आज दिनभर के खबर ल अपन गुरतुर छत्तीसगढ़ी भाखा म पढ़व

केन्द्रीय मंत्रिमंडल-फैसला

केन्द्रीय मंत्रिमंडल ह प्रधानमंत्री गरीब कल्याण अन्न योजना ल ए बछर अक्टूबर ले दिसंबर तक, अउ तीन महीना बर बढ़ाय के मंजूरी दे दीन हे। केन्द्रीय सूचना अउ प्रसारण मंत्री अनुराग ठाकुर ह बतईन कि एमा अवइया तीन महीना म चवालीस हजार सात सौ बैसठ करोड़ रूपिया खरचा करे जाही। ओमन किहीन कि सरकार ह अब तक ए योजना म करीबन तीन लाख पैंतालीस हजार करोड़ रूपिया खरचा कर चुके हे। श्री ठाकुर ह बतईन कि कि देसभर म ए योजना के करीबन अस्सी करोड़ लाभार्थी हवय। एला अप्रैल दू हजार बीस ले लागू करे गेहे।
उहें, मंत्रिमंडल ह केन्द्रीय कर्मचारी मनके महंगाई भत्ता अउ पेंशनभोगी मनके महंगाई राहत म चार प्रतिसत के बढ़ोतरी ल घलो मंजूरी दे देहे। केन्द्रीय मंत्री श्री ठाकुर ह बतईन कि एमा हर बछर बारह हजार आठ सौ बावन करोड़ रूपिया खरचा होही।

पीएफआई-प्रतिबंध

केन्द्र सरकार ह पॉपुलर फ्रंट ऑफ इंडिया-पी.एफ.आई अउ एखर सहयोगी के संगेसंग एखर ले जुड़े गुट मन उपर तुरते प्रभाव ले पांच बछर बर प्रतिबंध लगा देहे। केन्द्रीय गृह मंत्रालय डहार ले जारी करे गे अधिसूचना म केहे गेहे कि        पी.एफ.आई. अउ उंखर सहयोगी गुट देस म गैर-कानूनी अउ आतंकी              गतिविधि म सामिल हवय। सरकार के ए मानना हवय कि कहूं पी.एफ.आई. अउ एखर ले जुड़े गुट के गैर-कानूनी गतिविधि म तुरते रोक नइ लगाय जाही, त ए देस संवैधानिक ढांचा ल कमजोर करे अउ कानून व्यवस्था बिगाड़े के इरादा ले अपन गतिविधि जारी रखही। हालेच म राष्ट्रीय अन्वेषण अभिकरण-एनआईए, प्रवर्तन निदेशालय अउ कई ठिन राज्य के पुलिस मन ह सामलात अभियान चलाके पी.एफ.आई. ले जुड़े ठिकाना मन म छापा मारे रिहीन।

रमन सिंह-पत्रकारवार्ता

भाजपा के राष्ट्रीय उपाध्यक्ष अउ पूर्व मुख्यमंत्री डॉक्टर रमन सिंह ह किहीन कि प्रदेस म सड़क मनके खराब हालत बर राज्य सरकार ह जिम्मेदार हे। आज रईपुर म पत्रकार मन ले गोठबात गरत डॉक्टर सिंह ह किहीन कि मुख्यमंत्री डहार ले सड़क के हालत म भाजपा के पाछु सरकार ले घेरी-बेरी सवाल करे जाथे। डॉक्टर सिंह ह किहीन कि पाछु चार बछर ले प्रदेस म कांग्रेस के सरकार हवय। ए दउरान सड़क के जउन हालत हवय, ओखर बर राज्य सरकार ल जवाब देना चाही। डॉक्टर सिंह ह आरोप लगईन हे कि कुछेक क्षेत्र मन म विकास काम बर पइसा खरचा करे जावत हे। उहें, दूसर क्षेत्र मन म ध्यान नइ दे जात हे। ओमन किहीन कि मुख्यमंत्री ह खुदे सड़क रद्दा ले आने-आने क्षेत्र के दउरा करय, जेखर ले ओमन ल सड़क के मौजूदा स्थिति के जानकारी मिल सकय।

मल्टीमीडिया चित्र प्रदर्शनी

केन्द्रीय संचार ब्यूरो के प्रादेशिक कार्यालय डहार ले डोंगरगढ़ के बम्लेश्वरी मंदिर परिसर म मल्टीमीडिया चित्र प्रदर्शनी आज ले सुरू होगे हे। राजनांदगांव के सांसद संतोष पांडेय ह ए प्रदर्सनी के सुभारंभ करीन। उहें, डोंगरगढ़ के          विधायक भुनेश्वर बघेल ह कारीकरम के परगइति करीन। तीन दिन तक चलइया ए प्रदर्सनी म पाछु आठ बछर के दउरान केन्द्र्र सरकार डहार ले सेवा, सुशासन अउ गरीब कल्याण के क्षेत्र म करे गे आने-आने काम मन ल चित्र के माध्यम ले प्रदर्सित करे गेहे। ए प्रदर्सनी के दउरान लोगन मन ल कुपोसन ले बचाय के जानकारी दे बर जागरूकता स्टॉल घलो लगाय गेहे। आज प्रदर्सनी के पहिली दिन आजादी के अमृत महोत्सव के तहत नगर म एक रैली निकाले गीस, जेमा स्कूल-कालेज के विद्यार्थी अउ एनएसएस-एनसीसी के कैडेट म घलो भाग लीन। रैली म सामिल कलाकार मन ह गीत-संगीत के माध्यम ले लोगन मन ल जागरूकता के संदेस दीन।

