राज्यपाल अनुसुईया उइके ह युवा मन ले आह्वान करीन हे कि ओमन जीवन म अपन लक्ष्य निर्धारित करके ओला प्राप्त करे बर कठिन परिश्रम के संकल्प लेवय। ए संकल्प ले आप सफल होहू अउ राष्ट्र के विकास म अपन योगदान दूहू। ए बात राज्यपाल ह आज भारतीय उद्योग परिसंघ कोति ले रईपुर के पंडित दीनदयाल उपाध्याय ऑडिटोरियम म राखे गे युवा उत्सव कारीकरम म किहीन। ओमन किहीन कि केन्द्र सरकार ह आत्मनिर्भर भारत के जउन संकल्पना करे हे, ओला पूरा करे म भारत के युवा उद्यमी मनके बड़का भूमिका होही। ए दउरान राज्यपाल ह चयनित औद्योगिक इकाई अउ परिसंघ के विशिष्ट सदस्य मन ल पुरस्कार प्रदान करीन।
गौठान-आजीविका केन्द्र
राज्य के ग्रामीण क्षेत्र के चयनित गौठान मन ल आजीविका केन्द्र के रूप म विकसित करे जाही। एखर बर उहां महात्मा गांधी रूरल इंडस्ट्रीयल पार्क बनाय जाही। एखर तहत प्रत्येक विकासखंड म दू ठिन इंडस्ट्रीयल पार्क बनाय जाही। ए पार्क के सिलान्यास अउ लोकार्पण दू अक्टूबर के गांधी जयंती के मउका म करे जाही। मुख्य सचिव अमिताभ जैन ह जम्मों संभागायुक्त, कलेक्टर अउ जिला पंचायत के मुख्य कार्यपालन अधिकारी मन ल रूरल इंडस्ट्रीयल पार्क के स्थापना अउ उहां गतिविधि मनके संचालन के संबंध म दिसा-निरदेस दीन हे।
क्वांटिफाइबल डाटा आयोग
राज्य के जनसंख्या म अन्य पिछड़ा वर्ग अउ आर्थिक रूप ले कमजोर वर्ग के सर्वें बर छत्तीसगढ़ क्वांटिफाइबल डाटा आयोग के पोर्टल आज ले फेर सुरू होगे हे। ए वर्ग के जउन मनखे मन अब तक पंजीयन नइ कराय हे, ओमन आयोग के पोर्टल म पंजीयन करा सकत हे। आयोग के सचिव ह संबंधित वर्ग के लोगन मन ले पोर्टल या मोबाइल ऐप के माध्यम ले ए आखिरी मउका के लाभ उठाके अपन अउ अपन परिवार के सदस्य मन के पंजीयन कराय के अपील करीन हे।
रेलवे स्वच्छता पखवाड़ा
भारतीय रेलवे कोति ले ‘‘स्वच्छ रेल-स्वच्छ भारत‘‘ के तहत आज ले स्वच्छता पखवाड़ा के आयोजन करे जात हे। दू अक्टूबर तक चलइया ए पखवाड़ा के दउरान दक्षिण पूर्व मध्य रेलवे म हरेक दिन निर्धारित थीम के अनुसार आने-आने कारीकरम राखे जाही।
रईपुर रेलमंडल म स्वच्छता पखवाड़ा के सुभारंभ के मउका म प्रभातफेरी निकाले गीस। ए मउका म मंडल रेल प्रबंधक कार्यालय म मंडल रेल प्रबंधक श्यामसुंदर गुप्ता ह अधिकारी अउ करमचारी मन ल स्वच्छता के सपथ दिलईन। उहें, स्वच्छता जागरूकता बर रईपुर मंडल के स्काउट-गाइड डहार ले नुक्कड़ नाटक प्रस्तुत करे गीस।
उहें, स्वच्छता बर लोगन मन ल जागरूक करे खातिर प्रदेस म काली ले ‘‘स्वच्छता ही सेवा अभियान‘‘ सुरू होईस। इही कड़ी म कोंडागांव जिला के कलेक्टर दीपक सोनी अउ जिला पंचायत उपाध्यक्ष ह ‘‘स्वच्छता ही सेवा रथ‘‘ ल हरा झंडा दिखाके रवाना करीन।
