आज दिनभर के खबर ले अपन गुरतुर छत्तीसगढ़ी भाखा म पढ़व

बारिश

बीजापुर अउ दंतेवाड़ा जिला म बीते तीन दिन ले सरलग होवत बरसा के सेती नदी-नाला उफान म हे। एखर चलत बीजापुर-जगदलपुर के बीच सड़क संपर्क टूट गेहे। ए रद्दा म बहत मरी नदी उफान म हे, जेखर ले राष्ट्रीय राजमार्ग क्रमांक-तिरसठ म अवई-जवई बंद होगे हे। जिला के छोटे-बड़े नदी-नाला म पानी खतरा के निसान ले उपर बहत हे। कतकोन गांव के जिला मुख्यालय ले संपर्क ह टूट गेहे। इही बीच, दोरनापाल-दुब्बाटोटा के बीच नाला के पानी पुल के उपर ले बहे के सेती ए रद्दा म कतकोन घंटा अवई-जवई बाधित होय के खबर हे।
उहें, दंतेवाड़ा जिला के डंकिनी नदी म पुल के उपर ले पानी बहत हे। उहें, कटेकल्याण रद्दा म घलो पानी भर गेहे। जलभराव के स्थिति के सेती जघा-जघा बाढ़ के हालात बने हे। पुलिस अउ प्रसासन ल अलर्ट कर दे गेहे अउ स्थिति म नजर राखे जात हे। जगदलपुर म सरलग होवत मूसलाधार बरसा ल देखत जिला कलेक्टर चंदन कुमार ह आज जिला के स्कूल मन ल बंद करे के आदेस देहे। ओमन बताइन कि सावधानी राखे खातिर ये निर्णय ले गेहे।
ओति, जांजगीर-चांपा जिला म पामगढ़ क्षेत्र के बारगांव म नहर फूटे ले कतकोन एकड़ खेत म लगे फसल खराब होगे हे अउ नगर के पानी लोगन के घर म घलो घुस गेहे। जिला कलेक्टर तारन प्रकाश सिन्हा के निरदेस म एसडीएम अउ जल संसाधन विभाग के अधिकारी मन ह मउका म पहुंच के स्थिति के निरीक्षण करीन। जिला कलेक्टर ह नहर के क्षतिग्रस्त हिस्सा ल सुधारे अउ फसल ल होय क्षति के आंकलन करे के निरदेस दीन हे।

हर घर तिरंगा अभियान

हर घर तिरंगा अभियान ल लेके प्रदेस म तैयारी जोरसोर ले चलत हे। एखर तहत जांजगीर-चांपा जिला के जैजेपुर के बरेकेलकला गांव ले भाजपा पदाधिकारी मन ह तिरंगा रैली निकालीन। ए रैली महानदी म नाव उपर सवार होके निकाले गीस।
इही तरह, राजनांदगांव जिला म गौठान अउ स्व-सहायता समूह के माईलोगिन मन ह हर घर तिरंगा अभियान ल सफल बनाय के बीड़ा उठाय हे। ए माईलोगिन मन ह तिरंगा झंडा तैयार करे हे, जेला गांव-गांव म बांटे जात हे। बोरी गांव म प्रशासनिक अधिकारी मनके उपस्थिति म झंडा बांटे के बाद जागरूकता रैली निकाले गीस।
इही कड़ी म राजनांदगांव म भाजपा पदाधिकारी के एक बइठका घलो होईस। एमा हर घर तिरंगा अभियान ल सफल बनाय म विचार-विमर्श करके सबो ल जिम्मेदारी दे गीस। बइठका म बताय गीस कि अभियान के तहत सहर अउ गांव म कुल मिलाके पचहत्तर जघा म कारीकरम करे जाही।
उहें, अभियान के तहत सरगुजा के दूरस्थ वनांचल पहाड़ी गांव खर्रा नगर म बिसेसा पिछड़ा जनजाति पहाड़ी कोरवा लोगन के घर मन म राष्ट्रीय ध्वज लहराय गीस। भाजपा के प्रदेस प्रवक्ता अनुराग सिंहदेव के उपस्थिति म आयोजित ए कारीकरम ल लेके पहाड़ी कोरवा के जनजाति के माईलोगिन युवा अउ संगेसंग बुजुर्ग मन म घलो उछाह दिखत हे।
इही बीच आजादी के अमृत महोत्सव अउ हर घर तिरंगा अभियान के मउका म सीमा सुरक्षा बल बीएसएफ डहार ले बारा अगस्त के अटल नगर नवा रायपुर म वॉकथान के आयोजन करे जाही। एमा बीएसएफ के जवान संग स्कूली लईका शासकीय कर्मचारी अउ आम लोगन घलो सामिल होही।

माओवादी आगजनी

छत्तीसगढ़ अउ तेलंगाना के सीमावर्ती क्षेत्र किस्टाराम के सिंदूरगुड़ा इलाका म माओवादी मन ह रद्दा बने के काम म लगे दू ठिन वाहन म आगी लगा दीस। सुकमा जिला के पुलिस अधीक्षक सुनील शर्मा ह बताइन कि ठेकेदार डहार ले सुरक्षा के बिना ए वाहन मन ल ले जाये गे रीहिस। ए दउरान माओवादी मन ह पोकलेन अउ शिफ्टर म आगी लगा दीन।

अमृत महोत्सव प्रश्नोत्तरी

आजादी के अमृत महोत्सव उपर आकाशवाणी समाचार डहार ले राष्ट्रीय स्तर म राखे जात प्रश्नोत्तरी के तहत आज के प्रश्न हे-
– ओ स्वतंत्रता सेनानी के नाव बताव, जेखर 31 जुलाई 1857 के सैन्य विद्रोह अउ कोल्हापुर म दिसंबर 1857 के विद्रोह म प्रमुख भूमिका रिहीस ? ए स्वतंत्रता सेनानी ल ब्रिटिश सेना ह कराची म ग्यारह बछर तक, 15 मई 1869 के मृत्यु तक बंदी बनाके राखे गे रिहीस।

