नया नाम
राज्य सरकार ह चंदखुरी, गिरौदपुरी अउ सोनाखान के नाम बदले के फइसला लेहे। एखर बर मुख्यमंत्री भूपेश बघेल ह संबंधित विभाग ल जरूरी कार्रवाई करे के निरदेस दीन हे। जनप्रतिनिधि अउ स्थानीय लोगन मनके मांग म चंदखुरी के नवा नाम माता कौशल्या धाम चंदखुरी, गिरौदपुरी के बाबा गुरू घासीदास धाम गिरौदपुरी अउ सोनाखान के नवा नाम शहीद वीरनारायण सिंह धाम सोनाखान के नाम म राखे जाही। राज्य शासन डहार ले जल्दीच राजपत्र म ए तीनों जघा के नवा नामकरण संबंधी अधिसूचना के प्रकाशन करे जाही।
मुख्यमंत्री-नजरी आंकलन
सरगुजा संभाग के तीन जिला मन म सूखा के स्थिति ल देखत मुख्यमंत्री भूपेश बघेल ह संबंधित विभाग ल नजरी आंकलन करे के निरदेस दीन हे। संगेसंग मुख्य सचिव अमिताभ जैन ल कलेक्टर मन ले बात करके स्थिति उपर नजर राखे बर कहिन हे।
खबर के मुताबिक कांग्रेस विधायक बृहस्पत सिंह अउ चिंतामणि महाराज ह मुख्यमंत्री ल चिट्टी लिखके सरगुजा संभाग के बलरामपुर, जशपुर अउ सरगुजा जिला मन ल सूखाग्रस्त घोसित करके सर्वे करा के किसान मन ल फसल मुआवजा देके मांग करे रिहीन।
लोकसभा-केन्द्रीय विद्यालय
केन्द्र सरकार ह किहीन हे कि केन्द्रीय विद्यालय म भर्ती बर पहिली के कूपन व्यवस्था के जघा म आने योजना लाने के कोनों विचार नइ हे। केन्द्रीय शिक्षा मंत्री धर्मेन्द्र प्रधान ह लोकसभा म बतईन कि सरकार ह केन्द्रीय विद्यालय म दाखिला के प्रक्रिया ल पारदर्सी अउ सरल बनाय बर कई ठिन कदम उठाय हवय। श्री प्रधान ह किहीन कि केन्द्रीय विद्यालय एक बने संस्था हे अउ एखर स्थापना केन्द्र सरकार के कर्मचारी, रक्षा, अर्धसैनिक बल, केन्द्रीय स्वायत्तशासी संस्था समेत केन्द्रीय सार्वजनिक उपक्रम के कर्मचारी के लइका मन बर करे गे रिहीस, जेखर देस के आने-आने जघा म तबादला होत रहिथे।
परीक्षा परिणाम
छत्तीसगढ़ माध्यमिक शिक्षा मंडल ह डी.एल.एड. प्रथम अउ द्वितीय बछर के मुख्य परीक्षा परिणाम के आज घोसना कर देहे। डी.एल.एड. प्रथम बछर के परीक्षा म करीबन बैसठ प्रतिशत अउ द्वितीय बछर के परीक्षा म करीबन छिहत्तर प्रतिशत परीक्षार्थी पास होय हे। रिजल्ट माध्यमिक शिक्षा मंडल के वेबसाइट म घलो हवय।
माओवादी-मुठभेड़
सुकमा जिला म माओवादी मनके संग होय मुठभेड़ म पुलिस ह एक झिन माओवादी ल मार गिराय म सफलता पाय हे। मिले जानकारी के मुताबिक पुलिस के दल तलाशी अभियान म निकले रिहीन। इही दउरान भेज्जी इलाका म माओवादी मन ह अचानके घात लगाके हमला कर दीन। पुलिस डहार ले करे गे जवाबी कार्रवाई म हड़मा उर्फ सनकू नामक माओवादी मारे गीस। मृतक माओवादी आने-आने घटना म सामिल रेहे के संगेसंग माड़ इलाका म सक्रिय रिहीस।
बिजली महोत्सव
कांकेर जिला के भानुप्रतापपुर म बिजली महोत्सव राखे गीस। ए दउरान केन्द्र सरकार के सौभाग्य योजना, दीनदयाल उपाध्याय ग्राम ज्योति योजना अउ उपभोक्ता मनके अधिकार समेत आने-आने योजना के बारे म लोगन मन ल जानकारी दे गीस। संगेसंग नुक्कड़ नाटक करके उपभोक्ता मन ल जागरूक करे गीस। खबर के मुताबिक आजादी के अमृत महोत्सव अउ ‘‘उज्जवल भारत, उज्जवल भविष्य‘‘ कारीकरम के चलत प्रदेसभर म अइसन आयोजन राखे गीस।
विश्व-स्तनपान सप्ताह
आज ले विश्व स्तनपान सप्ताह मनाय जावत हे। ए ह सात अगस्त तक चलही। बछर उन्नीस सौ बयानवे म पहिली घांव स्तनपान संबंधी जागरूकता बर ए दिवस ल मनाना सुरू करे गे रिहीस। मां के दूध नवजात अउ लइका मन ल बीमारी ले बचाथे अउ उंखर रोग प्रतिरोधक क्षमता बढ़ाथे। ए बछर विश्व स्तनपान सप्ताह के बिसय हरय – ‘‘स्तनपान बर कदम शिक्षित करना अउ समर्थन‘‘ हवय।
अमृत महोत्सव प्रश्नोत्तरी
आजादी के अमृत महोत्सव उपर आकाशवाणी समाचार डहार ले राष्ट्रीय स्तर म राखे जात प्रश्नोत्तरी के तहत आज के प्रश्न हे-
– कोन स्वतंत्रता सेनानी ह बछर 1940 म हॉलवेल स्मारक विरोधी आंदोलन के अगुवई करे रिहीन ?