मल्टीमीडिया चित्र प्रदर्शनी
सूचना अउ प्रसारण मंत्रालय के अंतर्गत केन्द्रीय संचार ब्यूरो के रईपुर प्रादेशिक कार्यालय डहार ले दुरूग के स्वामी विवेकानंद सभागार म आजादी के अमृत महोत्सव बिसय उपर राखे गे दू दिन के मल्टीमीडिया चित्र प्रदर्शनी के काली समापन होईस। कारीकरम के आखिरी दिन प्रादेशिक लोक संपर्क कार्यालय के प्रमुख शैलेष फाये ह सूचना अउ प्रसारण मंत्रालय कोति ले जारी करे गे एक मोबाइल गेम ‘‘आजादी क्वेस्ट‘‘ के बारे म विद्यार्थी मन ल जानकारी दीन। एखर बाद प्रश्नमंच, चित्रकला, भासन अउ मेहंदी के प्रतियोगिता राखे गीस, जेमा सहर के आने-आने विद्यालय अउ महाविद्यालय मनके सौ ले जादा विद्यार्थी सामिल होईन।
ननकीराम कंवर-भूख हड़ताल
प्रदेस के पूर्व गृहमंत्री अउ रामपुर विधायक ननकीराम कंवर सड़क निर्माण अउ कथरीमाल सड़क निर्माण बर अधिग्रहित भूमि के मुआवजा के मांग ल लेके कोरबा म अनिश्चितकालीन भूख हड़ताल म बइठ गेहे। श्री कंवर अपन समर्थक अउ भाजपा नेता मन संग उरगा चउक म धरना म बइठ गेहे। श्री कंवर ह किहीन कि कथरीमाल सड़क निर्माण बर जमीन के अधिग्रहण करे कई साल होगे हे। ओमन किहीन कि प्रभावित किसान अउ ग्रामीण मन ल मुआवजा के रासि दे जाय म ही आंदोलन वापस ले जाही।
बीएलओ ई-पत्रिका-विमोचन
भारत निर्वाचन आयोग डहार ले बूथ लेवल ऑफिसर-बीएलओ मन ले प्रत्यक्ष संवाद करे खातिर ‘‘बीएलओ ई-पत्रिका‘‘ के विमोचन करे गेहे। आयोग कोति ले अनुभव साझा करे बर काली देसभर के बीएलओ के संग अपन तरह के पहिली संवाद सत्र के आयोजन करे गीस। एमा आने-आने राज्य अउ केन्द्रसासित प्रदेस मनके साढ़े तीन सौ ले जादा बीएलओ वीडियो कान्फ्रेंसिंग के माध्यम ले नई दिल्ली म राखे गे कारीकरम म प्रत्यक्ष रूप ले जुड़ीन।
कारीकरम म निर्वाचन आयुक्त अनूप चंद्र पांडेय ह किहीन कि ए ई-पत्रिका बूथ स्तर तक अनुदेस मन ल साझा करे, फीडबैक अउ सफलता के कहानी मन ल बताय अउ अंतर-राज्यीय सर्वोत्त पद्धति ल साझा करे बर भारत निर्वाचन आयोग ल एक प्लेटफॉर्म उपलब्ध कराथे।
संयुक्त प्रवेश परीक्षा-परिणाम
राष्ट्रीय परीक्षा एजेंसी ह केन्द्रीय विश्वविद्यालय मन म स्नातक पाठ्यक्रम बर संयुक्त प्रवेश परीक्षा – दू हजार बाईस के परिणाम घोसित कर देहे। आधिकारिक वेबसाइट म परिणाम देखे जा सकत हे। ए परीक्षा देस के दू सौ उनसठ अउ विदेस के दस सहर मन म पन्द्रह जुलाई ले तीस अगस्त के बीच संचालित करे गे रिहीस।
महिला छात्रवृत्ति कार्यक्रम
