स्वतंत्रता दिवस-प्रधानमंत्री
देश आज अपन स्वाधीनता के पहचत्तरवां बर्षगांठ मनावत हे। प्रधानमंत्री नरेन्द्र मोदी ह नई दिल्ली म लाल किला के प्राचीर से राष्ट्रीय ध्वज फहरा के स्वाधीनता दिवस समारोह के अगुवई करीन। ये अवसर म तिरंगा ल इक्कीस ठन तोप के सलामी दे गीस। एखर बर पहिली बार मेक इन इंडिया के तहत देस म ही विकसित होवित्जर तोप मनके इस्तेमाल करे गीस। अपन परंपरागत भासन म प्रधानमंत्री ह कहिन कि आज दुनिया के हर हिस्सा म भारत के तिरंगा गौरव अउ सम्मान के साथ लहरावत हे।
प्रधानमंत्री ह महात्मा गांधी, नेताजी सुभाष चन्द्र बोस, डॉक्टर बी.आर. अंबेडकर अउ विनायक दामोदर सावरकर जइसे महान नेता मनके प्रति आभार व्यक्त करीन। प्रधानमंत्री ह जवाहर लाल नेहरू, राममनोहर लोहिया अउ सरदार वल्लभ भाई पटेल सहित स्वतंत्र भारत के दूसर निर्माता मन ल घलो नमन करीन। प्रधानमंत्री ह किहीन कि आजादी के अमृत महोत्सव के दउरान हमला अपन राष्ट्र निर्माता मनके सपना ल याद करे के आवश्यकता हे। ओमन किहीन कि अब अमृतकाल म हमला अपन सामर्थ, संकल्प अउ सक्ति मनके संग पंच-प्रण ल आने वाला पच्चीस बछर बर केन्द्रित करना होही।
स्वतंत्रता दिवस-ध्वजारोहण-01
छत्तीसगढ़ म घलो स्वाधीनता दिवस पारंपरिक उल्लास के संग मनाय गीस। ये अवसर म राजधानी रायपुर के पुलिस परेड मैदान म आयोजित मुख्य समारोह म मुख्यमंत्री भूपेश बघेल ह ध्वजारोहण कर प्रदेसवासी मन ल स्वाधीनता दिवस के बधाई अउ सुभकामना दीन। अपन संबोधन म मुख्यमंत्री ह किहीन कि आजादी के पचहत्तरवां बर्षगांठ के संग प्रदेस म एक नवा सफर सुरू होगे हे, जेन ह न्याय के विरासत के संग आगे बढ़ही अउ ‘‘गढ़बो नवा छत्तीसगढ‘‘़ के लक्ष्य ल पूरा करही।
स्वाधीनता आंदोलन म अपन प्राण न्यौछावर करइया प्रदेस के अमर सहीद मन ल नमन करत हुए श्री बघेल ह कहिन कि शहीद गेंदसिंह, वीरनारायण सिंह अउ रानी अवंति बाई लोधी जइसे कई झिन विभूति मनके सहादत हमन ल देस बर सर्वोच्च बलिदान के प्रेरणा देवत रइही।
मुख्यमंत्री ह आगामी दू अक्टूबर के गांधी जयंती के दिन ले प्रदेस म ग्रामीण औद्योगिक परिक्षेत्र स्थापित करे के घोसना करीन। एखर अंतर्गत एक बछर म तीन सौ औद्योगिक पार्क स्थापित करे के लक्ष्य हे। ये औद्योगिक पार्क म खाद, बीज, गोबर अउ गौमूत्र सहित ग्रामीण क्षेत्र मनके दूसर संसाधन मन उपर आधारित औद्योगिक इकाई मन ल संचालित करे जाही। ओमन जन्माष्टमी के दिन ले ‘‘कृष्ण कुंज योजना‘‘ प्रारंभ करे के घोसना करीन। एखर तहत प्रदेस के सबो एक सौ सत्तर नगरीय निकाय मनके करीब सवा दू सौ करोड़ एकड़ क्षेत्र म सांस्कृतिक महत्व के पौधा मनके रोपण करे जाही।
