नीति आयोग बैठक
प्रधानमंत्री नरेंद्र मोदी ह आज नीति आयोग के शासी परिषद के सातवां बइठका के पगरैती करीन। राष्ट्रपति भवन म होय ये बइठका के उद्देश्य केंद्र,राज्य अउ केंद्रशासित प्रदेश मन बीच सहयोग के नवा युग सुरू करे बर माहौल बनाना रीहिस। कोविड महामारी बाद देस के अमृत काल म अमइ अउ अवइया बछर जी-ट्वेंटी के पगरैती भारत ल मिले उपर एखर बइठका बारे म ए बइठका महत्तम वाले रीहिस।
प्रधानमंत्री के पगरैती म होय ये बइठका म छत्तीसगढ़ के मुख्यमंत्री घलो सामिल होइन । एमा मुख्यमंत्री ह राज्य ले जुड़े कई ठिन योजना अउ बिसय बारे म अपन बात राखीन। श्री बघेल ह बताइन कि प्रधानमंत्री ह छत्तीसगढ़ के गोधन न्याय योजना के जिकर करीन अउकीहिन कि गोबर ले तियार होवत वर्मी कम्पोस्ट ह खेत मनके पैदावार बढ़ाय म सहायक रीही। किसान के हित बर ये ह सुघ्घर योजना हे। मुख्यमंत्री ह शहर तीर के गंवई जगा अउ बीस हजार ले कम आबादी के सहर मन म मनरेगा लागू करे बर सुझाव दीन। ओमन बइठका म जीएसटी क्षतिपूर्ति के मुद्दा घलो उठाइन।
संगे श्री बघेल ह केंद्रीय बजट म छत्तीसगढ़ ल केंद्रीय टैक्स के हिस्सा के जम्मों रासि देबर घलो कीहिन। एखर संगे मुख्यमंत्री ह कोयला समेत मुख्य खनिज मनके रायल्टी दर म संसोधन अउ कर्मचारी मनके हित म नवा पेंसन योजना म जमा पइसा ल लहुटाय के घलो मांग करीन।
जगदीप धनखड़-उप राष्ट्रपति
राष्ट्रीय जनतांत्रिक गठबंधन-एनडीए के प्रत्याशी जगदीप धनखड़, देस के चौदहवां उपराष्ट्रपति चुने गीन। श्री धनखड़ ल पांच सौ अठाईस ठिन वोट मिले हे, उंहे उंखर प्रतिद्वंदी विपक्षी उम्मीदवार मारग्रेट अल्वा ल एक सौ बंयासी वोट मिले हे।
उपराष्ट्रपति पद बर पाछू छै चुनाव मन ले श्री धनखड़ के जीत के अंतर सबले जादा हवय। श्री धनखड़ अवइया बिरस्पत के पद बर सपथ लीही। मौजूदा उपराष्ट्रपति एम. वेंकैया नायडू के कार्यकाल बुधवार के सिरावत हे। श्री धनखड़ ल राज्यसभा के पदेन सभापति बनाये जाही।
राष्ट्रपति द्रौपदी मुर्मू, उपराष्ट्रपति एम. वेंकैया नायडू, प्रधानमंत्री नरेंद्र मोदी छत्तीसगढ़ के राज्यपाल अनुसुइया उइके अउ मुख्यमंत्री भूपेश बघेल समेत कई झिन केंद्रीय मंत्री अउ आने नेता मन उपराष्ट्रपति चुनाव म जीत उपर श्री धनखड़ ल बधाई दीन हे।
प्रधानमंत्री नरेंद्र मोदी ले राज्यपाल अनुसुईया उइके ह अपन नई दिल्ली दउरा बेरा सौजन्य भेंट करीन। ए मउका म सुश्री उइके ह प्रधानमंत्री ल रक्षाबंधन के बधाई देवत प्रदेश के सबो बहिनी मन डहार ले प्रधानमंत्री ल राखी बांधके उंखर स्वस्थ अउ लंबा उमर के कामना करीन। राज्यपाल ह प्रधानमंत्री ले हर घर तिरंगा अभियान शुरू करे उपर धनवाद दीन।
ए मउका म ओमन प्रधानमंत्री ले प्रदेस ले जुड़े कई ठिन बिसय उपर गोठबात करीन। सुश्री उइके ह प्रधानमंत्री ल प्रदेस के कानून बेवस्था बारे म जानकारी दीन अउ अपराध नियंत्रण ल लेके अपन बिचार बांटीन।
राज्यपाल बैठक
राज्यपाल अनुसुईया उइके ह नई दिल्ली म होय आजादी के अमृत महोत्सव के राष्ट्रीय कार्यकारिणी के तीसर बइठका म सामिल होइन। एमा प्रधानमंत्री नरेंद्र मोदी, केंद्रीय गृहमंत्री अमित शाह, लोकसभा अध्यक्ष ओम बिड़ला, रक्षामंत्री राजनाथ सिंह समेत सबो राज्य के राज्यपाल, मुख्यमंत्री अउ कई अबड़ अकन जगा के प्रबुद्ध मनखे अउ कलाकार सामिल होइन । बइठका म केंद्रीय संस्कृति विभाग के सचिव ह अमृत महोत्सव के चलत अब तक होय कार्यक्रम मनके जानकारी दीन अउ अवइया कार्य योजना बारे म सबो झिन ल बतइन।
हर घर तिरंगा अभियान
