आज दिनभर के खबर ल अपन गुरतुर छत्तीसगढ़ी भाखा म पढ़व

कोरिया-भूकंप

कोरिया जिला के चरचा कालरी क्षेत्र म पाछु रतिहा करीबन एक बजे भूकंप के झटका महसूस करे गीस। मौसम विज्ञान के भूकंप अनुभाग ह रिक्टर पैमाना म एखर तीव्रता चार दशमलव छह बताय हे। भूकंप के ए झटका ले एसईसीएल के चरचा ईस्ट खदान के एक सौ एक नंबर पैनल म एयर ब्लास्ट होगे। ए घटना म इहां काम करइया तीन झिन करमचारी मन घायल होगे, जेमा ले दू झन के हालत गंभीर बताय गेहे। पाछु रतिहा आय भूंकप के केन्द्र भू-स्तह ले करीबन सोलह किलोमीटर भूईंया के भीतर बताय गेहे।
जानबा के मुताबिक पाछु ग्यारह जुलाई के घलो कोरिया जिला मुख्यालय के तीर चार दशमलव तीन रिक्टर तीव्रता वाले भूंकप के झटका आय रिहीस।
मुख्यमंत्री ह ए घटना म घायल करमचारी मन ल बने इलाज के सुविधा देवाय के निरदेस दे हवय।

आकाशीय बिजली-मौत

महासमुंद जिला के सिंघोडा थाना क्षेत्र म गाज गिरे ले पांच झिन माईलोगिन के मउत होगे। उहें, छह झिन आने मजदूर मन झुलस गे, जउन मन ल सरायपाली के सामुदायिक स्वास्थ्य केन्द्र म भर्ती कराय गेहे।
हमर संवाददता ह बतईन कि सिंघोडा थाना क्षेत्र के घाटकछार गांव म ग्यारह मजूर मन खेत म धान के रोपाई करत रिहीन। इही दउरान गाज गिर गे अउ जम्मों मजदूर मन एखर चपेट म आगे।
इही जिला के माधोपाली म घलो गाज गिरे ले गरवा चरावत चरवाहा के मउत होगे।

अनुसुईया उइके-तीन वर्ष

छत्तीसगढ़ के राज्यपाल के रूप म अनुसुईया उइके ह आज अपन कामकाज के तीन साल पूरा कर लीन। ए मउका म आज प्राईवेट विश्वविद्यालय विनियामक आयोग अउ जम्मों विश्वविद्यालय डहार ले सम्मान समारोह राखे गीस। ए मउका म राज्यपाल ह किहीन कि पाछु तीन बछर के दउरान हम जम्मों झिन मिलके कोविड के चुनौती के सामना करेन अउ लोगन मनके मदद करेन। ए जम्मों काम राजभवन के अधिकारी-करमचारी मनके मदद ले ही हो पईस। ए मउका म राजभवन डहार ले सुरू करे गे त्रै-मासिक पत्रिका ‘‘एक आशा‘‘ के घलो विमोचन करे गीस।

गौमूत्र-खरीदी

हरेली परब के मउका म काली ले प्रदेस के कतकोन गौठान मन म गौ-मूत्र के खरीदी सुरू होगे। काली पहिली दिन दू हजार तीन सौ छह लीटर गौमूत्र बिसाय गीस। सबले जादा तीन सौ सात लीटर गौमूत्र कबीरधाम जिला म खरीदे गीस। त उहें, बालोद जिला म दू सौ सत्यासी अउ महासमुंद जिला म एक सौ चौरासी लीटर गौमूत्र के खरीदी करे गीस। प्रदेस के तिरसठ ठिन गांव के गौठान मन म चार रूपिया प्रतिलीटर के भाव ले गौमूत्र बिसाय जात हे। गौमूत्र ले जैविक कीटनाशक तैयार करके किसान मन ल पचास रूपिया लीटर म दे जाही।

