हर घर तिरंगा-01
आजादी के पचहत्तर बछर पूरा होय म देसभर म हर घर तिरंगा अभियान चलाय जात हे। छत्तीसगढ़ म ए अभियान ल लेके लोगन म गजब के उछाह देखे जात हे। इही कड़ी म प्रदेस के जम्मों सरकारी, प्राईटेव अउ अनुदान मिले स्कूल मन म हमर तिरंगा कारीकरम बीस ले तीस अगस्त तक आयोजित करे जाही। ए संबंध म स्कूल शिक्षा विभाग कोति ले दिसा-निरदेस जारी कर दे गेहे। कारीकरम के उद्देश्य जन-जन म देशभक्ति के भावना के प्रचार-प्रसार करना, सहीद मनके गाथा ल लोगन ल पहुंचाना अउ सबो नागरिक म देस बर समर्पण के भाव जगाना हवय। एमा स्कूल म हरेक दिन होवइया कारीकरम के संगेसंग कक्षा ग्यारहवीं अउ बारहवीं के विद्यार्थी मन ल तीर के सिनेमा हाल या स्मार्ट कक्षा म गांधी फिलिम देखाय जाही।
उहें, काली कवर्धा म वन मंत्री मोहम्मद अकबर के अगुवई म तिरंगा रैली निकाले गीस। ए रैली म बड़ संख्या म लोगन संघरीन।
अइसने, राजनांदगांव म सांसद संतोष पांडेय अउ जिला भाजपा अध्यक्ष मधुसुदन यादव के अगुवई म तिरंगा रैली निकाले गीस। ए रैली म स्कूल के पढ़ईया लइका मन सामिल होईन।
ऐति, अंबिकापुर म अमृत महोत्सव के सेती सद्भावना दउड़ राखे गीस। एमा कलेक्टर अउ पुलिस अधीक्षक के संगेसंग स्कूल के छात्र-छात्रा भाग लीन। उहें, कोरबा जिला म आज स्वतंत्रता दउड़ के आयोजन करे गीस। महापौर राजकिशोर प्रसाद के अगुवई म कलेक्टर अउ पुलिस अधीक्षक संग कतकोन झन ए दउड़ सामिल होईन।
हर घर तिरंगा-02
कोंडगांव म शहीद के परिवार वाले मन बर सम्मान कारीकरम राखे गीस। उहें, जगदलपुर म हम एकेडमी अउ सीआरपीएफ कोति ले तिरंगा यात्रा निकाले गीस। अइसने, नगर पंचायत बस्तर म ‘‘रन फॉर हमर तिरंगा हॉफ मैराथन‘‘ के आयोजन करे गीस।
ऐति, भिलाई इस्पात संयंत्र म अमृत महोत्सव के सेती काली विद्यार्थी मन ह प्रभात फेरी निकालीन।
स्वतंत्रता दिवस-ध्वजारोहण
प्रदेस म काली स्वतंत्रता दिवस देसभक्ति अउ उछाह के संग मनाय जाही। मुख्यमंत्री भूपेश बघेल राजधानी रईपुर के पुलिस परेड ग्राउंड म राखे गे राज्य स्तरीय मुख्य समारोह म ध्वजारोहण करही। ए बेरा म तेरह ठिन टुकड़ी सुघ्घर मार्च पास्ट करही। समारोह म तिरालीस झिन पुलिस अधिकारी मन ल पदक अलंकरण ले सम्मानित करे जाही। उहें, राज्य सरकार के महत्वाकांक्षी सुराजी गांव योजना म बनाय गे गौठान मन म प्रदेसभर म बने प्रदर्सन करइया तीन ठिन गौठान ल इनाम दे जाही। एमा दुरूग जिला के केसरा, रईपुर जिला के चटौद अउ कांकेर जिला के डौंडे हरनगढ़ गौठान सामिल हे।
