महंगाई-भत्ता
राज्य सरकार के कर्मचारी मनके महंगाई भत्ता म छह प्रतिशत के बढ़ोतरी करे गेहे। वित्त विभाग ह ए संबंध म आज आदेस जारी कर देहे। राज्य सरकार के ए फइसला के बाद प्रदेस के कर्मचारी मन ल अब कुल अट्ठाईस प्रतिशत महंगाई भत्ता मिलही। बाढ़े महंगाई भत्ता के गणना पाछु एक अगस्त ले करे जाही।
छत्तीसगढ़ अधिकारी-कर्मचारी फेडरेशन के संयोजक कमल वर्मा ह बतईन कि प्रदेस के आने-आने सासकीय संगठन महंगाई भत्ता म बारह प्रतिशत बढ़ोतरी के मांग ल लेके पाछु कुछ समय ले आंदोलन करत रिहीन।
बस्तर फाईटर
बस्तर क्षेत्र म सुरक्षा बर गठित बस्तर फाइटर्स पुलिस बल म इक्कीस सौ आरक्षक मनके चयन सूची जारी कर दे गेहे। बस्तर संभाग के जम्मों सात जिला मन म ए पुलिस बल के तीन-तीन सौ आरक्षक तैनात करे जाही। आज जारी करे गे चयन सूची म बस्तर, दंतेवाड़ा, कांकेर, बीजापुर, नारायणपुर, सुकमा अउ कोंडागांव जिला म युवा मनके संघरा बड़का संख्या म स्थानीय युवती मन म घलो आरक्षक के रूप म चुने गेहे।
बारिश-01
बस्तर क्षेत्र म इंद्रावती नदी के जलस्तर घलो सरलग बाढ़त हे। एखर सेती बीजापुर ल महाराष्ट्र अउ तेलंगाना ले जोड़इया राष्ट्रीय राजमार्ग उपर अवई-जवई बंद होगे हे। पाछु रतिहा भोपालपट्टनम चंदनगिरी इलाका म बाढ़ के स्थिति बने के सेती देर रात ग्यारह बजे ले करीब डेढ़ बजे तक नगर सेना के जवान मन लगभग साठ झिन ग्रामीण मन ल बाढ़ प्रभावित क्षेत्र ले ओमन के घरेलू सामान समेत सुरक्षित जघा म पहुंचाय गीस।
जिला के गंगालूर इलाका म एक झिन ग्रामीण मछली पकड़े बर नंदिया म उतरे रिहीस, तभे तेज बहाव म बोहा गे। राहत दल के कर्मचारी मन उंखर सव बरामद करके परिजन मन ल सौंप दीन।
उहें, कोंडागांव जिला म घलो सरलग होवत बारिस के सेती तीस ले जादा गंवई मनके जिला मुख्यालय ले संपर्क टूट गेहे। जिला म सबो नदी-नाला उफान म हे। इहां मर्दापाल ले नारायणपुर जाने वाला रस्ता बंद होगे हे। उहें, केशकाल म बारदा नदी के पानी सड़क के उपर ले बोहात हे। एखर सेती धनोरा, इरागांव अउ चुरेगांव समेत लगभग छियालीस गंवई मनके संपर्क मुख्य मार्ग ले टूट गेहे।
इही बीच, धमतरी जिला के गंगरेल बांध म अभी भी पानी के आवक बने हुए हे। एखर सेती बांध के जम्मों चौदह गेट आजो खुल्ला हे। जिला म महानदी के जलस्तर सरलग बाढ़त हे। उहें, जांजगीर-चांपा जिला के शिवरीनारायण म महानदी के पानी सबरी सेतु के उपर ले बोहावत हे। एखरे सेती पुल के दूनों तरफ अवई-जवई बंद कर दे गेहे। इहां पुलिस बल ल घलो तैनात करे गेहे। महानदी के बाढ़त जलस्तर ल देखत प्रशासन ह तटीय इलाका मन म मुनादी कराके लोगन मन ल अलर्ट कर देहे।
बारिश-02
ओति, रायगढ़ जिला म पाछु कुछेक दिन होवत बरसात के सेती जिला के बांध अउ जलाशय मन म जलस्तर तेजी ले बाढ़त हे। जिला के समोदा बांध ले एक लाख क्यूसेक पानी छोड़े जात हे। प्रसासन ह बताय हे कि ए बांध के पानी आज सरिया-बरमकेला क्षेत्र तक पहुंच चुके हे। एला देखत बरमकेला अउ आसपास के इलाका मन म विशेष अलर्ट जारी करे गेहे। बाढ़ प्रभावित मनके मदद बर जिला के सूरजगढ़, पड़ीगांव, सरिया, छिछोर अउ उमरिया म राहत सिविर लगाय गेहे। कलेक्टर रानू साहू ह ए सिविर मन म भोजन अउ दवा समेत दूसर जरूरी इंतजाम सुनिश्चित करे बर किहीन हे। क्षेत्रीय विधायक प्रकाश नायक अउ कलेक्टर ह दूसर अधिकारी मन संग काली बाढ़ प्रभावित क्षेत्र मनके दउरा घलो करीन।
उहें, पुसौर अउ बरमकेला विकासखंड के अंतर्गत बाढ़ प्रभावित क्षेत्र के स्कूल मन म आज ले अट्ठारह अगस्त क लइका मन बर अवकाश घोसित करे गेहे।
ओति, गरियाबंद जिला म घलो पाछु दू दिन ले होवत सरलग बारिस के सेती सिकासेर बांध के जलस्तर तेजी ले बाढ़त हे। जलभराव ल नियंत्रित करे बर बांध के दस गेट ल खोल दे गेहे। ए बेरा बांध ले सोलह हजार क्यूसेक पानी छोड़े जात हे।