स्वतंत्रता दिवस-ध्वजारोहण-02
श्री बघेल ह किहीन कि प्रदेस म पेसा कानून लागू करे के फइसला ले जा चुके हे। एखर जरिया ग्राम सभा मन ल ‘‘जंल, जंगल अउ जमीन‘‘ के बारे म खुद फइसला लेके अधिकार प्राप्त होही। ओमन किहीन कि आगामी शिक्षा सत्र ले प्रदेस के चार सौ बाईस स्कूल मन म स्वामी आत्मानंद योजना लागू होही। मुख्यमंत्री ह किहीन कि राज्य सरकार ह आदिवासी, किसान अउ मजदूर मन सहित सबो वर्ग ल न्याय दिलाय बर अनेक कदम उठाय हे। एखर बर राजीव गांधी किसान न्याय योजना, मुख्यमंत्री नोनी सशक्तिकरण योजना अउ मुख्यमंत्री सियान श्रमिक योजना सहित कई ठिन योजना सुरू करे गेहे।
श्री बघेल ह किहीन कि प्रदेस के माओवाद प्रभावित क्षेत्र म सुरक्षा व्यवस्था ल अउ बेहतर बनाय बर ‘‘बस्तर फाइटर्स विशेष बल‘‘ के गठन करे गेहे। एमा करीब इक्कीस सौ पद म स्थानीय युवा मनके भर्ती करे जात हे। मुख्यमंत्री ह कहिन कि राज्य सरकार ह ग्रामीण अउ सहरी क्षेत्र मन म विकास के संगेसंग नागरिक सुविधा मन ल घलो अउ बेहतर बनाय बर जेन नवाचार करे हे, ओखर अच्छा प्रतिसाद मिलत हे।
राजधानी के मुख्य समारोह म आयोजित परेड म केन्द्रीय सशस्त्र बल, राज्य बल अउ एनसीसी के अलग-अलग टुकड़ी मन हिस्सा लीन। परेड प्रदर्सन अउ परिधान सज्जा के आधार म केन्द्रीय सशस्त्र बल मन म सीमा सुरक्षा बल ल पहलइया, सशस्त्र बल ल दूसरइया अउ केन्द्रीय रिजर्व पुलिस बल ल तीसरइया स्थान प्राप्त होईस।
स्वतंत्रता दिवस-ध्वजारोहण-03
ये अवसर म मुख्यमंत्री ह आर्थिक गतिविधि मनके कुशल संचालन अउ उत्कृष्ट कार्य बर प्रदेस के तीन ठन स्वावलंबी गौठान मन ल सम्मानित करीन। ए तीनों गौठान मन ल पचास-पचास हजार रूपिया के प्रोत्साहन रासि के संग स्मृति चिन्ह अउ प्रशस्ति पत्र दे गीस। एमा दुर्ग जिला के पाटन विकासखंड के केसरा गौठान, रायपुर जिला के आरंग विकासखंड के चटौद गौठान अउ कांकेर जिला म कोयलीबेड़ा विकासखंड के डोंडे-हरनगण गौठान सामिल हे।
स्वाधीनता दिवस के अवसर म प्रदेस के प्रमुख शासकीय भवन अउ दफ्तर मन म घलो ध्वजारोहण के कार्यक्रम आयोजित करे गीस। राज्यपाल अनुसुईया उइके ह राजभवन म राष्ट्रीय ध्वज फहरइन अउ परेड के निरीक्षण करीन।
उहें, प्रदेस के मंत्री अउ संसदीय सचिव मन घलो अलग-अलग जिला मुख्यालय मन म आयोजित समारोह म तिरंगा फहरईन अउ मुख्यमंत्री के संदेस के वाचन करीन।
कृषि मंत्री रविन्द्र चौबे ह दुर्ग के पुलिस परेड मैदान म राष्ट्रीय ध्वज फहरईन। ये अवसर म कृषि मंत्री ह चालीस सहीद मनके परिजन मन ल सम्मानित करीन। ये मउका म हाल ही म इंग्लैड म आयोजित राष्ट्र मंडल खेल के अंतर्गत बैंडमिंटन म रजत पदक जीतइया जिला के अंतर्राष्ट्रीय खिलाड़ी आकर्षि कश्यप ल घलो सम्मानित करे गीस।