उहें, प्रदेस के आने जिला म घलो स्वतंत्रता दिवस समारोह के तियारी पूरा कर ले गेहे। विधानसभा अध्यक्ष डॉक्टर चरणदास महंत गौरेला-पेण्ड्रा-मरवाही म झंडा फहराही। अइसने, स्वास्थ्य मंत्री टी.एस. सिंहदेव सरगुजा, कृषि मंत्री रविन्द्र चौबे दुरूग, गृह मंत्री ताम्रध्वज साहू बेमेतरा, वन मंत्री मोहम्मद अकबर कबीरधाम, खाद्य मंत्री अमरजीत भगत राजनांदगांव, राजस्व मंत्री जयसिंह अग्रवाल कोरबा, महिला अउ बाल विकास मंत्री अनिला भेंडिया बालोद, उच्च शिक्षा मंत्री उमेश पटेल रायगढ़, स्कूल शिक्षा मंत्री डॉक्टर प्रेमसाय सिंह टेकाम सूरजपुर, उद्योग मंत्री कवासी लखमा सुकमा अउ लोक स्वास्थ्य यांत्रिकी मंत्री गुरू रूद्रकुमार मुंगेली अउ नगरीय प्रशासन मंत्री डॉक्टर शिवकुमार डहरिया जांजगीर-चांपा म झंडा फहराही।उहें, संसदीय सचिव मन आने जिला झंडा फहराही।
इही बीच, राज्यपाल अनुसुईया उइके अउ मुख्यमंत्री भूपेश बघेल ह प्रदेसवासी मन ल स्वतंत्रता दिवस के बधाई अउ सुभकामना दीन हे।
स्वतंत्रता दिवस-पुलिस पदक
स्वतंत्रता दिवस के मउका म एक हजार बयासी पुलिस कमरचारी मन ल पुलिस पदक बर चुने गेहे। तीन सौ सैंतालीस पुलिस करमचारी मन ल वीरता बर पुलिस पदक दे जाही। सत्यासी झिन करमचारी मन ल बने सेवा बर राष्ट्रपति के पुलिस पदक अउ छह सौ अड़तालीस झिन करमचारी मन ल बने सेवा बर पुलिस पदक मिलही।
इही बीच, केन्द्र सरकार ह स्वतंत्रता दिवस म छत्तीसगढ़ के पन्द्रह झिन अधिकारी अउ जवान मन ल वीरता पदक देके ऐलान करीन हे। एमा दुरूग के पुलिस अधीक्षक डॉक्टर अभिषेक पल्लव सामिल हे। तीन झिन करमचारी उप निरीक्षक श्याम किशोर शर्मा, आरक्षक जयलाल उइके अउ कनेर उसेंडी ल ए अवॉर्ड मरणोपरांत दे जाही। उहें, राष्ट्रपति के विशिष्ट सेवा पदक ले सीआईडी के पुलिस महानिरीक्षक डॉक्टर संजीव शुक्ला अउ एसआईबी के निरीक्षक डॉक्टर विष्णु प्रसाद देशमुख ल सम्मानित करे जाही। एखर संगेसंग बस्तर आई.जी. सुंदरराज पी., एसआईबी के पुलिस महानिरीक्षक ओ.पी. पाल, आईपीएस राजेश कुकरेजा, एसटीएफ बघेरा के सेनानी विजय पांडेय समेत दस झिन पुलिस कमरचारी मन ल सराहनीय सेवा पदक ले सम्मानित करे जाही। उहें, पुलिस मेडल फॉर मेटोरियस सर्विस बर दस झिन पुलिस कमरचारी मन ल सम्मानित करे जाही।
बारिश-01
राजधानी रईपुर समेत प्रदेस के आने-आने जिला म पाछु कुछ दिन ले होवत सरलग बरसा ले कई ठिन नंदियां-नरवा उफान म हवय। नंदियां के तटीय क्षेत्र म बाढ़ के स्थिति बन गेहे। राज्य के बिलासपुर, जांजगीर-चांपा, रायगढ़, महासमुंद, बेमेतरा समेत आने जिला म घलो नंदिया-नरवा के जलस्तर सरलग बाढ़त हे।
