‘‘स्वच्छ टॉयकैथॉन‘‘
केन्द्रीय आवास अउ शहरी कार्य मंत्रालय ह सूखा कचरा ले खिलौना बनाय के अनूठा प्रतियोगिता ‘‘स्वच्छ टॉयकैथॉन‘‘ सुरू करे हे। मंत्रालय के सचिव मनोज जोशी ह कहिन कि टूटे खिलौना ल कचराघर म फेंक दे जाथे। ओमन कहिन कि पुराना खिलौना ल नवा रूप देके फेर ले बेचे जा सकथे। ओमन ह खिलौना ल पर्यावरण के अनुकूल बनाय खातिर सामाजिक स्तर म आंदोलन चलाय जाय म जोर देहे। ए उद्देश्य ल ध्यान म राखत ‘‘स्वच्छ टॉयकैथॉन‘‘ प्रतियोगिता सुरू करे गेहे।
मार्केटप्लेस विक्रेता-संवाद
केन्द्रीय वाणिज्य अउ उद्योग मंत्रालय के इकाई गवर्नमेंट ई-मार्केटप्लेस यानि ‘‘जेम‘‘ अउ रईपुर स्थित पत्र सूचना कार्यालय डहार ले आज राजधानी म विक्रेता मन बर संवाद कार्यक्रम के आयोजन करे गीस। कारीकरम म बताय गीस कि जेम पोर्टल बर अब तक छत्तीसगढ़ के करीब सड़सठ हजार विक्रेता मनके पंजीयन हो चुके हे।
ए मउका म आयोजित पत्रकारवार्ता ल संबोधित करत गवर्नमेंट ई-मार्केटप्लेस-जेम के निदेशक आयुष अग्रवाल ह बतईन कि छत्तीसगढ़ म जेम पोर्टल ल अच्छा प्रतिसाद मिलत हे। राज्य ले पंजीयन करइया विक्रेता मन म आने-आने क्षेत्र के कारोबारी सामिल हे। ओमन बतईन कि राज्य के नौ हजार ले जादा सूक्ष्म, लघु अउ मध्यम उद्योग जेम पोर्टल म पंजीकृत हे। ए विक्रेता मनके माध्यम ले जेम पार्टल ल अब तक कुल छह सौ अठहत्तर करोड़ रूपिया के खरीदी के प्रस्ताव मिल चुके हे। उहें, जेम पोर्टल के सलाहकार अमित उपाध्याय ह बतईन कि ए केन्द्रीय इकाई ले केन्द्र अउ राज्य सरकार के सबो विभाग के संग सहकारी समिति, स्वायत्त निकाय, सार्वजनिक उपक्रम अउ स्थानीय निकाय मन म घलो बड़का पैमाना म खरीदी करे जाथे।
कारीकरम के दउरान रईपुर स्थित पत्र सूचना कार्यालय के निदेशक कृपाशंकर यादव अउ उपनिदेशक सुनील कुमार तिवारी ह जेम पोर्टल के कामकाज के संबंध म जानकारी दीन।
डिजिटल डोर नंबर
राजधानी रईपुर के सबो घर मन म तुरते डिजिटल डोर नंबर अउ यूनिक कोड दर्ज करे जाही। एखर माध्यम ले मकान मालिक मन ल आने-आने कर के भुगतान अउ कचरा संग्रहण संग छब्बीस तरह के जरूरी अउ आपातकालीन सेवा घरे म मिल सकही।
ए संबंध म कलेक्टर डॉक्टर सर्वेश्वर नरेन्द्र भुरे ह आज देवेन्द्र नगर आवासीय कॉलोनी म पहुंच के रायपुर स्मार्ट सिटी लिमिटेड डहार ले आने-आने घर मन म लगाय जात डिजिटल डोर नंबर के जानकारी लीन। ए दउरान नगर निगम आयुक्त अउ रायपुर स्मार्ट सिटी लिमिटेड के प्रबंध संचालक मयंक चतुर्वेदी घलो रिहीन। कलेक्टर ह बतईन कि स्मार्ट सिटी डहार ले करे जात ए तकनीक परयास ले शहर के सबो तीन लाख पन्द्रह हजार ले जादा घर मन म डिजिटल डोर नंबर लगाय जाही।
