शिक्षक दिवस पुरस्कार
आज शिक्षक दिवस हरय। ए दिवस शिक्षाविद् अउ पूर्व राष्ट्रपति डॅाक्टर सर्वपल्ली राधाकृष्णन के जयंती के मउका म मनाये जाथे।
ए मउका म राष्ट्रपति भवन म आयोजित एक ठिन विशेष कार्यक्रम म राष्ट्रपति द्रौपदी मुर्मू ह शिक्षा के क्षेत्र म उल्लेखनीय काम बर देशभर के चुने गे शिक्षक मन ल राष्ट्रीय पुरस्कार ले सम्मानित करीन। एमा राजधानी रायपुर के शासकीय प्राथमिक स्कूल पंडित सखाराम दुबे के सहायक शिक्षिका ममता अहार घलो सामिल हे।
उंहें छत्तीसगढ़ के राज्यपाल अनुसुइया उइके अउ मुख्यमंत्री भूपेश बघेल ह आज शिक्षक दिवस के मउका म प्रदेस के साठ उत्कृष्ट शिक्षक मन ल सम्मानित करीन। राजभवन म आयोजित राज्य स्तरीय शिक्षक सम्मान समारोह म प्रदेस के महान साहित्यकार मनके नाव म चार शिक्षक मन ल स्मृति पुरस्कार अउ छप्पन शिक्षक मन ल राज्य शिक्षक सम्मान ले सम्मानित करे गीस।
ए मउका म राज्यपाल ह राज्य शासन डहार ले स्कूल शिक्षा के क्षेत्र म करे जात उल्लेखनीय प्रयास के सराहना करीन । उंहें मुख्यमंत्री ह शिक्षक मनके सराहना करत कीहिन कि ओमन ह कोविड काल म घलो समाज के प्रति अपन दायित्व निभावत विद्यार्थी मन ल शिक्षा ले दूरिहा नइ होवन दीन।
मुख्यमंत्री घोषणा
राज्य म छत्तीसगढ़ भासा ल बढ़ावा दे खातिर सबो स्कूल मन म अब हप्ता म एक दिन छत्तीसगढ़ी अउ आदिवासी बोली के शिक्षा दे जाही। बस्तर अउ सरगुजा क्षेत्र म स्थानीय आदिवासी बोली के अनुसार अउ आने क्षेत्र म छत्तीसगढ़ी भाषा म पाठ्यक्रम तियार करे जात हे।
मुख्यमंत्री भूपेश बघेल ह शिक्षक दिवस म ये घोषणा करीन। मुख्यमंत्री ह एक अउ नवा घोषणा करत कीहिन कि भारत के संस्कृति अउ परंपरा ल बढ़ावा दे खातिर स्वामी आत्मानंद अंग्रेजी माध्यम स्कूल मन म संस्कृत विसय के घलो पढ़ई होही । एखर संगेसंग स्वामी आत्मानंद अंग्रेजी माध्यम स्कूल म कंम्पयूटर शिक्षा ल घलो मुख्यमंत्री ह अनिवार्य करे के बात कीहिन।
बालवाड़ी योजना शुभारंभ
प्रदेस म जाबो बालवाड़ी बढ़ाबो शिक्षा के गाड़ी के थीम म आधारित बालवाड़ी योजना आज ले शुरू होगे हे। मुख्यमंत्री भूपेश बघेल ह ए योजना के शुभारंभ करीन। स्कूल शिक्षा विभाग डहार ले शुरू करे गे ए योजना नवा शिक्षा नीति के तहत चलाये जाही।
ए योजना पांच ले छै बछर तक के लईका मन बर हरय। एखर माध्यम ले खेल-खेल म लईका मन ल शिक्षा दे जाही। सबो बालवाड़ी म आंगनबाड़ी सहायता के संग प्राथमिक शाला के एक झिन सहायक शिक्षक के नियुक्ति करे जाही अउ एखर बर ओमन ल हर महीना पांच हजार पांच सौ अतिरिक्त मानदेय घलो दे जाही। प्रदेस म ए बछर पांच हजार ले जादा बालवाड़ी सुरू करे गेहे।
गोधन न्याय योजना-राशि अंतरण
मुख्यमंत्री भूपेश बघेल ह आज गोधन न्याय योजना के हितग्राही मन ल पांच करोड़ रूपिया ले जादा के राशि दीन। ए राशि सोझे हितग्राही मनके बैंक खाता म जमा करे गेहे।
ए मउका म मुख्यमंत्री ह गोधन न्याय योजना के सफलता बर सबो अधिकारी-कर्मचारी, पशुपालक, गौठान समिति के पदाधिकारी अउ स्व सहायता समूह के माइलोगिन मन ल बधाई अउ शुभकामना दीन। ओमन कीहिन कि बीते एक बछर म ए योजना के हितग्राही मनके संख्या बाढ़के ढाई लाख ले जादा हेगे हे। उंहें तीन हजार ले जादा गौठान स्वावलंबी बने हे।
ट्रेन रद्द
दक्षिण पूर्व मध्य रेलवे ह काली ले सतरा सितंबर तक रायपुर ले जवइया दस ठिन एक्सप्रेस ट्रेन मन ल रद्द कर दे गेहे। उंहे कुछएक ट्रेन मन ल रद्दा बदल के चलाय जाही। संगेसंग कुछएक ट्रेन मन ल पेसैंजर ट्रेन के रूप म चलाय जाही अउ कुछएक ट्रेन देरी ले रवाना होही।
