मुख्यमंत्री भूपेश बघेल ह काली अउ परन दिन प्रदेस के तीन ठन नवा जिला के सुरूवात करही। एमा मोहला-मानपुर-अंबागढ़ चौकी, सारंगढ़-बिलाईगढ़ अउ खैरागढ़-छुईखदान-गंडई सामिल हे।
कारीकरम के अनुसार मुख्यमंत्री ह काली मोहला के मिनी स्टेडियम म राखे गे कारीकरम म छत्तीसगढ़ के नवा बने उनतीसवां जिला मोहला-मानपुर-अंबागढ़ चौकी के सुरूवात करही। उहें, तीन सितंबर के सारंगढ़ के खेलभाठा मैदान म राखे गे कारीकरम म तीसवां जिला सारंगढ़-बिलाईगढ़ के सुरूवात करही। इही दिन श्री बघेल खैरागढ़ के राजाफतेह सिंह खेल मैदान म राखे गे कारीकरम म इकतीसवां जिला खैरागढ़-छुईखदान-गंडई के सुरूवात करही।
मुख्यमंत्री ह काली दू नवा जिला मोहला-मानपुर-अंबागढ़ चौकी अउ खैरागढ़-छुईखदान-गंडई म राखे गे कारीकरम म सामिल होही, जिहां ओमन ह चार सौ इकहत्तर करोड़ रूपिया के निर्माण काम के लोकार्पण अउ भूमिपूजन करही।
मुख्यमंत्री-भेंट मुलाकात
प्रदेशव्यापी भेंट-मुलाकात कारीकरम म मुख्यमंत्री भूपेश बघेल ह आज रायगढ़ जिला के नवापारा अउ लोइंग म ग्रामीण मन ले भेंट करके उंखर समस्या सुनीन। ए मउका म ओमन ह नवापारा म उप स्वास्थ्य केन्द्र ल प्राथमिक स्वास्थ्य केन्द्र म विकसित करे के, कठानी अउ मिडमिडा गांव म प्राथमिक स्वास्थ्य केन्द्र के नवा भवन बनाय के घोसना करीन। संगेसंग ओमन ह एकताल रद्दा म लहंगापाली तक सड़क बनाय के, ग्राम मल्दा ले सोडकला तक सड़क बनाय के अउ बोराडीपा म सामुदायिक भवन बनाय के घलो ऐलान करीन। मुख्यमंत्री ह पुसौर के बड़ेहरदी म मिनी स्टेडियम बनाय के, रेंगालपाली म सासकीय मिडिक स्कूल भवन बनाय के अउ महानदी ले लगे बाढ़ प्रभावित गांव म बाढ़ राहत केन्द्र बनाय के घलो घोसना करीन।
उहें, मुख्यमंत्री ह लोइंग-महापल्ली म आईटीआई खोले अउ मिनी स्टेडियम बनाय, पंडरीपानी म सब स्टेशन, कोइलंगा नाला म पुलिया निर्माण अउ बेलरिया म स्टॉप डैम निर्माण के घोसना करीन।
राष्ट्रीय पोषण माह
केन्द्रीय महिला अउ बाल विकास मंत्रालय ह आज ले तीस सितंबर तक पूरा देस म राष्ट्रीय पोषण माह मनावत हे। ए बछर के पोषण माह के उद्देश्य ग्राम पंचायत के माध्यम ले महिला अउ लइका मन के स्वास्थ्य अउ सिक्षा उपर ध्यान केन्द्रित करना हे। पोषण अभियान ह भारत सरकार के प्रमुख योजना हे।
ऐति, छत्तीसगढ़ म घलो पोषण माह के सुरूवात करे गीस। पोषण माह के दउरान स्वस्थ भारत के परिकल्पना ल साकार करे के उद्देश्य ले छह बछर ले कम उमर के लइका मन ल, गर्भवती माईलोगिन मन बर अउ किशोरी मन उपर बिसेस ध्यान दे जाय के संग पोषण के महत्व उपर जागरूकता फैलाय बर देसभर म कतकोन कारीकरम कराय जाही। पंचायत स्तर म आंगनबाड़ी सेवा अउ बेहतर स्वास्थ्य प्रथा उपर जागरूकता अभियान चलाय जाही। उहें, आंगनबाड़ी सेवा के दायरा म जादा ले जादा लोगन ल सामिल करे बर विकास मापन अभियान चलाय जाही। संगेसंग किशोरी मन म एनीमिया के जांच बर स्वास्थ्य सिविर घलो लगाय जाही। उहें, राज्य स्तर म होवइया गतिविधि म पारंपरिक व्यंजन ले जुड़े अम्मा की रसोई के आयोजन करे जाही।
