राष्ट्रीय स्वयंसेवक संघ के छत्तीसगढ़ के राजधानी रईपुर म चलत अखिल भारतीय समन्वय बइठका आज सिरा गे। तीन दिन तक चले ए बइठका के अखिरी दिन आज मीडिया ले गोठबात करत संघ के सह सरकार्यवाह डॉक्टर मनमोहन वैद्य ह बतईन कि राष्ट्रीय स्वयंसेवक संघ ले प्रेरित छत्तीस ठिन संगठन मनके प्रमुख पदाधिकारी के बइठका म प्रमुख रूप ले ब्रांडेड के जघा म स्थानीय उत्पाद ल कइसन ढंग ले आगू लाय जाय अउ संगेसंग घरेलू उत्पाद के जघा म रोजगार वाले नवा आर्थिक भारत इंडेक्स तियार करे, जैविक खेती ल बढ़ावा दे, कृषि सिक्षा म बदलाव के संगेसंग भारतीय विद्यापीठ मन म हिन्दूत्व ले जुड़े पाठ्यक्रम तियार करे उपर घलो बइठका म गोठबात होईस अउ संगेसंग न्यायालय मन म भारतीय भासा मन म कामकाज ल बढ़ावा दे अउ अदालत के फइसला ल भारतीय भासा म करे जाय उपर घलो गोठबात होईस।
कांग्रेस नेता राहुल गांधी के भारत जोड़ो यात्रा ले जुड़े एक ठिन सवाल के जवाब म डॉक्टर वैद्य म किहीन कि यदि प्रेम के बजाय नफरत ल आधार बनाके जोड़े के प्रयास करे जाही त ओ ह सिरिफ एक ठिन राजनीतिक नौटंकी के रूप म देखे जाही।
राष्ट्रीय स्वयंसेवक संघ के अखिल भारतीय समन्वय बइठका पाछु दस सितंबर ले सुरू होय रिहीस, जेमा संघ के सरसंघचालक डॉक्टर मोहन भागवत अउ सरकार्यवाह दत्तात्रेय होसबाले के संगेसंग संघ के पांच सह सरकार्यवाह अउ संघ ले प्रेरित छत्तीस संगठन के प्रमुख पदाधिकारी मन भाग लीन।
दुर्घटना
कोरबा जिला म आज बिहनिया होय एक ठिन सड़क दुर्घटना म सात झन लोगन के मउत होगे अउ तीन झिन मनखे मन घायल होगे, जेमा ले दू झिन के हालत गंभीर बने हे।
जानबा के मुताबिक ए दुर्घटना बांगो थाना क्षेत्र के मरईघाट के तीर होईस। राष्ट्रीय राजमार्ग क्रमांक-एक सौ तीस म रईपुर ले सीतापुर कोति जावत एक ठिन बस ह मड़ई के तीर रद्दा म खड़े ट्रेलर ले टकरा गे। बस ह जोरदरहा रफ्तार म चलत रिहीस। घटना म घायल तीन झिन लोगन मन ल पोड़ी अउ कोरबा के जिला अस्पताल म भर्ती कराय गेहे।
मुख्यमंत्री ह ए घटना म सात झिन लोगन के मउत म गहरा दुख जताय हे। मुख्यमंत्री ह ए घटना म मृत लोगन मनके परिवार वाले मन ल जरूरी मदद अउ घायल मनके बने इलाज के व्यवस्था करे के निरदेस जिला प्रशासन ल देहे।
ऐति, दुरूग जिला के भिलाई म सेंट्रल एवेन्यू रोड म पाछु रतिहा गणेश विसर्जन के दउरान होय घटना म दू झिन लोगन के मउत होगे।
भाजपा-कार्यकारिणी
