आज दिनभर के खबर ल अपन गुरतुर छत्तीसगढ़ी भाखा म पढ़व

मन की बात-01

प्रधानमंत्री नरेन्द्र मोदी ह आजादी के अमृत महोत्सव ल जन-आंदोलन असन होय उपर अपन खुसयारी जतईन हे। आकाशवाणी ले मन की बात  कारीकरम म श्री मोदी ह किहीन कि ए महोत्सव के जुड़े कतकोन कारीकरम म जीवन अउ समाज के हरेक जघा ले जुड़े मनखे सामिल होवत हे। ओमन किहीन कि मन की बात के ए कड़ी के बिसेस महत्तम रिही, काबर कि भारत ह बहुत जल्दी अपन आजादी के पचहत्तर बछर पूरा करही। प्रधानमंत्री ह किहीन कि हमन सौभाग्यसाली हरन जउन मन स्वतंत्र भारत म जनम ले हन।
श्री मोदी ह हर घर तिरंगा अभियान के घलो उदाहरण दीन अउ बतईन कि ए हर आजादी के अमृत महोत्सव के चलत होवत हे। प्रधानमंत्री ह लोगन मन ले ए आंदोलन म सामिल होय के अपील घलो करीन।
प्रधानमंत्री ह किहीन कि आजादी के अमृत महोत्सव के सबले बड़े आरो हे कि हरेक मनखे ल पूरा समर्पण के संग अपन कर्तव्य निभाना चाही अउ अवइया पच्चीस बछर के अमृत काल ह हरेक देसवासी बर कर्तव्य काल घलो होही। श्री मोदी ह किहीन कि कोविड महामारी ले अभू घलो लड़ई चलत हे अउ सबो झिन के स्वास्थ्य सेवा म बाढ़त रूचि ले हरेक मनखे ल ए महामारी ले निपटे म सहायता मिलही।

मन की बात-02

प्रधानमंत्री ह देसभर म होवत अब्बड़ अकन मेला मनके बारे म घलो गोठइन। ओमन छत्तीसगढ़ म नारायणपुर जिला के विश्व प्रसिद्ध पांच दिन वाले मावली मेला के उदाहरण घलो दीन। श्री मोदी ह किहीन कि आदिवासी परंपरा अउ संस्कृति के झलक ए मेला म दिखथे। देसवासी मन ले ओमन ए मेला मन ल देखे के आग्रह घलो करीन। मन की बात कारीकरम म प्रधानमंत्री डहार ले मावली मेला बारे म गोठ उपर भाजपा के प्रदेस प्रवक्ता केदार कस्यप ह किहीन कि नारायणपुर जिला के रहवइया मन बर ए ह गौरव के बात हे। ओमन एखर बर उहां के रहइवया मन डहार ले प्रधानमंत्री ल धनबाद घलो दीन। श्री कश्यप ह किहीन कि ए मेला ह आदिवासी परंपरा के अनोखा मिलन के सुघ्घर अउ अलगहे तरह के संगम हे।
मन की बात कारीकरम म प्रधानमंत्री ह किहीन कि ए पूरा महीना ह खिलाड़ी मनके नाव हे। ओमन राष्ट्रमंडल खेल मन म भारत के अगुवई करत जम्मों खिलाड़ी मन ल सुभकामना दीन हे।

