अमित शाह – छत्तीसगढ़
केंद्रीय गृह मंत्री अमित शाह काली सत्ताईस अगस्त के एक दिवसीय प्रवास म रायपुर आही। श्री शाह मंझनियां दू बजे रायपुर पहुंचही। एखर बाद ढाई ले साढ़े तीन बजेतक नवा रायपुर स्थित एनआईए के मुख्यालय भवन के उद्घाटन करही।
केंद्रीय गृह मंत्री चार बजे पंडित दीनदयाल ऑडिटोरियम पहुंचही। जिहां ओमन प्रधानमंत्री नरेंद्र मोदी उपर केंद्रित – मोदी एट द रेट ट्वेंटी- किताब ल लेके होवइया सेमीनार म मुख्य वक्ता के रूप म सामिल होही। श्री शाह संझा साढ़े पांच बजे भाजपा प्रदेश कार्यालय म पार्टी पदाधिकारी मनके बइठका लीही। एखर बाद ओमन साढ़े सात बजे दिल्ली बर रवाना होही।
यूनिफाइड कमांड बैठक
प्रदेश म माओवाद विरोधी अभियान म तेजी लाये जाही । ये बात मुख्यमंत्री भूपेश बघेल ह आज रायपुर म आयोजित स्टेट यूनिफाइड कमांड के बइठका के अध्यक्षता करत कीहिन। ओमन ह प्रदेश के माओवाद प्रभावित क्षेत्र मन म स्थानीय गांव वाले मनखे मन ल विश्वास म लेके माओवाद के खिलाफ अभियान चलाये के निर्देश दीन। ए बइठका म माओवाद प्रभावित क्षेत्र मन म तैनात राज्य अउ केंद्रीय सुरक्षा बल के जवान मनके कल्याण के संबंध म घलो चर्चा करीन। मुख्यमंत्री ह माओवाद प्रभावित क्षेत्र मन म चलत अधोसंरचना के काम के सुरक्षा के संग निर्धारित समय म पूरा करे बर कीहिन।
बइठका म छत्तीसगढ़ राज्य के सीमावर्ती राज्य महाराष्ट्र, तेलंगाना, आंध्रप्रदेश अउ ओडिशा के रद्दा उपर सरलग निगरानी राखे के निर्देश दीन। जिहां ले माओवादी मनके आये-जाये के संभावना होथे। संगेसंग सीमावर्ती राज्य मनके संग खबर ल घलो साझा करे बर जोर दे गीस।
मुख्यमंत्री बिजली संयंत्र
प्रदेश म तेरा सौ बीस मेगावाट के नवा बिजली संयंत्र के स्थापना करे जाही ।ए बात मुख्यमंत्री भूपेश बघेल ह आज रायपुर म पावर कंपनी मनके समीक्षा बइठका के दउरान कहीन। नवा संयंत्र के स्थापना के बाद छत्तीसगढ़ स्टेट पावर जनरेशन कंपनी के खुद के विद्युत उत्पादन क्षमता बाढ़के चार हजार तीन सौ मेगावाट हो जाही। ये छत्तीसगढ़ स्टेट पावर जनरेशन कंपनी के सबले बड़े अउ आधुनिक संयंत्र होही।
बइठका के दउरान मुख्यमंत्री ह भविष्य म विद्युत के मांग ल देखत पूर्ति बर जरूरी विद्युत उपलब्धता के समीक्षा करीन। ओमन ह कीहिन कि बछर दू हजार तीस-इकतीस तक विद्युत मांग म होवइया बढ़ोत्तरी के आपूर्ति बर नवा विद्युत संयंत्र के जरूरत होही। मुख्यमंत्री ह राज्य के विद्युत उत्पादन कंपनी ल कोरबा पश्चिम म देगे जमीन म सुपर क्रिटिकल नवा विद्युत उत्पादन संयंत्र के स्थापना के निर्देश दीन।
प्रधानमंत्री स्मार्ट हैकथॉन
