छत्तीसगढ़ अउ मध्यप्रदेश के जम्मों जिला बर अग्निपथ योजना म महिला सैन्य पुलिस रैली अवइया उन्नीस ले बाईस अक्टूबर तक जबलपुर म राखे जाही। ए रैली म संगरे बर अभ्यर्थी मन ल सात सितंबर तक ज्वाइन इंडियन आर्मी वेबसाईट म ऑनलाईन पंजीयन कराय बर पड़ही। ए संबंध म अउ जादा जानकारी नवा रायपुर के सेना भर्ती कार्यालय ले ले जा सकत हे।
उंहें भारतीय थल सेना कोति ले अग्निपथ योजना म युवा मनके भर्ती बर अवइया तेरह ले बाईस नवंबर तक रायपुर म रैली राखे जाही। एमा संगरे बर अर्जी देवइया मन ल ज्वाइन इंडियन आर्मी वेबसाइट म तीन सिंतबर तक पंजीयन कराना जरूरी हे। एमा आने-आने पद म भर्ती बर आठवीं ले बारहवीं पास के शैक्षणिक योग्यता तय करे गेहे। ये रैली म भाग लेबर एक अक्टूबर उन्नीस सौ निन्यानबे ले एक अप्रैल दू हजार पांच के बीच जनम लेवइया अभ्यर्थी पात्र होही। ये रैली ले सामान्य ड्यूटी सैनिक के संगेसंग र्क्ल्क, स्टोर कीपर अउ ट्रेड मैन के पद म भर्ती करे जाही।
मुख्यमंत्री भूपेश बघेल के जनमदिन म आज राष्ट्रपति द्रौपदी मुर्मू, उप राष्ट्रपति जगदीप धनखड़ अउ प्रधानमंत्री नरेंद्र मोदी समेत आने-आने राजनेता मन बधाई अउ शुभकामना दीन हे। उप राष्ट्रपति अउ प्रधानमंत्री ह अपन संदेस म मुख्यमंत्री के स्वस्थ अउ दीर्घायु जीवन के संगेसंग उंखर उज्जवल भविष्य के कामना करीन हे।
केंद्रीय गृहमंत्री अमित शाह ह घलो श्री बघेल ले फोन म गोठबात करत जनमदिन के शुभकामना दीन। उंहें प्रदेश के राज्यपाल अनुसुइया उइके अउ राज्यमंत्री मंडल के सदस्य मन घलो मुख्यमंत्री के जनमदिन म अपन संदेस म उंखर स्वस्थ अउ खुशहाल जिनगी के कामना करीन। इही बीच मुख्यमंत्री के जनमदिन म उंखर रायपुर स्थित निवास म आज ओपन हाउस के आयोजन करे गीस। ये बेरा म आने-आने सामाजिक अउ सांस्कृतिक संस्था के पदाधिकारी समेत आम लोगन मन मुख्यमंत्री ले भेंट करके अपन शुभकामना दीन।
छ.ग.माध्यमिक शिक्षा मंडल
छत्तीसगढ़ माध्यमिक शिक्षा मंडल ह दसवीं अउ बारहवीं के पूरक परीक्षा के नतीजा घोषित कर देहे। पढ़इया लइका मन मंडल के वेबसाइट म जाके अपन परीक्षा के नतीजा देख सकत हे। ए पूरक परीक्षा जुलाई महीना म करे गे रीहिस। नतीजा के मुताबिक पूरक परीक्षा म हाईस्कूल के करीबन तेइस प्रतिशत अउ हायर सेकण्डरी के करीबन अड़तीस प्रतिशत परीक्षार्थी पास होइन।
नया जिला पुलिस पदस्थापना
राज्य सरकार ह पाछू बछर गठित नवा जिला म राज्य पुलिस सेवा के ग्यारा झिन अधिकारी मनके नवा पदस्थापना कर देहे। आदेश के मुताबिक डोंगरगढ़ म पदस्थ नेहा पांडे ल खैरागढ़ के अतिरिक्त पुलिस अधीक्षक बनाये गेहे। उंहे राजनांदगांव के अतिरिक्त पुलिस अधीक्षक आकाश मरकाम ल इही पद म मोहला मानपुर अउ रायगढ़ के अतिरिक्त पुलिस अधीक्षक महेश्वर नाग ल सारंगढ़ म इही पद म पदस्थ करे गेहे।
अइसने बिलासपुर म छत्तीसगढ़ सशस्त्र बल के उप सेनानी निमेश बरइया ल सारंगढ़ के अतिरिक्त पुलिस अधीक्षक बनाये गेहे। संगेसंग माना रायपुर के उप सेनानी गायत्री सिंह अब सक्ति के अतिरिक्त पुलिस अधीक्षक होही। उंहें कोरिया के उप पुलिस अधीक्षक रूपेश डांडे ल इही पद म मनेंद्र चिरमिरी भेजे गेहे।
