नया जिला-राजपत्र प्रकाशन
राज्य सासन ह नवा जिला ‘‘मनेन्द्रगढ़-चिरमिरी-भरतपुर‘‘ अउ ‘‘सक्ती‘‘ के गठन के अधिसूचना राजपत्र म प्रकासित कर दे गेहे। मुख्यमंत्री भूपेश बघेल नौ सितंबर के प्रदेस के बत्तीसवां जिला के रूप म ‘‘मनेन्द्रगढ़-चिरमिरी-भरतपुर‘‘ जिला अउ तैंतीसवां जिला के रूप म ‘‘सक्ती‘‘ जिला के सुभारंभ करही। मुख्यमंत्री नवा जिला म कलेक्टर अउ पुलिस अधीक्षक कार्यालय के उद्घाटन करही। संगेसंग रोड शो घलो करही। ए मउका म मुख्यमंत्री ह नवगठित जिला बर करोड़ों रूपिया के विकास काम के घोसना करही। अधिसूचना के अनुसार कोरिया जिला के सीमा ल बदल के नवा जिला ‘मनेन्द्रगढ़-चिरमिरी-भरतपुर‘‘ अउ जांजगीर-चांपा जिला के सीमा ल बदल के ‘‘सक्ती‘‘ बनाय गेहे।
इही बीच, राज्य सरकार ह काली ले अस्तित्व म अवइया दू नवा जिला बर पुलिस अधीक्षक के नियुक्ति कर देहे। टी.आर. कोशिमा ल ‘मनेन्द्रगढ़-चिरमिरी-भरतपुर‘ अउ एम.आर. अहिरे ल ‘सक्ती‘ जिला के पुलिस अधीक्षक नियुक्त करे गेहे।
एनटीए-प्रवेश परीक्षा
राष्ट्रीय परीक्षा एजेंसी-एन.टी.ए. ह स्नातक स्तर के राष्ट्रीय पात्रता सह प्रवेश परीक्षा-नीट दू हजार बाईस के परिणाम घोसित कर देहे। अभ्यर्थी परिणाम डब्ल्यू-डब्ल्यू-डब्ल्यू डॉट एनटीए डॉट एसी डॉट इन म देखत सकत हे। मेडिकल प्रवेस परीक्षा म राजस्थान के तनिष्का पहिली स्थान म हे। उहें, दिल्ली के वत्स आशीष बत्रा ह दूसर स्थान अउ कर्नाटक के ऋषिकेश नागभूषण गंगुले ह तीसर स्थान पाय हे। ए परीक्षा सत्रह जुलाई के देस के चार सौ संतानवे अउ विदेस के चौदह सहर म आयोजित करे गे रिहीस।
जे.पी. नड्डा-छत्तीसगढ़
भारतीय जनता पार्टी के राष्ट्रीय अध्यक्ष जगत प्रकाश नड्डा काली नौ सितंबर के छत्तीसगढ़ प्रवास म रईपुर आवत हे। श्री नड्डा काली रईपुर के साईंस कॉलेज मैदान म भाजपा कार्यकर्ता मनके सम्मेलन ल संबोधित करही। एखर बाद राष्ट्रीय अध्यक्ष प्रदेस भाजपा कार्यालय कुशाभाऊ ठाकरे परिसर म भाजपा कोर ग्रुप के संग प्रदेस पदाधिकारी, विधायक अउ सांसद मनके बइठका लीहीं।
भाजपा कार्यकर्ता मन ह श्री नड्डा के स्वागत के सबो तैयारी पूरा कर लेहे। भारतीय जनता युवा मोर्चा के कार्यकर्ता मोटर साइकिल रैली के माध्यम ले राष्ट्रीय अध्यक्ष के काफिला के अगुवई करही अउ ओमन ल विमानतल ले पंडित दीनदयाल उपाध्याय चौक तेलीबांधा लेके पहुंचही। एखर बाद श्री नड्डा के छत्तीसगढ़ के परंपरा म स्वागत करे जाही।