क्वांटिफायबल डाटा आयोग
प्रदेस म अन्य पिछड़ा वर्ग अउ आर्थिक रूप ले कमजोर वर्ग के लोगन के जानकारी जुटाय बर क्वांटिफायबल डाटा आयोग के पोर्टल सत्रह अक्टूबर तक फेर खोल दे गेहे। ए पोर्टल म अन्य पिछड़ा वर्ग अउ कमजोर वर्ग ले संबंधित लोगन के जानकारी सर्वेक्षण के माध्यम ले दर्ज करे जाही। आयोग के पोर्टल म अपन जानकारी दर्ज कराय खातिर पंचायत अउ नगरीय निकाय के स्थानीय दफ्तर मन म जाके पंजीयन कराय जा सकथे।
मुख्यमंत्री भूपेश बघेल ह ए लोगन मन ले अपील करे हे कि ओमन क्वांटिफायबल डाटा आयोग डहार ले करे जात सर्वेक्षण म जरूर भाग लेवय।
सिटी बस-संचालन
करीबन दू बछर के बाद राजधानी रईपुर म सिटी बस सेवा फेर ले सुरू होगे हे। आज सिटी बस सहर के आने-आरे रद्दा म चलाय गीस।
सिटी बस विभाग के कार्यपालन अभियंता बद्री चंद्राकर ह बतईन कि राजधानी बर उपलब्ध कराय गे सिटी बस मनके संचालन घलो तुरते सुरू करे जाही। आज तीस सिटी बस के संचालन सुरू करत बेरा महापौरा एजाज ढेबर, विधायक कुलदीप जूनेजा, नगर निगम के सभापति प्रमोद दुबे अउ कलेक्टर डॉक्टर सर्वेश्वर नरेन्द्र भूरे संग आने अधिकारी घलो मौजूद रिहीन।
दीनदयाल उपाध्याय-जयंती
एकात्म मानववाद के प्रणेता पंडित दीनदयाल उपाध्याय के जयंती म काली मुंगेली के भाजपा कार्यालय आने-आने कारीकरम करे गीस। ए मउका म पंडित उपाध्याय के योगदान ल सुरता करत पार्टी कार्यकर्ता मन ह अपन श्रद्धांजलि दीन। ए मउका म आकाशवाणी ले प्रसारित प्रधानमंत्री नरेन्द्र मोदी के ‘‘मन की बात‘‘ कारीकरम घलो कार्यकर्ता मन ह सुनीन। ए आयोमन म क्षेत्रीय विधायक पुन्नूलाल मोहले घलो सामिल होईन। ओमन कार्यकर्ता मन ल संबोधित करत कहिन कि प्रधानमंत्री के मंसा के अनुरूप स्थानीय उत्पाद ल बढ़ावा दे खातिर प्रयास करना पड़ही।
शारदेय नवरात्र
शक्ति के अराधना के परब शारदेय नवरात्र आज ले सुरू होगे हे। आज ले लेके नौ दिन तक सबो शक्तिपीठ अउ मंदिर देवाला मन म मां दुर्गा के बिसेस पूजा-अर्चना करे जाही। मंदिर मन म आज ले घट स्थापना के संग मनोकामना ज्योति कलश जलाय जाही। उहें, चउक-चउराहा के पंडाल मन म घलो मां दुर्गा के मूर्ति के स्थापना करे जात हे। प्रदेस के प्रमुख शक्तिपीठ – दंतेवाड़ा म दंतेश्वरी, रतनपुर अउ रायपुर के महामाया मंदिर अउ डोंगरगढ़ म मां बम्लेश्वरी के मंदिर मन म शारदेय नवरात्र के दउरान आने-आने धार्मिक आयोजन होही।
राज्यपाल अनुसुईया उइके अउ मुख्यमंत्री भूपेश बघेल ह प्रदेसवासी मन ल देवी उपासना के परब नवरात्रि के बधाई अउ सुभकामना दीन।