श्रोता मन अपन उत्तर वाट्सअप नंबर – आठ आठ दू छै पांच चार छै दू छै दू – या ई-मेल आई डी – अमृत महोत्सव क्विज एट द रेट प्रसार भारती डॅाट जीओवी डॅाट इन म भेज सकत हे।
भाग्यशाली प्रतिभागी ल विजेता के रूप म चुने जाही अउ काली के समाचार प्रभात म विजेता के नाव के घोषणा करे जाही। विजेता ल ई-प्रमाण पत्र अउ सांकेतिक पुरस्कार दे जाही।
रायपुर रेलमंडल-कार्यक्रम
आजादी के अमृत महोत्सव के तहत आज रईपुर रेलमंडल म आने-आने कारीकरम के आयोजन करे गीस। ए दउरान एकता के संदेस दे बर चार किलोमीटर के दउड़ होईस, जेमा तिरपन अधिकारी अउ रेलवे सुरक्षा बल के जवान मन ह भाग लीन। उहें, रईपुर के रेलवे कॉलोनी क्षेत्र म करीबन सत्तर छायादार अउ फलदार पौधा लगाय गीस।
झाडूराम रावटे-निधन
पूर्व सांसद झाडूराम रावटे के केशकाल म आज निधन होगे। ओमन अस्सी बछर के रिहीन। दिवंगत रावटे चौथा लोकसभा म निर्दलीय सांसद के रूप म चुने गे रिहीस। उंखर अंतिम संस्कार केशकाल के वीरानगांव म करे गीस। दिवंगत रावटे के निधन ले क्षेत्र म सोक के लहर हवय।
मुख्यमंत्री भूपेश बघेल ह सांसद रावटे के निधन म दुख जतईन हे अउ उंखर परिवार वाले मन बर अपन संवेदना प्रकट करीन हे।
एम्स-ट्रांसप्लांट
रईपुर के अखिल भारतीय आयुर्विज्ञान संस्थान-एम्स म कार्निया के पहिली सफल ट्रांसप्लांट करे गेहे। ऑपरेसन के बाद मरीज ह ठीक हवय। एखर संगेसंग एम्स म कार्निया ट्रांसप्लांट के सुरूवात होगे हे। अभी घलो तीस ले जादा मरीज मन ल कार्निया दान देइवया मनके इंतजार हवय, जेखर ले उंखर आंखी के रोसनी वापिस लहुट सकय।
एम्स के निदेशक डॉक्टर नितिन एम. नागरकर ह बतईन कि आयुष्मान भारत योजना के तहत श्रमिक मरीज मनके कार्निया ट्रांसप्लांट पूरा तरह निःशुल्क रही। उहें, कार्निया ट्रांसप्लांट के नोडल अधिकारी डॉक्टर विद्या साहू ह बतईन कि कोनों भी सामान्य मनखे के मउत के बाद छह घंटा तक नेत्रदान करे जा सकथे। कार्निया दान करे के पूरा प्रक्रिया ल एम्स के टीम डहार ले कराय जाही।
आकर्षी कश्यप-कॉमनवेल्थ गेम्स
कॉमनवेल्थ गेम्स म छत्तीसगढ़ के बैडमिंटन खिलाड़ी आकर्षि कश्यप के सानदार प्रदर्सन जारी हे। अपन दूसर मैच म आकर्षि ह साउथ अफ्रीका के योहनिता शॉल्टज ल इक्कीस-ग्यारह अउ इक्कीस सोलह ले हराके टीम ल सेमीफाइनल म पहुंचा देहे। पाछु रतिहा होय ए मैच म आकर्षि ह अपन आक्रमक खेल के प्रदर्सन करीन।
सावन सोमवार
सावन महीना के आज तीसरइया सोमवार हरय। ए मउका म शिव मंदिर मन म भगवान भोलेनाथ के दर्सन अउ अभिषेक बर भक्त मनके लाइन लगे हे। श्रद्धालु मन ह भगवान भोलेनाथ के जल अभिषेक अउ दूध ले अभिषेक करके बिसेस पूजा-पाठ करत हे। राजधानी रईपुर म बूढ़ेश्वर महादेव ले कावड़ यात्रा निकाल के कांवड़िया मन ह महादेव घाट के हटकेश्वर महादेव म जल चढ़ईन। उहें, सरोना के शिव मंदिर मन म घलो भक्त मनके भीड़ लगे हे।
ऐति, गरियाबंद जिला के राजिम स्थित कुलेश्वर महादेव, रायपुर जिला के चंपारण्य के चंपेश्वर महादेव समेत पंचकोशी महादेव मन म जल अभिषेक करे बर भक्त अउ कांवड़िया मनके लाइन लगे हे।
उहे, जांजगीर-चांपा के खरौद म स्थित भगवान लक्ष्मणेश्वर के दर्सन बर बिहनियाच ले भक्त के लाइन लगे हवय।