इही बीच, भाजपा के प्रदेस प्रभारी डी. पुरंदेश्वरी, राष्ट्रीय उपाध्यक्ष अउ पूर्व मुख्यमंत्री डॉक्टर रमन सिंह, पार्टी के प्रदेस अध्यक्ष अरूण साव, सह प्रभारी नितिन नबीन समेत पार्टी के पदाधिकारी मन ह आज रईपुर के साईंस कॉलेज मैदान पहुंच के सभास्थल ल देखीन।
नेता प्रतिपक्ष-बयान
छत्तीसगढ़ विधानसभा म नेता प्रतिपक्ष नारायण चंदेल ह कहिन कि प्रदेस म राज्य सरकार के काम ले समाज के कोनों वर्ग संतुष्ट नइ हे, जेखर सेती रईपुर म धरना देवइया के संख्या सरगल बाढ़त हे। मुंगेली म पत्रकार मन ले चर्चा करत श्री चंदे ह आरोप लगईन हे कि गौठान योजना सिरिफ कागजी काम म दिखत हे। उहें, कतकोन गाय-गरू ह रद्दा म ही दिखथे। ओमन कहिन कि नाम मात्र बर जउन गौठान बनाय गेहे, ओमा घलो गाय-गरू बर चारा-पानी के कोन्हों व्यवस्था नइ हे।
राष्ट्रीय कृमि मुक्ति दिवस
प्रदेस म काली नौ सितंबर के राष्ट्रीय कृमि मुक्ति दिवस मनाये जाही। शिशु अउ बाल स्वास्थ्य कार्यक्रम के उप संचालक डॅाक्टर वी.आर. भगत ह बताइन कि ए दउरान प्रदेस के चौबीस जिला के एक ले उन्नीस बछर तक के पच्चीस लाख ले जादा लईका मन ल कृमि मुक्ति के दवा खिलाय के लक्ष्य राखे गेहे। ए लईका मन ल आंगनबाड़ी केंद्र, सरकारी स्कूल, स्वास्थ्य केंद्र, अनुदान प्राप्त निजी स्कूल, अउ तकनीकी शिक्षा संस्थान मन म कृमि के दवा एलबेंडाजॉल दे जाही।
उंहें चौदह सितंबर के मॉप-अप दिवस के आयोजन करे जाही। ए दिन दवा खाय ले छूटे लईका मन ल कृमि मुक्ति दवा दे जाही।
अंतर्राष्ट्रीय साक्षरता दिवस
आज अंतर्राष्ट्रीय साक्षरता दिवस हरय। ए मउका म प्रदेस के प्राथमिक अउ माध्यमिक स्कूल के लइका मन म भाषायी कौशल के संग गणितीय कौशल के विकास बर बिसेस अभियान सुरू करे जात हे। आज ले राज्य के सबो प्राथमिक अउ माध्यमिक स्कूल मन म ‘‘गढ़बो नवा भविष्य‘‘ कारीकरम के तहत पठन सामग्री के वाचन, ‘‘सौ दिन सौ कहानियां‘‘ अउ मुस्कान पुस्तकालय के रोजे उपयोग करे जाही। सुरूवाती कक्षा मन म अंग्रेजी बोलचाल म बिसेस ध्यान दे जाही। उहें, पठन सामान के वाचन म सबो लइका ल तीस आने-आने रोजगार के जानकारी देवत ओला समझे अउ देखे के मउका घलो दे जाही। ‘‘सौ दिन सौ कहानी‘‘ के तहत सबो मिडिल स्कूल मन म सबो विद्यार्थी ल एक ठिन कहानी के पुस्तक एक दिन पढ़े के लक्ष्य दे जाही। प्रदेस के सबो प्राथमिक अउ माध्यमिक स्कूल मन मुस्कान पुस्तकालय चलाय जात हे। अब स्कूल के समय सारिणी म पुस्तकालय के एक ठिन कालखंड सबो कक्षा मन म जरूरी रूप देवाय जाही।
