साव/चंदेल-बस्तर प्रवास
भारतीय जनता पार्टी के प्रदेस अध्यक्ष अरूण साव अउ नेता प्रतिपक्ष नारायण चंदेल ए दिन म बस्तर संभाग के पांच दिन के प्रवास म हंवय। आज ओमन सुकमा पहुंच के पार्टी कार्यकर्ता अउ पदाधिकारी मन ले मुलाकात करीन। ए दउरान भाजपा नेता केदार कश्यप घलो मौजूद रिहीन।
पार्टी कार्यकर्ता मन ले चरचा करत श्री साव ह किहीन कि भाजपा, अवइया विधानसभा चुनाव म बस्तर के जम्मों बारह सीट म दमदारी के साथ चुनाव लड़ही। ओमन कार्यकर्ता मन ल संगठन ल अउ मजबूत करे बर किहीन। उहें, नेता प्रतिपक्ष ह सराबबंदी के मामला ल उठावत किहीन कि राज्य के कांग्रेस सरकार ह चुनाव ले पहिली सराबबंदी के वादा करे रिहीस, फेर ओला पूरा नइ करत हे।
स्वास्थ्य सचिव-कोविड टीका
स्वास्थ्य विभाग के सचिव प्रसन्ना आर. ह प्रदेस के जम्मों कलेक्टर मन ल परिपत्र जारी करके कोरोना टीकाकरण के काम म तेजी लाय के निरदेस दीन हे। पत्र म ओमन किहीन कि जेन मनखे मन कोविड वैक्सीन के दूसरा खुराक अउ ्रप्रिकॉशन डोज लेहे ले छूट गेहे, ओमन ल तुरते टीका लगाय जाही। स्वास्थ्य सचिव ह किहीन कि कोरोना संक्रमण ले बचाव बर टीकाकरण एक प्रभावी माध्यम हरय। ओमन बतईन कि अट्ठारह साल अउ ओखर ले जादा आयु वर्ग के जम्मों लाभार्थी मन ल पाछु पन्द्रह जुलाई ले शासकीय कोविड टीकाकरण केन्द्र मन म प्रिकॉशन डोज निःशुल्क लगाय जात हे। आजादी के अमृत महोत्सव के अंतर्गत ए अभियान तीस सितंबर तक चलाय जाही।
राज्यपाल-सैनिक कल्याण बोर्ड
राज्यपाल अनुसुईया उइके ह किहीन हे कि सशस्त्र सेना जतका सुदृढ़ होही, देस उतके सुरक्षित अउ विकाससील होही। ए बात राज्यपाल ह आज जगलदपुर के धरमपुरा स्थित सैनिक कल्याण बोर्ड कार्यालय के परिसर म सैनिक विश्रामगृह के लोकार्पण करत कहिन। ओमन कहिन कि नवा बने विश्रामगृह के लाभ सैनिक परिवार के अलावा बस्तर अवइया जम्मों वर्दीधारी अउ ओमन के परिजन ल मिलही। राज्यपाल ह जिला प्रसासन ल सैनिक अउ ओमन के परिजन कोनों प्रकार के समस्या न हो, एखर बर हेल्पलाइन नंबर जारी करे के निरदेस दीन। संघरा महिना म दू दिन सैनिक मनके कल्याण अउ उंखर समस्या के निराकरण करे किहीन। ओमन बस्तर क्षेत्र के युवा मन ल सुरक्षा बल अउ सेना म भर्ती बर प्रेरित करे के आवश्यकता उपर जोर दीन।
गोधन न्याय योजना
गोधन न्याय योजना के तहत मुख्यमंत्री भूपेश बघेल ह काली वर्चुअल कारीकरम म पशुपालक ग्रामीण, गौठान ले जुड़े महिला समूह अउ गौठान समिति मन ल सात करोड़ चार लाख रूपिया के रासि ऑनलाइन जारी करीन। ए योजना के तहत राज्य म अब तक हितग्राही मन ल तीन सौ पैंतीस करोड़ छत्तीस लाख रूपिया के भुगतान करे जा चुके हे।
