अमित शाह-छत्तीसगढ़
केन्द्रीय गृह अउ सहकारिता मंत्री अमित शाह ह किहीन हे कि केन्द्र अउ छत्तीसगढ़ सरकार मिलके वामपंथी उग्रवाद ल खतम करे म जरूर सफल होही। श्री शाह ह आज अपन छत्तीसगढ़ प्रवास के दउरान नवा रायपुर स्थित राष्ट्रीय अन्वेषण अभिकरण-एनआईए के शाखा कार्यालय भवन के उद्घाटन समारोह ल संबोधित करत हुए ए बात ल किहीन। केन्द्रीय मंत्री ह किहीन कि दोष सिद्धि के मामला म एनआईए ह चौरानवे प्रतिसत ले जादा सफलता हासिल करे हे। नवा रायपुर म ए भवन ह एनआईए के बढ़त साख के परिचय आय। आने वाला बछर म मई ले पहिली एनआईए के कार्यालय सबो राज्य म होही। अब तक अट्ठारह राज्य म एनआईए के कार्यालय खुल चुके हे। केन्द्रीय मंत्री ह किहीन कि पाछु तीन बछर म एनआईए ह काफी विस्तार करे हे।
समारोह म मुख्यमंत्री भूपेश बघेल ह किहीन कि वामपंथी उग्रवाद हमला विरासत म मिले हे। एखर ले हमर कई जवान मन सहीद होय हे अउ जनहानि घलो होय हे। तभो आज वामपंथी उग्रवाद उपर काफी हद तक लगाम लगाय जा चुके हे। एखर बर राज्य पुलिस अउ केन्द्रीय बल ह धन्यवाद के पात्र हे। ओमन किहीन कि जल्दी ही हम छत्तीसगढ़ ले वामपंथी उग्रवाद ल खतम करे म सफल होबो। श्री बघेल ह इहू किहीन कि छत्तीसगढ़ म एनआईए के कार्यालय भवन खोले ले अपराध मनके रोकथाम म मदद मिलही।
अमित शाह-सेमिनार
केन्द्रीय गृह मंत्री अमित शाह ह आज रायपुर के पंडित दीनदयाल ऑडिटोरियम म प्रधानमंत्री नरेन्द्र मोदी उपर केन्द्रित ‘‘मोदी एट द रेट ट्वेंटी‘‘ किताब ल लेके आयोजित संगोष्ठी म मुख्य वक्ता के रूप म सामिल होईन। ए मउका म श्री शाह ह किहीन कि राष्ट्र प्रथम, मोदी के जीवन के मंत्र आय। मोदीजी के व्यक्तित्व से लोगन मन प्रेरित होवत हे अउ उंखर कार्यकाल ल ए किताब के जरिया समझ सकथे। ओमन किहीन कि मोदी के नाम अउ काम ल देस के जनता ल बताय के जरूरत नइ हे। मोदीजी ल हर व्यक्ति ह अपन-अपन नजरिया से देखे हे। युवा मन मोदी जी स्टार्टअप के मार्गदर्शक के रूप म देखते। मोदी के प्रधानमंत्री बने के बाद देस म कई ठन परिवर्तन दिखाई दीस। देशभर म करोड़ों सौचालय बनीस, जेन ह माता-बहिनी मन सम्मान देके काम करीस। श्री शाह ह किहीन कि मोदी जी ह गरीबी ल देखे हे अउ अनुभव करे हे। आज मोदीजी के जीवन ल लोगन मनके सामने लाय के जरूरत हे।
सगोष्ठी म पूर्व मुख्यमंत्री अउ भाजपा के राष्ट्रीय उपाध्यक्ष डॉक्टर रमन सिंह, भाजपा के प्रदेस अध्यक्ष अरूण साव सहित पार्टी के अन्य पदाधिकारी अउ बुद्धिजीवी मौजूद रिहीन।
न्यायाधीश-शपथ
न्यायमूर्ति उदय उमेश ललित ह आज भारत के मुख्य न्यायाधीश के रूप म सपथ लीन। राष्ट्रपति द्रौपदी मुर्मु ह राष्ट्रपति भवन म आयोजित समारोह म उनला देस के उनचासवां मुख्य न्यायधीश के रूप म सपथ दिलईन। न्यायमूर्ति उदय उमेश ललित ह न्यायमूर्ति एन.वी. रमना के जघा म आय हे। उंखर कार्यकाल ए बछर आठ नवंबर तक रिही। शपथ ग्रहण समारोह म उप राष्ट्रपति जगदीप धनखड़, प्रधानमंत्री नरेन्द्र मोदी अउ दूसर केन्द्रीय मंत्री मन उपस्थित रिहीन।
बस्तर विकास प्राधिकरण-बैठक
बस्तर क्षेत्र आदिवासी विकास प्राधिकरण के बइठका कोंडागांव म आयोजित करे गीस। प्राधिकरण के अध्यक्ष लखेश्वर बघेल अउ जिला के प्रभारी मंत्री कवासी लखमा के अध्यक्षता म आयोजित बइठका म एनएमडीसी के सुपर स्पेशलिटी अस्पताल, राष्ट्रीय राजमार्ग क्रमांक-तीस अउ कांकेर जिला म बाईपास सड़क सहित अलग-अलग निर्माण काम मनके समीक्षा करे गीस। बइठका म सदस्य मन ह प्राधिकरण के बत्तीस करोड़ रूपिया के बजट ल बढ़ाके सौ करोड़ रूपिया करे के प्रस्ताव दीन। संगेसंग वन अधिकार मान्यता पत्र पट्टाधारी मन ल सासन के योजना मनके लाभ दिलाय के संगेसंग किसान मनके पंजीयन अउ केसीसी कार्य के ग्राम स्तर म व्यापक प्रचार-प्रसार के जरूरत बताय गीस।
