मन की बात
प्रधानमंत्री नरेन्द्र मोदी ह दू अक्टूबर के गांधी जयंती अउ अवइया तिहार मन ल देखत लोगन ले स्थानीय जिनीस ल खरीदे के अभियान ल तेज करे के अपील करीन हे। आज आकाशवाणी ले ‘‘मन की बात‘‘ कारीकरम म श्री मोदी ह ए बात म जोर दीन कि सबला मिलके स्थानीय उत्पाद ल आगू बढ़ाना चाही।
प्रधानमंत्री ह किहीन कि काली ले नौ दिन के परब सुरू होवत हे। भारतीय तिहार मन ह अनुशासन के माध्यम ले सिद्धि प्राप्ती के संदेस देथे। ओमन किहीन कि दसहरा के बाद धनतेरस अउ देवारी घलो मनाय जाही। ए तिहार मन संग घलो स्थानीय उत्पाद ल खरीदे के संकलप जुड़े हे। प्रधानमंत्री ह तिहार के दउरान पैकेंजिक बर पॉलीथीन बैग के उपयोग बर निरासा जतईन। प्रधानमंत्री ह टीबी के मरीज मन लोगन के सकारात्मक भावना के तारीफ करीन। ओमन किहीन कि देस ल तपेदिक मुक्त बनाना जनभागीदारी ले संभव हे।
केन्द्रीय राज्यमंत्री-पत्रकारवार्ता
केन्द्रीय रसायन अउ उर्वरक राज्यमंत्री भगवंत खूबा ह किहीन हे कि केन्द्र सरकार ह छत्तीसगढ़ सरकार ल मांग के अनुसार खाद के आपूर्ति कर देहे। ओमन किहीन कि देस के कोनों भी किसान ल खाद के किल्लत नइ होवन दे जाही। आज रईपुर म पत्रकार मन ले गोठबात करत श्री खूबा ह किहीन कि छत्तीसगढ़ सरकार किसान मनके मामला म राजनीति झन करय। दुनियाभर म आने-आने कारण ले खाद के कीमत म पांच गुना बढ़ोतरी होय हे। फेर, प्रधानमंत्री नरेन्द्र मोदी ह किसान मनके समस्या ल देखत खाद के सब्सिडी ल बढ़ा दे हंवय।
मुख्यमंत्री-डीएमएफ
मुख्यमंत्री भूपेश बघेल के अगुवई म आज उंखर निवास कार्यालय म खनिज न्यास मद के राज्य स्तरीय निगरानी समिति के बइठका कराय गीस। बइठका म मुख्यमंत्री ह डीएमएफ मद ले उच्च अउ सामान्य प्राथमिकता ल देखत मितव्ययिता बर बिसेस ध्यान देके निरदेस दीन। ओमन किहीन कि जिला म होवत मेला म डीएमएफ के रासि के उपयोग नइ करे जाय। बइठका म डीएमएफ मद के खरचा के सोशल ऑडिट बर राज्य स्तरीय प्रकोष्ठ घलो बनाय गीस।
मुख्यमंत्री ह किहीन कि खनिज मद के राशि के आवंटन प्रभावित जिला म निर्धारित अनुपात के आधार म करे जाय। एमा नवा पांच जिला बर घलो राशि के आवंटन सुनिश्चित हो, जेखर ले विकास काम प्राथमिकता के आधार म पूरा हो सकय। श्री बघेल ह किहीन कि स्वास्थ्य अउ सिक्षा ले जुड़े उपकरण के खरीदी बर विभागीय बजट के उपयोग करे जाय। एखर बर डीएमएफ मद के उपयोग झन होवय। मुख्यमंत्री ह अधिकारी मन ले किहीन कि गरियाबंद जिला के हीरा खदान म न्यायालय डहार ले लाए गे स्टे ऑर्डर ल वापस ले बर जरूरी कार्रवाई निश्चित करे जाय, जेखर ले हीरा खदान ल बने ढंग ले चालू करे जा सकय।