श्रोता मन अपन उत्तर वाट्सअप नंबर – आठ आठ दू छै पांच चार छै दू छै दू – या ई-मेल आई डी – अमृत महोत्सव क्विज एट द रेट प्रसार भारती डॅाट जीओवी डॅाट इन म भेज सकत हे।
भाग्यशाली प्रतिभागी ल विजेता के रूप म चुने जाही अउ काली के समाचार प्रभात म विजेता के नाव के घोषणा करे जाही। विजेता ल ई-प्रमाण पत्र अउ सांकेतिक पुरस्कार दे जाही।

विश्व आदिवासी दिवस-राज्यपाल

राज्यपाल अनुसुईया उइके ह विश्व आदिवासी दिवस के पहिली संझा म आदिवासी समाज अउ सबो लोगन ल अपन सुभकामना दीन। ओमन ह अपन संदेस म कीहिन कि छत्तीसगढ़ देस के ओ प्रदेस मन म सामिल हे, जिहां करीबन तीस प्रतिसत आदिवासी रहिथे अउ ओमन ल सुरू ले ही संस्कृति-परंपरा अउ प्रकृति के संरक्षक माने गेहे। राज्यपाल ह कीहिन कि आदिवासी समाज के सहीद बिरसा मुण्डा, वीर नारायण सिंह, वीर गुण्डाधुर अउ रानी दुर्गावती जइसन महान लोगन मन ह सर्वोच्च बलिदान घलो दीन हे।

खेल मड़ई फोटो प्रदर्शनी

विश्व आदिवासी दिवस के मउका म राजधानी रायपुर म दू दिवसीय पारंपरिक खेल मड़ई के आयोजन करे जात हे। ए खेल मड़ई के आज आखरी दिन हरय। राजधानी के स्वामी विवेकानंद स्टेडियम म आयोजित ए खेल मड़ई म राज्य के सतरह जिला के लगभग सात सौ प्रतिभागी भाग लेवत हे।
खेल मड़ई म विशेष रूप ले संरक्षित जनजाति मनके पारंपरिक खेल के प्रदर्शन करे जात हे। जेमा फुगड़ी, गेड़ी, रस्साकसी, मटका दौड़ जइसन खेल सामिल हे। ए मड़ई म तीरंदाजी विसेस आकर्षण के केंद्र रीहीस । जनजाति महोत्सव म स्कूली लईका के संग युवा मन घलो हिस्सा लीन। आदिम जाति अउ अनुसूचित जाति विकास विभाग डहार ले करे जात ए खेल प्रतियोगिता म जिला स्तर म चयनित प्रतिभागी सामिल होवत हे।
खेल मड़ई सांस्कृतिक संध्या के आयोजन काली रायपुर के पंडित जवाहर लाल नेहरू शासकीय चिकित्सा महाविद्यालय के ऑडिटोरियम म होइस।
उंहें विश्व आदिवासी दिवस के मउका म  राज्य के आदिवासी समुदाय के आने-आने अउ अनूठा संस्कृति म केंद्रित तीन दिवसीय फोटो प्रदर्शनी के आयोजन काली ले रायपुर म शुरू होही। संस्कृति विभाग डहार ले आयोजित ए प्रदर्शनी महंत घासीदास संग्रहालय म लगाये जाही। ए प्रदर्शनी के मुख्य उद्देश्य आदिवासी मनके संस्कृति के संरक्षण अउ संवर्धन करना हरय।

शहीद परिजन सम्मान

पचहत्तरवां स्वतंत्रता दिवस के मउका म तेरह अगस्त के राज्य म सहीद मनके परिजन मन ल सम्मानित करे जाही। राजधानी रायपुर म मुख्यमंत्री भूपेश बघेल ह ए सम्मान दीही। उंहें आने-आने जिला मन म मंत्री विधायक अउ जन प्रतिनिधि सहीद मनके परिजन मन ल सम्मानित करही। हमर तिरंगा अभियान के तहत छत्तीसगढ़ के अइसन जवान जेखर शहादत सैन्य बल मन म पदस्थापना के दउरान ड्यूटी करत बेरा होय हे। उंहें राज्य म सहीद होय छत्तीसगढ़ राज्य बल अउ केंद्रीय बल के जवान मनके परिजन मन ल सम्मानित करे जाही।

अउ अब थोरकुन समाचार सार म-

– राष्ट्रीय परीक्षा एजेंसी ह जेईई के मुख्य संयुक्त प्रवेश परीक्षा दू हजार बाईस बर पेपर-वन-बी.ई अउ बी.टेक. बर आखरी अंक घोषित कर देहे। परीक्षा म कुल चोबीस उम्मीदवार ह शत प्रतिशत अंक हासिल करे हे।

– छत्तीसगढ़ योग आयोग डहार ले रायपुर के टिकरापारा म उन्नीसवां निशुल्क योगाभ्यास केंद्र के शुभारंभ करे गेहे।

– राजनांदगांव म कांग्रेस डहार ले काली ले चौदह अगस्त तक विधानसभा स्तरीय गौरव यात्रा निकाले जाही। ए दउरान पचहत्तर किलोमीटर के पदयात्रा करे जाही।

अउ

– सीमा सुरक्षा बल भिलाई के एक सौ सड़सठवीं अउ सत्रहवीं वाहिनी डहार ले कांकेर जिला के माओवाद प्रभावित इलाका म पौधारोपण अभियान चलाये गीस।