प्रधानमंत्री-जल जीवन मिशन
प्रधानमंत्री नरेन्द्र मोदी ह किहीन कि देस के दस करोड़ ग्रामीण परिवार मन ल नल के साफ पानी पहुंचाय गे हवय। श्री मोदी ह पणजी म जल जीवन मिशन म हर घर जल उत्सव म वीडियो कान्फ्रेंसिंग के माध्यम ले गोठबात करीन। ओमन अपन खुसी जाहिर करीन कि मात्र तीन बछर म सात करोड़ ग्रामीण घर ल नल ले पानी देवाय गे हवय। प्रधानमंत्री ह किहीन कि अमृतकाल के एखर ले सुघ्घर सुरूवात नइ हो सकय। आजादी के सात दसक बाद घलो सिरिफ तीन करोड़ घरेच म ए सुविधा रिहीस।
जन्माष्टमी
भगवान श्रीकृष्ण के जन्म उत्सव जन्माष्टमी आज छत्तीसगढ़ संघरा देस के आने-आने जघा म श्रद्धा अउ आस्था के संग मनाय जावत हे। ए मउका म प्रदेस के कृष्ण मंदिर मन म जरूरी तैयारी कर ले गेहे। मंदिर अउ घर मन म आज रतिहा भगवान श्रीकृष्ण के विशेष रूप ले पूजा-अर्चना करके जनम उत्सव मनाय जाही।
राजधानी रईपुर के टाटीबंध के इस्कान मंदिर म अउ समता कॉलोनी के राधा कृष्ण मंदिर म बिहनिया ले श्रद्धालु मन ह भगवान के दर्सन करीन।
कृष्ण कुंज-लोकार्पण
कृष्ण जन्माष्टमी के मउका म आज ले प्रदेस के एक सौ बैसठ नगरीय निकाय म कृष्ण कुंज योजना के सुरूवात होईस। एमा चुने गे जघा म पीपल, बरगद, नीम, कदम, शहतूत, तेंदू, चिरौंजी जइसन सांस्कृतिक महत्व के पौधा लगाय गीस। मुख्यमंत्री भूपेश बघेल ह राजधानी रईपुर के तेलीबांधा म ़कृष्ण कुंज के लोकार्पण करके कदम के पौधा लगईन। ए दउरान डेढ़ हेक्टेयर ले जादा जघा म तीन सौ तिरासी ठन पौधा लगाय गीस।
कारीकरम म मुख्यमंत्री ह किहीन कि भगवान श्रीकृष्ण कर्मयोगी, ज्ञानयोगी, भक्तियोगी के संग अर्थशास्त्री घलो रिहीन। ओमन ह कृषि ले गौपालन ल जोड़े रिहीन। छत्तीसगढ़ म राज्य सरकार ह घलो गौपालन ल घलो बढ़ावा दे हवय। ओमन किहीन कि भगवान कृष्ण ह हमन ल जीवन जीये के कला सिखाथे। ओमन किहीन कि कृष्ण कुंज योजना ल शहरी वातावरण ल शुद्ध राखे बर अउ सांस्कृतिक महत्व के पेड़ ल सहेजे के अनोखा पहल हे।
हमर तिरंगा अभियान
देस के आजादी के पचहत्तर बछर पूरा होय म राज्य के सबो सासकीय, निजी अउ अनुदान प्राप्त स्कूल मन म काली बीस ले तीस अगस्त तक हमर तिरंगा कारीकरम कराय जाही। ए संबंध म समग्र सिक्षा विभाग के प्रबंध संचालक ह सबो जिला सिक्षा अधिकारी, प्राचार्य डाइट अउ जिला मिशन समन्वयक ल ए कारीकरम के निरीक्षण अउ प्रचार-प्रसार करे बर निरदेस दीन हे। कारीकरम के उद्देश्य विद्यार्थी अउ समुदाय के बीच देशभक्ति के भावना अउ संविधान बर आस्था जगाना हे।
मुख्यमंत्री-निर्देश
