नया जिला-शुभारंभ
प्रदेस म एक ले पांच सितंबर के बीच पांच ठिन नवा जिला के उद्घाटन करे जाही। एखर संग छत्तीसगढ़ म जिला के संख्या बाढ़ के तैंतीस हो जही। मुख्यमंत्री भूपेश बघेल एक सितंबर के सक्ती जिला के सुभारंभ करही। उहें, दू सितंबर के मोहला-मानपुर, तीन सितंबर के मनेन्द्रगढ़, चार तारीख के खैरागढ़ अउ पांच सितंबर के सारंगगढ़ जिला के उद्घाटन करही। ए दउरान मुख्यमंत्री ए नवा जिला म रोड-शो करही। ए सबो पांच जिला म राज्य सरकार ह ओएसडी, प्रशासन अउ ओएसडी पुलिस के नियुक्ति घलो होगे हे।
आत्मानंद इंग्लिश महाविद्यालय
प्रदेस म स्वामी आत्मानंद इंग्लिश मीडियम स्कूल असन अब स्वामी आत्मानंद इंग्लिश मीडियम आदर्श महाविद्यालय खोले जाही। मुख्यमंत्री भूपेश बघेल ह प्रदेस के पढ़ईया लइका मनके हित म आदर्श महाविद्यालय सुरू करे के फइसला लेहे। ए संबंध म मुख्यमंत्री ह मुख्य सचिव ल दस दिन म कार्ययोजना प्रस्तुत करे के निरदेस दीन हे। प्रदेस म स्वामी आत्मानंद इंग्लिश मीडियम आदर्श महाविद्यालय खुले ले इंग्लिश मीडियम स्कूल म पढ़ईया लइका मन ल बारहवीं कक्षा के बाद आगू के पढ़ई बर बाहिर जाय बर नइ पढ़ही। राज्य म ही ओमन ल अंग्रेजी माध्यम म बने सिक्षा मिलही। पहिली चरण म अवइया सैक्षणिक सत्र जून दू हजार तेईस ले राज्य के प्रमुख नगर म कम से कम दस ठिन इंग्लिश मीडियम कॉलेज खोले जाही। उहें, अवइया तीन बछर म राज्य के जम्मों जिला मुख्यालय म अइसन कालेज खुलही।
राजीव गांधी जयंती-राशि वितरण
पूर्व प्रधानमंत्री स्वर्गीय राजीव गांधी जयंती के मउका म बीस अगस्त के मुख्यमंत्री भूपेश बघेल राज्य के किसान, पशुपालक, गौठान समिति अउ महिला स्व-सहायता समूह के खाता म सत्रह सौ पचास करोड़ चौबीस लाख रूपिया के रकम ऑनलाइन जारी करही। ए रकम छत्तीसगढ़ सरकार के राजीव गांधी किसान न्याय योजना अउ गोधन न्याय योजना के तहत दे जाही। ए बेरा म मुख्यमंत्री प्रदेस के जनप्रतिनिधि, किसान, गौपालक अउ समूह के माईलोगिन के वर्चुअल गोठबात करही।
हमर तिरंगा अभियान
मुख्यमंत्री भूपेश बघेल ह प्रदेस के नागरिक मन ले अपील करीन हे कि ‘‘हमर तिरंगा अभियान‘‘ के सफलता पूर्वक समापन के बाद जम्मों झन अपन-अपन घर, दुकान अउ संस्था म फहराय गे राष्ट्रीय ध्वज ल ससम्मान उतार के अउ समेट के राखय, जेखर ले उचित मउका म आय म ध्वज ल फेर ले फहराय जा सकय।
खबर के मुताबिक स्वतंत्रता के पचहत्तरवां वर्षगांठ म ग्यारह ले सत्रह अगस्त तक प्रदेस म स्वतंत्रता सप्ताह के आयोजन करे गीस। एमा प्रदेसवासी मन ह ‘‘हमर तिरंगा अभियान‘‘ म उछाह के संग बढ़-चढ़के भागीदार करीन।
