नया जिला शुभारंभ
मुख्यमंत्री भूपेश बघेल ह नौ सितंबर के दू ठिन नवा जिला के सुभारंभ करइया हे। एमा मनेन्द्रगढ़-चिरमिरी-भरतपुर अउ सक्ती जिला सामिल हवय, जेखर बाद अब प्रदेस म जिला के संख्या बाढ़के तैंतीस हो जही। नव गठित जिला म श्री बघेल ह कलेक्टर अउ पुलिस अधीक्षक कार्यालय के उद्घाटन करही। संगेसंग रोड-शो घलो करही। उहें, मुख्यमंत्री ह नवा बने जिला बर करोड़ों रूपए के विकास कार्य सौगात घलो दीहीं।
जानबा के अनुसार मुख्यमंत्री ह पाछू दू अउ तीन सितंबर के नवगठित तीन ठिन नवा जिला – मोहला-मानपुर-अंबागढ़ चौकी, सारंगढ़-बिलाईगढ़ अउ खैरागढ़-छुईखदान-गंडई के सुभारंभ करे रिहीन।
कार यात्री-सीट बेल्ट
केन्द्रीय सड़क परिवहन अउ राजमार्ग मंत्री नितिन गडकरी ह किहीन कि कार म अवई-जवई के बेरा लोगन मन बर अब सीट बेल्ट लगाना जरूरी होही। श्री गडकरी ह नई दिल्ली म एक ठिन कारीकरम के बेरा किहीन कि अवइया तीन दिन म सरकार ह ए संबंध म आदेस जारी करही। ओमन किहीन कि यदि कार म आगू या पाछु बइठे लोगन मन अगर सीट बेल्ट नइ लगाही, त उंखर उपर जुर्माना लगाय जाही।
कोविड टीका
भारत बायोटेक के नाक ले दे जाय वाले पहिली कोविड रोधी औषधि ल आपात स्थिति म प्रतिबंधित उपयोग के मंजूरी मिल गेहे। एखर उपयोग अट्ठारह बछर ले जादा लोगन मन बर करे जा सकही। केन्द्रीय स्वास्थ्य मंत्री मनसुख मांडविया ह एला कोविड के खिलाफ लड़ाई म एक ठिन महत्वपूर्ण कदम बताय हे। ओमन किहीन कि केन्द्रीय औषधि मानक नियंत्रण संगठन ह ए औषधि ल अनुमोदित करे हे।
उहें, कोविड कार्यबल के अध्यक्ष डॉक्टर एन.के. अरोड़ा ह आकाशवाणी ले गोठबात म बतईन कि ए ह देस बर एक ठिन बड़का उपलब्धि हरय।
आकाशवाणी/दूरदर्शन-भूमिका
केन्द्रीय सूचना अउ प्रसारण राज्य मंत्री डॉक्टर एल. मुरूगन ह किहीन हे कि आकाशवाणी अउ दूरदर्शन ह देस म महत्वपूर्ण भूमिका निभावत हे। नई दिल्ली म आकाशवाणी परिसर के रंगभवन म आकाशवाणी अउ दूरदर्शन इंजीनियरिंग कर्मचारी संघ के राष्ट्रीय सम्मेलन के उद्घाटन करत हुए डॉक्टर मुरूगन ह किहीन कि प्रसार भारती के करमचारी सरकार के अभिन्न अंग हे अउ लोकतंत्र म एखर महत्वपूर्ण भूमिका हवय। ओमन किहीन कि आकाशवाणी अउ दूरदर्शन के आवाज़ देश के हरेक लोगन के दिल ल छूथे। प्रसार भारती न सिरिफ समाचार म योगदान देथे, बल्कि भारतीय कला अउ संस्कृति ल पोषित करे म घलो बड़ भूमिका निभाथे। डॉक्टर मुरूगन ह ‘‘मन की बात‘‘ बर आकाशवाणी के चयन करे उपर प्रधानमंत्री नरेन्द्र मोदी के आभार जतईन हे।