परीक्षाएं-रद्द
छत्तीसगढ़ माध्यमिक शिक्षा मंडल ह पेपर लीक होय के बाद कक्षा पहिली ले बारहवीं तक के होवइया तिमाही परीक्षा ल रद्द कर देहे। अब प्रदेस के सबो स्कूल अपन-अपन स्तर म परीक्षा ले सकही। ए संबंध म जिला सिक्षा अधिकारी मन ल निरदेस जारी कर दे गेहे।
स्कूल शिक्षा विभाग के सचिव डॉक्टर आलोक शुक्ला ह जिला शिक्षा अधिकारी मन ल पत्र जारी करके किहीन हे कि लइका मन म शैक्षणिक गुणवत्ता के आंकलन बर राज्य सरकार ह सरकारी स्कूल म घलो त्रैमासिक परीक्षा लेके फइसला करे रिहीस। छब्बीस ले उनतीस सितंबर तक पहिली ले पांचवीं अउ छब्बीस ले एक अक्टूबर तक छठवीं ले आठवीं तक के परीक्षा होना रिहीस। फेर, प्रश्न पत्र लीक होय के सेती परीक्षा रद्द कर दे गीस। अब तिमाही परीक्षा बर पेपर स्कूल स्तर म ही तैयार करे जाही। सबो परीक्षा दस अक्टूबर तक संपन्न कराना होही। प्रश्न पत्र छपाय के बजाय ब्लैक बोर्ड म लिखके लइका मन ल दे जाही।
दीनदयाल उपाध्याय जयंती
एकात्म मानववाद के प्रवर्तक पंडित दीनदयाल उपाध्याय के आज जयंती हे। ए मउका म उप राष्ट्रपति जगदीप धनखड़ अउ प्रधानमंत्री नरेन्द्र मोदी ह ओमन ल श्रद्धांजलि दीन हे। प्रधानमंत्री ह पंडित दीनदयाल उपाध्याय ल महान मानवतावादी, चिंतक अउ भारत के सच्चा सपूत बतईन हे।
ऐति, छत्तीसगढ़ म घलो पंडित दीनदयाल उपाध्याय के जयंती म कतकोन कारीकरम कराय गीस। रईपुर के तेलीबांधा म उंखर प्रतिमा म केन्द्रीय उर्वरक अउ रसायन राज्यमंत्री भगवंत खूबा ह मार्ल्यापण करके ओमन ल अपन श्रद्धांजलि दीन। ए मउका म ओमन किहीन कि देस के अंतिम पायदान म बइठे मनखे तक सासन के योजना के फायदा पहुंचय, इही अंत्योदय के सिद्धान्त हे।
भाजपा-सेवा पखवाड़ा
भारतीय जनता पार्टी डहार ले प्रधानमंत्री नरेन्द्र मोदी के जनम दिवस के मउका म छत्तीसगढ़ संघरा देसभर म सेवा पखवाड़ा मनाय जावत हे। इही कड़ी म मुंगेली जिला म भाजपा सांस्कृतिक अउ एनजीओ प्रकोष्ठ के तत्वावधान म आत्मनिर्भरता ल बढ़ावा दे बर ‘‘वोकल फॉर लोकल‘‘ कारीकरम कराय गीस। ए मउका म बांस शिल्प अउ माटी कला ले जुड़े लोगन के सम्मान घलो करे गीस। कारीकरम म विधायक पुन्नूलाल मोहले ह किहीन क स्थानीय उत्पाद ले अपन रोजी-रोटी कमाने वाला मन ल बढ़ावा देना हे।
एखर अलावा भाजपा महिला मोर्चा ह जल संरक्षण बर जागरूकता कार्यक्रम करईस।
सीबीआई-ऑपरेशन मेघ चक्र
सीबीआई ह ऑपरेशन मेघ चक्र के सावधानीपूर्वक कार्रवाई म बाल यौन शोषण सामग्री ल डाउनलोड अउ प्रसारित करे ले जुड़े दू मामला म इक्कीस राज्य अउ केन्द्रसासित प्रदेस म करीबन उनसठ जघा म तलाशी लीन। एमा छत्तीसगढ़ के राजधानी रईपुर घलो सामिले हे।