कोंडागांव-सामुदायिक पुलिसिंग
कोंडागांव जिला म पुलिस अउ जनता के बीच आपसी संवाद ल मजबूत बनाय खातिर सामुदायिक पुलिसिंग सुरू करे गेहे। इही कड़ी म जिला के अनंतपुर म काली एक ठिन कारीकरम आयोजित करे गीस। ए दउरान पुलिस अधीक्षक दिव्यांग पटेल संग आने अधिकारी मन डहार ले लोगन ल साइबर अपराध ले बाचे के उपाय बताय गीस। संगेसंग सड़क सुरक्षा से संबंधित जानकारी घलो दे गीस। कारीकरम के दउरान क्षेत्रीय विधायक अउ प्रदेस कांग्रेस अध्यक्ष मोहन मरकाम डहार ले स्थानीय युवा मन ल खेल सामग्री मन ल बाटे गीस। ए मउका श्री मरकाम अउ पुलिस अधीक्षक श्री पटेल ह अनंतपुर थाना के नवा भवन के निर्माण बर भूमिपूजन घलो करीन।
ऑनलाइन सट्टा-आरोपी गिरफ्तार
रईपुर पुलिस ह चारपहिया गाड़ी म घूमत सट्टा कारोबार चलइया नौ झिन आरोपी मन ल गिरफ्तार करे हे। नगर के अतिरिक्त पुलिस अधीक्षक अभिषेक माहेश्वरी अउ नगर पुलिस अधीक्षक अविनाश मिश्रा के टीम ह मुखबिर के सूचना के आधार म ए आरोपी मन ल रंगेहाथ पकड़ीन। पूछताछ के दउरान आरोपी मन ल बतईन कि ओमन मोबाइल ऐप्लीकेशन के माध्यम ले सट्टा खेलइया मनके बुकिंग करत रिहीस अउ वाट्सऐप गु्रप बनाके ओमा जानकारी देवत रिहीन।
क्षेत्रीय प्रशिक्षण सम्मेलन
राष्ट्रीय सांख्यिकी कार्यालय डहार ले असमाविष्ट क्षेत्र के उद्यम मनके वार्षिक सर्वेक्षण बर क्षेत्रीय प्रशिक्षण सम्मेलन काली ले रईपुर म सुरू होही। राष्ट्रीय सांख्यिकी कार्यालय के रईपुर म पदस्थ उप महानिदेशक रोशनलाल साहू ह ए तीन दिन के प्रसिक्षण सम्मेलन के उद्घाटन करही।
अउ अब थोरकुन समाचार सार म –
– भ्रष्टाचार निरोधक शाखा-एसीबी अउ आर्थिक अपराध अन्वेषण ब्यूरो के टीम ह आज मनरेन्द्रगढ़-चिरमिरी-भरतपुर जिला के खड़गवां कार्यालय म पदस्थ महिला अउ बाल विकास विभाग के लेखापाल ल पचास हजार रूपिया के रिश्वत लेवत रंगेहाथ पकड़ लीन।
– सूरजपुर जिला के चांदनी क्षेत्र म वन भूमि म होय कब्जा ल खाली कराय बर गे थाना प्रभारी अउ वनकर्मी मन उपर गांव वाले मन ह हमला कर दीन। ए घटना म थाना प्रभारी संग घायल वनकर्मी मन ल तीर के अस्पताल म भर्ती कराय गेहे। पुलिस ह हमला करइया ग्रामीण उपर जुर्म दर्ज करके उंखर खोज सुरू कर देहे।
– जशपुर जिला के बाबूसाजबहार गांव म हाथी के हमला ले एक झिन सियान माईलोगिन के मउत होगे।
अउ
– रायगढ़ के एक ठिन निजी संयंत्र म पारादीप ले कोयला लेके आय मालगाड़ी ले कोयला निकालत बेरा एक झिन मनखे के मनखे के सव बरामद करे गेहे। संयंत्र प्रबंधन डहार ले तुरते एखर सूचना स्थानीय पुलिस ल दे गीस। पुलिस ह जांच सुरू कर देहे।