जांजगीर-चांपा जिला के शिवरीनारायण म महानदी के सबरी पुल ले तीन फीट उपर पानी बोहात हे, जेखर ले ए रद्दा म अवई-जवई बंद होगे हे। महानदी के तीर बसे गांव म ऐहतियात बरते के निरदेस दे गेहे। उहें, गिधौरी-घटमड़वा रद्दा म पुल के उपर ले पानी बोहात हे, जेखर ले शिवरीनारायण के बलौदाबाजार, सरसीवां अउ सारंगढ़ ले संपर्क कट गेहे। जिला कलेक्टर तारन प्रकाश सिन्हा अउ पुलिस अधीक्षक विजय अग्रवाल ह आज जिला म बाढ़ ले प्रभावित क्षेत्र के जांच करीन। ओमन डभरा ब्लॉक के गांव साराडीह म बाढ़ प्रभावित क्षेत्र ल देखीन। कलेक्टर ह गांव के लोगन ले किहीन कि प्रशासन के संग आपदा अउ राहत टीम मुस्तैदी संग सतर्क हवय। ओमन एसडीएम अउ तहसीलदार ल फील्ड म रेहे के निरदेस दीन। संगेसंग गांव के लोगन ले महानदी के तीर-तखार के क्षेत्र म नइ जाय के अपील करीन। कलेक्टर ह स्थिति के गंभीरता ल देखत जिला के सबो अधिकारी अउ करमचारी मनके छुट्टी निरस्त करत मुख्यालय म रेहे के निरदेस दीन हे।
ओति, अंबिकापुर-बिलासपुर रद्दा म बनत राष्ट्रीय राजमार्ग म लखनपुर के तीर बरसा के सेती एक रद्दा बोहा गेहे, जेखर ले अंबिकापुर-बिलासपुर रद्दा म अवई-जवई बंद होगे हे। उहें, रायगढ़ म केलो नदी के चक्रपथ पानी म बूढ़ गेहे। तीर-तखार के गांव म बाढ़ के स्थिति बने हे। कलेक्टर रानू साहू ह जिला के सबो विकासखंड अधिकारी ल तुरते मउका म पहुंच के स्थिति ल देखे अउ राहत बचाव कार्य बर बने प्रबंध करे के निरदेस दीन।
बारिश-02
बिलासपुर जिला म पचपेड़ी थाना तीर शिवनाथ नंदियां के बाढ़ म फंसे दू परिवार के छह झिन ल एसडीआरएफ, होम गार्ड के टीम ह रेस्क्यू करके सकुसल बाहिर निकालीन।
ऐति, राजनांदगांव म घलो सरगल बरसा ले शिवनाथ समेत सबो नंदियां-नरवा म बाढ़ आय के स्थिति होगे हे। बाढ़त जलस्तर के सेती मोंगरा, घुमरिया अउ सुखा नाला बैराज ले करीबन अड़तीस हजार क्यूसेक पानी छोड़े जात हे।
उहें, धमतरी जिला के सोंढूर डेम के पांच ठिन गेट खोले गेहे। जिला प्रसासन ह तीर-तखार के गांव म अलर्ट जारी कर देहे।
ओति, नारायणपुर म जिला प्रसासन ह सबो अधिकारी मन ल आपदा प्रबंधन के तियारी राखे के निरदेस दीन हे। कलेक्टर ह दुर्घटना ले बचाव बर पुल अउ रपटा उपर ले पानी बोहाय म अवई-जवई ल रोके बर केहे हे।
इही बीच, मौसम विभाग ह अवइया चौबीस घंटा म सत्रह ले जादा जिला म अलर्ट जारी कर देहे। मौसम विज्ञानी एच.पी. चन्द्रा ह बतईन कि रायगढ़, जांजगीर-चांपा, बलौदाबाजार अउ महासमुंद जिला म भारी बरसा हो सकत हे अउ आने जिला म गरज-चमक संग हल्का ले मध्यम बरसा होय के संभावना जताय गेहे।
वसुंधरा-सम्मान
मुख्यमंत्री भूपेश बघेल ह आज रईपुर म साहित्यकार अउ पत्रकार लीलाधर मंडलोई ल वसुंधरा सम्मान ले सम्मानित करीन। ए बेरा म मुख्यमंत्री ह किहीन कि मंडलोई जी ह साहित्य अउ पत्रकार के क्षेत्र म बने काम करीन हे। खबर के मुताबिक वसुंधरा सम्मान स्वर्गीय देवी प्रसाद चौबे के स्मृति म दे जाथे।