पेंशन प्रकरण-निराकरण

प्रदेस म रिटायर करमचारी मनके पेंसन प्रकरण ल तुरते निपटाय के दिसा म कदम उठाय जावत हे। एखर बर पेंसन प्रकरण मनके परीक्षण करके एके घांव म जम्मों आपत्ति दर्ज करे जाही अउ ए आपत्ति मनके पेंसन आफिस म निराकरण करे जाहीं। प्रदेस के वित्त सचिव अलरमेल मंगई डी. ह आज वित्त विभाग के समीक्षा बइठका म ए बारे म अधिकारी मन ल जरूरी निरदेस दीन। वित्त सचिव ह किहीन कि पेंसन के जउन ऑनलाइन प्रकरण के भौतिक रूप ले सत्यापन नइ करे गेहे, उंखर निराकरण बर संबंधित विभाग के अधिकारी मन ल चिट्ठी भेजके जरूरी कार्रवाई करे जाय।

लम्पी स्कीन

पशु मन म होवइया लम्पी त्वचा रोग के प्रदेस म अब तक कोनो मामला आगू नइ आय हे। फेर, आसंका ल देखत पशु चिकित्सा विभाग ह अपन मैदानी अमला ल पहिलीच ले सचेत कर देहे। विभाग के अधिकारी अउ करमचारी मन सरलग गंवई-गांव म जाके पशुपालक मन ल लम्पी रोग ले बचाव के जानकारी देवत हे। ए रोग ल देखत राज्य के पच्यासी गांव मन चौकी बनाके निगरानी करे जावत हे। उहें, सीमावर्ती गांव मन म पशु मेला के आयोजन म घलो रोक लगा दे गेहे।

रेलवे-समय बदलाव

दक्षिण पूर्व मध्य रेलवे ह अवइया एक अक्टूबर ले चौहत्तर ट्रेन के समय म बदलाव करे हे। कुछेक एक्सप्रेस अउ सुपर फास्ट गाड़ी मनके अवई-जवई उही बेरा म रइही। बिलासपुर रेलवे जोन ह समय के बदलाव ले परभावित होवइया गाड़ी मनके सूची अउ उंखर नवा समय-सारिणी जारी कर देहे।

भाजपा महिला मोर्चा-बैठक

प्रदेस के भारतीय जनता पार्टी महिला मोर्चा डहार ले सराबबंदी, महिला सुरक्षा अउ रेडी-टू-ईट पोषण आहार के मुद्दा ल लेके अवइया तीन नवंबर के बिलासपुर म महतारी हुंकार रैली के आयोजन करे जाही। रईपुर म पत्रकार मन ले गोठबात करत भाजपा के राज्यसभा सांसद सरोज पांडेय अउ प्रदेस भाजपा महिला मोर्चा के अध्यक्ष शालिनी राजपूत ह बतईन कि ए हुंकार रैली म प्रदेस के जम्मों जिला ले महिला मोर्चा के कार्यकर्ता मन ल इकट्ठा करे जाही। सरोज पांडेय अउ शालिनी राजपूत ह राज्य सरकार उपर आरोप लगईन कि कांग्रेस के चुनावी घोषणा पत्र म सराबबंदी के वादा करे गे रिहीस हे, फेर एला अभी तक पूरा नइ करे गेहे। सरोज पांडेय ह बतईन कि आंदोलन ले पहिली अवइया सात ले ग्यारह अक्टूबर तक महिला मोर्चा के कार्यकर्ता मन डहार ले ग्रामीण क्षेत्र म जाके महिला समूह, आंगनबाड़ी कार्यकर्ता अउ विद्या मितानिन मन ले संपर्क करे जाही।
एखर पहिली, काली भाजपा महिला मोर्चा के प्रदेस कार्यसमिति के रईपुर म होय बइठका म पार्टी के अवइया रणनीति अउ कारीकरम उपर गोठबात करे गीस। प्रदेस भाजपा कार्यालय कुशाभाऊ ठाकरे परिसर म होय बइठका म भाजपा के राष्ट्रीय उपाध्यक्ष अउ पूर्व मुख्यमंत्री डॉक्टर रमन सिंह ह आरोप लगईन कि राज्य के कांग्रेस सरकार ह प्रदेस के हर वर्ग के संग विश्वासघात करे हे। डॉक्टर  सिंह ह यहू आरोप लगाय हे कि प्रदेस म हत्या, लूट, अपहरण, दुराचार जइसन आपराधिक घटना सरलग बाढ़त हे। बइठका ल राज्यसभा सांसद सरोज पांडेय, भाजपा महिला मोर्चा के प्रदेस प्रभारी लता उसेंडी अउ महिला मोर्चा के अध्यक्ष शालिनी राजपूत घलो संबोधित करीन।

हाईकोर्ट-मुकेश गुप्ता

वरिष्ठ आईपीएस अधिकारी मुकेश गुप्ता के पदोन्नति के मामला म छत्तीसगढ़ हाईकोर्ट ह राज्य सासन के याचिका ल मंजूर करत केन्द्रीय प्रशासनिक न्यायाधिकरण-कैट जबलपुर के आदेस ल निरस्त कर देहे।
खबर के मुताबिक बछर दू हजार अट्ठारह म आईपीएस अधिकारी मुकेश गुप्ता ल अतिरिक्त महानिदेशक ले पदोन्नत करके महानिदेशक बनाय गे रिहीस। फेर, बछर दू हजार उन्नीस म सासन ह मुकेश गुप्ता के पदोन्नति ल निरस्त कर दे रिहीस। एखर बाद राज्य सासन के आदेस ल कैट ह रद्द कर दे रिहीस। एमा राज्य सरकार ह छत्तीसगढ़ हाईकोर्ट के युगलपीठ म याचिका लगाय रिहीन।