अधिकारी/कर्मचारी-हड़ताल
केन्द्र असन महंगाई भत्ता के मांग ल लेके राज्य के सरकारी अधिकारी-करमचारी मन काली ले अनिश्चितकालीन हड़ताल म जाय के फइसला लेहे। ए बारे म काली फेडरेशन ह समीक्षा बइठका लेके हड़ताल के रणनीति तय करीस। फेडरेशन के दावा हे कि ए हड़ताल म प्रदेसभर के तहसीलदार, नायब तहसीलदार, जिला न्यायालय अउ अधीनस्थ न्यायालय के करमचारी मन घलो रइही।
इहां ए बतादन कि एखर आगू करमचारी-अधिकारी फेडरेशन अउ शिक्षक संगठन मन केन्द्र असन महंगाई भत्ता यानि डीए के मांग ल लेके पाछु पच्चीस ले उनतीस जुलाई तक हड़ताल करे रिहीन। उहें, हाले म राज्य सासन ह करमचारी मनके डीए ल छै प्रतिसत बढ़ाय हे।
अमृत महोत्सव-प्रदर्शनी
आजादी के अमृत महोत्सव के चलत राष्ट्रीय अनुसूचित जनजाति आयोग ह आदिवासी जननायक मनके योगदान वाले प्रदर्सनी राजधानी रईपुर के कई ठिन यूनिवर्सिटी अउ कालेज मन म लगाय के निर्णय लेहे। ए प्रदर्शनी म आजादी के लड़ई म आदिवासी जननायक अउ उंखर सुघ्घर योगदान ल दर्साय जाही। ए बारे म राष्ट्रीय जनजातीय आयोग के समन्वयक डॉक्टर अनुराग जैन ह राज्यपाल अनुसुईया उइके ले भेंट करके उनला कारीकरम बारे म विस्तार ले बतईन। संगे कारीकरम म आय बर नेवता घलो दीन। ओमन बतईन कि रईपुर के पंडित रविशंकर शुक्ल विश्वविद्यालय, इंदिरा गांधी कृषि विश्वविद्यालय समेत आई.आई.एम., ट्रिपल आईटी अउ एनआईटी के संगेसंग आने यूनिवर्सिटी अउ कालेज मन म जनजातीय नायक मनके स्वतंत्रता के लड़ई म उंखर योगदान बतईया प्रदर्सनी लगाय जाही। ए प्रदर्सनी ह पन्द्रह सितंबर तक रइही।
ओति, भिलाई के पंडित जवाहर लाल नेहरू चिकित्सालय अउ अनुसंधान केन्द्र म राज्य के पहला स्किन बैंक सुरू होगे हे। आजादी के अमृत महोत्सव के मउका म एखर सुभारंभ भिलाई इस्पात संयंत्र के प्रभारी निदेशक अनिर्बान दास गुप्ता ह करीन। एखर संगे राज्य म जवाहर लाल नेहरू चिकित्सालय अउअनुसंधान केन्द्र ह कैडेवरिक टिशू ट्रांसप्लांट सुरू करइया पहलइया संस्थान बन गेहे।
भाजपा-बैठक
भारतीय जनता पार्टी रायपुर संभाग के पदाधिकारी मनके काली राजधानी के एकात्म परिसर स्थित कार्यालय म बइठका होईस। बइठका म क्षेत्रीय संगठन महामंत्री अजय जामवाल, प्रदेस सह प्रभारी नितिन नबीन, प्रदेश अध्यक्ष अरूण साव अउ प्रदेस संगठन महामंत्री पवन साय समेत पार्टी के आने बड़का पदाधिकारी सामिल होईन।
ए मउका म क्षेत्रीय संगठन महामंत्री अजय जामवाल ह किहीन कि छत्तीसगढ़ के कार्यकर्ता मन मजबूत अउ संगठनवान हे। उहें, प्रदेस अध्यक्ष अरूण साव ह किहीन कि जउन सपना ल लेके छत्तीसगढ़ राज्य बनाय गे रिहीस। राज्य सरकार ह एखर विपरीत काम करत हे।
