देश के नवा उप राष्ट्रपति बर काली मतदान होही। संसंद भवन म बीहनिया दस बजे ले संझा पांच बजे तक वोट डाले जाही। एनडीए कोति ले उप राष्ट्रपति पद बर जगदीप धनकड़ अउ यूपीए डहार ले मार्गरेट अल्वा उम्मीदवार हरय। मतगणना काली मतदान के बाद संसंद भवन म करे जाही।
बतादन कि उप राष्ट्रपति एम. वेंकैया नायडू के कार्यकाल ए महीना के दस तारीख के सिरावत हे।
जउन व्यावसायिक वाहन संचालक मन परिवहन विभाग म टैक्स जमा नइ करे हे। ओमन बर राज्य सरकार एकमुश्त निपटान योजना लावत हे। छत्तीसगढ़ परिवहन विभाग डहार ले संचालित ये योजना के तहत त्रैमासिक अउ मासिक कर देय वाहन मन म एक अप्रैल दू हजार तेरा ले इकतीस दिसंबर दू हजार अठारा के अवधि तक अधिरोपित लंबित जुर्माना के राशि म पूरीपूरा छूट के लाभ दे जात हे।
ए संबंध म परिवहन आयुक्त दीपांशु काबरा ह बताइन कि त्रैमासिक अउ मासिक कर देय वाहन मन म अधिरोपित लंबित शास्ति म छूट केवल एकमुश्त निपटान योजना के अवधि एक अप्रैल दू हजार बाईस ले इकतीस मार्च दू हजार तेईस तक होही। ओखर बाद कर शास्ति अउ ब्याज समेत पूरा राशि वसूल करे जाही।
ए साल स्वतंत्रता दिवस समारोह म राज्य अउ जिला स्तर म उत्कृष्ट गौठान मन ल पुरस्कृत करे जाही। कृषि विभाग कोति ले उत्कृष्ट गौठान के चयन प्रक्रिया सुरू कर दे गेहे। एखर तहत राज्य के तीन ठिन सर्वश्रेष्ठ गौठान मन ल राज्य स्तरीय समारोह म पचास-पचास हजार रूपिया के इनाम दे जाही। उहें, हरेक जिला के एक-एक उत्कृष्ट गौठान मन ल पच्चीस-पच्चीस हजार रूपिया के इनाम जिला स्तरीय स्वतंत्रता दिवस समारोह म दे जाही। समारोह म उत्कृष्ट गौठान ले जुड़े ग्राम पंचायत के सरपंच अउ गौठान समिति के अध्यक्ष ल मुख्य अतिथि डहार ले सम्मानित करे जाही।
कृषि विभाग ह उत्कृष्ट गौठान चयन बर बुनियादी ढांचा, गोबर खरीदी अउ कम्पोस्ट उत्पादन, विविध आजीविका अउ स्वावलंबन ल आधार मानत एखर बर कुल सौ नंबर निर्धारित करे हे।
इही बीच, गौठान मन म गोधन न्याय योजना के अंतर्गत गोबर के खरीदी अउ ओखर ले जैविक खाद बनाय के प्रक्रिया के मॉनिटरिंग बर संभाग स्तर म समिति गठित करे जाही।
प्रवर्तन निदेशालय-ईडी के टीम ह आज छत्तीसगढ़ के दुरूग, राजनांदगांव अउ रईपुर के कई झिन कारोबारी मनके ठिकाना म छापा मारीन। दुरूग म टीम ह सराफा व्यपारी मनके दुकान, घर अउ चार्टर्ड अकांउटेंट के आफिस मन म छापा मार कार्रवाई करीन। एखर अलावा रईपुर अउ राजनांदगांव म घलो सराफा अउ कपड़ा व्यवसायी के ठिकाना मन म छापा मारे गीस। कार्रवाई के दउरान टीम के सुरक्षा बल सीआरपीएफ के जवान घलो मौजूद रिहीन।
एखर पहिली, आयकर विभाग के टीम ह घलो दू दिन पहिली रईपुर, कोरबा अउ रायगढ़ के स्टील अउ बिजली उद्योग ले जुड़े कारोबारी मनके ठिकाना म छापा मारके जांच-पड़ताल करे रिहीन।
मुख्यमंत्री भूपेश बघेल ह किहीन हे कि सी-मार्ट के उद्देश्य स्थानीय उत्पाद, महिला स्व-सहायता समूह, कुम्हार अउ दूसर पारंपरिक कुटीर उद्योग मन ल बढ़ावा देना हरय। ए बात श्री बघेल ह काली रईपुर म महिला समूह मन डहार ले बने उत्पाद के सी-मार्ट म खरीदी-बिक्री के समीक्षा बइठका के दउरान किहीन। बइठका म ओमन बतईन कि सी-मार्ट के माध्यम ले स्थानीय निवासी मन ल रोजगार के बेहतर मउका उपलब्ध कराय के संघरा ओमन ल एकेच जघा म गुणवत्तायुक्त सामान उचित कीमत म उपलब्ध कराय जात हे। श्री बघेल ह उत्पाद मनके प्रचार सोशल मीडिया म घलो करे के सुझाव दीन।