रेलवे डहार ले देगे जानकारी के अनुसार लखौली, मंदिरहसौद, अउ नया रायपुर स्टेशन म करे जात आने आने विकास काम के सेती ए रद्दा म चलइया सैंतीस ठिन ट्रेन मन प्रभावित होय हे। जउन ट्रेन रद्द करे गेहे ओमा गांधीधाम- पुरी एक्सप्रेस, विशाखापट्नम-कोरबा, रायपुर-जुनागढ़, विशाखापट्नम-दुर्ग, अउ टिटलागढ़-रायपुर एक्सप्रेस शामिल हे। अइसने पुरी-दुर्ग एक्सप्रेस, दुर्ग अउ महासमुंद के बीच रद्द रइही। उंहे विशाखापट्नम-रायपुर स्पेशल महासमुंद अउ रायपुर के बीच नइ चलही।
आई.आई.एम. राज्यपाल
राज्यपाल अनुसुइया उइके काली आजादी के अमृत महोत्सव के मउका म भारतीय प्रबंधन संस्थान-आईआईएम रायपुर डहार ले आयोजित स्वतंत्रता संग्राम म जनजातीय नायक मनके योगदान कार्यक्रम म सामिल होइन । ए मउका म ओमन कीहिन कि ए बड़े गर्व के बात हरय कि आजादी के ए अमृत महोत्सव बछर म देसभर के आने-आने विश्वविद्यालय मन म स्वतंत्रता संग्राम म जनजातीय योगदान विसय म कार्यक्रम के आयोजन करे जात हे। एखर ले देस के स्वतंत्रता म योगदान देवइया सबो गुमनाम आदिवासी नायक मन ल पहिचान मिलही।
कार्यक्रम म राष्ट्रीय अनुसुचित जनजाति आयोग की सचिव अलका तिवारी ह आयोग के दायित्व, शक्ति अउ कार्यप्रणाली के बारे म जानकारी दीन।
राष्ट्रीय कृमि मुक्ति दिवस
प्रदेस म नौ सितंबर के राष्ट्रीय कृमि मुक्ति दिवस मनाये जाही। शिशु अउ बाल स्वास्थ्य कार्यक्रम के उप संचालक डॅाक्टर वी.आर. भगत ह बताइन कि ए दउरान प्रदेस क चौबीस जिला के एक ले उन्नीस बछर तक के पच्चीस लाख ले जादा लईका मन ल कृमि मुक्ति के दवा खिलाय के लक्ष्य राखे गेहे। ए लईका मन ल आंगनबाड़ी केंद्र, सरकारी स्कूल, स्वास्थ्य केंद्र, अनुदान प्राप्त निजी स्कूल, अउ तकनीकी शिक्षा संस्थान मन म कृमि के दवा एलबेंडाजॉल दे जाही। उंहें चौदह सितंबर के मॉप-अप दिवस के आयोजन करे जाही। ए दिन दवा खाय ले छूटे लईका मन ल कृमि मुक्ति दवा दे जाही।
कोंडागांव सामुदायिक पुलिसिंग
कांडागांव जिला के बयानार थाना क्षेत्र के गांव मड़ानार म सामुदायिक पुलिसिंग के तहत बिसेस कार्यक्रम के आयोजन करे गीस। पुलिस अधीक्षक दिव्यांग पटेल ह घलो ए कार्यक्रम म पहुंचीन अउ ओमन ह ग्रामीण मनले मिलके उंखर हालचाल जानीन। कार्यक्रम म अंदरूनी गांव, मड़ानार, केजंग, राजबेड़ा, अउ तीर तखार के गांव ले भाग लीन। ए मउका म कोंडागांव पुलिस डहार ले स्कूली लईका मन ल कॉपी, पेन अउ आने शिक्षण संग खेल के जीनिस दे गीस।
उंहें दुर्ग पुलिस ह आज सामुदायिक पुलिसिंग के अंतर्गत जामगांव-आर म जन चौपाल लगाइन। कार्यक्रम म पुलिस अधीक्षक डॅाक्टर अभिषेक पल्लव संग पुलिस अउ यातायात विभाग के कतकोन बड़का अधिकारी मन घलो मौजूद रीहिन। ए दउरान ग्रामीण मन ह साइबर धोखाधड़ी अउ यातायात जागरूकता क जानकारी दीन। संगेसंग महिला सुरक्षा ल लेके पुलिस विभाग डहार ले शुरू करे गे अभिव्यक्ति एप डाउनलोड करे खातिर प्रेरित करीन। ए दउरान तैराकी अउ कुरसी दौड़ प्रतियोगिता के घलो आयोजन करे गीस। जेखर विजेता मन ल पुलिस डहार ले पुरस्कृत करे गीस।
मनोज श्रीवास्तव कुलपति
आगरा के प्रोफेसर मनोज कुमार श्रीवास्तव जगदलपुर के शहीद महेंद्र कर्मा विश्वविद्यालय के नवा कुलपति होही । राज्यपाल अनुसुइया उइके ह ओमन ल ए विश्वविद्यालय के नवा कुलपति नियुक्त करे हे। ए संबंध म राजभवन ह आदेस जारी कर देहे।
खारून नदी डूबे
रायपुर जिला के धरसींवा थाना क्षेत्र म आज खारून नदी म एक झिन शिक्षक संग तीन आने लोगन बूड गे, जेखर तलासी करे जात हे। एमा शिक्षक लखनलाल बंजारे, हरजीत भारती अउ शेखर बंजारे सामिल हे। ये तीनो एके परिवार के हरय।
खबर के मुताबिक एनीकट के उपर पानी बोहात रीहिस। ये सबो लोगन मन एनीकट पार करत बेरा पानी के तेज बहाव के सेती ओम फिसलके खारून नदी म बूड गे। घटना के जानकारी मिलतेच प्रसासन अउ पुलिस के टीम मउका म पहुंच गे अउ गोताखोर के मदद ले तलास जारी हे।