दीक्षांत समारोह

हिदायतुल्लाह राष्ट्रीय विधि विश्वविद्यालय के पांचवां दीक्षांत समारोह इकतीस जुलाई के रईपुर म होही। ए समारोह के मुख्य अतिथि उच्च न्यायालय के मुख्य न्यायाधीश न्यायमूर्ति एन.वी. रमना होही।
विश्वविद्यालय के कुलपति प्रोफेसर व्ही.सी. विवेकानंदन अउ रजिस्ट्रार उदय शंकर ह आज पत्रकार मन ले गोठबात म बतईन कि दीक्षांत समारोह म          बी.ए. एल.एल.बी. के तीन सौ सात, एल.एल.एम. के एक सौ दस अउ पीएचडी के चार झिन छात्र मन ल डिग्री दे जाही। त उहें, तेईस झिन छात्र मन ल आने-आने संस्था अउ मनखे के नाम ले गोल्ड मेडल दे जाही। ओमन बतईन कि विश्वविद्यालय के नौ सौ अड़तीस छात्र मन बर स्वास्थ्य बीमा के व्यवस्था करे गेहे।

भाजपा प्रशिक्षण शिविर

भारतीय जनता पार्टी के तीन दिन के प्रशिक्षण शिविर आज ले रईपुर म सुरू होगे। प्रसिक्षण सत्र म सोलह ठिन बिसय उपर वक्ता मन प्रसिक्षण दीही। जेमा भाजपा आईटी सेल के प्रमुख अमित मालवीय, विश्व हिन्दू परिषद के राष्ट्रीय कार्यवाहक अध्यक्ष आलोक कुमार, संघ के प्रांत प्रचारक प्रेमशंकर सिदार अउ राष्ट्रीय प्रवक्ता सुंधाशु त्रिवेदी के नाम सामिल हे। प्रसिक्षण सत्र म पूर्व मुख्यमंत्री डॉक्टर रमन सिंह अउ पूर्व मंत्री अजय चंद्राकर घलो एकात्म मानववाद, सोसल मीडिया, मीडिया प्रबंधन, चुनाव प्रबंधन अउ मोदी सरकार ले जुड़े प्रमुख बिसय उपर प्रसिक्षण दीहीं।

बिजली महोत्सव

आजादी के अमृत महोत्सव के तहत देस म बिजली के क्षेत्र म मिले सफलता ल बताय बर ‘‘उज्जवल भारत-उज्जवल भविष्य‘‘ कारीकरम चलाय जात हे। इही कड़ी म आज महासमुंद जिला म बिजली महोत्सव राखे गीस। कारीकरम म बिजली ले आम लोगन मनके जिनगी म आय बदलाव के बारे म बताय गीस अउ संगेसंग राज्य सासन के योजना के अलावा केन्द्र सरकार के सौभाग्य योजना, कुसुम योजना अउ उपभोक्ता के अधिकार के संगेसंग आने-आने योजना के बारे म लोगन मन ल जानबा दे गीस।

हर घर तिरंगा अभियान

आजदी के अमृत महोत्सव के तहत देस म तेरह ले पन्द्रह अगस्त तक हर घर तिरंगा अभियान चलाय जाही। एखर बर जन-जागरूकता कारीकरम के आयोजन प्रदेस म ए बेरा चलत हे। दुरूग जिला म स्थित सशस्त्र सीमा बल भिलाई के अधिकारी डी.ए.वी. स्कूल पहुंचीन अउ उहां के लइका, सिक्षक मन ल अपन-अपन घर म तिरंगा झंडा फहराय के बात किहीन। ए दउरान तीन हजार स्कूली लइका मन ह झंडा फहराय के संकलप लीन।
त उहें, राजनांदगांव जिला म स्व-सहायता समूह के माईलोगिन मन ह हर घर झंडा अभियान बर झंडा बनाय के काम म लगे हे।

अंतर्राष्ट्रीय बाघ दिवस

आज अंतर्राष्ट्रीय बाघ दिवस हरय। प्रधानमंत्री ह बाघ मनके रक्षा करइया मनखे मनके प्रसंसा करे हे। एक ठिन ट्वीट म ओमन किहीन कि भारत म पचहत्तर हजार वर्ग किलोमीटर म बावन ठिन बाघ अभ्यारण्य हवय।
उहें, केन्द्रीय पर्यावरण, वन अउ जलवायु परिवर्तन मंत्री भूपेन्द्र यादव ह किहीन कि राष्ट्रीय बाघ संरक्षण प्राधिकरण के प्रयास ले दू हजार चौदह ले दू हजार अट्ठारह-उन्नीस के बेरा म देस म बाघ मनके संख्या दोगुना होगे हे। ओमन बतईन कि देस म बाघ अभ्यारण्य के संख्या नौ ले बाढ़के बावन होगे।

