छत्तीसगढ़ विधानसभा के मानसून सत्र आज ले शुरू होगे। पहिली दिन शून्यकाल म कांग्रेस के वरिष्ठ नेता टी.एस. सिंहदेव के पंचायत अउ ग्रामीण विकास विभाग ले इस्तीफा देके मामला गूंजीस। विपक्षी सदस्य म ह एखर उपर सवाल उठाइन अउ एला बेवस्था के सवाल बताके सरकार ले जवाब मांगीन। इही बीच विधानसभा अध्यक्ष डॅाक्टर चरणदास महंत ह सदन के कार्यवाही ल पहिली दस मिनट बर अउ बाद म काली तक बर स्थगित कर देहे।
शून्यकाल शुरू होतेच भाजपा विधायक अजय चंद्राकर ह बेवस्था के सवाल उठाइन अउ कीहिन कि प्रदेश म संवैधानिक संकट के स्थिति बन गेहे। उंखरे मंत्री ह मुख्यमंत्री ल चिट्ठी लिखके सरकार उपर गंभीर आरोप लगाय हे। श्री चंद्राकर ह कीहिन कि सामूहिक उत्तरदायित्व के तहत जम्मों आरोप उपर मुख्यमंत्री अउ दूसर मंत्री के जवाब आना चाही। भाजपा के दूसर विधायक ह एखर उपर सवाल उठाइन हे। एमा विधानसभा अध्यक्ष ह कीहिन कि एक मंत्री के मुख्यमंत्री ल चिट्ठी लिखना संवैधानिक संकट अउ बेवस्था के सवाल नइ होवय।
उंहें प्रश्नकाल म भाजपा विधायक रंजना डीपेंद्र साहू अउ अजय चंद्राकर ह घरेलू नल कनेक्शन योजना के मुद्दा ल उठाइन। नेता प्रतिपक्ष धरमलाल कौशिक ह कीहिन कि सितंबर दू हजार तेइस तक अड़तालिस लाख घर तक नल कनेक्शन देके लक्ष्य हवय। फेर जुलाई दू हजार बाईस तक सिरिफ छै लाख लोगन ल एखर फायदा मिले हे। एखर जवाब म लोक स्वास्थ्य यांत्रिकी मंत्री गुरू रूद्रकुमार ह समयसीमा के भीतरी ए योजना ल पूरा करे के भरोसा दिलाइन। एखर ले पहिली सदन म दिवंगत पूर्व सांसद चक्रधारी सिंह अउ पूर्व विधायक भजनसिंह निरंकारी ल श्रद्धांजलि दे गीस।
प्रधानमंत्री नरेंद्र मोदी ह देश म दू सौ करोड़ टीका लगाये के लक्ष्य हासिल करे बर टीका लगाने वाला मनके सराहना करीन हे। प्रधानमंत्री ह ओमन ल प्रशंसा पाती भेजके बधाई दीन हे। श्री मोदी ह कीहिन हे कि टीकाकरण करने वाला स्वास्थ्यकर्मी, स्वास्थ्य सहायता कर्मचारी अउ अग्रिम पंक्ति के कार्यकर्ता मन ह लोगन मन ल स्वास्थ्य सुरक्षा दे म महत्वपूर्ण भूमिका निभाय हे। ओमन ह कीहिन हे कि कोविड टीकाकरण अभियान पाछू बछर सोला जनवरी के शुरू होय रीहिस। ए महीना के सतरा तारीख तक देश ह दू सौ करोड़ टीका लगाये के लक्ष्य ल पूरा करे हे।
एति छत्तीसगढ़ म घलो कोरोना टीकाकरण अभियान सरलग चलत हे। राज्य म अब तक चार करोड़ सत्ताईस लाख छियानबे हजार ले जादा कोविड रोधी टीका लगाये जा चुके हे।
इही बीच राज्य म कोरोना संक्रमण के मामला घलो बाढ़त जात हे । काली प्रदेश म पांच सौ पंच्यानबे कोरोना संक्रमित मरीज मिलिन हे। रायपुर जिला म सबले जादा छियानबे झिन मरीज मनके पहिचान करे गीस। एमन ल मिलाके राज्य म सक्रिय मरीज मनके संख्या बाढ़के तीन हजार तिरालिस होगे ।
प्रदेश म अवइया अठाईस जुलाई के हरेली तिहार ले गोधन न्याय योजना के विस्तार करत गोबर के संगेसंग गौमूत्र के खरीदी घलो करे जाही। एखर खरीदी बर चार रूपिया प्रति लीटर के दर तय करे गेहे। खरीदे गे गौमूत्र के उपयोग कीटनाशक अउ खाद बनाये बर करे जाही।
मुख्यमंत्री भूपेश बघेल ह आज विधानसभा के अपन कार्यालय म गोधन न्याय योजना के हितग्राही मनके खाता म सात करोड़ अड़तालिस लाख रूपिया के ऑनलाईन भुगतान करे के बेरा ए जानकारी दीन।
ओमन ह बताइन कि वर्मी कम्पोस्ट के बिक्री बर महिला स्व सहायता समूह ल प्रति किलो एक रूपिया अउ सहकारी समिति ल दस पइसा के बोनस मिलही। जेखर बर आदेश जारी कर दे गेहे । मुख्यमंत्री ह कीहिन हे कि एसो सात जुलाई तक बिक चुके कम्पोस्ट बर महिला समूह ल बोनस के रूप म सतरा करोड़ चौसठ लाख रूपिया अउ सहकारी समिति बर एक करोड़ छिहत्तर लाख रूपिया के प्रोत्साहन राशि दे जाही।