भारतीय जनता पार्टी के प्रदेस अध्यक्ष अरूण साव ह प्रदेस के नवा कार्यकारिणी के घोसना कर देहे। एमा आठ झिन प्रदेस उपाध्यक्ष बनाय गेहे, जेमा ले तीन झिन माईलोगिन घलो सामिल हे। श्री साव ह मीडिया टीम म घलो बदलाव करे हे। अब मुख्य प्रवक्ता अजय चंद्राकर होही। उहें, तीन झिन नवा प्रवक्ता बनाय गेहे। एमन ल मिलाके कुल बारह झिन भाजपा के गतिविधि के बारे म जानबा मीडिया ल दीहीं। एखरे संग भाजपा के आने-आने मोर्चा के अध्यक्ष मन घलो बदले गेहे अउ चार झिन नेता मन ल प्रदेस महामंत्री बनाय गेहे। संगेसंग रवि भगत ल भारतीय जनता युवा मोर्चा के प्रदेस अध्यक्ष बनाय गेहे।
स्मार्ट लैब
प्रदेस के चौदह ठिन सहर मन म इही साल पैथालॉजी अउ रेडियोलॉजी जांच के सुविधा फीस के आधा रेट म करे जाही। एखर बर स्मार्ट लैब तियार करे जात हे, जेमा रईपुर, बीरगांव, धमतरी, दुरूग, राजनांदगांव, भिलाई-रिसाली, चरौदा, जगदलपुर, बिलासपुर, कोरबा, रायगढ़, अंबिकापुर अउ चिरमिरी सामिल हे। अक्टूबर महीना ले सुरू होवइया ए पैथालॉजी लैब के माध्यम ले करीबन उनसठ लाख ले जादा लोगन मन ल एक्स-रे, सिटी स्कैन, एम.आर.आई. अउ पैथालॉजी जांच के सुविधा मिल सकही। दूसर पारी म प्रदेस के तिरालीस नगर पालिका अउ ओखर बाद एक सौ तेरह नगर पंचायत मन म स्मार्ट लैब खोले जाही।
भेंट-मुलाकात
भेंट-मुलाकात कारीकरम के तहत मुख्यमंत्री ह आज रायगढ़ जिला के गांव राजपुर पहुंचीन। ए दउरान ओमन गांव के लोगन मन ले मिलके उंखर समस्या ल सुनीन। ए मउका म मुख्यमंत्री ह प्राथमिक स्वास्थ्य केन्द्र राजपुर ल सामुदायिक स्वास्थ्य केन्द्र बनाय, बसंतपुर अउ घटगांव म नवा प्राथमिक स्वास्थ्य केन्द्र खोले के घोसना करीन। संगेसंग लैलूंगा ले पोतरा रद्दा म खारून नंदियां उपर नवा पुलिया बनाय, कटंगपारा ले सलिहापारा पहुंच मार्ग उपर खारून नंदियां म नवा पुलिया बनाय अउ लैलूंगा के शासकीय कॉलेज म नवा कमरा बनाय के संगेसंग लैलूंगा म इंडोर स्डेटियम बनाय के घोसना करीन। मुख्यमंत्री ह राजपुर के हायर सेकेंडरी अउ हाई स्कूल के नाव ल स्वर्गीय रूपधर बेहरा के नाव म करे के घोसना करीन।
किसान मोर्चा-आरोप
भाजपा किसान मोर्चा के प्रदेस प्रभारी अउ प्रवक्ता संदीप शर्मा ह किहीन हे कि राज्य सरकार ह पंजीकृत किसान मन ल धान बेचे के बाद अंतर के राशि के भुगतान अब तक नइ करे हे। ओमन किहीन कि पंजीकृत किसान मनके खाता म राजीव गांधी न्याय योजना के तहत अंतर के राशि के दू किस्त नइ दे गेहे।
सुप्रीम कोर्ट-नान मामला
उच्चतम न्यायालय के सॉलिसिटर जनरल तुषार मेहता के गैरहाजिर होय के सेती छत्तीसगढ़ के नागरिक आपूर्ति निगम घोटाला मामला म आज होवइया सुनवई ल एक हफ्ता बर बढ़ा दे गेहे। अब सुनवई ह उन्नीस सितंबर के होही। खबर के मुताबिक प्रवर्तन निदेशालय-ईडी ह आईएएस डॉक्टर आलोक शुक्ला अउ अनिल टुटेजा ले पूछताछ करे बर अनुमति अउ ए मामला के सुनवाई ल छत्तीसगढ़ उच्च न्यायालय बिलासपुर के संगेसंग आने प्रदेस म करे बर याचिका दायर करे रिहीन।
सत्य सांई संजीवनी अस्पताल
