भारतीय जनता पार्टी के बड़का नेता अउ जांजगीर-चांपा के विधायक नारायण चंदेल छत्तीसगढ़ विधानसभा के नवा नेता प्रतिपक्ष होही। ए अभी के नेता प्रतिपक्ष धरमलाल कौशिक के जघा लीहीं। पार्टी के प्रदेस प्रभारी डी. पुरंदेश्वरी ह आज रईपुर म होय भाजपा विधायक दल के बइठका म उंखर नाव के घोसना करीन। बइठका म प्रदेस के सह प्रभारी नितिन नबीन अउ संगठन महामंत्री अजय जामवाल घलो मौजूद रिहीन।
नेता प्रतिपक्ष चुने जाय म श्री चंदेल ह किहीन कि चुनौती के बेरा ओमन ल भाजपा विधायक दल के नेता चुने गेहे। अवइया चुनाव म पार्टी ल विजय देवाना हमर प्राथमिकता रइही। ओमन राज्य सरकार के आलोचन करत किहीन कि प्रदेस म झूठ के सरकार चलत हे।
ओति, प्रदेस कांग्रेस अध्यक्ष मोहन मरकाम ह विधानसभा म नेता प्रतिपक्ष के रूप म नारायण चंदेल ल चुने जाय म प्रतिक्रिया देवत किहीन कि सिरिफ चेहरा बदले ले भाजपा के स्थिति म कोनों किसम के बदलाव नइ आ सकय। अपन एक बयान म श्री मरकाम म किहीन कि कांग्रेस ह पाछु साढ़े तीन बछर म प्रदेस म विकास के जउन काम करे हे, ओ आधार म राज्य के जनता के भरोसा ओला आगू घलो मिलत रइही।
भाजयुमो-बैठक
भारतीय जनता युवा मोर्चा ह बेरोजगारी के मुद्दा ल लेके प्रदेसभर म आंदोलन सुरू करे के ऐलान करे हे। आज रईपुर के प्रदेस भाजपा कार्यालय एकात्म परिसर म पत्रकार मन ले गोठबात करत युवा मोर्चा के प्रदेस प्रभारी अनुराग सिंहदेव अउ प्रदेस अध्यक्ष अमित साहू ह बतईन कि बेरोजगारी के मुद्दा म प्रदेस के युवा मन ल एकजुट करे बर अवइया बीस अगस्त के मसाल रैली निकाले जाही। चौबीस अगस्त के राजधानी म मुख्यमंत्री निवास के घेराव करे के संगेसंग प्रदर्सन करे जाही। एखर अगुवई भारतीय जनता युवा मोर्चा के राष्ट्रीय अध्यक्ष तेजस्वी सूर्या ह करही।
मुख्यमंत्री-निर्देश
प्रदेस के आने-आने जघा म पाछु कुछ दिन ले होवत सरलग बरसा के सेती बाढ़ के स्थिति ल देखत मुख्यमंत्री भूपेश बघेल ह परभावित क्षेत्र म तुरते राहत पहुंचाय के निरदेस दीन हे। ओमन किहीन कि जउन जघा म जलस्तर म बढ़ोतरी होवत हे, उहां जिला प्रसासन कोति ले सरलग स्थिति म नजर राखे जाय। संगेसंग राज्य स्तरीय राहत अउ बचाव दल के टीम ल सचेत राखे जाय। मुख्यमंत्री किहीन कि बाढ़ के आसंका वाले क्षेत्र म रोजे मुनादी करवा के गांव के लोगन ल सावधान करे जाय। उहें, नंदियां-नरवा के तीर-तखार म कोनों किसम के दुर्घटना अउ जनहानि ल रोके बर गोताखोर मन ल तैनात करे जाय। श्री बघेल ह बाढ़ प्रभावित क्षेत्र म लगाय गे राहत सिविर म खाय-पीये अउ दवई समेत आने व्यवस्था ल सुनिश्चित करे बर किहीन। संगेसंग बाढ़ ले होय नकसान के आंकलन करके मुआवजा के रासि बांटे के निरदेस दीन।