साव-मुलाकात
भाजपा के प्रदेश अध्यक्ष अरूण साव ह आज अपन संसदीय क्षेत्र बिलासपुर म पार्टी कार्यकर्ता अउ आम लोगन मन ले भेंट करके उंखर समस्या सुनीन। ए दउरान बिलासपुर के संगे कोरबा, जांजगीर-चांपा, रायगढ़, गौरेला-पेण्ड्रा-मरवाही अउ मुंंगेली के भाजपा पदाधिकारी अउ कार्यकर्ता मनके संगे क्षेत्र के लोगन मन ह श्री साव ल अपन समस्या बतईन। ए मउका म ओमन अधिकारी मन ले गोठबात करके समस्या के निराकरण के आश्वासन दीन।
योगाभ्यास सत्र
छत्तीसगढ़ योग आयोग डहार ले दृष्टिहीन नोनी मन ल योग के माध्यम ले स्वास्थ्य लाभ देवाय बर राजधानी रईपुर के हीरापुर स्थित नेशनल एसोसिएशन फॉर द ब्लाइंड प्रेरणा संस्थान बालिका छात्रावास म योगाभ्यास सत्र राखे गीस। ए मउका म योग आयोग के अध्यक्ष ज्ञानेश शर्मा ह किहीन कि दृष्टिहीन नोनी मन ल योग के जरिया स्वस्थ रेहे अउ आत्म शक्ति ल मजबूत बनाय खातिर ए सत्र ह महत्वपूर्ण साबित होही। ए मउका म दृष्टिहीन नोनी मन योग क्रिया मनके प्रदर्सन करीन।
मोदी पुस्तक-सेमिनार
जांजगीर-चांपा जिला के जैजेपुर म प्रधानमंत्री नरेन्द्र मोदी के मुख्यमंत्री अउ प्रधानमंत्री वाले आठ बछर के कार्यकाल ल लेके ‘‘मोदी एट दी रेट ट्वेंटी‘‘ पुस्तक ल लेके एक ठिन सेमिनार के आयोजन करे गीस। ए मउका वक्ता मन म बतईन कि पुस्तक म अब्बड़ अकन नामी मनखे मनके आलेख प्रकासित करे गेहे। भाजपा नेता अउ पूर्व आईएएस ओ.पी. चौधरी ह बतईन कि प्रधानमंत्री ह गुजरात के मुख्यमंत्री पद म राहत विकास के अब्बड़ अकन नवा आयाम विस्थापित करे हे। तहां फेर प्रधानमंत्री बने के बाद देस के सकारात्मक तस्वीर बदले खातिर कई ठन योजना बनईन। उखरे बदौलत आज जम्मों विश्व म भारत के कद ह बाढ़े हे।
दुर्ग-वृक्षारोपण
पढ़ईया लइका मन ल वन अउ रूख-राई बर जागरूक करे खातिर दुरूग जिला के पाटन विकासखंड के सबो स्कूल मन म आम, जाम, जामुन, अमरूद, बादाम, असोक, कचनार अउ आंवरा प्रजाति के पचास-पचास ठिन पौधा लगाय जात हे। दुरूग वनमंडल डहार ले ए अभियान म करीबन तीन सौ स्कूल मन म पन्द्रह हजार पौधा लगाय के लक्ष्य राखे गेहे।
स्वाईन फ्लू-मौत
प्रदेस म स्वाइन फ्लू के मामला सरलग बाढ़त हे। राजधानी रईपुर म एखर चार ठिन नवा मामला मिले हे। उहें, एक झिन स्वाइन फ्लू पॉजिटिव माईलोगिन के इलाज बेरा मउत होगे। ए जानकारी रईपुर के मुख्य चिकित्सा अउ स्वास्थ्य अधिकारी मीरा बघेल ह दीन।