पोला पर्व
छत्तीसगढ़ के लोकपर्व पोरा आज प्रदेसभर म पारंपरिक तरीका ले उल्लास के संग मनाय जात हे। ए अवसर म किसान मन अच्छा फसल के कामना के संग अपन बइला ल सुंदर ढंग से सजाके उंखर पूजा-अर्चना करीन। संगेसंग उनला ठेठरी, खुर्मी अउ चीला जइसे छत्तीसगढ़ी व्यंजन के भोग घलो लगईन।
पोरा तिहार कृषि संस्कृति म पशुधन के महत्व ल दर्शाने वाला परब आय। आज रईपुर सहित प्रदेस के ग्रामीण क्षेत्र मन म पोरा तिहार धूमधाम ले मनाय जात हे। लइका मन माटी के बइला अउ दूसर खिलौना मन संग आनंद उठईन।
मुख्यमंत्री भूपेश बघेल के रईपुर स्थित निवास म घलो पोरा-तीजा के तिहार धूमधाम के संग मनाय गीस। मुख्यमंत्री ह अपन परिवार संग भगवान शिव अउ नंदी बइला के पूजा-अर्चना कर प्रदेसवासी मनके सुख-समृद्धि के कामना करीन। ए मउका म मुख्यमंत्री निवास म जलेबी दउड़, कबड्डी, मटकी डांस सहित स्थानीय खेल मनके आयोजन करे गीस। येमा महिला मन बढ़-चढ़के हिस्सा लीन। संगेसंग स्थानीय कलाकार अउ नर्तक दल मन घलो अपन प्रस्तुति दीन।
मन की बात
प्रधानमंत्री नरेन्द्र मोदी आकाशवाणी ले मन की बात कार्यक्रम म काली बिहनिया ग्यारह बजे देश-विदेश के लोगन मन संग अपन विचार साझा करही। ये कार्यक्रम ल आकाशवाणी अउ दूरदर्शन के सब्बो नेटवर्क, आकाशवाणी समाचार वेबसाइट अउ न्यूज ऑन एआईआर मोबाइल ऐप म घलो प्रसारित करे जाही। आकाशवाणी समाचार, डी.डी. न्यूज, प्रधानमंत्री कार्यालय, सूचना अउ प्रसारण मंत्रालय के यू-ट्यूब चैनल म एखर सीधा प्रसारण होही।
जिले की चिट्ठी
आकाशवाणी समाचार डहार ले काली संझा छह बजके तीस मिनट म ‘‘जिले की चिट्ठी‘‘ कार्यक्रम के प्रसारण करे जाही। ए कार्यक्रम आकाशवाणी के रायपुर केंद्र डहार ले प्रसारित होही। जेला जम्मों केंद्र मन ह एके संग रिले करही। ए बखत के अंक म ‘‘गरियाबंद‘‘ जिला के गतिविधि मनके बारे म जानकारी दे जाही।
अउ अब थोरकुन समाचार सार म –
– राज्य सासन ह स्कूल सिक्षा विभाग के अंतर्गत छह सौ इकसठ सिक्षक मनके हाल ही म जारी स्थानांतरण आदेस ल लिपिकीय त्रुटि के सेती निरस्त कर देहे।
– गरियाबंद जिला पंचायत के सीईओ ह भ्रष्टाचार अउ अनियमितता के आरोप म ग्राम पंचायत बिरिघाट के सचिव ल निलंबित कर देहे।
– राजनांदगांव के बूढ़ासागर सरोवर के सौंदर्यीकरण कार्य म अनियमितता बरते के मामला म तीन झिन अधिकारी अउ एक लेखापाल के खिलाफ निलंबन के कार्रवाई के संगेसंग एफआईआर दर्ज कराय जाही। नगर निगम के सामान्य सभा के बइठका म एखर संबंधित प्रस्ताव ल सर्व सम्मित से मंजूरी दे देहे।
– नारायणपुर जिला के फसरगांव थाना क्षेत्र के कड़हागांव म माओवादी मन ह बीते रतिहा एक झिन ग्रामीण के धारदार हथियार से हत्या कर दीन।
– दुर्ग-भिलाई ट्रक-ट्रेलर एसोसिएशन के पदाधिकारी अउ ट्रांसपोर्टर मन ह वाहन चालक अउ परिचालक मन संग खुर्सीपार चउक म भिलाई इस्पात संयंत्र-बीएसपी प्रबंधन के खिलाफ प्रदर्सन करीन। एसोसिएशन के आरोप हे कि बीएसपी प्रबंधन डहार ले स्थानीय मनके बजाय बाहरी ट्रांसपोर्टर मन ल काम दे जात हे।
अउ
– धमतरी वनमंडल के अंतर्गत दुगली वन परिक्षेत्र म एक ठन तेंदुआ के सव बरामद करे गेहे। ये मृत तेंदुआ के चारों पंजा गायब पाय गेहे। ए मामला म अज्ञात आरोपी मनके खिलाफ वन्यप्राणी अधिनियम के तहत मामला दर्ज करे गेहे।