विधानसभा समाचार
छत्तीसगढ़ विधानसभा के मानसून सत्र के आखरी दिन आज भाजपा विधायक बृजमोहन अग्रवाल ह अविश्वास प्रस्ताव राखीन। श्री अग्रवाल ह चर्चा के शुरूआत करीन। ओमन कीहिन कि प्रदेश म अठारा लाख लोगन मनके तीर घर नइ हे। उंहें कानून व्यवस्था के स्थ्ति घलो ठीकठाक नइ हे । ओमन कीहिन कि युवा अउ किसान मन आत्महत्या करत हे, अवैध रेती के कारोबार चलत हे, अउ अधिकारी मन अपन जिम्मेदारी बने ढंग ले नइ निभात हे।
उंहें नेता प्रतिपक्ष धरमलाल कौशिक ह कीहिन कि सरकार ह अविश्वास प्रस्ताव के उपर गोठबात नइ करना चाहे। भाजपा सदस्य अजय चंद्राकर ह आदिवासी दिवस के छुट्टी के औचित्य उपर सवाल उठाइन । मंत्री कवासी लखमा अउ अमरजीत भगत ह अजय चंद्राकर के बयान उपर आपत्ति जताइन। ए दउरान सदन म शब्द के परयोग अउ विसय ले भटकाव ल लेके दूनो पक्ष म बहस होय लगगे। जेखर बाद विधानसभा अध्यक्ष ह सदन के कार्यवाही ल दस मिनट बर स्थगित कर दीन।
एखर पहिली विधानसभा म आज प्रश्नकाल के दउरान संविदा अउ दैनिक वेतनभोगी कर्मचारी मनके नियमितिकरण के मुद्दा ल नेता प्रतिपक्ष धरमलाल कौशिक अउ अजय चंद्राकर ह उठाइन। एखर जवाब म मुख्यमंत्री ह कीहिन कि ग्यारा दिसंबर दू हजार उन्नीस के सौ कमेटी के बइठका होय रीहिस, फेर ए मामला ह कोर्ट म चलत हे। एखर उपर नेता प्रतिपक्ष ह कीहिन कि दू हजार बाईस तक अभिमत नइ आय हे। एखर जवाब म मुख्यमंत्री ह कीहिन कि अभिमत घलो आ जाही अउ नियमितिकरण घलो करे जाही। मुख्यमंत्री के जवाब ले विपक्षी सदस्य मन ह हंगामा करीन अउ सदन ले बहिर्गमन कर दीन। समाचार लिखे जाय तक अविश्वास प्रस्ताव उपर चर्चा चलत हे।
छत्तीसगढ़ के सभ्यता अउ संस्कृति ल जोड़े के परब हरेली काली प्रदेश म मनाये जाही। सावन महीना के अमावस्या के मनाये जाये के परब ल किसान मन अपन कुलदेवता अउ खेती किसानी म परयोग होवइया औजार के पूजा करथे।
राज्यपाल अनुसुईया उइके अउ मुख्यमंत्री भूपेश बघेल के संग विधानसभा अध्यक्ष चरणदास महंत ह हरेली परब के मउका म प्रदेश के लोगन मन ल बधाई अउ शुभकामना दे हवय। हरेली के मउका म काली मुख्यमंत्री के रायपुर स्थित घर म खेती-किसानी मनके औजार के पूजा-पाठ करे जाही अउ छत्तीसगढ़ी लोक कलाकार मन सुआ, कर्मा, ददरिया अउ गेड़ी नृत्य के प्रस्तुति दीही। हरेली तिहार के मउका म गेड़ी रेस, भंवरा, पिठुल, कंचा, पतंग, खो-खो, रस्सा खींच अउ गिल्ली डंडा जइसन खेल मनके आयोजन करे जाही।
मुख्यमंत्री ह अपन निवास ले महतारी न्याय रथ ल हरा झंडी दिखाके रवाना करही। ए रथ ह जम्मों जिला म जाही अउ रथ म बैइठे वकील मन ह माइलोगिन मन ल संवैधानिक अधिकार के बारे म जागरूक करही।