इही बीच, मुंगेली के आगर नदी म काली एक युवक के सव बरामद करे गीस। राहत दल के कर्मचारी मनके अनुसार ए युवक दू दिन पहिली नदी म बोहा गे रिहीस।
वाजपेयी-पुण्यतिथि
देश आज भारतरत्न अउ पूर्व प्रधानमंत्री अटल बिहारी वाजपेयी के चौथा पुण्यतिथि म ओमन ल सुरता करत हे। श्री वाजपेयी के निधन बछर दू हजार अट्ठारह म आजे के दिन होय रिहीस। ए मउका म राष्ट्रपति द्रौपदी मुर्मू, उप राष्ट्रपति जगदीप धनखड़ अउ प्रधानमंत्री नरेन्द्र मोदी समेत केन्द्रीय मंत्री मन अटल बिहारी वाजपेयी के समाधि स्थल सदैव अटल म जाके ओमन ल श्रद्धासुमन अर्पित करीन। सार्वजनिक जीवन अउ भारत के विकास म उंखर योगदान ल हमेसा याद रखे जाही। श्री वाजपेयी एक प्रखर राजनेता के संगेसंग कवि घलो रिहीन।
किसान स्कूल-ध्वजारोहण
जांजगीर-चांपा जिला के बहेराडीह गांव म संचालित देश के पहिली किसान स्कूल आजकल चर्चा म बने हे। आजादी के पचहत्तरवां वर्षगांठ म काली ले इहां कम्प्यूटर शिक्षा के सुरूवात घलो होगे हे। किसान मन डहार ले संचालित देस के ए पहिली किसान स्कूल म अट्ठारह बिसय के पढ़ई होथे। अपन नवाचार के सेती ए अनूठा स्कूल ल देस अउ प्रदेस म सरलग सराहना मिलत हे। ए किसान स्कूल म काली स्वाधीनता दिवस म बिसेस कारीकरम घलो राखे गीस। समारोह म गांव के किसान श्यामलाल राठौर ह ध्वजारोहण करीन।
हर घर तिरंगा
प्रादेशिक लोकसंपर्क ब्यूरो के जगदलपुर क्षेत्रीय कार्यालय डहार ले आजादी के अमृत महोत्सव के तहत काली बस्तर जिला के बिलोरी गांव म ‘‘हर घर तिरंगा अभियान‘‘ बर बिसेस प्रचार कारीकरम राखे गीस। ए मउका म बिलोरी के आने-आने स्कूल मन म स्वाधीनता दिवस समारोह के बाद विद्यार्थी अउ सिक्षक मनके संघरा स्थानीय जनप्रतिनिधि अउ ग्रामीण मन अपन हाथ म तिरंगा लेके रैली निकालीन। ए मउका म नगरनार के कला मंडली कोति ले स्थानीय भासा म देसभक्ति गीत अउ नृत्य के प्रदर्सन करे गीस अउ संघरा निबंध लेखन, प्रश्नोत्तरी, चित्रकला अउ रंगोली समेत दूसर आयोजन घलो होईस।
ओति, बेमेतरा सहर म आज स्थानीय सामाजिक संस्था के कार्यकर्ता मन चउक-चउराहा म लगे तिरंगा झंडा ल सम्मान पूर्वक उतार के सुरक्षित जघा म इकट्ठा करीन।
सुनो रायपुर अभियान
राजधानी के लोगन मन ल साइबर अपराध के प्रति जागरूक बनाय के उद्देश्य ले गृह विभाग ह ‘‘सुनो रायपुर अभियान‘‘ सुरू करे हे। गृहमंत्री ताम्रध्वज साहू ह काली ए अभियान के सुरूवात करीन। एखर अंतर्गत इक्कीस अगस्त तक साइबर जागरूकता सप्ताह मनाय जाही। ए मउका म गृहमंत्री ह किहीन कि इंटरनेट के जरिया होवइया साइबर अपराध मन ले बाचे बर सतर्कता अउ जागरूकता ही सबले कारगर उपाय हरय। श्री साहू ह रायपुर पुलिस डहार ले ए बारे म तियार करे गे पुस्तिका अउ सीडी के विमोचन घलो करीन।
अउ अब थोरकुन समाचार सार म –
– राज्यपाल अनुसुईया उइके ह पांरपरिक तिहार हलषष्ठी यानी कमरछठ के मउका म प्रदेसवासी मन ल सुभकामना दीन हे। बिसेस रूप महिला मन सुभकामना देवत राज्यपाल ह अपन संदेस म किहीन कि संतान के लंबा उमर के खातिर ए तिहार प्रदेस म बिसेस महत्व रखथे।
– वीरांगना रानी अवंतीबाई लोधी के जयंती म मुख्यमंत्री भूपेश बघेल ह आज अपन निवास कार्यालय म ओमन ल नमन करीन।
– कर्मचारी चयन आयोग डहार ले अवइया इक्कीस अगस्त के प्रदेस के आने-आने केन्द्र मन म संयुक्त स्नातक स्तरीय परीक्षा ले जाही। सामान्य अभ्यर्थी मन बर ए परीक्षा बिहनिया ग्यारह ले बारह बजे तक होही। दृष्टिबाधित दिव्यांग अभ्यर्थी मन बर परीक्षा के बेरा बिहनिया ग्यारह बजे ले बारह बजके बीस मिनट तक रइही।
अउ
– राजस्व अउ आपदा प्रबंधन विभाग ह वरिष्ठ सलाहकार अउ दस जिला के सलाहकार के संविदा पद बर चौबीस अगस्त तक आवेदन मंगाय हे।