दीक्षांत समारोह-01

सर्वोच्च न्यायालय के मुख्य न्यायाधीश न्यायमूर्ति एन.वी. रमना ह किहीन हे कि असमाजिक तत्व मनके सेती हर हमेसा समाज के सबले कमजोर तबका ह सिकार बनथे। उंखर मानव अधिकार मनके हनन होथे। अइसन म जवान लइका मन ल आगू आके कमजोर वर्ग के मदद के संगे ओमन ल न्याय देवाना चाही।
रायपुर के हिदायतुल्लाह राष्ट्रीय विधि विश्वविद्यालय के पांचवां दीक्षांत समारोह म बोलत न्यायमूर्ति रमना ह किहीन कि जरूरतमंद मन ल मदद के संगे ओमन ल कम खरचा म न्यायिक प्रक्रिया के जरिया ले इंसाफ मिलय। ए दिसा म काम करे के जरूरत हे। ओमन किहीन कि भारत म कानूनी सहायता सेवा दुनिया म सबले बड़का हवय। हमन ल ए आंदोलन ल सही दिसा म चलाय बर जवान अउ प्रतिभासाली दिमाग के जरूरत हे। नवा बने युवा वकील अउ लॉ प्रोफेशनल्स मन ले मुख्य न्यायाधीश ह किहीन कि आप मन भौतिक धन-दौलत के पाछु परिवर्तन के सक्ती ल झन बिसारहू। न्यायमूर्ति रमना ह किहीन कि छत्तीसगढ़ सरकार ह ज्यूडिशियल कम्युनिटी के बजट अउ इंफ्रास्ट्रक्चर वाले जरूरत के पूरा ख्याल रखत हे। ओमन आसा व्यक्त करीन कि ए ट्रेंड ह इही तरह जारी रइही अउ छत्तीसगढ़ ह ज्यूडिशियरी ल सबले अच्छा इंफ्रास्ट्रक्चर देवाय म अव्वल राज्य बनके उभरही।
रायपुर के हिदायतुल्लाह राष्ट्रीय विधि विश्वविद्यालय-एच.एन.एल.यू. के बड़ई मारत सीजेआई ह किहीन कि एखर नाव ह एक झिन महान कानून के जानकार के नाव उपर रखे गेहे, जउन अपन पूरा जीवन ल विधि के नाव म समर्पित कर दीन। न्यायमूर्ति रमना ह विद्यार्थी मन ल बधाई देवत किहीन कि ज्ञान अउ सूचना सबले बड़का धरोहर हे अउ एला बने ढंग ले बउर के हमन ल आगू बाड़ना हे।

दीक्षांत समारोह-02

पांचवां दीक्षांत समारोह म दू झिन शोधार्थी मन ल डॉक्टर ऑफ फिलॉसफी के उपाधि दे गीस। एखर संगे तेईस झिन पढ़ईया लइका मन ल छियासठ ठिन गोल्ड मेडल ले सम्मानित करे गीस। दीक्षांत समारोह म सबले सुघ्घर बेरा तब अईस, जब पढ़ईया नोनी यवनिका ल प्रोफेसनल एथिक्स म गोल्ड मेडल दे गीस। यवनिका ह अपन दृष्टिहीनता ल कभू भी अपन लक्ष्य के आगू नइ आवन दीस। ए उपलब्धि उपर न्यायमूर्ति रमना, मुख्यमंत्री भूपेश बघेल अउ आय जम्मों पहुना मन यवनिका के हौसला बढ़ईन। ए बेरा यवनिका ह बेंग्लुरू के नेशनल लॉ कॉलेज म एल.एल.एम. के पढ़ई करत हे।
दीक्षांत समारोह म छत्तीसगढ़ के मुख्यमंत्री भूपेश बघेल ह विशिष्ट पहुना रिहीन। ए मउका म ओमन विश्वविद्यालय के जरनल (जर्नल) लॉ एंड सोशल साईंस के छठवां संस्करण के विमोचन करीन। समारोह के पगरइति सर्वोच्च न्यायालय के न्यायमूर्ति एस. अब्दुल नजीर ह करीन। ए मउका म छत्तीसगढ़ उच्च न्यायालय के मुख्य न्यायाधिपति अउ हिदायतुल्लाह राष्ट्रीय विधि विश्वविद्यालय के कुलाधिपति अरूप कुमार गोस्वामी घलो उपस्थित रिहीन।

रेल परिचालन

दक्षिण पूर्व मध्य रेलवे के नागपुर रेलमंडल के राजनांदगांव-कलमना रेलखंड के बीच नॉन इंटरलॉकिंग काम के सेती ए रद्दा म चलइया कई ठिन ट्रेन के अवई-जवई परभावित रइही। जानकारी मुताबिक एक अउ दू अगस्त के करीबन अट्ठाईस ठिन केंसिल रइही। उहें, चार ठिन ट्रेन ल बीचे म सिरो दे  जाही।