केंद्रीय कृषि मंत्रालय डहार ले देशभर के किसान मनके खेती किसानी संबंधित विशेष रूप ले फसल बीमा ले संबंधित शिकायत के निदान बर किसान शिकायत निवारण पोर्टल-एफजीआर तियार करे गेहे। ए पोर्टल ल फिलहाल केंद्र सरकार डहार ले पायलट प्रोजेक्ट के रूप म छत्तीसगढ़ म लागू करे जात हे। काली केंद्रीय कृषि मंत्रालय डहार ले ए पोर्टल ल वीडियो कॉन्फ्रेसिंग के माध्यम ले लांच करे जाही।
छत्तीसगढ़ म एखर परिणाम ल देखे के बाद एला पूरा देश म लागू करे जाही। कृषि मंत्रालय ह छत्तीसगढ़ के चयन प्रधानमंत्री फसल बीमा ले अच्छा तरीका ले लागू करे म अउ बीमा दावा राशि के भुगतान म देश के अग्रणी राज्य होय के सेती करे हे।
दूरिहा जगा के स्कूल मन म निरीक्षण के बेरा नियुक्त शासकीय शिक्षक के जगा म आने शिक्षक डहार ले काम करे के शिकायत ल गंभीरता ले लेहे। समग्र शिक्षा के प्रबंध संचालक नरेंद्र दुग्गा ह सबो जिला शिक्षा अधिकारी मन ल अवइया दस दिन के भीतरी ए संबंध म जरूरी कार्रवाई करे के निर्देश दीन हे। संगेसंग ओमन ह सबो स्कूल म काम करे वाला शासकीय शिक्षक के फोटो अउ उखर नाम समेत विवरण बाहरी दिवार म प्रदर्शित करे बर कीहिन हे । एखर अलावा ओमन ह शासकीय शिक्षक के दस्तावेज के कार्यालय म प्रमाणीकरण करे के घलो निर्देश दीन।
रायपुर के अखिल भारतीय आयुर्विज्ञान संस्थान-एम्स म रोगी मन बर प्रधानमंत्री जनऔषधि केंद्र स्थापित कर दे गेहे। केंद्र म जेनेरिक दवाई बहुते कम कीमत म मिलही। एखर खुले के बाद अब कैंपस के अंदर दू ठिन फार्मेसी के दुकान होगे हे। ए केंद्र के उद्घाटन एम्स के निदेशक डॅाक्टर नीतिन एम. नागरकर ह करीन।
घरेलू उपभोग व्यय सर्वेक्षण ल लेके रायपुर के राष्ट्रीय सांख्यिकी कार्यालय म आज ले राज्य स्तरीय क्षेत्रीय प्रशिक्षण सम्मेलन शुरू होय हे। ए तीन दिन तक चलइया कार्यक्रम के शुभारंभ राष्ट्रीय सांख्यिकी कार्यालय रायपुर के उप महानिदेशक रौशनलाल साहू ह करीन। ए बेरा म ओमन बताइन कि घरेलु व्यय म सर्वेक्षण एक जुलाई ले शुरू होय हे, जउन कि अवइया एक बछर तक चलही।
श्री साहू ह बताइन कि ए सर्वेक्षण म ए जाने के कोसिस करे जाही कि देश के शहरी अउ ग्रामीण क्षेत्र म आने-आने जीनिस अउ सेवा उपर घरेलु उपभोक्ता मन डहार ले अपन मासिक बजट के कतका प्रतिशत हिस्सा खर्च करे जात हे। मिले आंकड़ा के आधार म उपभोक्ता मूल्य सूचकांक के आधार बछर के पुनर्निधारण करे जाही।
दुर्ग जिला के अंजोरा रद्दा म तीन दिन पहिली शिवनाथ नदी म बोहाय कार मिल गेहे। एमा एक झिन जवान लईका के शव मिले हे। पुलिस अधीक्षक डॅाक्टर अभिषेक पल्लव ह बताइन कि कार ह रायपुर के हरय अउ एमा सवार युवक के पहिचान कर ले गेहे।
जानबा के अनुसार इतवार के रतिहा ए कार ह शिवनाथ नदिया म बोहा गे रीहिस। पाछू तीन दिन ले एनडीआरएफ अउ एसडीआरएफ के जवान कार ल खोजे म जुटे रीहिन। फेर आज क्रेन के मदद ले नदिया म बूड़े कार ल बाहिर निकाले गीस।
– राष्ट्रपति चुनई के मतगणना काली राष्ट्रीय राजधानी के संसद भवन म बीहनिया ग्यारा बजे शुरू होही। देश के नवा राष्ट्रपति चुनई बर संसद भवन, राज्य विधानसभा अउ आने निर्धारित मतदान केंद्र म पाछू अठारा जुलाई के मतदान होय रीहिस।
– राज्य सरकार डहार ले जगदलपुर के शासकीय इंजीनियरिंग कॉलेज के नामकरण झाड़ा-सिरहा शासकीय इंजीनियरिंग महाविद्यालय कर दे गेहे।
– प्रदेश म करीबन पचहत्तर झिन शासकीय अधिकारी-कर्मचारी संगठन के अवइया पच्चीस ले उनतीस जुलाई तक प्रस्तावित कलमबंद हड़ताल ल अनियमित कर्मचारी संघ ह घलो अपन समर्थन देके घोषणा करीन हे।
–
अउ
– साउथ इर्स्टन कोल्ड फील्डस् लिमिटेड- एसईसीएल म नौकरी लगाय के नाव म चार लाख अस्सी हजार रूपिया के ठगी करे के आरोप म जांजगीर-चांपा जिला के हसौद पुलिस ह दू झिन मनखे ल गिरप्तार करीन।