मुख्यमंत्री भूपेश बघेल ह अवइया तिहार अउ सार्वजनिक उत्सव मन ल देखत नगरीय क्षेत्र म सबो जरूरी व्यवस्था करे के निरदेस दीन हे। ए संबंध म नगरीय प्रशासन विभाग डहार ले जिला कलेक्टर, नगर निगम आयुक्त अउ मुख्य नगर पालिका अधिकारी मन ल पत्र लिखे गे हवय। पत्र म तिहार के दउरान तालाब अउ घाट मनके सफई, ब्लीचिंग पाउडर के चिड़काव, पीये के पानी के व्यवस्था बर निरदेस दीन हे। पत्र म यहू केहे गेहे कि गणेश विसर्जन, दुर्गा पूजा अउ दूसर तिहार म राज्य सरकार डहार ले जारी करे गे निरदेस के पालन करे जाय। नदी मन म मूर्ति के विसर्जन ल रोके जाय, जेखर ले नदी के पानी ल खराब होय ले बचाय जा सकय। उहें, ध्वनि प्रदूषण उपर नियंत्रण बर पुलिस प्रसासन डहार ले जरूरी कार्रवाई करे जाय।
स्मार्ट रीडिंग रूम
मुख्यमंत्री भूपेश बघेल ह स्मार्ट सिटी मिशन म आज रईपुर के मोतीबाग म प्रस्तावित स्मार्ट रीडिंग रूम के भूमिपूजन करीन। करीबन साढ़े छह करोड़ रूपिया के लागत ले बनइया ए रीडिंग रूम म ग्राउंड के संग दू मंजिला भवन बनाय जाही। ए भवन म वाई-फाई, लेन संघरा करीबन छह सौ लोगन के बइठे के व्यवस्था होही, जेमा विद्यार्थी मन ह एक साथ पढ़ई कर सकही। उहें, दिव्यांग लइका मन ल आधारतल म जघा देवाय जाही।
राजीव गांधी जयंती-राशि वितरण
पूर्व प्रधानमंत्री स्वर्गीय राजीव गांधी के जयंती के मउका म काली बीस अगस्त के मुख्यमंत्री भूपेश बघेल राज्य के किसान, पशुपालक ग्रामीण, गौठान समिति अउ महिला स्व-सहायता समूह के खाता म सत्रह सौ पचास करोड़ चौबीस लाख रूपिया के रासि ऑनलाइन जारी करही। ए रासि छत्तीसगढ़ सरकार के राजीव गांधी किसान न्याय योजना अउ गोधन न्याय योजना म दे जाही। ए दउरान मुख्यमंत्री ह प्रदेस के किसान, गौपालक अउ समूह के माईलोगिन मन ले वर्चुअल गोठबात घलो करही।
दुर्घटना
जगदलपुर-रईपुर राष्ट्रीय राजमार्ग क्रमांक-तीस म आज बिहनिया होय सड़क दुर्घटना म पांच झन लोगन के मउत होगे। हमर संवाददाता ह बतईन कि आज मुंधरहा एक ठिन यात्री बस अउ कार के बीच जगदलपुर सिटी कोतवाली क्षेत्र म मेटावाड़ा पुल तीर जोरदार भिंड़त होगे। ए हादसा अतका भयंकर रिहीस कि कार के परखच्चा उड़ गे अउ ओमा बइठे चार झिन लोगन के मउकाच म मउत होगे। उहें, गंभीर रूप ले घायल एक झिन मनखे के अस्पताल म मउत होगे। गाड़ी म बइठे ए मन ल गैस कटर के मदद ले बाहिर निकाले गीस। बताय जावत हे कि बस रईपुर ले जगदलपुर कोति जावत रिहीस। जबकि कार सवार जगदलपुर ले रईपुर डहार आवत रिहीस। मृतक मन म दू झिन युवक जगदलपुर के, दू झन नगरनार के एक झिन सुकमा जिला के रहइया रिहीस। बस म बइठे यात्री मन ल कोनों नुकसान नइ होय हे।
