आज दिनभर के खबर ल अपन गुरतुर छत्तीसगढ़ी भाखा म पढ़व

मुख्यमंत्री-जुआ/सट्टा

मुख्यमंत्री भूपेश बघेल ह प्रदेस म जुआ अउ सट्टा के अलग-अलग रूप अउ प्लेटफॉर्म मन उपर रोक लगाय बर पुलिस महानिदेशक अशोक जुनेजा ल कड़ा कदम उठाय के निरदेस दीन, ताकि एखर रोकथाम बर कानून बनाय जा सकय। ओमन किहीन कि ऑनलाइन संचालित होवत जुआ अउ सट्टा के खिलाई बर कोई विधिक प्रावधान अउ स्पष्ट कार्रवाई के प्रक्रिया नइ होय ले एखर उपर प्रभावी रूप ले रोक नइ लगाय जा पावत हे। एला देखत हुए मुख्यमंत्री ह विधिक प्रावधान अउ प्रक्रिया के प्रारूप जल्द तैयार करे बर केहे हे।

छत्तीसगढ़िया ओलम्पिक

प्रदेस म आगामी छह अक्टूबर ले होवइया छत्तीसगढ़िया ओलम्पिक ल लेके तैयारी जोरशोर ले चलत हे। ये ओलम्पिक म गिल्ली डंडा, पिट्ठूल, लंगड़ी दउड़ जइसे चौदह पारंपरिक खेल मनके मुकाबला होही। छत्तीसगढ़िया ओलम्पिक के आयोजन के दायित्व पंचायत ग्रामीण विकास अउ नगरीय प्रशासन अउ विकास विभाग ल सौंपे गेहे। स्पर्धा के समापन अगले साल छह जनवरी के होही।
छत्तीसगढ़िया ओलम्पिक बर छह स्तर निर्धारित करे गेहे। एमा गांव म सबले पहिली स्तर राजीव युवा मितान क्लब के होही। उहें, दूसरइया स्तर जोन म आठ राजीव युवा मितान क्लब ल मिलाके एक ठन क्लब होही। फेर विकासखंड-नगरीय क्लस्टर, जिला, संभाग अउ आखरी म राज्य स्तर म खेल प्रतियोगिता आयोजित होही। राज्य स्तर के मुकाबला अट्ठाईस दिसंबर ले छह जनवरी तक होही।

मन की बात

प्रधानमंत्री नरेन्द्र मोदी काली पच्चीस सितंबर के बिहनिया ग्यारह बजे आकाशवाणी ले ‘‘मन की बात‘‘ कारीकरम म देश-विदेश के लोगन मन संग अपन विचार साझा करही। ये कार्यक्रम आकाशवाणी अउ दूरदर्शन के सबो नेटवर्क म प्रसारित होही। आकाशवाणी समाचार के वेबसाइट अउ न्यूज ऑन एआईआर मोबाइल ऐप म घलो ये कार्यक्रम उपलब्ध रिही। आकाशवाणी समाचार, दूरदर्शन समाचार, प्रधानमंत्री कार्यालय अउ सूचना अउ प्रसारण मंत्रालय के यू-ट्यूब चैनल म घलो कार्यक्रम सीधा प्रसारित होही। आकाशवाणी ले हिन्दी प्रसारण के तुरते बाद मन की बात कार्यक्रम के क्षेत्रीय भाषा म प्रसारण करे जाही।

सेवा पखवाड़ा

प्रधानमंत्री नरेन्द्र मोदी के जन्मदिवस के उपलक्ष्य म भाजपा महिला मोर्चा रायपुर शहर डहार ले सेवा पखवाड़ा कार्यक्रम के तहत पार्टी के सबो सोलह मंडल मन म जल संरक्षण अउ पानी बचाव ल लेके कार्यक्रम आयोजित करे गीस। उहें, जन-जागरण अभियान चलाय के संगेसंग निबंध, पेंटिंग अउ रंगोली प्रतियोगिता घलो आयोजित करे गीस, जेमा लइका मन बढ-चढ़के हिस्सा लीन।
उहें, मुंगेली म भाजपा महिला मोर्चा पथरिया मंडल डहार ले सरस्वती शिशु मंदिर म जल संरक्षण जागरूकता कार्यक्रम के आयोजन करे गीस। ये मौका म अलग-अलग प्रतियोगिता मनके आयोजन होईस।

राज्यपाल-कोंडागांव

राज्यपाल अनुसुईया उइके अपन कोंडागांव प्रवास के दउरान काली एकल अभियान परिचय अउ सम्मान समारोह म सामिल होईन। ये अवसर म ओमन किहीन कि एकल अभियान ले जुड़े लोगन मन डहार ले बिना साधन-सुविधा के गांव-गांव म सिक्षा के संग संस्कृति, परंपरा अउ राष्ट्रीयता के जेन प्रेरणा लोगन मन ल प्रदान करे जात हे, ओ ह सराहनीय हे।
ये दौरान ओमन शिल्पनगरी के अवलोकन कर शिल्पकार मन ले मुलाकात करीन। संगेसंग ओमन अपन गोद ले गांव लंजोड़ा के आश्रित गांव सल्फीपदर के घलो दौरा करीन। ये दौरान ओमन किहीन कि लंजोड़ा अउ सल्फीपदर गांव ल मिलाके महात्मा गांधी ग्रामीण उद्योग पार्क के स्थापना करे जात हे, जेखर बर दू करोड़ रूपिया के सहायता राज्य सासन डहार ले प्रस्तावित करे गेहे। ओमन किहीन कि इहां करे जात काली मिर्च के खेती ले न केवल ग्रामीण मन ल रोजगार मिले हे, बल्कि गांव के अर्थव्यवस्था घलो मजबूत होय हे। राज्यपाल ह वन सुरक्षा के क्षेत्र म महिला मन डहार ले करे जात पहल के सराहना घलो करीन।

