हर घर तिरंगा अभियान-01
आजादी के पचहत्तरवां बछर पूरा होय के मउका म केन्द्र सरकार ह आज ले पन्द्रह अगस्त तक हर घर तिरंगा अभियान मनावत हे। प्रधानमंत्री नरेन्द्र मोदी ह आज ले पन्द्रह अगस्त तक अपन घर म तिरंगा फहरा के सबो देसवासी मन ल हर घर तिरंगा अभियान म सामिल होय के आग्रह करीन हे। प्रधानमंत्री ह देसभर म हर घर तिरंगा अभियान बर देसवासी मनके उत्साह ल देख के अपन खुसी जाहिर करीन हे। श्री मोदी ह ट्वीट संदेस म किहीन कि देस के जल-थल अउ नभ म तिरंगा लहरावत देखके भारत के हरेक मनखे के मन म उछाह हे। एखर बर प्रधानमंत्री ह लोगन ल धन्यवाद दीन।
‘‘हर घर तिरंगा अभियान‘‘ म केन्द्रीय संस्कृति मंत्रालय ह हर घर तिरंगा गीत जारी करे हे, जेला अपन ट्वीटर हैंडल म साझा करे हे।
छत्तीसगढ़ म घलो हर घर तिरंगा अभियान बर लोगन म उछाह देखे जावत हे। एखर बर लोगन ल जागरूक करे बर कतकोन कारीकरम करे जावत हे। इही कड़ी म बिलासपुर के भरनी के केन्द्रीय सुरक्षा पुलिस बल के जवान मन ह मोटर साइकिल रैली निकाली। ए रैली कैम्प ले सुरू होके आने-आने रद्दा ले होवत नेहरू चउक पहुंचीस अउ ए दउरान लोगन ल तिरंगा फहराय बर जागरूक करे गीस।
उहें, सरगुजा जिला के ग्राम केपी म केन्द्रीय रिजर्व पुलिस बल के बैसठवां बटालियन डहार ले अपन स्थापना दिवस म आज तिरंगा रैली निकाल के लोगन ल आजादी के महत्व के बारे म बताय गीस। ए मउका म जवान मन ह सहीद मन ल नमन करीन।
अइसने, कोरिया कलेक्टर कुलदीप शर्मा ह अपन निवास म तिरंगा फहरईन अउ लोगन ल ए अभियान म सहभागी बनके अपन-अपन घर म तिरंगा फहराय के अपील करीन।
हर घर तिरंगा अभियान-02
बेमेतरा जिला म भारतीय जनता पार्टी के कार्यकर्ता मन संघरा स्कूली लइका अउ आम लोगन ह तिरंगा यात्रा निकालीन।
उहें, रईपुर के पश्चिम विधानसभा क्षेत्र के खमतराई अउ गुढ़ियारी इलाका म विधायक विकास उपाध्याय के अगुवई म गौरव यात्रा के आयोजन करे गीस। ओमन बतईन कि ए यात्रा के माध्यम ले स्वतंत्रता सेनानी मनके कहानी ल जन-जन तक पहुंचाना हे।
ओति, नारायणपुर जिला म सीमा सुरक्षा बल के एक सौ बैसठवां बटालियन डहार ले बैहासालेभाट म सांस्कृतिक कारीकरम कराय गीस। ए दउरान जवान मन डहार ले लोगन ल आजादी के अमृत महोत्सव के बारे म जानकारी दे गीस। उहें, जगदलपुर म स्कूली लइका मन ह सीआरपीएफ के जवान मन ल रक्षा सूत्र बांधीन।
ऐति, सूरजपुर जिला के आने-आने स्कूल म घलो हमर तिरंगा अभियान म कतकोन कारीकरम कराय जावत हे।
ओति, कोंडागांव जिला म स्व-सहायता समूह के माईलोगिन मन राष्ट्रीय ध्वज बनाय म जुटे हे। महिला समूह मन डहार ले अभी तक दस हजार झंडा बेचे गे हवय।
