मौसम विभाग ह अवइया चौबीस घंटा के दउरान प्रदेस के कतकोन जघा म जोरदरहा बरसा होय के चेतावनी देहे। मौसम विभाग ह बीजापुर, दंतेवाड़ा, सुकमा जिला बर रेड अलर्ट जारी करत बताय हे कि ए जिला मनके एक-दू जघा म गरजई-चमकई के संगे भारी बरसा अउ कहूं-कहूं गाज घलो गिर सकत हे। बस्तर, गरियाबंद, धमतरी, राजनांदगांव, बेमेतरा, बालोद, मुंगेली, बिलासपुर अउ ओखर ल लगे जिला मन म घलो एक-दू जघा म भारी बरसा हो सकत हे।
ओति, बीजापुर जिला म पाछु दू दिन ले सरलग बरसा होवत हे। जेखर पाय के जनजीवन अस्त-व्यस्त होगे हे। अब्बड़ अकन गांव मन म बाढ़ असन हालत होगे हे। कोटेर, जारगोया अउ कोकड़ापारा गांव के मनखे मन ल प्रशासन डहार ले सुरक्षित जघा म पहुंचाय जावत हे। जिला म भारी बरसा के सेती मोदकपाल नाला के उपर ले पानी सरलग बोहावत हे, जेखर सेती बीजापुर-भोपालपट्टनम नेशनल हाईवे क्रमांक-तिरसठ म अवई-जवई बंद होगे हे। सरलग होवत बरसा के सेती बीजापुर म पांच ठिन मकान के ढहे के घलो खबर हवय।
राज्यपाल-समन्वय वर्ग
राज्यपाल अनुसुईया उइके ह आज वनबंधु परिषद अउ एकल अभियान डहार ले रईपुर म राखे गे समन्वय वर्ग के समापन कारीकरम म सामिल होईन। कारीकरम वनबंधु परिसद के राष्ट्रीय अउ प्रदेस स्तर के बड़का पदाधिकारी अउ समन्वय वर्ग के कार्यकर्ता मौजूद रिहीन।
कारीकरम म बोलत राज्यपाल ह किहीन कि वनबंधु परिषद के माध्यम ले एकल विद्यालय डहार ले वनवासी मन ल आगू बढ़ाय अउ वनबंधु मन ल पढ़ाय-लिखाय बर जउन काम करे जात हे, तेहर सहराय के लईक हे अउ आगू चलके इही जवान लइका मन राष्ट्र निर्माण म अपन योगदान देवत हे।
रावघाट-लौह अयस्क
रावघाट के अंजरेल ले खनई करे गे लौह अयस्क के पहिली रैक ल तकनीकी ट्रायल बर आज डेढ़ सौ किलोमीटर के दूरी तय करके अंतागढ़ ले भिलाई इस्पात संयंत्र लाय गीस। अंजरेल ले मिले लौह अयस्क म बैसठ प्रतिशत तक आयरन के मात्रा हवय। ए लौह अयस्क ले बीएसपी के इस्पात उत्पादन के लागत म कमी आही।
लौह अयस्क के भिलाई पहुंचे म बीएसपी के प्रभारी निदेशक अनिर्बान दासगुप्ता समेत आने-आने बड़का अधिकारी मन ह ए रैक के स्वागत करीन। खबर के मुताबिक रावघाट क्षेत्र ले लौह अयस्क के खनई अउ भिलाई तक लाय बर दल्ली राजहरा ले नारायणपुर अउ जदगलपुर तक के रेललाइन बिछाय के काम चलत हवय। ए परियोजना के तहत दल्लीराजहरा ले अंतागढ़ तक के साठ किलोमीटर लंबा रेललाइन के काम पूरा होगे हे।
माओवादी-समाचार
तेलंगाना के कोत्तागुड़म पुलिस ह माओवादी कमांडर दामोदर के गोसईन रजीता के संग एक झिन आने माईलोगिन माओवादी ल गिरफ्तार करे हे। रजीता उपर तेलंगाना-छत्तीसगढ़ के सीमा म कई ठिन घटना म सामिल देहे के आरोप हे। कोत्तागुड़म एसपी डॉक्टर विनिथ ह एखर पुष्टि करे हे।
खबर हे कि एक झिन माओवादी कमांडर रमन्ना के गोसईन सावित्री ह तेलंगाना पुलिस तीर आत्समर्पण करे हे। सावित्री ह अभी माओवादी मनके कोंटा एरिया कमेटी के इंजार्च म हवय। उहें, पाछु बछर रमन्ना अउ सावित्री के बेटा रंजित ह घलो तेलंगना पुलिस के समक्ष आत्मसमर्पण करे रिहीन।
अवैध निर्माण-वैधता
प्रदेस के नगरीय निकाय म बने गैर कानूनी ढंग ले निर्माण ल वैध करे बर राज्य सरकार ह पहल करे हे। जउन भू-स्वामी मन ल नक्सा पास करवाय के बाद बिल्डिंग म अवैध या तय ले जादा निर्माण करे हे, ओमन जुर्माना देके करवा सकत हे। अइसन लोगन ल संबंधित नगरीय निकाय अउ नगर निवेश कार्यालय म आवेदन के संग मकान के कागजात, फोटोग्रॉफ्स आर्किटेक्ट डहार ले बनाय गे नक्सा अउ संपत्ति कर या बिजली बिल के रसीद जमा करना होही। एखर संगेसंग पार्किंग म गैर कानूनी ढंग ले करे गे निर्माण बर तय सुल्क ल जमा करना होही।
जेईई एडवांस्ड-परिणाम