ट्रेन-परिचालन
रेलवे ह यात्री मनके सुविधा ल देखत दक्षिण पूर्व मध्य रेलवे ले चलने वाला कुछ गाड़ी मनके परिचालन तीस सितंबर ले फेर सुरू करे के निर्णय लेहे। एमा गोंदिया-वडसा मेमू स्पेशल, वडसा-चंदा फोर्ट मूम स्पेशल अउ चंदा फोर्ट-गोंदिया मेमू स्पेशल ट्रेन सामिल हरय।
शिक्षा प्रोत्साहन योजना
छत्तीसगढ़ राज्य लघु वनोपज संघ कोति ले संचालित शिक्षा प्रोत्साहन योजना के तहत बछर दू हजार इक्कीस-बाईस बर शैक्षणिक छात्रवृत्ति योजना के तहत जम्मों प्राथमिक लघु वनोपज सहकारी समिति के माध्यम ले प्रस्ताव आमंत्रित करे गेहे। प्रस्ताव मिले के बाद पात्र विद्यार्थी मन ल ऑनलाइन माध्यम ले छात्रवृत्ति के भुगतान करे जाही। योजना के तहत पाछु तीन साल म राज्य सरकार डहार ले राज्य लघु वनोपज संघ के माध्यम ले बाईस हजार ले जादा मेघावी छात्र-छात्रा मन ल ल बीस करोड़ दस लाख छप्पन हजार रूपिया ले जादा के छात्रवृत्ति दे गेहे।
लता खापर्डे-निधन
छत्तीसगढ़ के सुप्रसिद्ध लोक कलाकार लता खापर्डे के पाछु रतिहा राजनांदगांव म निधन होगे। मुख्यमंत्री भूपेश बघेल अउ संस्कृति मंत्री अमरजीत भगत ह ओमन के निधन उपर दुख व्यक्त करीन हे। मुख्यमंत्री ह किहीन कि लता खापर्डे ह छत्तीसगढ़ी बोली अउ लोक संगीत के उत्थान बर जउन करीन, ओला कभू भुलाय नइ जा सकय।
बतादन कि लता खापर्डे ह सात साल के उमर ले रामचंद्र देशमुख के लोक कला मंच चंदैनी गोंदा ले बाल कलाकार के रूप म सुरूवात करे रिहीन। ओखर बाद ओमन खुमान लाल साव के चंदैनी गोंदा म गायन अउ अभिनय करीन। उहें, हबीब तनवीर के नया थियेटर के माध्यम ले जर्मनी अउ रूस म छत्तीसगढ़ी लोक कला ल पहुंचईन। संघरा लता खापर्डे ह फिलिम पीपली लाईव म अपन सशक्त अभिनय के लोहा मनवईन।
माओवादी गिरफ्तार
बीजापुर जिला म सुरक्षा बल ह एक माओवादी सिविर ल ध्वस्त करे के संग विस्फोटक सामग्री ल ले जावत ओमन के दू सहयोगी ल गिरफ्तार करे हे। मिले जानकारी अनुसार जिला पुलिस बल अउ डीआरजी के संयुक्त टीम ह आवापल्ली अउ फरसेगढ़ थाना क्षेत्र म ए कार्रवाई करीन। गिरफ्तार माओवादी सहयोगी मन करा ले कार्डेक्स वायर, जिलेटीन रॉड अउ डेटोनेटर बरामद करे गेहे।
उहें, राजनांदगांव जिला के सीमा ले लगे गढ़चिरौली पुलिस की समक्ष एक महिला समेत दू झिन माओवादी मन आत्मसमर्पण करीन हे। एमन उपर छह लाख रूपिया के इनाम घोसित रिहीस।
बस्तर दशहरा
