़ा मनाये जात हे। अइसने छत्तीसगढ़ म घलो तेइस सितंबर ले आयुष्मान पखवाड़ा मनाये जात हे, जउन सात अक्टूबर तक चलही।
एमओयू हस्ताक्षर
राज्य के तकनीकी संस्थान ल टेक्नॉलाजिकल हब के रूप म विकसित करे, कृषि अनुसंधान केंद्र अउ नवाचार ल अपग्रेड करे बर काली रायपुर म मुख्यमंत्री निवास म राज्य योजना आयोग अउ टाटा टेक्नॉलाजी पुणे के बीच एमओयू म दस्तखत करे गीस। ये मउका म मुख्यमंत्री भूपेश बघेल ह कीहिन कि भविष्य म प्रौद्योगिकी उपर आधारित अर्थव्यवस्था के बढ़वार के संभावना हे।
अइसन म जरूरी हवय कि युवा मन ल आधुनिक तकनीक ले तियार करे जाय जेखर ले ओमन रोजगार अउ स्व रोजगार बर तियार हो सकय। श्री बघेल ह कीहिन कि टाटा टेक्नॉलाजी संग एमओयू ले छत्तीसगढ़ क औद्योगिक विकास म तेजी आही।
उंहें राज्य योजना आयोग के उपाध्यक्ष अजय सिंह ह बताइन कि टाटा टेक्नॉलाजी कोति ले अवइया तीन बछर तक राज्य योजना आयोग के मदद ले शैक्षणिक अउ तकनीकी संस्थान ल अपन सेवा दीही।
छात्रा नासा चयन
महासमुंद जिला नयापारा के स्वामी आत्मानंद शासकीय अंग्रेजी माध्यम स्कूल के कक्षा ग्यारहवीं के छात्रा रितिका ध्रुव के चयन नासा के सीटीजन साइंस प्रोजेक्ट म क्षुद्र ग्रह खोज अभियान बर होय हे।
नासा के ये प्रोजेक्ट इसरो संग अंतर्राष्ट्रीय खगोलीय खोज सहयोग कार्यक्रम म साझेदारी के हिस्सा हवय। ये प्रोजेक्ट बर देशभर ले छै झिन स्कूल म पढ़ईया लईका मन ल चुने गेहे। एमा छत्तीसगढ़ के सिरपुर के रहवइया रितिका ध्रुव सामिल हे। रितिका सतीस धवन स्पेस सेंटर श्रीहरिकोटा आंध्रप्रदेश म प्रशिक्षण लेवत हे। अवइया चरण म वो ह नवंबर म बैंगलुरू इसरो म राखे गे क्षुद्र ग्रह प्रशिक्षण शिविर म भाग लीही।
मुख्यमंत्री भूपेश बघेल अउ स्कूल शिक्षा मंत्री डॅाक्टर प्रेमसाय सिंह टेकाम ह ये उपलब्धि खातिर रितिका ध्रुव ल बधाई अउ शुभकामना दीन हे।
साव समारोह
प्रदेश भाजपा अध्यक्ष अरूण साव ह काली मुंगेली जिला म सेतगंगा मंडल के गांव टेढ़ाधौरा म राखे गे स्वागत समारोह म सामिल होइन । ये बेरा म ओमन क्षेत्र के विकास बर सांसद मद ले बारा लाख रूपिया देके घोषणा करीन। ओमन कीहिन कि भारतीय जनता पार्टी के एक-एक कार्यकर्ता उपर नजर रहिथे अउ उंखर क्षमता के मुताबिक जिम्मेवारी सांपे दे जाथे ।
श्री साव ह कीहिन कि भाजपा ही एकमात्र पार्टी हे जेमा छोटे ले छोटे कार्यकर्ता घलो प्रदेश अध्यक्ष के पद म पहुंच सकथे। कार्यक्रम म क्षेत्रीय विधायक पुन्नूलाल मोहिले घलो सामिल होइन।
रोड सेफ्टी क्रिकेट मैच
राजधानी रायपुर के शहीद वीर नारायण सिंह अंतर्राष्ट्रीय क्रिकेट स्टेडियम म खेले गे रोड सेफ्टी वर्ल्ड सीरीज के फाइनल मुकाबला म काली इंडिया लीजेंडस ह श्रीलंका लीजेंडस ल टॉस्क जीतके पहिली बल्लेबाजी करत तय बीस ओवर म छै विकेट के नकसान म एक सौ पंच्यानबे रन बनाइन। नमन ओझा ह शानदार शतक बनात एक सौ आठ रन के नाबाद पारी खेलीस। जुआब म श्रीलंका लीजेंडस अठारा ओवर अउ पांच गेंद म सिरिफ एक सौ बासठ रन बना सकीस।
मुख्यमंत्री भूपेश बघेल पुरस्कार समारोह म संघरीन। ओमन विजेता इंडिया लीजेंडस के कप्तान सचिन तेंदुलकर ल रोड सेफ्टी वर्ल्ड सीरीज दू हजार बाईस के ट्रॉफी दीन।
अउ अब पेस हे मौसम के हाल –
अउ अब थोरकुन समाचार सार म –
– राजनांदगांव जिला के चिचोला पुलिस ह ब्राउन शुगर तस्करी करे के आरोप म तीन झन ल गिरप्तार करे हे। तीनो आरोपी दुर्ग, भिलाई के रहवइया हरय। उंखर तीर ले उन्नीस ग्राम ब्राउन शुगर बरामद करे गेहे। जेखर कीमत करीबन दू लाख रूपिया बताय जात हे।
अउ
– इंदिरा कला संगीत विश्वविद्यालय खैरागढ़ अउ शासकीय शिवनाथ साइंस कालेज राजनांदगांव के बीच एक समझौता होय हे, जेमा दूनो संस्थान अपन संसाधन ल शैक्षणिक गतिविधि म साझा करही।