‘मेरी पॉलिसी मेरे हाथ‘
कृषि मंत्री रविन्द्र चौबे ह आज रईपुर म राखे गे एक ठिन कारीकरम म प्रदेसव्यापी ‘मेरी पॉलिसी मेरे हाथ‘ कारीकरम के सुरूवात करीन। ए मउका म श्री चौबे ह पैंतीस झन किसान मन ल प्रधानमंत्री फसल बीमा योजना म पॉलिसी के दस्तावेज दीन। ए दउरान बीमा कंपनी के अधिकारी मन ह किसान मन ल बीमा के नियम अउ सर्त के बारे म जानकारी दीन। ‘मेरी पॉलिसी मेरे हाथ‘ कारीकरम म राज्य के सबो बीमित किसान मन ल सितंबर महीना म पॉलिसी दे जाही।
खबर के मुताबिक प्रधानमंत्री फसल बीमा योजना म ए खरीफ सीजन म करीबन चौदह लाख किसान मन ह अपन फसल के बीमा कराय हे।
अग्निपथ योजना भर्ती
छत्तीसगढ़ अउ मध्यप्रदेश के जम्मों जिला बर अग्निपथ योजना म महिला सैन्य पुलिस रैली उन्नीस ले बाईस अक्टूबर तक जबलपुर म राखे जाही। ए रैली म संगरे बर अभ्यर्थी मन ल सात सितंबर तक ज्वाइन इंडियन आर्मी वेबसाईट म ऑनलाईन पंजीयन कराय बर पड़ही। ए बारे म अउ जादा जानबा बर फोन नंबर – शून्य सात छह एक दू छह शून्य सात छह तीन सात म संपर्क करे जा सकथे।
उंहें, भारतीय थल सेना कोति ले अग्निपथ योजना म युवा मनके भर्ती बर तेरह ले बाईस नवंबर तक रायपुर म रैली राखे जाही। एमा संगरे बर अर्जी देवइया मन ल ज्वाइन इंडियन आर्मी वेबसाइट म तीन सिंतबर तक पंजीयन कराना जरूरी हे। एमा आने-आने पद म भर्ती बर आठवीं ले बारहवीं पास के शैक्षणिक योग्यता तय करे गेहे। ये रैली म भाग लेबर एक अक्टूबर उन्नीस सौ निन्यानबे ले एक अप्रैल दू हजार पांच के बीच जनम लेवइया अभ्यर्थी पात्र होही। ये रैली ले सामान्य ड्यूटी सैनिक के संगेसंग कलर्क, स्टोर कीपर अउ ट्रेड मैन के पद म भर्ती करे जाही।
आरएसएस-बैठक
राष्ट्रीय स्वयंसेवक संघ-आरएसएस ले जुड़े अनषांगिक संगठन के पदाधिकारी मनके बइठका अवइया दस ले बारह सितंबर तक रईपुर म राखे जाही। ए बइठका म सर संघचालक डॉक्टर मोहन भागवत अउ सर कार्यवाह दत्तात्रेय होसबाले संघरा संघ के पांचों सह सर कार्यवाह अउ दूसर पदाधिकारी मन सामिल होही। ए बइठका म संगठन के आने-आने गतिविधि के बारे म गोठबात करे जाही अउ अवइया चुनाव के तियारी बर रणनीति बनाय जाही। बइठका म पर्यावरण, परिवार प्रबोधन अउ सामाजिक समरसता जइसन बिसय उपर घलो विचार-विमर्श करे जाही। बइठका म संगठन डहार ले राजनीतिक प्रस्ताव घलो पारित करे जाही।