जांजगीर चांपा जिला के उप पुलिस अधीक्षक संदीप मित्तल ल कुनकुरी के अनु विभागीय पुलिस अधिकारी बनाये गेहे। अइसने रायपुर म पदस्थ उप पुलिस अधीक्षक के तबादला इही पद म सक्ति म कर दे गेहे। कुनकुनी के अनुविभागीय पुलिस अधिकारी मनीष कंवर ल सारंगढ़ के उप पुलिस अधीक्षक बनाये गेहे। पत्थलगांव के एसडीओ पुलिस मयंक तिवारी ल इही पद म मानपुर म अउ मानपुर के एसडीओ पुलिस हरिश पाटिल ल वही पद म पत्थलगांव म पदस्थ करे गेहे।
स्वास्थ्य समीक्षा
प्रदेस के स्वास्थ्य मंत्री टी.एस. सिंहदेव ह केंद्रीय योजना म मिले रकम ल तय समय म प्राथमिकता के संग खरच करे के निर्देश देहे। ओमन स्टाफ, नर्स अउ स्वास्थ्य कर्मचारी मनके खाली पद म भर्ती प्रक्रिया जरूरत के मुताबिक जल्दी पूरा करे बर कीहिन ।
आज मंत्रालय म अपन विभाग के समीक्षा बइठका म स्वास्थ्य मंत्री ह राष्ट्रीय स्वास्थ्य मिशन म मंजूर विकास काम ल बेरा म पूरा करे के निर्देश दीन। ओमन प्रदेश के आने-आने जगा म चलाये जात प्राथमिक स्वास्थ्य कें्रद अउ सामुदायिक स्वास्थ्य केंद्र के नवा भवन बनाये के काम ल जल्दी पूरा करे के बात कीहिन। शासकीय दंत चिकित्सा महाविद्यालय अउ अस्पताल म मिलइया सुविधा के समीक्षा करत सिंहदेव ह कीहिन कि इंहा अवइया मरीज मन ल सबो सुविधा अस्पताल म ही देवाय जाय।
ट्रेन हादसा
राजनांदगांव जिला के डोंगरगढ़ स्टेशन के यार्ड म आज भिनसरहा कोरबा ले इतवारी जावत शिवनाथ एक्सप्रेस के दू ठिन डिब्बा पटरी ले उतर गे । घटना के बेरा ट्रेन के गति धीरे रीहिस। जेखर ले यात्री मन ल कोनो किसम के नुकसान नइ होय हे । सूचना मिलतेच मंडल रेल प्रबंधक मनीन्दर उत्तपल अउ आने बड़का अधिकारी मन संग राहत दल तुरते घटना के जगा पहुंच गे।
घटना के बेरा शिवनाथ एक्सप्रेस डोंगरगढ़ स्टेशन के तीर यार्ड म चलत रीहिस। एखर सेती मुख्य रेल लाईन जादा बेरा बर बाधित नइ होइस। तभो ले ये घटना के सेती सात ठिन ले जादा ट्रेन के अवई जवई कुछ देर बर प्रभावित रीहिस। राहत दल के कर्मचारी मन ह पटरी ले उतरे डिब्बा के यात्री मन ल स्लीपर कोच म पहुंचाइन तभे ट्रेन ल राजनांदगांव ले नागपुर बर रवाना करे गीस।
इही बीच बिलासपुर रेल मंडल के हिमगीर स्टेशन म चौथा रेल लाईन बर नॉन इंटरलॉकिंग के काम पाछू इक्कीस अगस्त ले चलत हे जउन उनतीस अगस्त तक चलही, जेखर ले पच्चीस अगस्त के वलसाड ले चलइया वलसाड-पुरी एक्सप्रेस अउ अठाईस अगस्त के पुरी ले चलइया पुरी-वलसाड एक्सप्रेस ल रद्द कर देहे।
दुर्घटना
दुर्ग बायपास रोड म आज बीहनिया करीबन छै बजे एक कार ह डिवाइडर तोड़के विपरित दिशा ले आवत टरक ल टक्कर मार दीस। ये दुर्घटना म कार म बइठे दू झिन कालेज पढ़इया छात्र मनके मउकाच मउत होगे, उंहें एक आने छात्र गंभीर रूप ले घायल होगे हे। जउन ल इलाज बर स्थानीय अस्पताल म भर्ती कराय गेहे। पुलिस के मुताबिक ये तीनो बीहनिया नास्ता करे बर ढाबा जावत रीहिन।