हर घर तिरंगा अभियान

आजादी के अमृत महोत्सव के चलत देसभर म अवइया तेरह ले पन्द्रह अगस्त तक हर घर तिरंगा अभियान चलाय जाही। एखर बर जन-जागरूकता कारीकरम प्रदेसभर म करे जात हे। इही कड़ी म आज दुरूग लोकसभा सांसद विजय बघेल के घर ले हर घर तिरंगा अभियान के सुरूवात करे गीस। ए दउरान सांसद ह लोगन मन ले नौ ले पन्द्रह अगस्त तक घरों-घर तिरंगा फहराय के अपील करीन। ए मउका म श्री बघेल ह किहीन कि देस ह आजादी के पचहत्तरवां वर्षगांठ मनाय बर जावत हे। ओमन किहीन कि जम्मों झन ल ए सपथ लेना चाही कि अवइया पच्चीस बछर म देस ल वैभव के सिखर तक पहुंचाबो।

प्रेमचंद जयंती

प्रसिद्ध साहित्यकार अउ लेखक मुंशी प्रेमचंद के आज जयंती हरय। ए मउका म मुख्यमंत्री भूपेश बघेल ह उंखर सुरता करत नमन करीन। ए मउका म श्री बघेल ह किहीन कि साहित्य के क्षेत्र म उपन्यास सम्राट मुंशी प्रेमचंद के बड़का योगदान हवय। प्रेमचंद एक झिन संवेदनशील लेखक रिहीन। जउन आम आदमी के संसो अउ पिरा ल अपन लिखई म उतारीन। मुख्यमंत्री ह किहीन कि प्रेमचंद के अधिकतर रचना ह आम आदमी के गरीबी अउ बेबसी के ठउका चित्रण हवय।

बीएसपी-चुनाव

भिलाई इस्पात संयंत्र म होय यूनियन मान्यता चुनाव म भारतीय मजदूर संघ-बीएमएस जीते हवय। पाछु रतिहा घोसित नतीजा मुताबिक इंटक ल दूसर अउ सीटू ल तीसर स्थान मिले हवय।
निर्वाचन चुनाव अधिकारी अउ डिप्टी सीएलसी आर.के. पुरोहित के निगरानी म काली रतिहा आठ बजे वोट के गनती सुरू होय रिहीस। वोट के गनती बाद घोसित परिणाम मुताबिक पहिली बेर युवा पदाधिकारी मनके टीम भारतीय मजदूर संघ जीते हे।

आकर्षी कश्यप-कॉमनवेल्थ गेम्स

छत्तीसगढ़ के बैडमिंटन खिलाड़ी आकर्षी कस्यप ह बर्मिंघम म आयोजित होय कॉमनवेल्थ खेल म एकतरफा प्रदर्सन करत श्रीलंका के विदारा सुहासनी ल हरा देहे। आकर्षी ह मिक्स्ड टीम इवेंट म ग्रुप प्ले स्टेज ग्रुप के मैच म इक्कीस-तीन, इक्कीस-नौ ले श्रीलंका के खिलाड़ी ल हरईन।
इहां ए बतादन कि आकर्षी कश्यप के कॉमनवेल्थ गेम्स म पहिली मैच रिहीस।

बिजली महोत्सव

कांकेर जिला के नरहरपुर म बिजली महोत्सव राखे गीस। ए दउरान केन्द्र सरकार के सौभाग्य योजना, दीनदयाल उपाध्याय ग्राम ज्योति योजना अउ उपभोक्ता मनके अधिकार समेत आने योजना बारे म लोगन मन ल जानकारी दे गीस। इहां ए बतादन कि आजादी के अमृत महोत्सव अउ ‘‘उज्जवल भारत, उज्जवल भविष्य‘‘ कारीकरम के चलत प्रदेसभर म ए तरह के आयोजन राखे गीस।

चिटफंड कंपनी

राज्य सरकार के आदेस बाद पुलिस प्रसासन डहार ले चिटफंड कंपनी के निदेसक मन ल गिरफ्तार करके ओखर मनके चीज-बस ल नीलाम करे बाद  निवेसक मन ल उंखर पइसा वापिस लहुटाय जावत हे। इही कड़ी म दुरूग जिला म सुष्क इंडिया अउ साइनिंग स्टार इंफ्रा स्टेट कंपनी के चीज-बस के नीलामी करे गीस। नीलामी म करीबन दू करोड़ छप्पन लाख रूपिया मिलीस, जेला ए कंपनी म अपन पइसा लगइया निवेसक मन ल वापिस करे जाही।