स्वतंत्रता दिवस-पुलिस सम्मान
रायपुर के पुलिस मैदान म आयोजित स्वतंत्रता दिवस समारोह म पुलिस अउ जेल विभाग के अधिकारी मन ल उंखर उत्कृष्ट कार्य बर पुलिस वीरता पदक, भारतीय पुलिस पदक, केन्द्रीय गृह मंत्री पदक सहित दूसर राष्ट्रीय अउ प्रादेशिक पदक मन ले सम्मानित करे गीस। मुख्यमंत्री भूपेश बघेल ह बछर दू हजार बीस, इक्कीस अउ बाईस बर चुने गे अधिकारी मन ल ये पदक ले विभूषित करीन। सम्मानित होने वाला अधिकारी मन म बिलासपुर रेंज के पुलिस महानिरीक्षक रतनलाल डांगी, छत्तीसगढ़ बल, बीजापुर म पन्द्रहवीं वाहिनी के सेनानी विवेक शुक्ला सहित दूसर पुलिस अधिकारी मन सामिल हे।
बारिश
राजधानी रईपुर सहित प्रदेस के अलग-अगल जिला म पाछु कुछ दिन ले होवत लगातार बरसा के कारण नदी-नाला उफान म हे। महानदी अउ शिवनाथ नदी के तटीय इलाका म बाढ़ के स्थिति घलो बन गेहे।
धमतरी जिला म अउ पड़ोसी क्षेत्र म होवत लगातार बरसा के कारण गंगरेल बांध के जलस्तर खतरा के निसान तक पहुंच गेहे। एखर सेती बांध के सबो चौदह गेट ल खोल दे गेहे। बांध ले आज बिहनिया के जानकारी के अनुसार एक लाख इकतीस हजार क्यूसेक पानी प्रति सेंकड छोड़े जात हे। उहें, बांध म करीब एक लाख क्यूसेक पानी के आवक बने हुए हे। गंगरेल बांध ले बड़ मात्रा म पानी छोड़े के कारण महानदी के आसपास के तिरालीस अति संवेदनशील गांव मन म हाई अलर्ट कर दे गेहे। नदी तीर के कई ठिन गांव म रहइया लोगन मन ल सुरक्षित स्थान म पहुंचा दे गेहे।
ओति, दुर्ग जिला के महमरा एनीकट म आठ फीट उपर पानी बोहावत हे। इहां शिवनाथ नदी खतरा के निशान ले दू फीट उपर बोहावत हे। जिला के मोंगरा, सूखा नाला अउ घुमरिया से लगभग सत्तर हजार क्यूसेक पानी छोड़े जात हे। तांदुला जलाशय घलो लगभग पूरा भर गेहे।
इही बीच, बस्तर संभाग के अलग-अलग जघा मन म पाछु कुछ दिन ले होवत लगातार बरसा के कारण मारकंडी नदी के पानी पुल के उपर ले बोहावत हे। एखर सेती जगदलपुर-रायपुर राष्ट्रीय राजमार्ग क्रमांक-तीस म काकड़ी घाट करा सड़क यातायात बंद होगे हे। पुलिया के उपर लगातार पानी बोहाय ले बस्तर ले रायपुर के सड़क संपर्क टूट गेहे। ये पुलिया के दूनों डहार यात्री अउ मालवाहक गाड़ी मनके लंबा कतार लगे हुए हे।
ऐति, कांकेर जिला के विकास पल्ली गांव म एक कच्चा मकान के दीवार गिरे ले एक ही परिवार के पांच झिन सदस्य के मउत होगे। मुख्यमंत्री ह ए घटना म दुख जतावत पीड़ित परिवार ल तुरते रासि उपलब्ध कराय के निरदेस देहे।