प्रधानमंत्री नरेंद्र मोदी ह कीहिन कि भारत के भविष्य युवा मनके अभिनव प्रयोग अउ काम उपर निर्भर करही। युवा शक्ति के अभिनव सोच अवइया पच्चीस बछर म भारत ल विश्व म शीर्ष स्थान दिलाही।
काली रतिहा स्मार्ट हैकथॉन के नवाचारी मन संग वीडियो कॉन्फ्रेन्स के माध्यम ले गोठबात करत श्री मोदी ह कीहिन कि इक्कीसवीं सदी के भारत अपन युवा मन म पूरा विश्वास रखत आगू बाढ़त हे। ओमन ह कीहिन कि पाछू आठ बछर म पेटेंट के संख्या ह सात गुना बाढ़े हे।
राज्यपाल-विवि समीक्षा
राज्यपाल अनुसुइया उइके ह निजी विश्वविद्यालय के कुलपति ले कहिन कि प्रदेश म उच्च शिक्षा के क्षेत्र म बहुत संभावना हवय अउ एखर बर ओमन लक्ष्य निर्धारित करे के काम करय। ओमन ह कीहिन कि प्रदेश के विद्यार्थी मन ल कौशल अउ रोजगार मूलक शिक्षा देके आवश्यकता हे । जेला बढ़ावा दे जाय। शासकीय अउ निजी विश्वविद्यालय के दू दिन के समीक्षा बइठका ल संबोधित करत राज्यपाल ह कहिन कि विश्वविद्यालय मन म स्वस्थ प्रतिस्पर्धा हो, ताकि राज्य के युवा मनके क्षमता के विकास हो सके।
बइठका म नैक ग्रेडिंग अउ नवा शिक्षा नीति सहित कतकोन बिंदु उपर चर्चा करे गीस। राज्यपाल ह कहिन कि विश्वविद्यालय मन म नवा शिक्षा नीति जल्दी लागू करे जाय। राज्यपाल ह पैरामेडिकल अउ कृषि के क्षेत्र म विद्यार्थी मनके बाढ़त रूचि ल देखत विश्वविद्यालय मन म पाठ्यक्रम चालू करे संबंधी नियम ल विद्यार्थी मनके हित म छूट देके संबंध म चर्चा करीन।
बइठका म राज्यपाल ह एनएसएस, रेडक्रॅास अउ स्काउट गाइड के गतिविधि ल घलो विश्वविद्यालय मन म प्राथमिकता के संग आयोजित करे के निर्देश दीन। ए बेरा म सुश्री उइके ह शासकीय विश्वविद्यालय मनके समान अच्छा काम करइया निजी विश्वविद्यालय बर कुलाध्यक्ष सम्मान प्रदान करे के घोषणा करीन।
सुकमा बच्चे बीमार
सुकमा जिला म पेदाकुरती पोटाकेबीन आश्रम के सौ ले जादा लईका मन म बुखार अउ जुकाम के शिकायत के बाद स्वास्थ्य विभाग ह सतर्क होगे हे। जिला शिक्षा अधिकारी नितिन दंडसेना ह घटना के पुष्टि करत बताइन कि पोटाकेबिन के सतरा लईका मन ल दोरनापाल के अस्पताल म भर्ती कराय गेहे। एमा ले दू लईका म डेंगू अउ तीन म मलेरिया के लक्षण पाय गेहे।
जिला कलेक्टर हरीश एस. ह स्वास्थ्य विभाग के टीम ल लईका मनके बने देखभाल के निर्देश दीन।
कार्यवाहक अध्यक्ष
राज्य शासन ह तितली गौरव बिंदल ल बेमेतरा जिला के थान खम्हरिया नगर पंचायत के कार्यवाहक अध्यक्ष नियुक्त करे हे। नगरीय प्रशासन विभाग के अवर सचिव राकेश साहू ह ए संबंध म आदेश जारी कर देहे। तितली गौरव बिंदल थान खम्हरिया नगर पांचायत के वार्ड क्रमांक पांच के पार्षद हे ।