त उंहें काली ले प्रदेश म गौ-मूत्र के खरीदी घलो शुरू हो जाही। मुख्यमंत्री ह दुर्ग जिला के पाटन विकासखंड के करसा गांव ले गौमूत्र खरीदी के शुभारंभ करही।
केंद्रीय स्वास्थ्य अउ परिवार कल्याण मंत्रालय ह पुरूष नसबंदी पखवाड़ा म बढ़िया काम करे के सेती छत्तीसगढ़ ल तीन ठिन पुरस्कार ले सम्मानित करे हे। केंद्रीय स्वास्थ्य राज्य मंत्री डॅाक्टर भारती प्रवीण पवार ह आज नई दिल्ली म राखे गे कार्यक्रम म प्रदेश ल ए उपलब्धि बर पुरस्कृत करीन। परिवार नियोजन कार्यक्रम के उप संचालक डॅाक्टर टी.के. टोंडर अउ कंसलटेंट डॅाक्टर रोशन गुप्ता ह प्रदेश कोति ले ए पुरस्कार लीन।
पुरूष नसबंदी बर प्रदेश ल दू ठिन अउ श्रेणी म पुरस्कार मिले हे। सबले जादा पुरूष नसबंदी बर डॅाक्टर संजय नवल ल राष्ट्रीय स्तर म दूसरा अउ दंपत्ति मोटिवेशन के श्रेणी म रायपुर जिला के तिल्दा कि मितानिन केवरा वर्मा ल पुरस्कृत करे गेहे।
जानबा के मुताबिक पुरूष नसबंदी पखवाड़ा के दउरान पाछू तीन साल दू हजार उन्नीस ले दू हजार इक्कीस के बीच नसबंदी म छत्तीसगढ़ ल देश म पहिली स्थान मिलत हे। मुख्यमंत्री अउ स्वास्थ्य मंत्री ह राष्ट्रीय स्वास्थ्य मिशन के टीम ल बधाई दे हवय।
केंद्र सरकार के कर्मचारी मन जइसन चौंतीस प्रतिशत महंगाई अउ गृह भाड़ा भत्ता के मांग ल लेके प्रदेश के सरकारी कर्मचारी मनके हड़ताल के आज तीसर दिन रीहीस। ये हड़ताल के सेती आज घलो सरकारी ऑफिस मन म काम-काज प्रभावित रीहिस।
छत्तीसगढ़ शासकीय कर्मचारी-अधिकारी फेडरेशन ह केहे हे कि कर्मचारी मनके तनखा म कटौती करना गलत हरय। उंहें जांजगीर-चांपा म अधिकारी कर्मचारी के हड़ताल ल विधायक अउ भाजपा के प्रदेश महामंत्री नारायण चंदेल ह घलो समर्थन देहे।
राज्य सरकार ह सरकारी सेवक अउ उंखर आश्रित परिवार मनके इलाज बर पचहत्तर ठिन अस्पताल ल मान्यता देहे। सरकारी कर्मी के इलाज बर चालू वित्तीय बछर बर ए अस्प्ताल ल मान्यता मिले हे। लोक स्वास्थ्य अउ परिवार कल्याण मंत्री टी.एस. सिंहदेव के अनुमोदन के बाद चिकित्सा शिक्षा विभाग ह मान्यता मिले अस्पताल मनके सूची मंत्रालय ले जारी कर देहे।
स्वास्थ्य विभाग के अधिकारी मन ह बताइन कि जारी सूची म अउ अस्पताल मनके नाम थोरिक दिन बाद जोड़े जाही।
प्रदेश के पॉलिटेक्निक कॉलेज अउ आईटीआई म थ्री-डी प्रिटिंग अउ रोबोटिक्स जइसन नवा ट्रेड मनके शुरूआत करे जाही। संगेसंग रूरल इंडस्ट्रीयल पार्क म उत्पाद मन ल तियार करे बर नवा-नवा तकनीक के प्रयोग करे जाही। ए फैसला मुख्यमंत्री के अगवई म विधानसभा स्थित उंखर कार्यालय म टाटा टेक्नोलॉजिस के अधिकारी मनके संग होय बइठका म ले गीस।