तंबाकू उत्पाद-चेतावनी

केन्द्रीय स्वास्थ्य मंत्रालय ह जम्मों तंबाकू उत्पाद के पैकेट म लिखे स्वास्थ्य चेतावनी ल अधिसूचित करे हे। बदले नियम ह एसो एक दिसंबर ले लागू होही। मंत्रालय ह किहीन हे कि एक दिसंबर दू हजार बाईस या ओखर बाद बने या आयात करे गे जम्मों तम्बाकू उत्पाद म स्वास्थ्य चेतावनी के संग ‘‘तम्बाकू दर्दनाक मौत के कारण है‘‘ के फोटू बने रइही।

कोविड टीका

राष्ट्रव्यापी टीकाकरण अभियान के तहत अब तक दू सौ तीन करोड़ साठ लाख ले जादा कोविडरोधी टीका लगाय जा चुके हे। केन्द्रीय स्वास्थ्य मंत्रालय ह बतईन कि काली अड़तीस लाख तिरसठ हजार ले जादा टीका लगाय गेहे।
ऐति, प्रदेस म घलो कोरोना टीकाकरण अभियान म जोर आ गेहे। अब तक प्रदेस म चार करोड़ चवालीस लाख पचहत्तर हजार ले जादा कोविडरोधी टीका लगाय जा चुके हे, जेमा सत्ताईस लाख निन्यानवे हजार तीन सौ अट्ठाईस प्रिकॉशन डोज सामिल हे।
उहें, प्रदेस म काली कोरोना संक्रमण के दू सौ चौरासी नवा मामला आगू आय हे।

कर्मचारी/अधिकारी-हड़ताल

केन्द्र सरकार के करमचारी जइसन समान चौंतीस प्रतिसत महंगाई अउ गृह भाड़ा भत्ता के मांग ल लेके प्रदेस के सरकारी करमचारी मनके हड़ताल के आज पांचवां दिन रिहीस, जेखर सेती आज घलो सरकारी आफिस मन म कामकाज प्रभावित रिहीस। रईपुर के बूढ़ातलाब के तीर धरना वाले जघा म आज कतकोन करमचारी मन धरना-प्रदर्शन करीन।
उहें, गरियाबंद जिला म अधिकारी-करमचारी मन ह महारैली निकालीन अउ कलेक्ट्रेट के आगू प्रदर्सन करीन। ए करमचारी मन ह चेतावनी दे हवय कि उंखर मांग ल नइ माने जाही, त ओमन अनिश्चितकालीन हड़ताल म जा सकथे।
ऐति, कोरिया जिला म घलो करमचारी मन ह रैली निकाल के नाराबाजी करीन।

माओवादी-मुठभेड़

दंतेवाड़ा अउ सुकमा जिला ले लगे क्षेत्र म पुलिस अउ माओवादी मनके बीच होय मुठभेड़ म एक झिन माओवादी मारे गीस। एखर उपर पांच लाख रूपिया के इनाम राखे गे रिहीस।
पुलिस अधीक्षक सिद्धार्थ तिवारी ह बतईन कि सुकमा अउ दंतेवाड़ा जिला के तीर नहनी गुडरा के जंगल म माओवादी मनके रेहे के सूचना मिले रिहीस, जेखर बाद डीआरजी के टीम ल रवाना करे गीस। इही दउरान सुकमा जिला के बिंद्रापानी के तीर माओवादी मन ह पुलिस उपर फायरिंग सुरू कर दीन। जवान मन डहार ले करे गे जवाबी कार्रवाई म एक झिन माओवादी मारे गीस। घटना वाले जघा ले हथियार अउ आने माओवादी जिनीस बरामद करे गेहे।