उहें, दुरूग के हेमचंद यादव विश्वविद्यालय म एक सितंबर ले पहला सर्टिफिकेट कोर्स सुरू होही। एखर शीर्षक ‘‘भारतीय स्वतंत्रता आंदोलन के अज्ञात नायक‘‘ राखे गे हवय। विश्वविद्यालय के कुलपति डॉक्टर अरूणा पल्टा ह स्वतंत्रता दिवस म ए पाठ्यक्रम के संचालन के घोसना करही।
हर घर तिरंगा-डाकघर
देशभर म डाकघर के माध्यम ले दस दिन के अवधि म एक करोड़ ले जादा राष्ट्रीय ध्वज खरीदे गे हवय। हर घर तिरंगा अभियान म डाक विभाग ह डेढ़ लाख डाकघर के माध्यम ले एला दे पाय हे। एला मात्र पच्चीस रूपिया म ले जा सकत हे। ऑनलाइन ई-पोस्ट के माध्यम ले डाक विभाग डहार ले देस म कोनों भी जघा एला बिना उपरहा सुल्क के पहुंचाय जावत हे। डाकघर के माध्यम ले तिरंगा के बिक्री पन्द्रह अगस्त तक होही। लोगन तिरंगा के साथ अपन सेल्फी वेबसाइट म अपलोड कर सकत हे।
राष्ट्रपति संदेश
स्वतंत्रता दिवस के पहिली संझा म काली सात बजे आकाशवाणी डहार ले राष्ट्रपति के राष्ट्र के नाव संदेस प्रसारित करे जाही। एखर सेती काली प्रादेशिक समाचार हिन्दी बुलेटिन ह संझा सात बजके आठ मिनट के जघा म रात नौ बजे प्रसारित होही।
स्वतंत्रता दिवस-ध्वजारोहण
प्रदेस म स्वतंत्रता दिवस देशभक्ति अउ उछाह के संग मनाय जाही। राजधानी रईपुर के पुलिस परेड ग्राउंड म स्वतंत्रता दिवस के राज्य स्तरीय समारोह होही। मुख्यमंत्री भूपेश बघेल पन्द्रह अगस्त के बिहनिया नौ बजे झंडा फहरा के परेड के सलामी लीहीं। एखर तियारी ल आखिरी रूप दे बर आज बिहनिया फुल ड्रेस रिहर्सल करे गीस। पुलिस महानिदेशक अशोक जूनेजा के मौजूदगी म कलेक्टर अउ वरिष्ठ पुलिस अधीक्षक ह व्यवस्था के जायजा लीन। स्वतंत्रता दिवस के मउका म पुलिस परेड ग्राउंड म तेरह ठन टुकड़ी डहार ले मार्च पास्ट करे जाही अउ तिरालीस झन पुलिस अधिकारी मन ल पदक अलंकरण ले सम्मानित करे जाही।
उहें, राज्य सरकार के महत्वाकांक्षी सुराजी गांव योजना म बने गौठान मन म बने प्रदर्सन करइया तीन ठन गौठान ल घलो पुरस्कार दे जाही। एमा दुरूग जिला के केसरा, रईपुर जिला के चटौद अउ कांकेर जिला के डौंडे हरनगढ़ गौठान सामिल हे।
उहें, प्रदर्सन के दूसर जिला म घलो स्वतंत्रता दिवस समारोह के तियारी जोरसोर ले चलत हे। विधानसभा अध्यक्ष डॉक्टर चरणदास महंत गौरेला-पेण्ड्रा-मरवाही म झंडा फहराही। अइसने, दूसर जिला मुख्यालय म राखे गे कारीकरम म राज्य सरकार के मंत्री अउ जनप्रतिनिधि मन डहार ले झंडा फहराय जाही।
डेमू पैसेंजर स्पेशल ट्रेन
दल्लीराजहरा-रावघाट-जगदलपुर परियोजना म अंतागढ़ ले दुरूग अउ रईपुर ले अंतागढ़ तक डेमू पैसेंजर स्पेशल ट्रेन के सुविधा ल अंतागढ़ तक बढ़ा दे गेहे। कांकेर सांसद मोहन मंडावी ह आज डेमू पैसेंजर ट्रेन के सुरूवात करीन। ए मउका म श्री मंडावी ह किहीन कि केवटी ले अंतागढ़ रेलमार्ग सुरू होय ले क्षेत्र के विकास हो सकही। अंतागढ़ अब दुरूग होवत रईपुर तक रेल सेवा ले सीधा जुड़ गे हवय। ए ट्रेन हर दिन अंतागढ़ ले मंझनिया एक बजके पैंतीस मिनट म रवाना होके संझा चार बजके चालीस मिनट म दुरूग पहुंचही। अइसने, दूसर दिसा म ए ह हर दिन बिहनिया सवा नौ बजे रईपुर ले निकल के मंझनिया एक बजके पच्चीस मिनट म अंतागढ़ स्टेशन पहुंचही।