बइठका म गौठान मन ल आईटीआई ले जोड़े गौठान मन म तियार होवत उत्पाद मनके वैल्यू एडिशन अउ ओला बेचे बर सी-मार्ट ले जोड़े जइसन विसय उपर गोठबात होइस।
प्रधानमंत्री नरेंद्र मोदी अउ गृहमंत्री अमित शाह ह आज केंद्रीय रिजर्व पुलिस बल के तिरासिवां स्थापना दिवस के मउका म जवान अउ ओखर परिवार वाले मन ल बधाई देहे। प्रधानमंत्री ह कीहिन कि सुरक्षा ले लेके मानवीय चुनौती ले निपटे म सीआरपीएफ के भूमिका ह प्रशंसा वाले हरय।
एति छत्तीसगढ़ के मुख्यमंत्री ह घलो केंद्रीय रिजर्व पुलिस बल-सीआरपीएफ के स्थापना दिवस के मउका म वीर जवान मन ल बधाई अउ शुभकामना दे हवय।
प्रदेश म कानून व्यवस्था के स्थिति ल लेके भारतीय जनता पार्टी के पदाधिकारी अउ कार्यकर्ता मन ह काली विधानसभा के घेराव के कोशिश करीन। विधायक बृजमोहन अग्रवाल, पूर्व मंत्री राजेश मूणत, अउ रायपुर जिला अध्यक्ष श्रीचंद सुंदरानी के अगवई म कतको कार्यकर्ता मन ह विधानसभ घेरे बर निकलीन।
एला रोके बर पुलिस ह जगा-जगा बैरिकेट्स लगाये रीहिन। लोधीपारा चौक म पहुंचे कार्यकर्ता मन ल पुलिस ह आगू बढ़े ले रोकीन। इही दउरान कार्यकर्ता अउ पुलिस मनके बीच झूमाझटकी होइस। पुलिस ह कार्यकर्ता मनके सांकेतिक गिरप्तारी करीन।
पूर्व राष्ट्रपति महान वैज्ञानिक अउ भारत रत्न ले सम्मानित डॅाक्टर एपीजे अब्दुल कलाम के आज सातवां पुण्यतिथी हरय। मिसाइल मैन के नाव ले प्रसिद्ध डॅाक्टर कलाम ल बढ़िया शिक्षक के रूप म घलो सुरता करे जात हे ।
गृहमंत्री ह ओमन ल श्रद्धांजलि देवत कीहिन कि डॅाक्टर कलाम के पूरा जिनगी ह भारत ल मजबूत राष्ट्र बनाय म लगीस।
एति प्रदेश के राज्यपाल अनुसुइया उइके अउ मुख्यमंत्री भूपेश बघेल ह डॅाक्टर कलाम के पुण्यतिथि म ओमन ल नमन करे हे।
प्रदेश म मंकीपॉक्स के लक्षण वाला एक झिन संदिग्ध मरीज मिले हे। जेला अंबेडकर अस्पताल के आइसोलेशन वार्ड म भर्ती कराय गेहे ।
बताये गेहे कि तेरा साल के ए छात्र ह थोरिक दिन ले रायपुर स्थित हॉस्टल म रहिके पढ़ई करत रीहिस। ओखर शरीर म लाल चकत्ता जइसे निशान देखे के बाद डॅाक्टर मन ह ए छात्र ल क्वांरटाइन करे के सलाह दीन। पीड़ित छात्र के सैंपल जांच बर भेजे गेहे।
प्रदेश म काली कतकोन जगा म हलका ले मध्यम बरसा के संगेसंग कोनो कोनो जगा म गाज गिरे के संभावना बताय गेहे। मौसम विभाग के मुताबिक एक ठिन चक्रवात पश्चिम बंगाल के खाड़ी अउ ओखर ले लगे आंध्रप्रदेश के तट म स्थित हे। एखर प्रभाव ले प्रदेश के एक दू जगा म गरज चमक के संग भारी बरसा हो सकथे।