इही बीच, जांजगीर-चांपा जिला म महानदी म बने पुल ले गाड़ी के अवई-जवई सुरू होगे हे। इहां पाछु दू दिन म नंदियां के पानी पुल के उपर ले बोहाय के सेती अवई-जवई बाधित होगे रिहीस।
कृष्ण कुंज
प्रदेस के एक सौ इक्कीस नगरीय निकाय म ‘‘कृष्ण कुंज‘‘ योजना म पीपल, बर अउ अंवरा समेत सांस्कृतिक महत्ता के आने-आने पौधा लगाय बर जघा के चुनाव कर ले गेहे। ए योजना अवइया उन्नीस अगस्त के कृष्ण जन्माष्टमी के दिन सुरू करे जाही।
खबर के मुताबिक सहरी क्षेत्र म वातावरण ल शुद्ध राखे अउ सांस्कृतिक महत्ता के पेड़ सहेजे खातिर ए योजना सुरू करे गेहे।
यूनिसेफ-अभियान
प्रदेस के नागरिक मनके सशक्तिकरण बर राज्य सरकार अउ यूनिसेफ जुलमिलके जन-जागरूकता अभियान चलाही। एमा लोगन के स्वास्थ्य, सिक्षा, पोषण अउ सामाजिक सुरक्षा के योजना के संबंध म बिसेस रूप ले जानकारी दे जाही। ए अभियान बर यूनिसेफ के अधिकारी मन ह आज मुख्यमंत्री भूपेश बघेल ल उंखर निवास कार्यालय म ग्यारह सौ ले जादा संचार उपकरण भेंट करीन। एमा प्रोजेक्टर, मेगाफोन समेत संचार के आने उपकरण सामिल हे। इंखर मदद ले अभियान के कार्यकर्ता, ग्रामसभा, हाट-बाजार, आंगनबाड़ी केन्द्र अउ स्वास्थ्य केन्द्र म जाके लोगन ल स्थानीय भासा म योजना के संबंध म जानकारी दीही। अभियान के पहिली चरण म प्रदेस के अस्सी विकासखंड के दूरदराज के क्षेत्र म करीबन पचास लाख लोगन तक पहुंचाय के लक्ष्य राखे गेहे।
भारतीय थल सेना भर्ती
भारतीय थल सेना कोति ले अग्निवीर योजना म युवा मनके भर्ती बर अवइया तेरह ले बाईस नवंबर तक रईपुर म रैली राखे जाही। ए आयोजन म संघरे बर आवेदक मन ल ‘‘ज्वाइन इंडियन आर्मी‘‘ वेबसाइट म तीन सितंबर तक पंजीयन कराना जरूरी हे। एमा आने-आने पद म भर्ती बर आठवीं ले बारहवीं कक्षा पास के सैक्षणिक योग्यता तय करे गेहे। रैली म एक अक्टूबर उन्नीस सौ निन्यानवे ले एक अप्रैल दू हजार पांच के बीच जनम लेवइया अभ्यर्थी पात्र होही।
बिजली परीक्षण प्रयोगशाला
प्रदेस म बिजली उपकरण के जांच बर नवा रईपुर म एक क्षेत्रीय प्रयोगसाला स्थापित करे जाही। एखर बर राज्य सरकार अउ केन्द्रीय विद्युत अनुसंधान संस्थान के बीच आज एक समझौता म दस्तखत करे गीस। ए प्रयोगसाला बर राज्य सरकार कोति ले संस्थान ल दस एकड़ भूईंया देवाय जाही। करीबन तीन बछर के भीतर तैयार होवइया ए मध्य भारत के सबले बड़े प्रयोगसाला होही। ए प्रयोगसाला ल बनाय म करीबन इक्कीस करोड़ रूपिया खरच होय के अनुमान हवय।
मुख्यमंत्री पत्रकार सुरक्षा कानून