एकलव्य आदर्श आवासीय विद्यालय
आदिम जाति अउ अनुसूचित जाति विकास मंत्री डॉक्टर प्रेमसाय सिंह टेकाम ह किहीन हे कि प्रदेस म पचास ठिन नवा एकलव्य आदर्श आवासीय विद्यालय भवन बनाय के मंजूरी दे दे गेहे, जेमा ले ग्यारह ठिन भवन ल बनाय के कामबूता घलो सुरू होगे हे। काली मंत्रालय म होय आवासीय अउ आश्रम संस्थान संचालक मंडल के बइठका म डॉक्टर टेकाम म किहीन कि बारह ठिन स्कूल के भवन निर्माण बर वन संरक्षण अधिनियम के तहत भूमि आवंटन प्रक्रियाधीन हवय। फेर उहें बाकी सत्ताईस ठिन स्कूल के भवन निर्माण के स्वीकृति बर प्रस्ताव राष्ट्रीय आदिवासी शिक्षा समिति के आगू प्रक्रियाधीन हे।
रेल-परिचालन
रेलवे डहार ले यात्री मनके मांग अउ सुविधा ल देखत हुए कुछु खास गाड़ी के परिचालन एक घांव फेर सुरू होय बर जात हे। एमा रायपुर-कोरबा-रायपुर अउ बिलासपुर-कोरबा-बिलासपुर पैसेंजर स्पेशल ट्रेन सामिल हवय। रायपुर-कोरबा पैसेंजर स्पेशल के परिचालन बीस सितंबर ले अउ कोरबा-रायपुर पैसेंजर स्पेशल के परिचालन इक्कीस सितंबर ले अवइया सूचना तक हर रोज करे जाही। अइसने, बिलासपुर-कोरबा पैसेंजर स्पेशल बीस सितंबर ले अउ कोरबा-बिलासपुर पैसेंजर स्पेशल के परिचालन घलो बीस सितंबर ले अवइया सूचना तक हर रोज करे जाही।
स्वाईन फ्लू
छत्तीसगढ़ राज्य पुलिस प्रशिक्षण अकादमी चंदखुरी म प्रसिक्षण लेवत बारह झिन उप पुलिस अधीक्षक मन म स्वाईन फ्लू के लक्ष्ण पाय गेहे। एखर बाद ओमन ल घर भेज दे गेहे। उहें, चार झिन आने प्रशिक्षु उप पुलिस अधीक्षक घलो बुखार ले पीड़ित बताय जात हे।
चंदखुरी पुलिस प्रशिक्षण अकादमी के महानिदेशक डीएम अवस्थी ह किहीन कि स्वाइन फ्लू के संक्रमण ल देखत हुए एक हफ्ता बर कक्षा ल रोक दे गेहे। उहें, जउन बारह झिन डीएसपी मन स्वाइन फ्लू ले प्रभावित पाय गेहे, ओमन ल होम क्वारेंटाइन के सलाह दे गेहे।
आईटी-छापा
प्रदेस के कई ठिन जिला म आज आयकर विभाग के टीम ह छापा मारे हे। जानबा के अनुसार मध्यप्रदेश जोन के आयकर विभाग के टीम ह आज बिहनिया रईपुर, रायगढ़, खरसियां, दुरूग अउ बिलासपुर म एक संग सराब, स्टील अउ बिल्डर कारोबारी के अलावा चार्टर्ड एकाउंटेंड के ठिकाना म दबिस दीन हे। बताय जात हे कि पचास ले जादा अधिकारी मन ए जांच टीम म सामिल हवय।
प्रयास आवासीय विद्यालय