मुख्यमंत्री भूपेश बघेल ह नवा रईपुर स्थित श्री सत्य सांई संजीवनी अउ बाल हॉस्पिटल के पहिली वर्षगांठ के कारीकरम म सामिल होईन। ए मउका म ओमन ए अस्पताल ल मानवता के सेवा म आगू आय के संगेसंग अस्पताल प्रबंधन डहार ले करे जात कामकाज के प्रसंसा करीन। मुख्यमंत्री ह किहीन कि ए अस्पताल म एक साल के दउरान दस हजार ले जादा गर्भवती माता मनके इलाज अउ करीबन साढ़े पांच सौ माईलोगिन मनके सुरक्षित प्रसव कराय गेहे। ओमन किहीन कि श्री सत्य सांई अस्पताल म ह्दय रोग ले पीड़ित लइका मनके मुफत म इलाज करे जात हे।
रोड सेफ्टी वर्ल्ड सीरीज
नवा रईपुर के परसदा स्थित शहीद वीरनारायण सिंह अंतर्राष्ट्रीय क्रिकेट स्टेडियम सत्ताईस सितंबर ले एक अक्टूबर तक रोड सेफ्टी वर्ल्ड सीरीज क्रिकेट टूर्नामेंट होही। ए दउरान सेमीफाइनल अउ फाइनल मैच होही। मुख्य सचिव अमिताभ जैन ह आज वीडियो कॉन्फ्रेंसिंग के माध्यम ले रोड सेफ्टी वर्ल्ड सीरीज क्रिकेट टूर्नामेंट के तियारी के बारे म बइठका लीन अउ अधिकारी मन ल आयोजन ले जुड़े जिम्मेवारी सौंपीन।
अउ अब पेस हे मौसम के हाल..
अवइया चौबीस घंटा के दउरान प्रदेस के कतकोन जघा म गरज-चमक के संग हल्का ले मध्यम बरसा होय के संभावना हे। मौसम विभाग के मुताबिक एक ठिन चिन्हित निम्नदाब के क्षेत्र दक्षिण पूर्व मध्यप्रदेश अउ ओखर ले लगे उत्तर विदर्भ के उपर स्थित हे। संगेसंग उपरी हवा के चक्रीय चक्रवाती घेरा बने हे, जेखर सेती काली उत्तरी छत्तीसगढ़ के एक-दू जघा म भारी बरसा होय के संभावना हे।
बौद्धिक व्याख्यान
आजादी के अमृत महोत्सव म दुरूग जिला के भिलाई म काली ‘‘स्वाधीनता आंदोलन में स्व गौरव‘‘ बिसय उपर बौद्धित व्याख्यान होईस, जेमा विचारक अउ लेखक डॉक्टर सदानंद सप्रे ह मुख्य वक्ता के रूप म सामिल होईन। ओमन किहीन कि भारत के अपन स्व-तंत्र हवय। कारीकरम के अगुवई करत भिलाई इस्पात संयंत्र के कार्यपालक निदेशक मिलिंद एम. गद्रे ह किहीन कि इतिहास म हमर पूर्वज मनके बारे म आने-आने मत बताय गेहे।
अउ अब थोरकुन समाचार सार म –
– छत्तीसगढ़ माध्यमिक शिक्षा मंडल डहार ले चलाय जात डी.एलएड अवसर परीक्षा बर छात्र मन ह सामान्य शुल्क के संग चौबीस सितंबर तक अउ विलंब शुल्क पांच सौ पचास रूपिया के संग तीन अक्टूबर तक ऑनलाइन अरजी कर सकथे।
– राजनांदगांव जिला के बजरंगपुर-नवागांव म गणेश ठंडा करत बेरा तरिया म बुड़े ले एक झिन मनखे के मउत होगे।
– इही जिला के बसंतपुर स्थित रानीसागर तरिया म एक झिन मनखे के सव बरामद करे गेहे। पुलिस के मुताबिक ए युवक ह चिटफंड कंपनी के एजेंट रिहीस।
अउ
– दुरूग जिला के गांव खोपली नहर म पाछु दिन डूबे मैकेनिकल इंजीनियर के चौबीस घंटा के बाद घलो पता नइ चल पाय हे। एसडीआरएफ के टीम ह खोजबीन करत हे।