जानबा के मुताबिक तत्कालीन अध्यक्ष अंजना ठाकुर के खिलाफ कांग्रेस के दस झिन पार्षद डहार ले लाये गे अविश्वास प्रस्ताव पारित होय के सेती ये पद रिक्त होगे रीहिस।
कराते चैंपियनशिप
जांजगीर-चांपा म काली ले दू दिवसीय राज्य स्तरीय ओपन कराते चैंपियनशिप के आयोजन करे जाही। जिला कराते संघ अउ राज्य यूनाइटेड शोतोकान कराते एसोसिएशन के संयुक्त तत्वाधान म होवइया ए प्रतियोगिता के उद्घाटन काली संझा राज्य गौ सेवा आयोग के अध्यक्ष महंत रामसुंदर दास करहीं। ए स्पर्धा म जांजगीर-चांपा, कोरबा, रायपुर, बलौदाबाजार, रायगढ़, दुर्ग अउ बिलासपुर के संग आने-आने जिला के तीन सौ ले जादा महिला अउ पुरूष खिलाड़ी मन भाग लीही।
स्वाइन फ्लू
स्वास्थ्य विभाग ह लोगन मनले मौसमी बीमारी के संग कोविड-नाइंटीन अउ स्वाइन फ्लू ले सतर्क रेहे के अपील करीन। संचालक महामारी नियंत्रण डॅाक्टर सुभाष मिश्रा ह बताइन कि स्वाइन फ्लू एच-वन एन-वन इन्फ्लुएंजा ए के कारण होथे । ये वायरस हवा के कण अउ संक्रमित वस्तु मन ल छुए ले फैलथे। डॅाक्टर मिश्रा ह बताइन कि स्वाइन फ्लू के लक्षण कोरोना के लक्षण जइसे हे। एमा खांसी, बलगम आना, गला म दर्द या खराश, जुकाम अउ कुछु लोगन मन म फेफड़ा म इंफेक्शन होय म सांस चढ़े लगथे। जउन मनखे मन ल अइसे लक्षण महसूस होवत हे, ओमन ल तुरते स्वाइन फ्लू के संग कोरोना के घलो जांच कराना चाही। प्रदेश म सबो मेडिकल कॉलेज म स्वाइन फ्लू के जांच के सुविधा उपलब्ध हे।
इही बीच जांजगीर-चांपा जिला के बम्हनीडीह क्षेत्र म स्वाइन फ्लू ले पीड़ित एक महिला के मउत होगे। मुख्य चिकित्सा अउ स्वास्थ्य अधिकारी डॅाक्टर आर. के. सिंह ह एखर पुष्टि करत बताइन कि गांव पोडीशंकर रहइया ए महिला के इलाज बिलासपुर के एक निजी अस्पताल म चलत रीहिस। स्वाइन फ्लू के मामला आगू आय के बाद जिला म स्वास्थ्य विभाग के टीम सतर्क होगे हे अउ घर-घर म सर्वे करे जात हे।
अग्निपथ योजना
छत्तीसगढ़ अउ प्रध्यप्रदेश के जम्मों जिला बर अग्निपथ योजना के तहत महिला सैन्य पुलिस रैली अवइया उन्नीस ले बाईस अक्टूबर तक जबलपुर म आयोजित करे जाही। ए रैली म सामिल होय बर ज्वाइन इंडियन आर्मी वेबसाइट म ऑनलाइन पंजीयन करे जात हे ।
अउ अब पेस हे मौसम के हाल –
प्रदेश म काली कतकोन जगा म हल्का ले मध्यम बरसा होय के संग छींटा पड़े के संभावना हे । मौसम विभाग ले मिले जानकारी के अनुसार एक द्रोणिका एक उपरी हवा के चक्रीय चक्रवाती घेरा दक्षिण पूर्व उत्तरप्रदेश अउ ओखर तीर तखार म बने हे। एखर असर ले प्रदेश म काली एक दू जगा म गरज-चमक के संग आकाशीय बिजली गिरे अउ भारी बरसा होय के चेतावनी दे गेहे।