भारतीय अंतरिक्ष अनुसंधान संगठन-इसरो रविवार सात अगस्त के अंतरिक्ष म तिरंगा फहराही। तिरंगा फहराय बर इसरो अपन सबले छोटे व्यवसायिक रॉकेट ल अंतरिक्ष म भेजही। ए रॉकेट श्री हरिकोटा के सतीश धवन अंतरिक्ष केंद्र ले बीहनिया नौ बजके अठारा मिनट म छोड़े जाही।
इसरो के अध्यक्ष एस. सोमनाथ ह नवा उपग्रह ल गेम चेंजर बताय हे। ओमन कीहिन कि छोटा उपग्रह मन ल अंतरिक्ष म भेजे के तेजी ले बाढ़त क्षेत्र म ये भारत बर मील के पत्थर साबित होही। पंद्रह अगस्त दू हजार अठारा के प्रधानमंत्री नरेंद्र मोदी ह घोषणा करे रीहिन कि देश के पचहत्तरवां स्वाधीनता दिवस म अंतरिक्ष म तिरंगा फहराय जाही।
मुख्यमंत्री भूपेश बघेल के अपील के बाद दू दिन के अंदर बीस हजार ले जादा लोगन मन अपन-अपन सोशल मीडिया प्रोफाइल म हैशटैग हमर तिरंगा के उपयोग करत विशेष फ्रेम म तिरंगा के साथ अपन फोटो अपडेट कर चुके हे। ए संख्या सरलग बाढ़त हे। मुख्यमंत्री ह लोगन मन ले अपील करीन हे कि ओमन सोशल मीडिया म घलो हमर तिरंगा अभियान बर एकजुटता दिखावत सोशल मीडिया म विशेष फ्रेम म तिरंगा के साथ फोटो अपडेट करय।
बतादन कि मुख्यमंत्री ह घलो अपन सोशल मीडिय प्रोफाइल अपडेट करत तिरंगा प्रोफाइल लगाय हे। ए अभियान के तहत प्रदेस म ग्यारह ले सत्रह अगस्त तक घर-घर म तिरंगा फहराय के लक्ष्य राखे गेहे।
विश्व आदिवासी दिवस के मउका म सात अउ आठ अगस्त के रईपुर के कोटा स्थित स्वामी विवेकानंद स्टेडियम म बिसेस रूप ले संरक्षित जनजाति मनके पारंपरिक खेल मड़ई के आयोजन करे जाही। खेल मड़ई म तीरंदाजी, गुलेल, मटका दौड़, गिल्ली-डंड ा, गेड़ी-दउड़, भौंरा, फुगड़ी, बिल्ला, कबड्डी, रस्साखींच पिटठुल, भारा दउड़, सुई-धागा दउड़, मुदी लुकावन, तीन टंगड़ी दउड़ अउ नौकायन जइसन प्रतियोगिता राखे जाही।
ए प्रतियोगिता बालक अउ बालिका मन बर दू वर्ग म आयोजित करे जाही। पहिली वर्ग म चौदह ले अट्ठारह साल तक के प्रतिभागी सामिल हो सकही। उहें, दूसरा वर्ग म अट्ठारह साल ले जादा आयु वर्ग के प्रतिभागी भाग ले सकही।
बतादन कि बाईस ले अट्ठाईस जुलाई तक जिला स्तर म होय खेल प्रतियोगिता म चयन के बाद सत्रह जिला के लगभग सात सौ प्रतिभागी ए राज्य स्तरीय प्रतियोगिता म सामिल होही।
रायगढ़ जिला के राष्ट्रीय राजमार्ग उनचास म बरगढ़ करा ट्रेलर के टक्कर ले मोटर सायकिल सवार तीन झिन युवक के मउत होगे। तीनो युवक कोरबा जिला के रहइया रीहीन।
एति राजनांदगांव के इंदिरा नगर चौक करा खड़ा मालवाहक ले टकराय ले मोटर सायकिल सवार एक युवक के मउत होगे। उंहे दू झिन दूसर मन गंभीर रूप ले घायल होगे। इही जिला के कुम्हरवाड़ा गांव म एक ठिन ट्रेक्टर अनियंत्रित होगे पेड़ ले टकरा गीस। ये हादसा म घायल चालक के अस्पताल ले जात बेरा मउत होगे।
खेलो इंडिया स्टेट सेंटर ऑफ एक्सिलेंस आवासीय खेल अकादमी बर एथलेटिक्स के बालक-बालिका मनके राज्य स्तरीय चयन ट्रायल रईपुर के कोटा स्थित स्वामी विवेकानंद स्टेडियम हो होईस। खेल अउ युवा कल्याण विभाग कोति ले स्वर्गीय बी.आर. यादव राज्य खेल प्रशिक्षण केन्द्र बहतराई बिलासपुर म संचालित अकादमी बर भारतीय खेल प्राधिकरण के तकनीकी खेल विशेषज्ञ मनके उपस्थिति म खिलाड़ी मनके चयन करे गीस। एमा राज्य के आने-आने जिला मन ले आय दू सौ तीन खिलाड़ी मन हिस्सा लीन। एखर बाद खिलाड़ी मन ल अकादमी म प्रवेस दे बर चयन संबंधी आगू के प्रक्रिया करे जाही।
उहें, राज्य खेल प्रशिक्षण केन्द्र बिलासपुर म संचालित होवइया आवासीय बालिका कबड्डी अकादमी बर खिलाड़ी मनके दू दिन के राज्य स्तरीय चयन ट्रायल आज ले रईपुर के पंडित रविशंकर शुक्ल विश्वविद्यालय म सुरू होगे हे।