इहां ए बतादन कि राज्य म अब तक स्वाइन फ्लू के सौ ले जादा मामला आगू आय हे, जेमा ले करीबन चौव्वन झिन मरीज मनके इलाज अस्पताल मन म चलत हे।
दुर्घटना
राजनांदगांव जिला म मोहगांव थाना क्षेत्र ले लगे गांव जीराटोला तीर एक ठिन मालवाहक गाड़ी के पलटी खाय ले दू झिन मनखे के मउत होगे। उहें, उन्नीस झिन आने मनखे मन घायल होगे हे, जउन मन ल छुईखदान के अस्पताल म भर्ती कराय गेहे। पुलिस ह गाड़ी चलइया के खिलाफ अपराध दर्ज कर लेहे। ए सबो मनखे मन बगदूर म होवत सत्संग म जावत रिहीन।
एम. गीता-निधन
छत्तीसगढ़ कैडर के उन्नीस सौ संतानवे बैच के भारतीय प्रशासनिक सेवा के अधिकारी एम. गीता के काली दिल्ली के एक ठिन प्राईवेट अस्पताल म निधन होगे। आईएएस एम. गीता पाछु कुछ महीना पहिली छत्तीसगढ़ ले प्रतिनियुक्ति म केन्द्रीय कृषि मंत्रालय म संयुक्त सचिव के पद म पदस्थ होय रिहीन।
मुख्यमंत्री भूपेश बघेल ह श्रीमती एम. गीता के निधन म सोक व्यक्त करत किहीन कि गोधन न्याय योजना के क्रियान्वयन म श्रीमती गीता के योगदान अंकित हे।
विश्व मच्छर दिवस
फैमिली हेल्थ इंडिया अउ स्वास्थ्य विभाग के संघरा आयोजन म काली कोंडागांव जिला के नौ ठिन गांव मन म मितानिन दीदी अउ आने विभाग मन संगे मिलके विश्व मच्छर दिवस मनईन, जेमा स्कूली लइका मन रैली निकाल के लोगन मन ल जागरूक करे के संगे डेंगू अउ मलेरिया ले बांचे बर सपथ देवईन। उहें, नारा लेखन, घरो-घर जाके लार्वा सर्वे अउ जरूरतमंद मन ल मच्छरदानी बांटे गीस।
खेल समाचार
बाईसवां राज्य स्तरीय शालेय क्रीडा प्रतियोगिता आज ले जशपुर म सुरू होईस। एखर सुभारंभ पत्थलगांव के विधायक अउ जनजातीय सलाहकार परिषद के उपाध्यक्ष रामपुकार सिंह ह करीन। ए प्रतियोगिता म पांचों संभाग के दू सौ चालीस झिन खिलाड़ी भाग लेवत हे।
अउ अब थोरकुन समाचार सार म –
– मुख्यमंत्री भूपेश बघेल ह आज रईपुर स्थित अपन निवास कार्यालय म स्वर्गीय वामनराव लाखे के पुण्यतिथि के मउका म उंखर फोटू म फुल-माला चढ़ाके उनला नमन करीन हे।
– भाजपा के प्रदेस अध्यक्ष अरूण साव ल काली रईपुर के पुरानी बस्ती स्थित मां महामाया मंदिर म पूजापाठ करके छत्तीसगढ़ के खुसहाली बर बिनती बिनोइन।
– बीजापुर जिला म आत्मसमर्पित एक झिन माओवादी के हत्या होगे। ए आसंका जताय जात हे कि ए हत्या ल माओवादी मन करे हे।
– रईपुर जिला के अंतर्गत होटल मैनेजमेंट प्रशिक्षण बर अभ्यर्थी मन ले काली बाईस अगस्त तक आवेदन मंगाय गेहे।
अउ
– जशपुर जिला म हल्दीमुड़ा क्षेत्र के कांटाटोंगरी के जंगल म हाथी मनके हमला ले एक झिन किसान के मउत होगे। उहें, एक झिन किसान घायल होगे हे।