खबर के मुताबिक छत्तीसगढ़ पंचायती राज अधिनियम म ग्रामसभा के हरेक तीन महीना म कम से कम एक सम्मेलन राखे के प्रावधान हरय। राज्य सासन के निरदेस के मुताबिक तेईस जनवरी, चौदह अप्रैल, बीस अगस्त अउ दू अक्टूबर के संगेसंग हरेक बछर जून अउ नवंबर महीना म सुभीता के मुताबिक तारीख म हरेक गांव म ग्रामसभा के आयोजन होना जरूरी हे।
ओति, गांधी जयंती के मउका म दू अक्टूबर के सर्व आदिवासी समाज कोति ले राजधानी रईपुर म ‘‘रायपुर चलो गसी‘‘ कारीकरम राखे जाही। एमा ग्राम सभा के महासम्मेलन अउ ग्राम स्वराज रैली निकलही।
स्वच्छता पुरस्कार
राष्ट्रपति द्रौपदी मुर्मू काली नई दिल्ली म – आजादी एट द रेट पचहत्तर- स्वच्छ सर्वेक्षण दू हजार बाईस म सबले साफ सुथरा राज्य अउ शहर ल इनाम दीही। ये पुरस्कार कचरा मुक्त शहर ल लेके स्वच्छ भारत शहरी अभियान के दूसर वर्षगांठ म दे जाही। समारोह म आने-आने श्रेणी म एक सौ साठ ले जादा पुरस्कार मिलही।
अंतर्राष्ट्रीय वृद्ध जनदिवस
काली अंतर्राष्ट्रीय वृद्ध जनदिवस हरय। ये बेरा म मुख्यमंत्री भूपेश बघेल ह सियान मन बर आपातकालिन स्थिति म मदद करे खातिर सियान हेल्पलाइन शुरू करे के घोषणा करीन । ये हेल्पलाइन राज्य स्थापना दिवस एक नवंबर ले शुरू करे जाही।
उंहे समाज कल्याण विभाग कोति ले रायपुर के सरदार बलवीर सिंह जुनेजा इंडोर स्टेडियम म राज्य स्तरीय समारोह राखे जाही। समारोह म समाज कल्याण मंत्री अनिला भेडिया जन प्रतिनिधि समेत आने-आने जिला ले आये वरिष्ठ नागरिक संघरही। ये मउका म वरिष्ठ नागरिक मनके सम्मान करे बर कतकोन कार्यक्रम होही।
भेंट-मुलाकात
राज्य सरकार कोति ले राजीव गांधी किसान न्याय योजना के तीसर किस्त किसान मन ल देवारी तिहार के पहिली 17 अक्टूबर के दे जाही । ये बात मुख्यमंत्री भूपेश बघेल ह भेंट-मुलाकात कार्यक्रम म कबीरधाम जिला के पंडरिया विधानसभा क्षेत्र के ग्राम इंदौरी म सभा म बोलत कीहिन।
ये बेरा म मुख्यमंत्री ह इंदौरी के उप स्वास्थ्य केंद्र ल प्राथमिक स्वास्थ्य केंद्र के रूप म बढ़वार करे अउ मरका म जिला सहकारी बैंक के शाखा खोले के घोषणा करीन। संगेसंग धौराबंद-खैरा, खरबना-राम्हेपुर अउ कोहड़िया-सूरजपुर-हरदी के बीच रद्दा बनाये के बात कीहिन एखर संगेसंग मुख्यमंत्री ह सहसपुर-लोहारा के रणवीरपुर म पुलिस चौकी बनाये अउ झलमला-धोथेवाड़ा के बीच संकरी नंदिया म पुल बनाय के घोषणा करीन।
श्रमिक-मजदूरी
राज्य सरकार ह औद्योगिक श्रमिक मनके महंगाई भत्ता म हरेक महीना एक सौ साठ रूपिया अउ कृषि मजदूर मनके महंगाई भत्ता म एक सौ पचास रूपिया के बढ़वार करे गेहे। अइसने, अगरबत्ती बनइया श्रमिक मन ल एक हजार अगरबत्ती बनाय म चालीस पइसा अउ बीड़ी श्रमिक मन ल एक हजार बीड़ी बनाय म चार रूपिया पच्चीस पइसा अलग ले मिलही। ए दर काली एक अक्टूबर ले अवइया बछर इकतीस मार्च तक बर तय करे गेहे। एखर संगेसंग कुशल, अकुशल, अर्द्धकुशल श्रमिक मन बर नवा दर तय करे गेहे।