पचहत्तर दिन तक चलने वाला विश्व प्रसिद्ध बस्तर दशहरा ल लेके कोंडागांव कलेक्टर दीपक सोनी ह आज जिला के दूसर जघा ले पहुंचे मांझी चालकी, मेम्बर-मेम्बरीन अउ गायता-पुजारी मन करा बइठका करीन। बइठका म बस्तर दशहरा म सामिल होय अउ जरूरी व्यवस्था के संबंध म चरचा करे गीस। ए दउरान बताय गीस कि बस्तर दशहरा म सामिल होय बर देव विग्रह के संग मांझी चालकी अउ पुजारी चार अक्टूबर के जगदलपुर जाही। बइठका म कलेक्टर एमन ल देवगुड़ी के विकास, एनीमिया ले मुक्ति अउ जंगल के सुरक्षा के संबंध म चरचा करके ए दिसा म सहभागिता निभाय के आग्रह करीन।
रेरा-कार्यशाला
रियल एस्टेट प्रमोटर मन बर काली ले तीस सितंबर तक रायपुर स्थित छत्तीसगढ़ भू-संपदा विनियामक प्राधिकरण-रेरा कार्यालय म प्रशिक्षण सह-कार्यशाला के आयोजन करे जाही।
रेरा के रजिस्ट्रार डॉक्टर अनुप्रिया मिश्रा ह बतईन कि रियल एस्टेट के प्रोजेक्ट पंजीयन बर प्रमोटर मन ल प्रोजेक्ट के संबंध म ऑनलाइन आवेदन करना जरूरी हरय। ओमन बतईन कि रायपुर संभाग के प्रमोटर्स के प्रतिनिधि मन बर कार्यशाला तेईस अउ छब्बीस सितंबर के होही। उहें, बिलासपुर संभाग बर सत्ताईस सितंबर, दुरूग संभाग बर अट्ठाईस, सरगुजा संभाग बर उनतीस अउ बस्तर संभाग बर तीस सितंबर के तारीख निर्धारित करे गेहे।
उच्च रक्तचाप-पुरस्कार
देस म ब्लड प्रेसर के बीमारी ले निपटे म सराहनीय प्रयास बर भारत ल संयुक्त राष्ट्र पुरस्कार ले सम्मानित करे गेहे। केन्द्रीय स्वास्थ्य मंत्री मनसुख मांडविया ह ट्वीट संदेस म किहीन कि उच्च रक्तचाप नियंत्रण कार्यक्रम ह जम्मों झन बर स्वास्थ्य सेवा सुनिश्चित करे के प्रधानमंत्री नरेन्द्र मोदी के मिशन ल अच्छा बनाय हे।
संक्षिप्त समाचार
अउ अब थोरकुन समाचार सार म –
– पत्र सूचना कार्यालय ह सोशल मीडिया म चलत केन्द्रीय कर्मचारी मन ल महंगाई भत्ता के अतिरिक्त किश्त दे जाय संबंधी परिपत्र ल फर्जी बताय हे।
– दाऊ वासुदेव चंद्राकर कामधेनु विश्वविद्यालय दुरूग के अंतर्गत संचालित कालेज मन म आने-आने पाठ्यक्रम बर प्रवेस प्रक्रिया चालू हरय। एखर बर पंजीकृत अभ्यर्थी काली तेईस सितंबर तक दस्तावेज सत्यापन अपन नजदीक के वेटनरी अउ मत्स्यिकी पॉलिटेक्निक म करा सकथे।
– छत्तीसगढ़ लोक सेवा आयोग डहार ले भृत्य परीक्षा पच्चीस सितंबर के मंझनिया बारह बजे ले आयोग कोति ले निर्धारित परीक्षा केन्द्र मन म संचालित करे जाही।
– जांजगीर-चांपा जिला के कचंदा गांव म तालाब म डूबे ले एक महिला के मउत होगे।
– उहें, कबीरधाम जिला के भोरमदेव तालाब म संगीसाथी मन करा नहाय गे एक युवक के डूबे ले मउत होगे।
अउ
– राजनांदगांव जिला के अंबागढ़ चौकी एनीकट म नहाय गे दू झिन युवक नदी म बोहा गे। एमा ले एक युवक तउर के बाहिर निकल गीस, जबकि दूसरा के तलास जारी हरय।