राज्य के अनुसूचित जाति, अन्य पिछड़ा वर्ग अउ ई.डब्ल्यू.एस. वर्ग के लइका मन बर स्वर्गीय राजीव गांधी बाल भविष्य सुरक्षा प्रयास आवासीय विद्यालय योजना के चलत अवइया वित्तीय बछर म चार ठिन नवा प्रयास आवासीय विद्यालय सुरू करे जाही। प्रदेस के अनुसूचित जाति वर्ग के बालक अउ बालिका मन बर पांच-पांच सौ सीटर अउ आने पिछड़ा वर्ग अउ ई.डब्ल्यू.एस. वर्ग के लइका मन बर घलो पांच-पांच सौ सीटर क्षमता के चार ठिन आवासीय विद्यालय सुरू करे जाही। हरेक आवासीय विद्यालय म कक्षा नौवीं म एक सौ पच्चीस छात्र अउ एक सौ पच्चीस छात्रा मन ल प्रवेस दे जाही। ए आवासीय विद्यालय म पढ़ईया लइका मन ल नौवीं ले लेके बारहवीं तक के पढ़ाई के निःशुल्क व्यवस्था होही।
इही बीच, चालू वित्तीय बछर म राज्य के अनुसूचित जाति, अन्य पिछड़ा वर्ग अउ ई.डब्ल्यू.एस. वर्ग के कुल चार सौ लइका मन ल आने-आने प्रतियोगी परीक्षा बर निःशुल्क कोचिंग सुविधा उपलब्ध कराय जाही। पढ़ईया लइका मन ल पी.एम.टी, पी.इ.र्टी., एन.एस.टी.ई., जे.ई.ई. मेन्स एडवांस, एम्स, नीट, सी.ए.-सी.एस. अउ क्लेट के अलावा एन.डी.ए. जइसे पाठ्यक्रम म प्रवेस बर कोचिंग दे जाही। लइका मन ल ए परीक्षा के प्रसिक्षण, रईपुर, बिलासपुर, दुरूग अउ भिलाई म प्रतिष्ठित कोचिंग संस्थान ले दे जाही।
पोषण माह-कार्यशाला
राष्ट्रीय पोषण माह के चलत रईपुर के लाभांडी म महिला स्वास्थ्य बिसय उपर काली राज्य स्तरीय कार्यशाला के आयोजन करे गीस। महिला अउ बाल विकास विभाग अउ यूनिसेफ के मदद ले होय ए कार्यसाला म माईलोगिन मनके स्वास्थ्य, पोषण अउ स्वच्छता संबंधित बिसय उपर गोठबात होईस। संगेसंग सुघ्घर आंगनबाड़ी बनाय, स्वमूल्यांकन कारीकरम के सुरूवात घलो करे गीस। ए बेरा म पोषण माह के कैलेंडर अउ गाइड लाइन के किताब के विमोचन होईस। एखर अलावा रेडी-टू-इट ले बने पौष्टिक व्यंजन, छत्तीसगढ़ी व्यंजन अउ भाजी के प्रदर्सनी घलो लगाय गे रिहीस।
अउ अब थोरकुन समाचार सार म –
– छत्तीसगढ़िया क्रांति सेना डहार ले कोरबा जिला म फर्जी जाति प्रमाण पत्र बनाय के सिकायत करे के बाद राज्य सरकार ह कटघोरा अनुविभाग के पूर्व एसडीएम ल नोटिस जारी करके पन्द्रह के भीतरी जवाब दे बर केहे हे।
– रईपुर के बूढ़ातालाब स्थित धरना स्थल म ग्राम पंचायत भृत्य कल्याण संघ विश्वविद्यालय दैनिक वेतनभोगी संघ, सर्वविभागीय दैनिक वेतनभोगी अउ किसान मित्र के लोगन प्रदर्सन करत हुए जमके नाराबाजी करीन।
अउ
– प्रदेस म एंक घांव फेर मौसम बदल सकत हे। मौसम विभाग के अनुसार बस्तर म भारी बारिस होय के संभावना हे। जबकि प्रदेस के कतकोन जघा म हल्का ले मध्यम बारिस हो सकत हे।