आजादी के पचहत्तर साल पूरा होय के उपलक्ष्य म देसभर म काली तेरह ले पंद्रह अगस्त तक हर घर तिरंगा अभियान चलाये जाही। ये अभियान के बारे म जागरूकता पैदा करे बर छत्तीसगढ़ म कतकोन कार्यक्रम राखे जात हे। एखर तहत केंद्रीय राज्यमंत्री रेणुका सिंह चौदह अगस्त के सूरजपुर के गोबिन्दपुर म हर घर तिरंगा अभियान म सामिल होही।
ए दउरान स्वतंत्रता संग्राम सेनानी अउ सहीद के परिजन मनके सम्मान करे जाही। उंहें सूचना अउ प्रसारण मंत्रालय भारत सरकार के केंद्रीय संचार ब्यूरो, क्षेत्रीय कार्यालय अंबिकापुर डहार ले लोगन मनले जागरूकता लाये बर आने-आने प्रतियोगिता आयोजित करे जाही। एखरे संघरा ट्राईफेड अउ जिला प्रसासन कोति ले तिरंगा रैली के आयोजन घलो करे जाही।
उंहें मुख्यमंत्री भूपेश बघेल ह आज अपन निवास कार्यालय म स्वतंत्रता के पचहत्तरवां वर्षगांठ के मउका म हमर तिरंगा अभियान म आधारित फिल्म के लोकार्पण करीन। फिल्म के निर्माण हिंदी अउ छत्तीसगढ़ी भाषा म जनसंपर्क विभाग डहार ले करे गेहे। ए मउका म मुख्यमंत्री ह प्रदेशवासी मनले आह्वान करीन कि ए अभियान के दउरान अपन घर शासकीय, अशासकीय संस्थान, दुकान अउ इमारत मन म राष्ट्रीय ध्वज जरूर फहरावय।
ओति दुर्ग जिला म आजादी के अमृत महोत्सव हर घर तिरंगा अभियान के तहत सीमा सुरक्षा बल-बीएसएफ कोति ले साइकिल रैली के आयोजन करे गीस। ए रैली ल सीमांत मुख्यालय सीमा सुरक्षा बल के कमांडेट संचार रतनलाल बागड़िया अउ कमांडेट ए.डी. माओ ह बीहनिया हरा झंडा दिखाके रवाना करीन। आने-आने रद्दा ले होवत ये रैली रिसाली भिलाई म समाप्त होइस।
इही जिला म केंद्रीय औद्योगिक सुरक्षा बल सीआईएसएफ के रिजर्व बटालियन उतई के महिला मन हर घर तिरंगा अभियान के तहत रक्षाबंधन म पचहत्तर पेड़ मन ल रक्षासूत्र बांधके पर्यावरण संरक्षण के शपथ लीन।
एति नया रायपुर म ए अभियान के तहत सीमा सुरक्षा बलके महानिरीक्षक बी.के. मेहता ह नया रायपुर सेक्टर तीस म बीहनिया हरा झंड दिखाके वाकेथन ल रवाना करीन, जेखर समापन सेक्टर सत्ताईस म होइस।
ओति प्रदेश कांग्रेस अध्यक्ष मोहन मरकाम के अगवई म पूरा प्रदेश म चौथा दिन घलो तिरंगा यात्रा चालू हे। यात्रा के चौथा दिन कोंडागांव जिला के मुलमुला ले तिरंगा यात्रा निकाले गीस।
प्रदेस के कई जिला मन म पाछू कुछएक दिन ले होवत बरसा के सेती जादातर नदी-नाला मन उफान म हे। मिले जानकारी अनुसार मुंगेली जिला म आगर नदी के जलस्तर तेजी ले बाढ़त हे । एला देखत नदी तीर के गांव मन म अलर्ट जारी कर दे गेहे। उंहें जिला के ग्राम चकरभाठा म नाला के पानी खेत म भर गेहे। जेखर ले धान के पौधा के सुरक्षा बर चिंतित किसान मन फसल बीमा अउ क्षतिपूर्ति राशि दिलाये के मांग ल लेके डिप्टी कलेक्टर ल ज्ञापन सौंपे हे।
उंहे बेमेतरा जिला म शिवनाथ, खारून, हाफ अउ सुरही नदी के संगरा कई ठिन नाला मन उफान म हे। खबर के मुताबिक सकरी नदी करा स्थित गांव दाढ़ी म आये बाढ़ ले करीबन डेढ़ सौ ले जादा लोगन मनके प्रभावित होय के खबर हे। प्रभावित लोगन मन ल अस्थायी शिविर म ठहराय गेहे। एखरे संग जिला म सरलग होवत बरसा ल देखत जिला मुख्यालय म एक कंट्रोल रूम बनाये गेहे। बेमेतरा कलेक्टर जितेंद्र शुक्ला ह मनखे मन ल बाढ़ प्रभावित जगा म नइ जाय के अपील करीन हे।