धमतरी-डायरिया

धमतरी जिला के कुरूद ब्लॉक के मड़ेली गांव म ए बखत डायरिया के प्रकोप देखे जात हे। काली एक झिन लइका के मउत होय के मामला सामने आए हे। उहें, सौ ले जादा ग्रामीण एखर चपेट म आ गेहे।
धमतरी के मुख्य चिकित्सा अउ स्वास्थ्य अधिकारी डॉक्टर डी.के. कुर्रे के अनुसार जब बच्ची ल सिविर म लाय गीस त ओखर स्थिति काफी गंभीर रिहीस। ओला खून के कमी अउ निमोनिया घलो रिहीस। फिलहाल गांव म स्थिति नियंत्रण म हे अउ दवा के वितरण करे जात हे। गांव म सिविर लगा के पीड़ित मनके इलाज करे जात हे। उहें, कुरूद, कचना, जिजामगांव अउ भखारा के स्वास्थ्य केन्द्र मन म मरीज मनके इलाज चलत हे। डायरिया फैले के कारण पेयजल आपूर्ति के पाईप लाइन म लिकेज बताय जात हे। लोगन मन ल शुद्ध पेयजल उपलब्ध कराय बर चार ठन टैंकर के व्यवस्था करे गेहे।

रबी फसल बीज

छत्तीसगढ़ राज्य बीज अउ कृषि विकास निगम लिमिटेड ह रबी फसल मनके प्रमाणित बीज के खरीदी दर निर्धारित कर देहे। गेहूं के उच्च किसम के प्रमाणित बीज के दर तीन हजार चार सौ पच्चीस रूपिया प्रति क्विंटल अउ गेहूं के बौनी किसम के बीच के कीमत चौंतीस सौ रूपिया प्रति क्विंटल हे। अइसने, चना बीज साढ़े सात हजार, मटर आठ हजार तीन सौ अउ मसूर बीज के कीमत आठ हजार रूपिया प्रति क्विंटल निर्धारित करे गेहे।

अंतर्राष्ट्रीय कृषि मेला

रायपुर के इंदिरा गांधी कृषि विश्वविद्यालय परिसर म आगामी चौदह ले अट्ठारह अक्टूबर तक अंतर्राष्ट्रीय कृषि मेला आयोजित करे जाही। कृषि मंत्री रविन्द्र चौबे ह बतईन कि पांच दिवसीय मेला के दौरान कृषि के उन्नत तकनीक के प्रसिक्षण किसान मन ल दे जाही। संगेसंग उन्नत फसल अउ कृषि के आधुनिक मसीनीकरण के घलो जानकारी दे जाही।

बातों-बातों-में

प्रादेशिक समाचार एकांश डहार ले समसामयिक विषय उपर आधारित साप्ताहिक कार्यक्रम ‘‘बातों-बातों-में‘‘ म ए बखत प्रधानमंत्री टीबी मुक्त भारत अभियान के संगेसंग टीबी ले बचाव के बारे म अउ अधिक जानकारी दे बर रायपुर के जिला क्षय नियंत्रण केन्द्र के चिकित्सा अधिकारी डॉक्टर नमिता साहू ले लेगे भेंटवार्ता प्रसारित करे जाही। एखर प्रसारण आकाशवाणी के रायपुर केन्द्र डहार ले काली बिहनिया  9 बजके 30 मिनट म करे जाही। एला छत्तीसगढ़ के जम्मों आकाशवाणी केन्द्र एके संघरा रिले करही।

जिले की चिट्ठी

आकाशवाणी समाचार डहार ले काली संझा छह बजके पैंतीस मिनट म ‘‘जिले की चिट्ठी‘‘ कार्यक्रम के प्रसारण करे जाही। ए कार्यक्रम आकाशवाणी के रायपुर केंद्र डहार ले प्रसारित होही। जेला जम्मों केंद्र मन ह एके संग रिले करही। ए बखत के अंक म ‘‘कोरबा‘‘ जिला के गतिविधि मनके बारे म जानकारी दे जाही।

अउ अब थोरकुन समाचार सार म –

– राष्ट्रपति द्रौपदी मुर्मू ह आज राष्ट्रपति भवन म बछर दू हजार बीस-इक्कीस बर राष्ट्रीय सेवा योजना पुरस्कार प्रदान करीन। दू विश्वविद्यालय, दस राष्ट्रीय सेवा योजना इकाई अउ उंखर अधिकारी के संगेसंग तीस स्वयंसेवक मन ल ये पुरस्कार दे गेहे।

– राजधानी रायपुर म छब्बीस सितंबर ले तीस ठन सिटी बस फेर सुरू होही। कलेक्टर डॉक्टर सर्वेश्वर नरेन्द्र भूरे अउ महापौर एजाज ढेबर ह ये बस मन ल हरा झंडा देखा के रवाना करही।

अउ

– आने-आने येजना के आठ सौ सड़सठ लाख रूपिया के रासि ल फर्जी तरीका ले व्यक्तिगत खाता म भुगतान करके वित्तीय अनियमितता बरते के आरोप म राज्य सासन ह बलरामपुर जिला के रामानुजगंज के पदस्थ प्रभारी कार्यपालन अभियंता संजय कुमार ग्रायकर ल निलंबित कर देहे।