मतगणना के बाद आज संझा चुनाव परिणाम के घोषणा करे जाही। बतादन कि जगदीप धनखड़ एनडीए के उम्मीदवार हरय। जबकि मार्गरेट अल्वा विपक्ष कोति ले मैदान म हवय। उप राष्ट्रपति एम. वेंकैया नायडू के कार्यकाल ए महीना के दस तारीख के सिरावत हे।
राष्ट्रपति-प्रधानमंत्री मुलाकात
मुख्यमंत्री भूपेश बघेल ह आज नई दिल्ली प्रवास के दउरान राष्ट्रपति द्रौपदी मुर्मू अउ प्रधानमंत्री नरेंद्र मोदी ले सौजन्य भेंट करीन।
हर घर तिरंगा अभियान
आजादी के पचहत्तरवां वर्षगांठ के मउका म ग्यारा ले सतरा अगस्त तक प्रदेश के जम्मों स्कूल अउ शिक्षण संस्थान मन म स्वतंत्रता सप्ताह मनाये जाही। ए दउरान स्कूल मन म राष्ट्रीय ध्वज फहराय जाही अउ प्रभात फेरी निकाले जाही। ए बेरा जम्मों स्कूल अउ दूसर शिक्षण संस्थान मन डहार ले हर घर झंडा कार्यक्रम के बारे म जनजागरूकता फैलाये के संग लोगन मन ल राष्ट्रीय ध्वज फहराय बर प्रेरित करे जाही।
इही बीच दुर्ग जिला के सुपेला स्थित प्रयास श्रवण विकलांग संस्थान म सशस्त्र सीमा बल भिलाई डहार ले आजादी के अमृत महोत्सव के आयोजन करे गीस। ए दउरान हर घर तिरंगा अभियान के तहत राष्ट्रीय ध्वज फहराये बर लइका मन ल प्रेरित करे गीस। उंहे श्रीराम जन्मोत्सव समिति भिलाई कोति ले सात,आठ अउ दस अगस्त के दीपोत्सव अउ पदयात्रा करे जाही।
ओति मुंगेली जिला म घलो स्वतंत्रता सप्ताह म हर घर झंडा कार्यक्रम के आयोजन के तहत महिला स्व-सहायता समूह डहार ले झंडा बनाये के काम करे जात हे। उंहें चेंबर ऑफ कॉमर्स कोति ले घलो जिला के जम्मों व्यापारी मन ल झंडा निशुल्क दे जाही।
अइसने राजनांदगांव अभियान म हर घर तिरंगा अभियान के तहत स्व सहायता समूह के महिला मन झंडा बनाये के काम म जुटे हे। जिला म चार लाख घर म तिरंगा फहराय के लक्ष्य राखे गेहे।
उंहें रेलवे बोर्ड के निर्देशानुसार रेलवे कर्मचारी अपन-अपन घर म राष्ट्रीय ध्वज फहराहीं। कर्मचारी हर घर तिरंगा वेबसाइट अउ सोशल मीडिया प्लेटफार्म म घलो राष्ट्रीय ध्वज के संग सेल्फी अपलोड करही। संगरा रायपुर रेल मंडल के अंतर्गत रेलवे स्टेशन मन म सेल्फी कार्नर घलो लगाये जाही।
बातों-बातों-में
प्रादेशिक समाचार एकांश डहार ले समसामयिक विषय उपर आधारित साप्ताहिक कार्यक्रम ‘‘बातों-बातों-में‘‘ म ए बखत देस के आजादी के पचहत्तर साल पूरा होय के मउका म अवइया तेरह ले पंद्रह अगस्त तक होने वाला हर घर तिरंगा अभियान उपर राजनांदगांव सांसद संतोष पांडेय करा ले भेंटवार्ता प्रसारित करे जाही। एखर प्रसारण आकाशवाणी के रायपुर केन्द्र डहार ले काली बिहनिया नौ बजके तीस मिनट म करे जाही। एला छत्तीसगढ़ के जम्मों आकाशवाणी केन्द्र रिले करही।
स्नातक प्रवेश परीक्षा
राष्ट्रीय परीक्षा एजेंसी ह सूचित करे हे कि स्नातक पाठ्यक्रम म प्रवेश बर आज होवइया साझा विश्वविद्यालय प्रवेश परीक्षा – सीयूईटी – यूजी प्रशासनिक अउ तकनीकी कारण ले तेरह राज्य के तिरपन केंद्र मन म स्थगित कर दे गेहे। एनटीए ह एक बयान म केहे हे कि स्थगित परीक्षा अब बारह ले चौदह अगस्त के बीच होही। एखर बर समान प्रवेश पत्र मान्य रीही। परीक्षार्थी मन ल परीक्षा स्थगित होय के बारे म एसएमएस अउ ई-मेल ले सूचित कर दे गेहे।
जिले की चिट्ठी
आकाशवाणी समाचार डहार ले काली संझा छह बजके तीस मिनट म ‘‘जिले की चिट्ठी‘‘ कार्यक्रम के प्रसारण करे जाही। ए कार्यक्रम आकाशवाणी के रायपुर केंद्र डहार ले प्रसारित होही। जेला जम्मों केंद्र मन ह एके संग रिले करही। ए बखत के अंक म ‘‘राजनांदगांव‘‘ जिला के गतिविधि मनके बारे म जानकारी दे जाही।
