वन कर्मचारी-हड़ताल
हड़ताल करत वन विभाग के दैनिक वेतनभोगी कर्मचारी मनके जघा नवा कर्मचारी मनके नियुक्ति करे जाही। एला लेके वन विभाग के सचिव आर. संगीता ह सबो विभाग के प्रमुख मन ल पत्र लिखीन। सुश्री संगीता ह किहीन कि जादा समय ले न आने वाला कर्मचारी मनके कारण जनहित ले जुड़े काम प्रभावित होवत हे। एला देखत हुए नवा करमचारी मन ल काम म लेके प्रक्रिया सुरू करे जाय।
बतादन कि राज्य के करीब सवा लाख दैनिक वेतनभोगी कर्मचारी अपन मांग ल लेके हड़ताल म हे। ए हड़ताल म वन विभाग के करीब सात हजार कर्मचारी सामिल होय रिहीन, जेमा ले ढाई हजार कर्मचारी अभी तक काम म नइ लहुटे हे। ए संबंध म सामान्य प्रशासन विभाग ह सबो विभाग प्रमुख ल पत्र लिखके काम म न आने वाला दैनिक वेतन भोगी या संविदा कर्मचारी मन ल हटा के उंखर जघा म नवा नियुक्ति करे के आदेस देहे।
भाजपा सेवा पखवाड़ा
भारतीय जनता पार्टी डहार ले प्रधानमंत्री नरेंद्र मोदी के जन्मदिवस के बेरा म छत्तीसगढ़ के संग देशभर म सेवा पखवाड़ा मनाये जात हे। इही कड़ी म मुंगेली के जिला भाजपा कार्यालय म आयोजित रक्तदान शिविर म सत्तर ले जादा युवा मन रक्तदान करीन। ए सिविर दू अक्टूबर तक चलही। ए बेरा म विधायक पुन्नूलाल मोहले अउ जिला भाजपा अध्यक्ष शैलेष पाठक के संग आने आने जनप्रतिनिधि मौजूद रीहिन।
भेंट-मुलाकात
भेंट-मुलाकात कारीकरम के तहत मुख्यमंत्री भूपेश बघेल कुछ दिन ले बालोद जिला के दउरा म हे। ए दउरान मुख्यमंत्री ह डौंडीलोहार क्षेत्र के विकास बर एक सौ उनसठ करोड़ रूपिया के आने-आने विकास कार्य के लोकार्पण अउ उद्घाटन करीन। एखर अलावा श्री बघेल ह गुरूर, जगन्नाथपुर अउ बालोद क्षेत्र के विकास बर कई घोषणा करीन।
जगन्नाथपुर म लोगन मन ले चर्चा करत हुए मुख्यमंत्री ह किहीन कि सिंचाई गांव औराभाठा ल राजस्व गांव घोसित करे जाही। ओमन आज बालोद म नवा बने इंडोर स्टेडियम के सुभारंभ घलो करीन। एखर अलावा मुख्यमंत्री ह समीक्षा बैठक लेके अधिकारी मन ल निरदेस दीन हे कि ओमन निर्माण कार्य के गुणवत्ता के ख्याल रखें। अवैध रूप ले सराब के बिक्री म रोक लगाय। संगेसंग श्री बघेल ह गुरूर क्षेत्र म गिरत जलस्तर उपर चिंता जतईन। ओमन ह राजस्व प्रकरण के जल्दी निराकरण करे के निरदेस दीन।
बीएसएफ-दौरा
