आज दिनभर के खबर ल अपन गुरतुर छत्तीसगढ़ी भाखा म पढ़व

मतदाता सूची पुनरीक्षण

प्रदेस म अवइया विधानसभा अउ लोकसभा चुनाव ल देखत मतदाता सूची विशेष संक्षिप्त पुनरीक्षण के काम एक अगस्त ले सुरू होगे हे। एखर बर छत्तीसगढ़ निर्वाचन पदाधिकारी कार्यालय डहार ले निर्वाचन ले जुड़े अधिकारी मन ल रईपुर म दू दिवसीय प्रशिक्षण दे गीस। प्रशिक्षण कारीकरम म अधिकारी मन ल निर्वाचक नामावली तैयार करे, आधार संकलन करे, नवा मतदाता मन ल ईपिक कार्ड बनवाय, नाम कटवाय के संग नाम सुधारे समेत मतदाता सूची म जोड़े के संबंध म जानकारी दे गीस।
छत्तीसगढ़ के अतिरिक्त मुख्य निर्वाचन पदाधिकारी शिखा राजपूत तिवारी ह प्रशिक्षण कारीकरम म अधिकारी मन ल फोटोयुक्त निर्वाचक नामावली तैयार करे म बिसेस सावधानी बरते के निरदेस दीन।
इही बीच, राज्य निर्वाचन आयोग के प्रतीक चिन्ह तैयार करे बर बारह अगस्त तक नमूना मंगाय गेहे। प्रतीक चिन्ह के नमूना सीडी के माध्यम ले या आयोग के ईमेल म भेज सकथे। सबले बढ़िया नमूना देवइया मन ल इनाम अउ प्रसस्ति पत्र दे जाही।

हर घर तिरंगा

प्रधानमंत्री नरेन्द्र मोदी ह ‘‘हर घर तिरंगा अभियान‘‘ के तहत अपन सोशल मीडिया प्रोफाइल तस्वीर बदल के उहां तिरंगा लगा देहे। ए अभियान आजादी के अमृत महोत्सव के तहत देस के स्वतंत्रता के पचहत्तर बछर पूरा होय के उत्सव म मनाय बर सुरू करे गेहे। प्रधानमंत्री ह अपन ट्वीट संदेस म लोगन मन ले अपन सोशल मीडिया प्रोफाइल म घलो तिरंगा लगाय के अपील करीन हे। ओमन किहीन कि आज के दिन बिसेस हे। प्रधानमंत्री ह किहीन कि अइसन बेरा म जब देस आजादी के अमृत महोत्सव मनावत हे, त सामूहिक आंदोलन के रूप म हर घर तिरंगा अभियान सुरू होगे हे।
इही बीच, भारतीय जनता पार्टी संसदीय दल के बइठका आज संसद भवन परिसर म होईस। बइठका म नौ ले पन्द्रह अगस्त तक होवइया ‘‘आजादी के अमृत महोत्सव‘‘ अउ ‘‘हर घर तिरंगा‘‘ अभियान समेत कारीकरम म चरचा करे गीस। बइठका के बाद संसदीय कार्य मंत्री प्रहलाद जोशी ह किहीन कि ए बेरा म तिरंगा बाइक रैली के घलो आयोजन करे जाही। ओमन किहीन कि पार्टी के जम्मों सांसद अलग-अलग जघा म होइवया कारीकरम म सामिल होही।

सूखा-नजरी आंकलन

मुख्यमंत्री भूपेश बघेल ह राज्य के अल्पवर्षा वाले तहसील म फसल मनके स्थिति के नजरी आंकलन कराय के निरदेस दीन हे। ओमन औसत ले कम बरसा  वाला तहसील म राहत काम बर तुरते कार्ययोजना घलो तैयार करे बर कहिन हे।
मुख्यमंत्री के निरदेस के बाद प्रदेस के मुख्य सचिव अमिताभ जैन ह आज वीडियो कान्फ्रेंसिंग के माध्यम ले जम्मों संभाग आयुक्त अउ कलेक्टर मन के बइठका लेके प्रदेस म बरसा के अभी स्थिति के समीक्षा करीन। श्री जैन ह कलेक्टर मन ल औसत ले कम बरसा वाले तहसील के राहत मैन्युवल दू हजार बाईस के प्रावधान के मुताबिक फसल के राजस्व, कृषि अउ उद्यानिकी विभाग के अधिकारी मनके माध्यम ले नजरी आंकलन कराय के निरदेस दीन। मुख्य सचिव ह किहीन कि औसत ले कम बरसा वाले अट्ठाईस तहसील म राहत काम सुरू करे बर तुरते कार्ययोजना घलो तैयार करे जाय।
खबर के मुताबिक राज्य के नौ ठिन जिला के अट्ठाईस तहसील म एक अगस्त के स्थिति म साठ प्रतिसत ले कमती औसत बरसा होय हे।

परिवहन मंत्री-निर्देश

प्रदेस के परिवहन मंत्री मोहम्मद अकबर ह किहीन हे कि सड़क दुर्घटना के रोकथाम अउ यातायात ल बने बनाय बर सबके प्रयास के जरूरत हवय। काली मंत्रालय म होय राज्य सड़क सुरक्षा परिषद के बइठका म ओमन किहीन कि पाठ्य-पुस्तक मन म घलो यातायात शिक्षा अउ नियम ले जुड़े सामान के समावेश होना चाही। ओमन लोगन मन म यातायात नियम के प्रति जागरूकता लाय अउ एखर कड़ाई ले पालन सुनिश्चित करे के निरदेस दीन।
बइठका म सड़क दुर्घटना म पीड़ित मनके मदद करे बर देवइया पांच हजार रूपिया म बढ़ोतरी करे के संगेसंग धनेली ले सिलतरा सर्विस रद्दा के चौड़ीकरण के फइसला ले गीस।

अमृत महोत्सव प्रश्नोत्तरी

आजादी के अमृत महोत्सव उपर आकाशवाणी समाचार डहार ले राष्ट्रीय स्तर म राखे जात प्रश्नोत्तरी के तहत आज के प्रश्न हे-
– 1857 के स्वतंत्रता संग्राम के ओ क्रांतिकारी के नाम का रिहीस, जउन अंग्रेज मन ल हराय म विदेशी सहायता जुटाय बर काबुल के यात्रा म गे रिहीन अउ ए दउरान खराब स्वास्थ्य के सेती उंखर मउत होगे रिहीस ?