बकोरी बांध-गेट
धमतरी जिला म पाछु कुछेक दिन म सरलग होवत बरसा ले सब्बो बांध मन लबालब होगे हे। उहें, मगरलोड विकासखंड के बकोरी बांध म पानी के भारी दबाव के सेती गेट के टूटे के खबर हे। गेट टूटे ले अचानक बहुत जादा मात्रा म बांध के पानी आय ले नहर ल घलो नुकसान पहुंचे हे। एखर ले करीबन ढाई सौ एकड़ खेत म पानी भर गे हवय, जेखर सेती कई एकड़ म लगे फसल के बर्बाद होय के आसंका हे। संगेसंग नगह के पानी तीर-तखार के कुछेक घर म घलो घुस गे हवय।
खबर के मुताबिक धमतरी जिला ले करीबन पचपन किलोमीटर के दूरी म बकोरी बांध हे, जेखर क्षमता ढाई टीएमसी हे।
रेडियो श्रोता दिवस
रेडियो श्रोता दिवस के मउका म काली बीस अगस्त के ओल्ड लिसनर्स ग्रुप ऑफ इंडिया डहार ले रईपुर के सिविल लाईन के वृंदावन हॉल म एक ठिन बिसेस कारीकरम कराय जाही। कारीकरम के मुख्य अतिथि आकाशवाणी केन्द्र रईपुर के सहायक केन्द्र निदेशक लखन लाल भौर्य होही। कारीकरम के अध्यक्षता पूर्व जिला पंचायत अध्यक्ष अशोक बजाज करही।
मल्टीमीडिया चित्र प्रदर्शनी
सूचना अउ प्रसारण मंत्रालय के केन्द्रीय संचार ब्यूरो रईपुर डहार ले बिलासपुर म भारतीय रेल के नॉर्थ ईस्ट इंस्टीट्यूट परिसर म आजादी के अमृत महोत्सव म तीन दिन के मल्टीमीडिया चित्र प्रदर्शनी के आयोजन करे गीस। एमा रस्सा खींच, मटका फोड़, निबंध, भासन अउ प्रश्नमंच जइसन प्रतियोगिता कराय गीस, जेमा सुघ्घर प्रदर्सन करइया प्रतिभागी मन ल समापन कारीकरम म काली सम्मानित करे गीस।
नारायण चंदेल-जांजगीर
छत्तीसगढ़ विधानसभा के नेता प्रतिपक्ष बने के बाद नारायण चंदेल ह आज जांजगीर-चांपा पहुंचीन। ए दउरान भाजपा कार्यकर्ता मन ह बाईक रैली निकाल के उंखर स्वागत करीन। उहें, कचहरी चउक ले नैला तक पदयात्रा घलो निकाले गीस। एखरे संग नारायण चंदेल ह जयस्तंभ म शहीद मन ल नमन करीन।
अउ अब थोरकुन समाचार सार म –
– छत्तीसगढ़ के प्रसिद्ध कलासाधक अउ संगीत बिसेसज्ञ महाराज चक्रधर सिंह के आज जयंती हरय। ए मउका म मुख्यमंत्री भूपेश बघेल ह ओमन ल नमन करीन।
– आज विश्व फोटोग्राफी दिवस हे। ए मउका म मुख्यमंत्री भूपेश बघेल ह रईपुर प्रेस क्लब डहार ले राखे गे प्रेस से रूबरू अउ सम्मान समारोह म सामिल होईन।
– बेमेतरा जिला के थान खम्हरिया थाना के ग्राम चुहका म नाला म नहावत खानी बहे ले एक झिन नोनी के मउत होगे। उहें, एक झिन दूसर लइका ल ग्रामीण के मदद ले बचाय गे हवय, जेखर इलाज चलत हे।
अउ
– सूरजपुर जिला के रेवटी चउकी पुलिस ह उत्तरप्रदेश के दू झिन गांजा तस्कर मन ल गिरफ्तार करके उंखर तीर ले ग्यारह किलो गांजा जब्त करीन हे।