सीमा सुरक्षा बल बीएसएफ के अतिरिक्त महानिदेशक आशीष गुप्ता ह कांकेर जिला के भानुप्रतापपुर के सामरिक मुख्यालय मुल्ला कैंप अउ माओवाद प्रभावित क्षेत्र के दउरा करीन। ए दउरान ओमन मुल्ला कैंप म पर्यावरण संरक्षण ल बढ़ावा दे बर पौधारोपण करीन अउ सैनिक सम्मेलन म सामिल होईन। श्री गुप्ता ह जवान मन ले माओवाद उन्मूलन बर चलत ऑपरेसन के दउरान सावधानी बरते अउ जादा ले जादा सफलता हासिल करे के आह्वान करीन। ओमन ह माओवाद परभावित क्षेत्र म तैनात अधिकारी मन ल निरदेस दीन कि ओ इलाका म रहवइया आदिवासी के सुरक्षा ल ध्यान रखत हुए उंखर मदद करें।
माओवादी-आत्मसमर्पण
सुकमा जिला म पांच माओवादी मन ह आत्मसमर्पण करे हे। ए माओवादी मन ह केन्द्रीय रिजर्व पुलिस बल-सीआरपीएफ के उप पुलिस महानिरीक्षक राजीव कुमार ठाकुर अउ पुलिस अधीक्षक सुनील शर्मा के आगू कोलाईगुड़ा कैम्प म आत्मसमर्पण करीन। ए जम्मों माओवादी भेज्जी इलाका म सक्रिय रिहीन।
राजू श्रीवास्तव-निधन
प्रसिद्ध हास्य कलाकार राजू श्रीवास्तव के आज नई दिल्ली के एम्स अस्पताल म निधन होगे। ओमन अंठावन बछर के रिहीस। पाछु बयालीस दिन ले ओमन अस्पताल म वेंटीलेटर म रिहीन। पाछु दस अगस्त के जिम म कसरत करे के दउरान श्री श्रीवास्तव ल दिल के दौरा पड़े रिहीस। राष्ट्रपति द्रौपदी मुर्मू अउ प्रधानमंत्री नरेन्द्र मोदी के संग देस के जाने-माने लोगन मन उंखर निधन म सोक जतईन।
राज्यपाल अनुसुईया उइके अउ मुख्यमंत्री भूपेश बघेल ह राजू श्रीवास्तव के निधन म दुख व्यक्त करे हे। ओमन ह किहीन कि श्री श्रीवास्तव ल ए देस ल हसना अउ खुस रहना सिखईस। उंखर निधन देस बर बहुत बड़े क्षति हरय।
सुपेबेड़ा-मौत
गरियाबंद जिला के सुपेबेड़ा म पाछु दू दिन म दू मनखे के मउत होगे। उहां के रहवइया मनके कहना हे कि ए मनखे मनके मउत किडनी के बीमारी ले होईस। फेर, डॉक्टर मनके अनुसार दूनों में से एक ल लंग कैंसर अउ दूसर ल सुगर के संग आने-आने बीमारी रिहीस।
जीपीएफ खाता
जनरल प्रोविडेंट फंड-जीपीएफ खाता ले उनसठ लाख रूपिया के ठगी के मामला म बिलासपुर एएसपी ऑफिस के फंड शाखा प्रभारी के पद म पदस्थ एएसआई मधुशिला सुरजाल ल निलंबित अउ हेड कांस्टेबल संजय श्रीवास्तव ल बर्खास्त कर दे गेहे। दूनों पुलिसकर्मी उपर मिलीभगत से ठगी करे के आरोप हे। सिविल लाइन थाना म आरोपी मनके खिलाफ मामला दर्ज करे गेहे। दू दिन पहिली ही पुलिस ह हेड कांस्टेबल संजय श्रीवास्तव ल गिरफ्तार करीन। उहें, मधुशिला सुरजाल फरार हे, जेखर पुलिस तलाश करत हे।