भाजपा प्रदेश अध्यक्ष
भारतीय जनता पार्टी के नव-नियुक्त प्रदेश अध्यक्ष अरूण साव के आज रईपुर स्थित स्वामी विवेकानंद विमानतल पहुंचे म पार्टी पदाधिकारी अउ कार्यकर्ता मन ह उंखर स्वागत करीन। एखर बाद युवा मोर्चा के कार्यकर्ता मनके बाईक रैली के संग श्री साव के काफिला एकात्क परिसर स्थित भाजपा कार्यालय बर निकलीस। ए दउरान जघा-जघाकार्यकर्ता मन डहार ले उंखर स्वागत करे गीस।
बारिश
प्रदेस के आने-आने जिला म पाछु कुछेक दिन ले होवत बरसा ले कतकोन नदी-नाला मन ह उफान म हवय, जेखर सेती मुख्य मार्ग मन म अवई-जवई ह बाधित होगे हवय। कुछेक गांव मनके सड़क संपर्क जिला मुख्यालय ले टूट गे हवय।
महासमुंद जिला म बरसा क्षेत्र के केरामुंडा-लोहर्सी नाला के पुलिया के उपर पानी बोहात हे। एखर सेती बलौदा-कुसमीसरार, सल्डीह-बलौदा सड़क अउ छुईपाली-राफेल रद्दा म अवई-जवई बंद होगे हवय। उहें, पिथौरा क्षेत्र के सागुनढाब-परसवानी रद्दा म नाली के पानी बहे ले इहां अवई-जवई प्रभावित होय हे।
बिलासपुर के गोकने नाला म नहाय बर गे तीन झन जवान लइका मन बोहा गे। एमा ले दू झन ह तउर के अपन जान बचइन अउ तीसर के तलाश करे जावत हे।
उहें, बेमेतरा जिला म शिवनाथ, सुरही, हाफ अउ सकरी नदी के जलस्तर घलो बाढ़े ले तीर-तखार के गांव म बाढ़ के स्थिति बन गे हवय। ग्राम पचभैया म करीबन दू दर्जन मकान म बाढ़ के पानी घुस गे हवय।
अइसने, मुंगेली जिला म सरलग होवत बरसा ले जनजीवन परभावित होय हे। जरहा गांव ब्लॉक ग्राम भतरी म एक ठन पेड़ गे गिरे ले एक झन लइका अउ दू झन माईलोगिन घायल होगे हवय।
बातों-बातों-में
प्रादेशिक समाचार एकांश डहार ले समसामयिक विषय उपर आधारित साप्ताहिक कार्यक्रम ‘‘बातों-बातों-में‘‘ म ए बखत ‘‘हर घर तिरंगा अभियान अउ राष्ट्रीय ध्वत संहिता उपर छत्तीसगढ़ के पूर्व निर्वाचन आयुक्त डॉक्टर सुशील त्रिवेदी ले ले गे भेंटवार्ता प्रसारित करे जाही। एखर प्रसारण आकाशवाणी के रायपुर केन्द्र डहार ले काली बिहनिया नौ बजके तीस मिनट म करे जाही। एला छत्तीसगढ़ के जम्मों आकाशवाणी केन्द्र रिले करही।
जिले की चिट्ठी
आकाशवाणी समाचार डहार ले काली संझा छह बजके तीस मिनट म ‘‘जिले की चिट्ठी‘‘ कार्यक्रम के प्रसारण करे जाही। ए कार्यक्रम आकाशवाणी के रायपुर केंद्र डहार ले प्रसारित होही। जेला जम्मों केंद्र मन ह एके संग रिले करही। ए बखत के अंक म ‘‘कबीरधाम‘‘ जिला के गतिविधि मनके बारे म जानकारी दे जाही।