मुख्यमंत्री भूपेश बघेल ह किहीन हे कि प्रदेस म पत्रकार मनके स्वास्थ्य बीमा बर जल्दी बिसेस पहल करे जाही। ओमन विधानसभा के अवइया सीतकालीन या बजट सत्र म पत्रकार सुरक्षा कानून बनाय जाय के घोसना करीन। श्री बघेल ह काली राजधानी रईपुर म पत्रकार मनके सम्मान समारोह म ए घोसना करीन हे। ओमन किहीन कि सुप्रीम कोर्ट के पूर्व जस्टिस के अगुवई म ए संबंध म गठित करे गे समिति के कतकोन बइठका होगे हे। समिति कोति ले ए कानून के मसौदा तियार करे जा चुके हे। ए कारीकरम म मुख्यमंत्री ह पाछु दिन जांजगीर-चांपा जिला के पिहरीद गांव म बोरवेल म फंसे बाबू राहुल साहू ल सुरक्षित बाहिर निकाले के अभियान के सरलग एक सौ घंटा तक रिपोर्टिंग करइया इकसठ झिन पत्रकार मन ल श्रमवीर सम्मान के विभूषित करीन। एला देखत राज्य सरकार कोति ले पत्रकार मन ल स्वास्थ्य बीमा के लाभ देवाय बर जल्दी पहल करे जाही।
कारीकरम म मुख्यमंत्री ह राजनांदगांव म पत्रकार मन बर आवंटित आवासीय भूखंड म विकास काम बर एक करोड़ अस्सी लाख रूपिया देके घोसना करीन।
माउंट एलब्रुस तिरंगा
कबीरधाम जिला के युवा पर्वतारोही अंकिता गुप्ता ह पन्द्रह अगस्त के यूरोपीय महाद्वीप के सबले ऊंचा चोटी माउंट एलब्रुस म तिरंगा फहरा के देस म छत्तीसगढ़ के नाव रोशन करीन हे। ए उपलब्धि बर मुख्यमंत्री ह अंकिता गुप्ता ल बधाई अउ सुभकामना दीन हे।
माओवादी-गिरफ्तार
नारायणपुर पुलिस ह आठ लाख रूपिया के इनामी महिला माओवादी ल गिरफ्तार करे हे। जिला म पुलिस अउ सुरक्षा बल कोति ले चलाय जात तलाशी अभियान के बेरा काली ए महिला माओवादी जनमिलिशिया कमांडर ल कावानार के जंगल ले गिरफ्तार करे गीस। पुलिस के मुताबिक ए महिला माओवादी उपर विस्फोटक बिछाय, हथियार लूटे समेत आने घटना म सामिल रेहे के आरोप हे।
ट्रेन-हादसा
बिलासपुर ले भगत के कोठी जवइया एक्सप्रेस ट्रेन के एक डिब्बा काली रतिहा गुदमा अउ गोंदिया स्टेशन के बीच पटरी ले उतर गे। ए घटना म ट्रेन म सवार दू झिन यात्री मामूली चोट आय हे, जउन मन ल प्राथमिक उपचार के बाद इही ट्रेन ले भेजे गीस। घटना के जानकारी मिलते नागपुर रेलमंडल ले एक बिसेस रेलगाड़ी यात्री मनके मदद बर रवाना करे गीस। ए ट्रेन म बचाव दल के संग रेलमंडल के बड़का अधिकारी घलो घटना के जघा पहुंचीन। करीबन सात घंटा के बाद बिहनिया आठ बजे ए ट्रेन ल गोंदिया ले रवाना करे गीस।
हलषष्ठी
लइका मनके लंबी आयु के मनौती ले जुड़े हलषष्ठी के परब आज प्रदेसभर म परंपरा के मुताबिक मनाय जात हे। एला कमरछठ केहे जाथे। ए बेरा म महतारी मन उपवास राखके महुआ, लाई, परहर चाउर चढ़ाके पूजापाठ करत हलषष्ठी माता के कथा सुनथे। ए बेरा म राज्यपाल अनुसुईया उइके अउ मुख्यमंत्री भूपेश बघेल ह प्रदेसवासी बिसेस रूप ले माईलोगिन मन ल सुभकामना दीन हे।