विप्रो कन्ज्यूमर केयर ह छत्तीसगढ़ म महिला छात्रवृत्ति कारीकरम के सातवां संस्करण के सुरूवात करे हे। एखर उद्देश्य प्रदेस के कमजोर वर्ग के जउन बालिका बारहवीं के बाद उच्च सिक्षा प्राप्त करना चाहत हे, ओमन बर आर्थिक सहायता प्रदान करना हरय। ए कारीकरम बर पात्र अभ्यर्थी मन ल तीस सितंबर तक आवेदन करना होही।
चेस टूर्नामेंट
छत्तीसगढ़ के राजधानी रईपुर म उन्नीस ले अट्ठाईस सितंबर तक इंटरनेशनल ग्रैंडमास्टर्स चेस टूर्नामेंट के आयोजन करे जाही। ए टूर्नामेंट म विश्व के पन्द्रह देस के पांच सौ ले जाद शतरंज खिलाड़ी, सौ ले जादा अनुभवी मास्टर्स के मार्गदर्शन म हिस्सा लीहीं। ए प्रतियोगिता खेल अउ युवा कल्याण विभाग, अखिल भारतीय शतरंज महासंघ अउ छत्तीसगढ़ ओलंपिक एसोसिएशन के संयुक्त तत्वावधान म करे जाही। ए टूर्नामेंट म भाग ले बर रसिया, उक्रेन, जॉर्जिया, यूएसए, कजाकिस्तान, मंगोलिया, पोलैंड वियतनाम, कोलंबिया, ईरान, श्रीलंका, बांग्लादेश, जिम्बाब्वे अउ नेपाल समेत पन्द्रह देस के खिलाड़ी पंजीयन कराय चुके हवय। ए टूर्नामेंट ले देस अउ प्रदेस के रेटेड खिलाड़ी मन ल अपन रेटिंग सुधारे के मउका मिलही।
चेस टूर्नामेंट ले जुड़े अधिकारी मन ह बतईन कि ए प्रतियोगिता के विजेता खिलाड़ी मन ल छत्तीसगढ़ चीफ मिनिस्टर ट्रॉफी ले पुरस्कृत करे जाही। ए टूर्नामेंट दू कैटेगरी मास्टर्स अउ चैलेंजर्स के रूप म होही। एमा मास्टर्स कैटेगरी म तेईस लाख रूपिया अउ ट्रॉफी, उहें चैलेंजर्स कैटेगरी म बारह लाख रूपिया अउ ट्रॉफी दे जाही। ए टूर्नामेंट के मैच के सीधा प्रसारण करे जाही।
36वें नेशनल गेम्स
छत्तीसवां नेशनल गेम्स के आयोजन गुजरात के पांच सहर -गांधीनगर, अहमदाबाद, राजकोट, सूरत अउ बड़ोदरा म उनतीस सितंबर ले बारह अक्टूबर तक करे जाही। एमा छत्तीसगढ़ के दू सौ तीस ले जादा खिलाड़ी अउ अधिकारी इक्कीस ठिन खेल स्पर्धा मन म हिस्सा लीही। नेशनल गेम्स बर छत्तीसगढ़ ओलंपिक एसोसिएशन डहार ले डॉक्टर अतुल शुक्ला ल टीम के चीफ द मिशन नियुक्ति करे गेहे।
मुख्यमंत्री अउ छत्तीसगढ़ ओलंपिक संघ के अध्यक्ष भूपेश बघेल अउ महासचिव गुरूचरण सिंह होरा ह नेशनल गेम म भाग लेवइया जम्मों खिलाड़ी मन ल बधाई अउ सुभकामना दीन हे।
सोंढूर जलाशय-नौका विहार
धमतरी जिला के सोंढूर जलाशय म नौका विहार के सुरूवात होगे हे। एखर सुभारंभ काली सिहावा विधायक अउ मध्य क्षेत्र विकास प्राधिकरण के उपाध्यक्ष डॉक्टर लक्ष्मी धु्रव ह करीन। ए मउका म उदंती सीतानदी टाइगर रिजर्व के निदेशक वरूण जैन ह बतईन कि सोंढूर जलाशय क्षेत्र के अइसन मछुवारा जेन मन मछली पकड़ के अपन आजीविका चलावत हे, ओमन ल रोजगार के नवा अवसर ले जोड़त जलाशय म पैडल बोट के संचालन करे जात हे। एखर ले जिहां पर्यटक इक्रो फेंडली पार्क के आनंद ले सकही। उहें, आसपास के गांव के युवा मन ल रोजगार घलो मिलही।