हर घर तिरंगा अभियान ल लेके प्रदेस म जोरदरहा तियारी चलत हे। इही कड़ी म नेहरू युवा केंद्र दुर्ग डहार ले आज बीहनिया बाईक रैली राखे गे रीहिस। ए दउरान देसभक्ति गीत के संगे गंवई के मनखे मन ल अवइया तेरा ले पंद्रा अगस्त तक घरोघर तिरंगा फहराय बर उछाह बढ़ाये गीस।
ओति मुंगेली जिला भाजपा डहार ले पंद्रह अगस्त तक ले जिला के करीबन चालीस हजार घर अउ सार्वजनिक जगा मन म झंडा लगाये जाही। ए बारे म आयोजित बइठका म जिला प्रभारी शंकरलाल अग्रवाल ह बताइन कि हर घर तिरंगा अभियान के तहत जिला के हरएक बूथ म कम ले कम पच्चीस-पच्चीस अउ हरएक विधानसभा क्षेत्र म पचहत्तर ठिन मुख्य जगा मन म झंडा लगाये के लक्ष्य राखे गेहे।
आधार लिंक
मतदाता मन अब अपन वोटर आईडी ल आधार कार्ड ले घर बइठे लिंक कर सकत हे। भारत निर्वाचन आयोग ह एखर बर वोटर हेल्पलाईन गरूड़-एप जारी करीन हे। वेबपोर्टल एन.वी.एस.पी. डॅाट इन ले खुदे या फेर बीएलओ के मदद ले घलो मतदाता मन वोटर आईडी अउ आधार कार्ड ल लिंक कर सकहीं। एखर बर मतदाता मन ल फार्म-छै बी के सबो जानकारी अपडेट करे ल पड़ही। आधार अपडेशन ले फर्जी मतदाता मनके चिन्हारी म सहूलियत होही।
कोरोना समाचार
प्रदेस म कोरोना संक्रमण के मामला सरलग बाढ़त हे। उंहें पॉजीटिवीटी रेट पांच दशमलव तीन सून्य प्रतिसत होगे हे। काली प्रदेस म कोरोना संक्रमण के चार सौ तिरानबे नवा मामला आगू आय हे। एमा सबले जादा दुर्ग जिला म सत्तर अउ रायपुर जिला म छियांलिस झिन मरीज मिले हे। ए बेरा तीन हजार तीन सौ इकहत्तर झिन मरीज मनके इलाज होम आइसोलेसन या प्रदेस के आने-आने अस्पताल म चलत हे।
ओति जशपुर जिला के गांव महादेवडांड़ के कस्तूरबा गांधी आवासीय विद्यालय म उन्नीस झिन पढ़ईया नोनी मन कोरोना पॉजीटिव पाये गीस। ए सबो नोनी मन ल स्कूले जगा म आइसोलेट करे गेहे।
एति प्रदेस म कोरोना ले बांचे खातिर अब तक चार करोड़ संतावन लाख ले जादा टीका लगाये जा चुके हे।
बीजापुर-मलेरिया
बीजापुर जिला के सारकेगुड़ा आश्रम म एक झिन पढ़ईया लईका के आज बीहनिया मलेरिया ले मउत होगे। जिला अस्पताल के डॅाक्टर अभय तोमर ह बताइन कि काली ए लईका ल बेहोसी हालत म अस्पताल लाये गे रीहिस। अब्बड़ परयास के बाद घलो ए लईका ल बचाये नइ जा सकीस। अस्पताल म परिवारवाले मन संग आश्रम अधीक्षक घलो मौजूद रीहिन।
मिले खबर के मुताबिक मउत होय लईका ह कक्षा चौथी म पढ़त रीहिस अउ वोह एक अगस्त ले बीमार रीहिस।
हाथी आतंक
राजनांदगांव बालोद जिला म ए बेरा हाथी मनके किंजरे ले गंवई जगा म दहशत हे। हाथी मनके दल ह बालोद जिला के डौंडी वन परिक्षेत्र अउ राजनांदगांव के कुसमी वन परिक्षेत्र के शेरपार-अंगारा गांव ले होवत पैदूर तक पहुंच गेहे। ए दउरान हाथी मन गांव पैदूर म तीन ठिन घर ल नकसान पहुंचाय हे, संगे खेत मन म ठाढ़ फसल ल घलो रौंद देहे।
अउ अब पेस हे मौसम के हाल –
मौसम विभाग ह काली प्रदेस के कतकोन जगा म बड़भारी अउ कहूं-कहूं जोरदरहा बरसा होय के चेतावनी दे गेहे। मौसम विभाग मुताबिक एक ठिन निम्न दाब के क्षेत्र उत्तर पश्चिम बंगाल के खाड़ी अउ ओखर ले लगे पश्चिम मध्य बंगाल के खाड़ी, तटीय ओडिशा अउ तटीय आंध्रप्रदेश उपर बने हे। संगे उपरी हवा के चक्रीय चक्रवाती घेरा बगरे हे। एखर असर ले प्रदेस म बादर अउ बरसा कस मौसम दिखत हे।
इही बीच बीजापुर जिला म पाछू दू दिन ले होवत सरलग बरसा ले जनजीवन एती-तेती होगे हे। जिला के कई ठिन नान्हे अउ बड़का नरवा उफनावत हे। नरवा मन म पुलिया ले उपर पानी चले के सेती अवई-जवई बंद होगे हे।
ओति जांजगीर-चांपा जिला म काली गाज गिरे के सेती सात ठिन आने-आने घटना म छै झिन मनखे के मउत होगे।