माओवादी मुठभेड़
कांकेर जिला के आमाबेड़ा थाना क्षेत्र म सुरक्षा बल मन माओवादी कैम्प ल ध्वस्त कर देहे। एखर पहिली सुरक्षा बल अउ माओवादी मनके बीच मुठभेड़ होइस मुठभेड़ के बाद माओवादी मन जंगल के फायदा उठाके भाग गीन। बाद म मउका म तलाशी के दउरान सुरक्षा बलके जवान मन ल बड़का संख्या म माओवादी साहित्य, वर्दी अउ बर्तन समेत दूसर दैनिक उपयोग के सामान बरामद करीन।
राष्ट्रीय खेल
छत्तीसवां राष्ट्रीय खेल के आयोजन अवइया सितंबर महीना म गुजरात म होही। एमा छत्तीसगढ़ ले घलो आने-आने खेल बर खिलाड़ी मन भाग लीहीं। राज्य के खिलाड़ी ए प्रतियोगिता म अपन सबले बढ़िया प्रदर्शन करत जादा ले जादा पदक जीत सकय एखर बर खेल विभाग ह तियारी शुरू कर देहे।
राष्ट्रीय खेल बर क्वालीफाई करने वाला खिलाड़ी मनके अधिकृत जानकारी खेल संचालनालय डहार ले खेल संग करा ले मंगाय गेहे। जेखर आधार म खिलाड़ी मन बर प्रशिक्षण शिविर के आयोजन करे जाही। राज्य के खिलाड़ी ल ओखर सर्वश्रेष्ठ प्रदर्शन बर खेल विभाग कोति ले सहयोग अउ प्रोत्साहन दे जाही।
भाजपा-किसान मोर्चा
भारतीय जनता पार्टी किसान मोर्चा के प्रदेश प्रभारी संदीप शर्मा ह प्रदेश म अल्प अउ खंड बरसा के स्थ्ति ल देखत बांध मन ले नहर के जरिया ले फसल के सिंचाई बर पानी छोड़े के मांग करीन हे। ओमन आरोप लगाइन कि प्रदेश सूखा के चपेट म हवय अउ एखर ले निपटे बर राज्य सरकार कोनो उपाय नइ करत हे। ओमन कीहिन कि प्रदेश म कई ठिन सिंचाई पंप बंद हवय। ओखर बर बिजली आपूर्ति सुनिश्चित करे जाना चाही।
ट्रेन परिचालन
दक्षिण पूर्व मध्य रेलवे के नागपुर रेलमंडल के कन्हान स्टेशन के यार्ड के आधुनिकीकरण अउ रीटा स्टील साइडिंग ल जोड़े बर नॉन इंटरलॉकिंग के काम छै ले चौदह अगस्त तक करे जाही। एखर चलत एक्सप्रेस अउ पेसैंजर समेत अड़सठ यात्री ट्रेन मन ल रद्द कर दे गेहे। उंहें ए दउरान कुछ ट्रेन मन ल गंतव्य ले पहिली समाप्त अउ रवाना करे जाही।
इही बीच रद्द करे गे विशाखापट्नम-निजामुद्दीन-विशाखा
अउ अब पेस हे मौसम के हाल –
बस्तर, दंतेवाड़ा, बीजापुर, सुकमा, कोण्डागांव, कांकेर अउ नारायणपुर जिला म बहत्तर घंटा बर रेड अलर्ट जारी करे गेहे। ए दउरान ए जम्मों जिला मन म भारी बरसा होय के चेतावनी दे गेहे। उंहें बस्तर संभाग समेत धमतरी अउ गरियाबंद जिला म अवइया चौबीस घंटा बर यलो अलर्ट जारी करे गेहे। ए दउरान ए जिला मन म घलो गरज-चमक के साथ भारी बरसा होय के आसार हरय।अउ अब थोरकुन समाचार सार म-– मुख्यमंत्री भूपेश बघेल ह वरिष्ठ पत्रकार सुशील शर्मा के निधन उपर शोक व्यक्त करे हे। ओमन कीहिन कि ओखर निधन ले पत्रकारिता जगत ल बड़ नुकसान होय हे।- रायपुर कोतवाली पुलिस ह क्रेडिट कार्ड ले लाखों रूपिया के ठगी करने वाला अंतर्राज्यीय गिरोह के चार झिन आरोपी मन ल गिरप्तार करे हे। आरोपी मन करा ले दर्जनों एटीएम कार्ड, चेक, पासबुक अउ मोबाइल समेत पांच हजार रूपिया नकद जब्त करे गेहे।
– दुर्ग जिला म चेंबर ऑफ कॉमर्स एंड इंडस्ट्रीज भिलाई इकाई डहार ले पॉलीथिन नइ बउरे बर जनजागरूकता अभियान चलाये गीस। एखर तहत सुभाष मार्केट म जागरूकता रैली निकाले गीस । ए दउरान व्यापारी मन पॉलीथिन नइ बउरे के शपथ लीन।
अउ
– कांकेर जिला म खनिज परिवहन अउ पुलिस विभाग के टीम डहार ले लौह अयस्क के अवैध परिवहन के मामला म पांच वाहन मनके खिलाफ कार्रवाई करे हे।