इही बीच, प्रदेस म आज ले चौदह सितंबर तक साक्षरता सप्ताह मनाय जात हे। ए सप्ताह के उद्देश्य सबो वर्ग के ध्यान नवभारत साक्षरता कारीकरम म केन्द्रित करना हे।
स्कूल शिक्षा मंत्री डॉक्टर प्रेमसाय सिंह टेकाम ह अंतर्राष्ट्रीय साक्षरता दिवस के मउका म प्रदेस के नागरिक, शिक्षाविद, शिक्षा ले जुड़े लोगन, संस्था अउ अध्ययनशील विद्यार्थी मन ल बधाई अउ सुभकामना देहे।
ट्रेन-परिचालन
ईस्ट कोस्ट रेलवे के संबलपुर मंडल म चलत आने-आने विकास काम के सेती कतकोन ट्रेन के अवई-जवई प्रभावित रइही। अवइया पन्द्रह सितंबर ले बिलासपुर ले चलइया बिलासपुर-टिटलागढ़ ट्रेन ह संबलपुर स्टेशन म खतम होही अउ संबलपुर-टिटलागढ़ के बीच रद्द रइही। अइसने, टिटलागढ़ ले चलइया टिटलागढ़-बिलासपुर ट्रेन पन्द्रह सितंबर तक संबलपुर स्टेशन ले चलाय जाही अउ टिटलागढ़-संबलपुर के बीच रद्द रइही।
एसीबी-कार्रवाई
एंटी करप्शन ब्यूरो-एसीबी के टीम ह पटवारी अउ सिक्षा विभाग के एक झिन करमचारी ल रिश्वत लेके आरोप म गिरफ्तार करे हे। आवेदक ले मिले सिकायत अउ जांच के बाद टीम ह सूरजपुर जिला के शिक्षा अधिकारी कार्यालय म पदस्थ लिपिक ल पन्द्रह हजार रूपिया के रिश्वत लेवत अउ दुरूग जिला के भिलाई क्षेत्र के कोहका इलाका के पटवारी ल छह हजार रूपिया रिश्वत लेके आरोप म गिरफ्तार करे गेहे।
चीफ मिनिस्टर ट्रॉफी
छत्तीसगढ़ चीफ मिनिस्टर ट्रॉफी प्रतियोगिता के अट्ठारह सितंबर के सुभारंभ होही। राजधानी रईपुर म अट्ठाईस सितंबर तक चलइया ए प्रतियोगिता म पन्द्रह देस के करीबन पांच सौ शतरंज खिलाड़ी भाग लीहीं। अखिल भारतीय शतरंज महासंघ, खेल अउ युवा कल्याण विभाग के संगेसंग छत्तीसगढ़ ओलंपिक एसोसिएशन ह मिलजुल के ए प्रतियोगिता के आयोजन करत हे। ए स्पर्धा म विजेता ट्रॉफी के संग पैंतीस लाख रूपिया के पुरस्कार रासि राखे गेहे। प्रतियोगिता दू भाग म मास्टर्स अउ चैलेंजर्स के रूप म कराय जाही।
अउ अब थोरकुन समाचार सार म –
– कोंडागांव कलेक्टर दीपक सोनी अउ जिला पंचायत अध्यक्ष देवचंद मातलाम ह एनीमिया मुक्त कोंडागांव अभियान के सुभारंभ करीन। ए अभियान यूनिसेफ के सहयोग ले चलाय जाही।
अउ
– मुंगेली जिला के नवागांव-घुटेरा रोड स्थित देशी अउ विदेशी शराब दुकान ल बंद कराय के मांग ल लेके भाजपा महिला मोर्चा के कार्यकर्ता मन ह प्रदर्सन करीन।