जानबा के मुताबिक मधुशिला सुरजाल बिलासपुर एएसआई आफिस के फंड साखा म लंबा समय ले काम करत रिहीन। ए दउरान ओ ह संजय श्रीवास्तव के संग मिलके जीपीएस अउ आने मद ले रकम निकाले बर पुलिस करमचारी मनके आवेदन म कूटरचना करीन। एखर जरिये ओ ह आवेदन म मांगे गे रकम ले जादा रकम निकाल के गड़बड़ी करीस। बतादन कि एसएसपी पारूल माथुर जेन समय नियमित तौर म फाइल के जांच करत रिहीन, तभे ओमन ल दस्तावेज मन म कतकोन कांट-छांट दिखीस, जेखर बाद ए मामला के खुलासा होईस। ए फर्जीवाड़ा बर आरोपी मन ह एसएसपी पारूल माथुर के फर्जी हस्ताक्षर के अलावा बैंक मनके फर्जी सील के इस्तेमाल करीन।
उहें, भिलाई नगर के रिसाली क्षेत्र म नौकरी लगाय के नाम म दस लोगन मन ले दस लाख रूपिया के ठगी के मामला म नेवई पुलिस ह एक आरोपी ल गिरफ्तार करे हे। पुलिस के अनुसार आरोपी ह रिसाली नगर पालिका निगम कार्यालय म नौकरी लगाय के नाम म दू साल पहिली लोगन मन ले पइसा ले रिहीस।
एखर अलावा भिलाई नगर निगम थाना क्षेत्र के तालपुरी म अज्ञात आरोपी ह क्रेडिट कार्ड नवीनीकरण के नाम म एक बुजुर्ग के खाता ले चार लाख अटहत्तर हजार रूपिया ले जादा पइसा निकाल लेहे।
बैंडमिंटन/चेस-स्पर्धा
राजधानी रायपुर म मुख्यमंत्री ट्रॉफी इंडिया इंटरनेशनल बैडमिंटन चैलेंज के तहत मुकाबला होवत हे। स्पर्धा के पहिली दिन काली पुरूष, महिला अउ मिश्रित युगल के पहिली दौर के मैच खेले गीस। ए स्पर्धा म भारत के अलावा श्रीलंका, थाईलैंड, कनाडा, अमेरिका अउ मलेशिया के संग ग्यारह देश के खिलाड़ी सामिल होवत हे। पच्चीस सितंबर तक चलइया ए स्पर्धा के आयोजन मोवा स्थित आई स्पोर्ट्स बैडमिंटन एरिना म करे जात हे।
उहें, रईपुर म छत्तीसगढ़ चीफ मिनिस्टर ट्रॉफी इंटरनेशनल ग्रैंडमास्टर्स चेस टूर्नामेंट के आयोजन घलो करे जात हे। स्पर्धा के दूसरइया दिन काली राष्ट्रीय अउ अंतर्राष्ट्रीय स्तर के खिलाड़ी मन ह रोचक मुकाबला म अपन-अपन मैच जीतके अगला दौर म प्रवेस करीन। ए टूर्नामेंट म भारत के संग रशिया, यूक्रेन, जॉर्जिया, य.ूएस.ए., कजाकिस्तान के अलावा पन्द्रह देस के पांच सौ ले जादा खिलाड़ी हिस्सा लेवत हे।
अउ अब पेस हे मौसम के हाल…
मौसम विभाग ह छत्तीसगढ़ के संग सीमावर्ती राज्य ओड़िसा, मध्यप्रदेश अउ महाराष्ट्र के विदर्भ म अवइया दू दिन तक जादा पानी गिरे के चेतावनी दीन। बंगाल के खाड़ी अउ उत्तरी ओड़िसा के संग पश्चिम बंगाल तट म हवा के कम दबाव के क्षेत्र बने हुए हे।
उहें, एक निम्नदाब के क्षेत्र उत्तर-पूर्व मध्यप्रदेश अउ उंखर आसपास हवय। एखर असर ले प्रदेस म काली कुछ जघा म हल्का ले कम पानी गिरे या गरज-चमक के संग छींटा पड़े के संभावना हे। ए दउरान एक-दू जघा म आकाशीय बिजली गिर सकत हे।