चंदेल-जेपी नड्डा मुलाकात
छत्तीसगढ़ विधानसभा के नेता प्रतिपक्ष नारायण चंदेल ह नई दिल्ली म भारतीय जनता पार्टी के राष्ट्रीय अध्यक्ष जे.पी. नड्डा ले मुलाकात करीन। ए मउका म ओमन ह विधानसभा म नेता प्रतिपक्ष के दायित्व दे जाय म श्री नड्डा बर अपन आभार जतईन। ए दउरान श्री चंदेल ह प्रदेस के राजनीतिक माहौल के बारे म घलो श्री नड्डा ल बतईन।
मुख्यमंत्री-ग्रामीण ओलंपिक
मुख्यमंत्री भूपेश बघेल ह किहीन हे कि राज्य सरकार, प्रदेस म ग्रामीण अउ पारंपरिक खेल मन ल बढ़ावा दे बर ग्रामीण ओलंपिक के आयोजन के संबंध म विचार करत हे। ए आयोजन म लइका मन, युवा मन अउ सियान मन तको सामिल हो सकही, जेखर ले गंवई क्षेत्र म खेल मन बर एक ठिन सुघ्घर वातावरण बन सकय।
वसुधा गुप्ता-महानिदेशक
भारतीय सूचना सेवा के बड़े अधिकारी डॉक्टर वसुधा गुप्ता ह आकाशवाणी के समाचार सेवा प्रभाग के महानिदेशक के कार्यभार संभाल लीन हे। उन्नीस सौ नवासी बैच के अधिकारी डॉक्टर वसुधा गुप्ता ह बत्तीस बछर ले जादा के अपन कार्यकाल म सूचना अउ प्रसारण मंत्रालय के आने-आने मीडिया इकाई म बड़े पद मन म काम करीन। एखर पहिली, ओमन ह पत्र सूचना कार्यालय म महानिदेशक रिहीन, उहां ओमन ह कोविड महामारी के दउरान बड़े भूमिका निभईन। ओमन ल आने-आने मीडिया प्लेटफार्म म भारत सरकार बर फीडबैक, डैश बोर्ड, पहल अउ सरकार बर तथ्य जांच व्यवस्था के श्रेय घलो मिले हे। ओमन ह आकाशवाणी के समाचार सेवा प्रभाग म अपर महानिदेशक के पद म रहत क्षेत्रीय भासा मन म सोशल मीडिया प्लेटफॉर्म के सुरूवात करीन। डॉक्टर वसुधा गुप्ता ह दिल्ली के भारतीय प्रौद्योगिकी संस्थान आईआईटी ले पीएचडी करे हे।
शालेय क्रीडा प्रतियोगिता
दुरूग जिला म तीन ले छह सितंबर तक राज्य स्तरीय शालेय क्रीडा प्रतियोगिता के आयोजन करे जाही। भिलाई विद्यालय सेक्टर-दू परिसर म होवइया ए आयोजन म बॉक्सिंग, साइकल पोलो, फैंसिंग, नेटबॉल, बैडमिंटन, लॉन टेनिस संघरा आठ खेल स्पर्धा कराय जाही।
अउ अब थोरकुन समाचार सार म –
– इंडियन ऑयल कॉपोर्रेशन ह उन्नीस किलोग्राम वाले कमर्शियल एलपीजी सिलेंडर के कीमत म इंक्यानवे रूपिया पचास पइसा के कमी के घोसना करे हे। ए दर आज ले लागू होही।
– मुख्यमंत्री भूपेश बघेल ह प्रदेसवासी मन ल बिसेस रूप ले उत्कल समाज के लोगन ल नुवाखाई परब के बधाई दीन हे।
– जांजगीर-चांपा जिला के धुरकोट गांव म होय एक ठिन सड़क हादसा म सेवानिवृत्त प्रधान आरक्षक के मउत होगे।
अउ
– खेल दिवस के मउका म राजनांदगांव म राखे गे तीन दिन के मेजर ध्यानचंद स्मृति इंटर क्लब हॉकी प्रतियोगिता के खिताब लाल बाग इलेवन ह जीते हे। काली फाइनल मुकाबला मिलचाल इलेवन अउ लालाबाग इलेवन के बीच खेले गे रिहीस।