भारतीय थल सेना भर्ती
भारतीय थल सेना कोति ले अग्निवीर योजना म युवा मनके भर्ती बर अवइया तेरह ले बाईस नवंबर तक रईपुर म रैली राखे जाही। ए आयोजन म संघरे बर आवेदक मन ल ‘‘ज्वाइन इंडियन आर्मी‘‘ वेबसाइट म तीन सितंबर तक पंजीयन कराना जरूरी हे। पांच अगस्त ले एमा पंजीयन सुरू होगे हे। एमा आने-आने पद म भर्ती बर आठवीं ले बारहवीं कक्षा पास के सैक्षणिक योग्यता तय करे गेहे। रैली म एक अक्टूबर उन्नीस सौ निन्यानवे ले एक अप्रैल दू हजार पांच के बीच जनम लेवइया अभ्यर्थी पात्र होही।
सोशल मीडिया चैनल्स-ब्लॉक
सूचना अउ प्रसारण मंत्रालय ह आठ यू-ट्यूब समाचार चैनल, एक फेसबुक अकाउंट अउ दू फेसबुक पोस्ट ल ब्लॉक कर देहे। ए सबो देस के राष्ट्रीय सुरक्षा, विदेस संग संबंध अउ सार्वजनिक व्यवस्था के संबंध म गलत सूचना प्रसारित करे म जुड़े रिहीन। ब्लॉक करे गे चैनल म सात भारतीय अउ एक पाकिस्तानी समाचार चैनल सामिल हे। सूचना अउ प्रसारण मंत्रालय ह बतईन कि ए जम्मों चैनल भारतीय सशस्त्र बल अउ जम्मू-कश्मीर के संबंध म फर्जी खबर चलात रिहीन। सरकार ह दू हजार इक्कीस ले लेके अब तक एक सौ दू यू-ट्यूब चैनल अउ कई ठिन आने आने सोशल मीडिया अकाउंट ब्लॉक करे हे।
श्रीकृष्ण जन्माष्टमी
भगवान श्रीकृष्ण के जन्म उत्सव ‘‘जन्माष्टमी‘‘ के परब काली भक्तिभाव अउ उछाह के संग मनाय जाही। ए मउका म राजधानी रईपुर समेत प्रदेस के कृष्ण मंदिर मन म जन्मोत्सव के तियारी होवत हे। श्रीकृष्ण जन्माष्टमी म राज्यपाल अनुसुईया उइके, मुख्यमंत्री भूपेश बघेल, विधानसभा अध्यक्ष चरणदास महंत ह प्रदेसवासी मन ल सुभकामना दीन हे।
इही बीच, राज्य सरकार ह जन्माष्टमी परब म प्रदेस म सुष्क दिवस घोसित करे हे। ए दउरान काली उन्नीस अगस्त के प्रदेस म सराब दुकान, रेस्टोरेंट, बार, होटल-बार अउ क्लब बंद राखे जाही। उहें, मांस बिक्री के दुकान ल बंद राखे के निरदेस दे गेहे। एखर संगेसंग जिला, संभाग अउ राज्य स्तरीय उड़नदस्ता कोति ले अवैध मदिरा के परिवहन अउ बिक्री के रोकथाम बर कड़ा कदम उठाय जाही।
कृष्ण कुंज
कृष्ण जन्माष्टमी के मउका म काली ले प्रदेस के एक सौ बैसठ नगरीय निकाय म कृष्ण कुंज योजना सुरू करे जाही। एमा बर, पीपल अउ अंवरा समेत सांस्कृतिक महत्ता के आने-आने पौधा लगाय बर जघा के चुनाव कर ले गेहे।
खबर के मुताबिक सहरी क्षेत्र म वातावरण ल शुद्ध राखे अउ सांस्कृतिक महत्ता के पेड़ सहेजे खातिर ए योजना सुरू करे गेहे। ए संबंध म मुख्यमंत्री भूपेश बघेल ह किहीन कि नगरीय क्षेत्र म तियार होवइया कृष्ण कुंज बर वन विभाग कोति ले कम से कम एक एकड़ भूईंया के आवंटन करे जाय।