श्रोता मन अपन उत्तर वाट्सअप नंबर – आठ आठ दू छै पांच चार छै दू छै दू – या ई-मेल आई डी – अमृत महोत्सव क्विज एट द रेट प्रसार भारती डॅाट जीओवी डॅाट इन म भेज सकत हे।
भाग्यशाली प्रतिभागी ल विजेता के रूप म चुने जाही अउ काली के समाचार प्रभात म विजेता के नाम के घोषणा करे जाही। विजेता ल ई-प्रमाण पत्र अउ सांकेतिक पुरस्कार दे जाही।

रेलवे-सहयोग

रेलवे स्टेशन मन म स्थित पूछताछ काउंटर-इंक्वायरी बूथ ल अब ‘‘सहयोग‘‘ नाम ले जाने जाही। रेल मंत्रालय ह ए संबंध म आदेस जारी कर देहे। खबर के मुताबिक रेल यात्री मनके सुविधा ल देखत प्लेटफारम मन म ट्रेन ले जुड़े जरूरी पूछताछ बर जम्मों महत्वपूर्ण रेलवे स्टेशन मन म पूछताछ काउंटर देवाय गेहे। ए पूछताछ काउंटर मनके माध्यम ले रेल यात्री ट्रेन के स्थिति, ट्रेन के प्लेटफॉर्म अउ अवई-जवई के जानकारी समेत स्टेशन म अवइया ट्रेन ले जुड़े जानकारी दे जाथे।

माओवादी समाचार

सुकमा जिला म एक झिन माओवादी दंपित्त ह पुलिस के आगू आत्मसमर्पण करे हे। मिले खबर के मुताबिक सलवम मुत्ता उर्फ सुक्कू ह अपन गोसईन गंगी के संग पुलिस अधीक्षक सुनील शर्मा अउ अतिरिक्त पुलिस अधीक्षक किरण चौहान के आगू आत्मसमर्पण करीन। ए दूनों उपर आठ-आठ लाख रूपिया के इनाम घोसित रिहीस। ए दूनों माओवादी सुकमा-बीजापुर सीमा म होय जम्मों बड़े माओवादी घटना म सामिल रेहे हे।

रस्तोगी कॉलेज

दुरूग जिला प्रसासन ह भिलाई के स्मृति नगर स्थित स्किल डेवलपमेंट इंस्टीट्यूट के छात्रावास म डायरिया फैले के कारण दूषित पानी ल बताय हे। कलेक्टर पुष्पेन्द्र मीणा ह बतईन कि रस्तोगी कॉलेज म पाछु संझा विद्यार्थी मनके बीमार होय के सूचना म स्वास्थ्य विभाग, मेडिसिन विशेषज्ञ अउ नगर निगम के स्वास्थ्य विभाग के टीम डहार ले जांच करे गीस। जांच के दउरान वाटर फिल्टर ह बड़ दिन ले खराब रिहीस। उहें, विद्यार्थी मन ह प्रबंधन उपर मापदंड के अनुरू सुविधा अउ खाना नइ देवाय के आरोप लगईन। कलेक्टर ह किहीन कि ए मामला म स्किल डेवलपमेंट इंस्टीट्यूट प्रबंधन ल दोसी पाय गेहे। जिला प्रसासन डहार ले जांच रिपोर्ट राज्य सरकार ले भेज के कार्रवाई के अनुसंसा करे गेहे।
खबर के मुताबिक स्किल डेवपलमेंट इंस्टीट्यूट के छात्रावास म डायरिया फैले ले जिहां एक छात्रा के मउत होगे। उहें, उनचालीस छात्र-छात्रा मन ल अस्पताल म भर्ती कराय गेहे।

नाग पंचमी

नाग पंचमी के परब आज प्रदेसभर म पांरपरिक रूप ले मनाय जात हे। ए मउका म सहर के संग गांव मन म नाग देवता के मूर्ति बनाके पूजापाठ करे गीस। उहें, कुश्ती अउ दंगल के घलो आयोजन होईस। राजधानी रईपुर के आने-आने अखाड़ा मन म भगवान रूद्र के मूर्ति स्थापित करके नागपंचमी म विधि-विधान ले पूजा करे गीस।

मानसून

मौसम विभाग ह अगस्त अउ सितंबर महीना म सामान्य मानसून के संभावना व्यक्त करे हे। आकाशवाणी ले बातचीत म मौसम विभाग के महानिदेशक मृत्युंजय महापात्रा ह बतईन कि ए दू महीना के दउरान पूरा देस म बने बरसा होय के उम्मीद हे।
ऐति, छत्तीसगढ़ म काली कुछेक जघा म हल्का ले मध्यम बरसा होय या गरज-चमक के संग छींटा पड़े के संभावना हवय। मौसम विभाग ह एक-दू जघा म गरज-चमक के संग गाज गिरे के चेतावनी घलो देहे।