इंजीनियरिंग स्नातक पाठ्यक्रम के संयुक्त प्रवेस परीक्षा-जेईई एडवांस्ड-दू हजार बाईस के रिजल्ट घोसित कर दे गेहे। एमा आर.क.े शिशिर ल सामान्य वर्ग म पहिली स्थान मिले हे। उहें, नोनी मन म तनिष्का काबरा पहिली स्थान म हे। ए बछर जेईई परीक्षा म चालीस हजार ले जादा उम्मीदवार मन ह क्वालीफाई करे हे। एमा छह हजार पांच सौ सोलह नोनी मन हवय। ए परीक्षा ल भारतीय प्रौद्योगिकी संस्थान-आईआईटी अउ आने तकनीकी शिक्षा संस्थान म स्नातक पाठ्यक्रम म एडमिशन खातिर आयोजित करे जाथे।
साइकिल रैली
एचआईवी एड्स ल लेके जन-जागरूकता बर आज राजधानी रईपुर म साइकिल रैली निकाले गीस। रैली म राष्ट्रीय सेवा योजना अउ आने-आने स्वयंसेवक मनके संग बड़ संख्या म युवा मन ह भाग लीन। ए रैली नेहरू युवा केन्द्र, युवा कारीकरम अउ खेल मंत्रालय के संगेसंग राज्य एड्स नियंत्रण समिति डहार ले आजादी के अमृत महोत्सव अउ अंतर्राष्ट्रीय युवा दिवस के मउका म राखे गे रिहीस। ए रैली म रईपुर पश्चिम के विधायक विकास उपाध्याय ह हिस्सा लेके जवान लइका मन ल जन-जागरूकता अभियान ले जुड़े बर प्रेरित करीन। कारीकरम म हॉकी के अंतर्राष्ट्रीय खिलाड़ी नीता डुमरे ह घलो जवान लइका मन ल फिटनेस अउ स्वस्थ जीवन जीये के मंत्र दीन। ए रैली ह कलेक्ट्रेट परिसर ले सुरू होके तेलीबांधा होवत मरीन ड्राईव म सिरईस।
कोविड टीका
प्रदेस म कोरोना टीकाकरण अभियान जोरसोर ले चलत हे। अब तक ले प्रदेस म कोरोना ले बाचे खातिर चार करोड़ छियासी लाख सत्ताईस हजार ले जादा टीका लगाय गेहे।
उहें, बलरामपुर जिला म कोविड टीकाकरण महाभियान के चलत काली एकेच दिन म छियालीस हजार ले जादा लोगन मन ल टीका लगाय गीस। एमा सौ बछर के माईलोगिन घलो सामिल रिहीस, जउन ल कोविड के प्रिकॉशन डोज लगाय गीस। ए दउरान कलेक्टर विजय दयाराम ह आने-आने टीकाकरण केन्द्र मनके निरीक्षण करके लोगन मन ल कोविडरोधी टीका लगाय बर उत्साह बड़़ईन।
गणेश-झांकी
प्रदेस म भगवान गणेश के मूर्ति मन ल ठंडा करे के सिलसिला आज घलो चलत हे। राजधानी रईपुर म आज बड़का मूर्ति मन ल सुघ्घर झांकी संग विसर्जन बर रवाना करे जाही। काली बड़े फजर खारून नंदियां तीर बनाय गे जघा म ए मूर्ति मन ल ठंडा करे जाही। झांकी ल लेके जिला प्रसासन ह पहिलीच रूट तय कर देहे। झाकी के सेती कई ठिन रद्दा म संझा छह बजे ले अवई-जवई बर छेका लगा दे गेहे। कई ठिन रद्दा मन ल डायवर्ट करे गेहे। कोनों भी प्रकार के अव्यवस्था होय म यातायात पुलिस ह हेल्पलाइन नंबर घलो जारी करे हे। आज संझाच ले कई ठिन जघा ले झांकी मनके सारदा चउक म पहुंचई सुरू होगे हे। राजनांदगांव ले घलो झांकी मन रईपुर पहुंच गेहे।
अउ अब थोरकुन समाचार सार म –
– ज्योतिष पीठ अउ द्वारका पीठ के शंकराचार्य जगद् गुरू स्वामी स्वरूपानंद सरस्वती के आज निन्यानवे बछर के उमर म मध्यप्रदेश के नरसिंहपुर म निधन होगे। उंखर परमधाम जाय म मुख्यमंत्री भूपेश बघेल ह गहरा दुख जतईन हे।
– ब्रिटेन के महारानी एलिजाबेथ-द्वितीय के सम्मान म आज भारत म एक दिन के राजकीय सोक राखे गेहे। छियानवे बछर के उमर म गुरूवार के उंखर निधन होगे। देसभर म आज सरकारी भवन जघा म राष्ट्रीय निहरे रइही अउ कोनों भी सरकारी कारीकरम म सांस्कृतिक कारीकरम नइ होही।
– बेमेतरा जिला के नगपुरा म फटफटी अउ डीजे गाड़ी बीच होय टक्कर म ग्राम पंचायत चरगवां के सरपंच अउ उंखर गोसईया के मउत होगे।
– उहें, जांजगीर-चांपा जिला के मोहंदी गांव म ट्रेलर के टक्कर म फटफटी सवार एक झिन मनखे के मउत होगे।
अउ
– सक्ती जिला के गोबराभाठा रद्दा निर्माण पूरा नइ होय के विरोध म लोगन मन जैजेपुर विधायक केशव चन्द्रा के अगुवई म मालखरौदा के मिशन चउक म चक्काजाम करीन।