मुक्केबाजी-प्रतियोगिता
राजधानी रईपुर के बलवीर सिंह जूनेजा स्टेडियम म काली अंतर्राष्ट्रीय मुक्केबाजी प्रतियोगिता ‘‘द जंगल-रम्बल‘‘ के आयोजन करे गीस। प्रतियोगिता म छह-छह राउंड के पांच मुकाबला होईस। प्रतियोगिता म पेशेवर भारतीय मुक्केबाज विजेन्दर सिंह अउ घाना के एलियासु सुले के बीच होय मुकाबला म विजेन्दर सिंह ह सिरिफ दू मिनट सात सेकेंड म एलियासु ल हरा दीस। प्रतियोगिता म अमेय नितिन अउ असद आसिफ खान, आशीष शर्मा अउ कार्तिक सतीस कुमार, सैकोम अउ गुरप्रीत सिंह, सचिन नॉटियाल अउ फैजान अनवर के बीच घलो मुकाबला होईस। ए मउका म मुख्यमंत्री भूपेश बघेल ह किहीन कि छत्तीसगढ़ ल एक खेल राज्य खेल गढ़ के रूप म स्थापित करे के परयास करे जात हे। ओमन किहीन कि मुक्केबाज विजेन्दर सिंह के पेशेवर लड़ई ए योजना ल अउ मजबूत करही। श्री बघेल ह यहू किहीन कि छत्तीसगढ़ के लोगन ल न सिरिफ खेल म प्रोत्साहित करना हे, भलूक प्रदेस ल खेल के महाशक्ति के रूप म पहिचान देवाना हे।
अधिकारी/कर्मचारी-हड़ताल
केन्द्र असन महंगाई भत्ता के मांग ल लेके राज्य के सरकारी अधिकारी-करमचारी मन ह बाईस अगस्त ले अनिस्चितकालीन हड़ताल करे के फइसला करे हे। ऐमा जिला न्यायालय अउ अधीनस्थ न्यायालय के करमचारी घलो सामिल होही। उहेंं, काली ले इक्कीस अगस्त तक सरकारी छुट्टी रही, जेखर सेती प्रदेस के सबो सरकारी कार्यालय काली ले बंद रइही।
खबर के मुताबिक एखर पहली करमचारी-अधिकारी फेडरेसन अउ सिक्षक संगठन ह केन्द्र असन महंगाई भत्ता ल लेके पच्चीस ले उनतीस जुलई तक हड़ताल करे रिहीन।
अउ अब थोरकुन समाचार सार म –
– केन्द्रीय क्षेत्रीय छात्रवृत्ति योजना म महाविद्यालय अउ विश्वविद्यालय के पढ़ईया लइका मन बर नवीन अउ नवीनीकरण ऑनलाइन अरजी देके आखिरी तारीख इकतीस अक्टूबर तय करे गेहे।
– संस्कृति विभाग कोति ले रईपुर के महंत घासीदास संग्रहालय के मुक्ताकाशी मंच म चौबीस अउ पच्चीस अगस्त के शास्त्री संगीत म आधारित दू दिवसीय पावस प्रसंग कारीकरम के आयोजन करे जाही।
– राजनांदगांव जिला के सीतागांव थाना ले लगे कंदाड़ी गांव म पाछु रतिहा माओवादी मन ह गांव के एक झिन मनखे ल गोली मार दीन। घायल ग्रामीण ल राजनांदगांव के मेडिकल कॉलेज अस्पताल म भर्ती कराय गेहे।
अउ
– भिलाई इस्पात संयंत्र के नगर सेवा अउ भूमि विभाग कोति ले अट्ठारह बछर बाद करोड़ों रूपिया के जमीन ल कब्जा मुक्त करा ले गेहे।