हवाई सेवा
अवइया तीन अक्टूबर ले बिलासपुर ले इंदौर बर सोझे विमान सेवा सुरू होवत हे। एलायंस एयर कंपनी कोति ले चलाय जात ए विमान सेवा हफ्ता म चार दिन सोमवार, बुधवार, सुक्रवार अउ सनिचर के उड़ान भरही। ए ह बिलासपुर, जबलपुर, इंदौर अउ ग्लावियर बर कनेक्टिंग फ्लाइट हवय। बिलासपुर एयरपोर्ट प्रबंधन के मुताबिक बिलासपुर के बिलासा बाई केवटिन एयरपोर्ट ले इंदौर बर विमान बिहनिया ग्यारह बजके पैंतीस मिनट म उड़ान भरही अउ मंझनिया एक बजके पच्चीस मिनट म इंदौर पहुंचही। अइसने, इंदौर ले ए विमान मंझनिया एक बजके पचपन मिनट म उड़ान भरही, जउन मंझनिया तीन बजके पैंतालीस मिनट म बिलासपुर पहुंचही।
खबर के मुताबिक अभी बिलासपुर ले जबलपुर प्रयागराज दिल्ली अउ भोपाल बर विमान सेवा चलत हे।
नियमितीकरण आवेदन
राज्य सरकार के निर्देश म आवासीय, शैक्षणिक, व्यावसायिक, गैर व्यावसायिक अउ औद्योगिक के अनियमित निर्माण के नियमितीकरण बर अर्जी मंगाय जात हे।
खबर के मुताबिक चौदा जुलाई के छत्तीसगढ़ अनाधिकृत विकास के नियमितीकरण संशोधन अधिनियम दू हजार बाईस लागू करे गीस। ये तारीख ले पहिली बने जम्मों किसम के विकास के नियमितीकरण बर अर्जी चौदा जुलाई दू हजार तेइस तक नगरीय निकाय अउ जिला म नगर अउ ग्राम निवेश के कार्यालय म दे जा सकथे।
राष्ट्रीय कार्यशाला
राष्ट्रीय जलवायु परिवर्तन अउ मानव स्वास्थ्य कार्यक्रम म राजधानी रायपुर म दू दिन के राष्ट्रीय कार्यशाला राखे गीस। स्वास्थ्य विभाग के मदद ले विश्व स्वास्थ्य संगठन कोति ले राखे गे ये कार्यशाला म वायु प्रदूषण के बाढ़त खतरा अउ एखर सेती लोगन के स्वास्थ्य म होवत दुष्प्रभाव उपर गोठबात करे गीस। संगेसंग एखर ले बांचे के उपाय घलो बताय गीस। कार्यशाला के पहिली दिन सबो भाग लेवइया मन ल वायु प्रदूषण ले स्वास्थ्य म होवइया दुष्प्रभाव के अध्ययन बर एम्स अउ जिला चिकित्सालय दिखाय गीस।
अउ अब थोरकुन समाचार सार म –
– केंद्रीय संचार ब्यूरो रायपुर के प्रादेशिक कार्यालय कोति ले डोंगरगढ़ मां बम्लेश्वरी मंदिर परिसर म लगाये गे मल्टीमीडिया चित्र प्रदर्शनी के आज समापन होइस। ये प्रदर्शनी सेवा सुशासन अउ गरीब कल्याण के आठ साल ये विसय म आयोजित करे गीस।
– उद्योग मंत्री कवासी लखमा ह काली सुकमा जिला के कोंटा विकासखंड के गांव चिंतलपुर म कन्या आश्रम बर दू करोड़ रूपिया, सामुदायिक भवन बर बीस लाख रूपिया अउ दुर्गा समिति भवन बर छै लाख रूपिया देके घोषणा करीन।
– भारतीय वनसेवा के उन्नीस सौ सत्यासी बैच के अधिकारी संजय शुक्ला ल प्रधान मुख्य वन संरक्षक बनाय गेहे। राज्य शासन कोति ले ये संबंध म आदेश जारी कर दे गेहे।
अउ
– छत्तीसगढ़ माध्यमिक शिक्षा मंडल कोति ले राखे गे हाइस्कूल अउ हायर सेकण्डरी पूरक परीक्षा के पुनर्गणना अउ पुनर्मूल्यांकन के नतीजा घोषित कर दे गेहे। परिणाम मंडल के वेबसाइट डब्लू डब्लू डब्लू डॅाट सीजीबीएसई डॅाट एनआईसी डॅाट इन म देख सकत हे।