सीबीआई ह इंटरपोल के लइका मनके विरूद्ध अपराध इकाई सिंगापुर ले मिले सूचना के आधार म कार्रवाई करीन हे। तलाशी के दउरान पचास ले जादा संदिग्ध मनके मोबाइल, लैपटॉप संघरा दूसर इलेक्ट्रॉनिक उपकरण बरामद करे गीस। ए उपकरण के प्रारंभिक जांच म कथित तौर म कतकोन इलेक्ट्रॉनिक उपकरण म बड़ मात्रा बाल यौन शोषण सामग्री होय के सूचना मिलीस। संदिग्ध मन ले पूछताछ करे जात हे।
समीक्षा-बैठक
केन्द्रीय जलशक्ति मंत्रालय के अतिरिक्त सचिव अउ आकांक्षी जिला कारीकरम म कोंडागांव के प्रभारी केन्द्रीय सचिव विकासशील ह जिला के अधिकारी मनके बइठका लीन। बइठका म ओमन ह मलेरिया मुक्त बस्तर, एनीमिया मुक्त कोंडागांव, संस्थागत प्रसव, सूक्ष्म सिंचाई, विद्युत व्यवस्था, मृदा स्वास्थ्य सिंचाई व्यवस्था, अंदरूनी क्षेत्र म सड़क निर्माण, जल जीवन मिशन, पशु मनके कृत्रित गर्भाधान अउ कौशल विकास के बारे म गोठबात करे गीस।
धोखाधड़ी
राजधानी रईपुर म ऑनलाइन धोखाधड़ी के मामला आगू आय हे। अज्ञात आरोपी ह क्रेडिट कार्ड बंद होय के झांसा देके चौबीस घंटा के भीतर वसुंधरा नगर चंगोराभाटा निवासी एक झन एलआईसी अधिकारी सनद कुमार धीवर के खाता ले करीबन दस लाख रूपिया निकाल लीस। डीडी नगर पुलिस ह धोखाधड़ी के मामला दर्ज करके अज्ञात आरोपी के तलाश सुरू कर देहे।
शारदेय नवरात्र
शक्ति के पूजा के परब शारदेय नवरात्र काली ले सुरू होवत हे। ए मउका म प्रदेस के आने-आने देवी मंदिर म नौ दिन तक बिसेस पूजा करे जाही। देवी मंदिर अउ शक्तिपीठ म मनोकामना ज्योति कलश के स्थापना घलो करे जाही। राजधानी रईपुर संघरा प्रदेस के आने-आने देवी मंदिर म सजावट करे जावत हे। कई समिति मन डहार ले सार्वजनिक जघा म पंडाल म घलो देवी के स्थापना करे जाही। राजनांदगांव जिला प्रशासन ह डोंगरगढ़ म मां बम्लेश्वरी के दर्शन बर पहुंचे भक्त मन ल सबो सुविधा देवाही। कलेक्टर डोमन सिंह ह एखर बर एसडीएम अउ दूसर अधिकारी मन ल बने बेवस्था करे के निरदेस दीन हे।
ओति, दंतेवाड़ा के मां दंतेश्वरी, रतनपुर के मां महामाया अउ सक्ति जिला के मां चन्द्रहासनी मंदिर म नवरात्र के सबो तैयारी पूरा कर ले गेहे।
राज्यपाल अनुसुईया उइके, मुख्यमंत्री भूपेश बघेल अउ विधानसभा अध्यक्ष डॉक्टर चरणदास महंत ह प्रदेसवासी मन ल देवी उपासना के परब नवरात्रि के बधाई अउ सुभकामना दीन हे। अपन संदेस म राज्यपाल ह कामना करीन हे कि उपासना के पर्व प्रदेस के सबो नागरिक मनके जीवन म सुख-सांति अउ समृद्धि लाही।