अइसने राजनांदगांव जिला म घलो शिवनाथ समेत ओखर सहायक नदी-नाला उफान म हे। शिवनाथ म सरलग मोंगरा, घुमरिया अउ सूखा नाला बैराज ले पानी घलो छोड़े जात हे । उंहें बाढ़ के स्थिति ल देखत कुछ रस्ता मन म अवई-जवई बंद हे, उंहा जिला पुलिस ह जवान मनके तैनाती करे हे। काली डोंगरगांव पुलिस ह रूदगांव म एक परिवार के छै सदस्य मन ल रेस्क्यू करके बाढ़ ले बाहिर निकालिन।
छत्तीसगढ़ के तीन झिन पुलिसकर्मी मन ल बने काम करे बर स्वतंत्रता दिवस के मउका म सम्मानित करे जाही। सेवा के आधार म विशिष्ट कार्य करे बर ए पदक अउ सम्मान दे जाही। केंद्रीय गृह मंत्रालय डहार ले जारी सूची म छत्तीसगढ़ ले अतिरिक्त पुलिस अधीक्षक राजेंद्र जायसवाल, उप निरीक्षक दिव्या शर्मा अउ निरीक्षक दिनेश यादव के नाव सामिल हरय।
इही बीच देशभर के डाकघर अउ ऑनलाइन माध्यम ले दस दिन के अवधि म एक करोड़ ले जादा राष्ट्रीय ध्वज खरीदे गेहे। हर घर तिरंगा अभियान के तहत डाक विभाग ह डेढ़ लाख डाकघर के माध्यम ले नागरिक मन ल आसानी ले राष्ट्रीय ध्वज पच्चीस रूपिया म उपलब्ध कराय के प्रबंध करे हे। डाक विभाग ए ध्वज ल मात्र पच्चीस रूपिया म ऑनलाईन के माध्यम से देश के कोनो भी पता म बिना अतिरिक्त शुल्क के पहुंचावत हे।
डाकघर के माध्यम ले राष्ट्रीय ध्वज के बिक्री पंद्रह अगस्त तक खुला हे। नागरिक मन ध्वज लेबर तीर के डाकघर म जाके या ई-पोस्ट ऑफिस के माध्यम ले घरे म ध्वज मंगाके हर घर तिरंगा अभियान के हिस्सा बन सकत हे ।
बीजापुर जिला म सुरक्षा बलके टीम ह माओवादी मन डहार ले लगाए गे आईईडी बरामद करे गे। मिले जानकारी अनुसार माओवादी विरोधी अभियान के तहत केंद्रीय रिजर्व पुलिस अउ सिटी कोतवाली पुलिस के टीम सर्चिंग बर निकले रीहिस। ए दउरान घाटी के नीचे पगडंडी उपर माओवादी मन कोति ले लगाए गे दू किलो वजनी आईईडी बरामद करे गीस। जेला मउकाच म निष्क्रिय कर दे गीस।
हालेच म बर्किंघम म होय राष्ट्रमंडल खेल म बैडमिंटन म रजत पदक जीतइया दुर्ग के आकर्षि कश्यप ह मुख्यमंत्री ले मुलाकात करीन। ए दउरान मुख्यमंत्री ह आकर्षि कश्यप ल ए उपलब्धि बर बधाई अउ शुभकामना दीन।
ओमन कीहिन कि आकर्षि ह अपन खेल प्रतिभा ले पूरा छत्तीसगढ़ ल गौरवान्वित करे हे। संगरा मुख्यमंत्री ह आकर्षि कश्यप ल ए उपलब्धि बर राज्य शासन डहार ले शासकीय नौकरी देके आश्वासन दीन।
बतादन कि आकर्षि कश्यप छत्तीसगढ़ के पहिला बैडमिंटन खिलाड़ी हरय, जउन ह राष्ट्रमंडल खेल दू हजार बाईस म हिस्सा लीन। आकर्षि ल ओलंपिक के दू हजार चौबीस-अठाईस म सामिल करे गेहे। छत्तीसगढ़ सरकार ह ओमन ल खेल पुरस्कार म सर्वोपरि गुण्डाधुर पुरस्कार अउ शहीद कौशल पुरस्कार ले सम्मानित करे हे।
एक भारत श्रेष्ठ भारत योजना के तहत गुजरात ले चौवन सदस्यीय छात्र अउ शिक्षक मनके दल काली तेरह अगस्त के छत्तीसगढ़ प्रवास म पहुंचत हे।
बतादन कि एक भारत श्रेष्ठ भारत योजना स्वतंत्रता सेनानी सरदार वल्लभ भाई पटेल के जीवन ले प्रेरणा ले के शुरू करे गेहे। जेमा देश के कोनो भी एक राज्य दूसर राज्य ले हर साल एकदूसर के विरासत जइसे संस्कृति, परंपरा, भाषा आदि ल बढ़ाय बर आपस म जुड़ही।
अउ अब थोरकुन समाचार सार म –