कोरोना-लाॅकडाउन
छत्तीसगढ़ म कोरोना संक्रमण के बाढ़त मामला ल देखत अवइया इक्कीस जुलाई के बाद लाॅकडाउन करे के फैसला ले गेहे। फेर, लाॅकडाउन पूरा छत्तीसगढ़ म नइ होही, बल्कि जिहां कोरोना संक्रमण के मामला जादा हे, उहां लाॅकडाउन करे जाही।
ए फैसला आज रईपुर म मुख्यमंत्री भूपेश बघेल के अध्यक्षता म होय उच्च स्तरीय बइठका म ले गीस। बइठका म सबो मंत्री मन सामिल रिहीन। बइठका म निर्णय ले गीस कि लाॅकडाउन कतना दिन के होही, एखर अधिकार जिला कलेक्टर मन ल दे गेहे। ओमन अपन जिला म कोरोना संक्रमण के स्थिति ल देखत ए फइसला लीहीं।
कोरोना मरीज
प्रदेस म अभी तक मिले सूचना के अनुसार आने-आने जिला ले कोरोना संक्रमित तिरसठ झन नवा मरीज मनके पुष्टि होय हे। एमा बस्तर संभाग ले बावन मरीज मिले हे अउ दुरूग जिला म ग्यारह झिन मरीज मनके पहिचान होय हे।
स्वास्थ्य विभाग के आंकड़ा के मुताबिक कांकेर ले सबले जादा छब्बीस झिन मरीज आगू आय हे। एमा बीएसएफ के उन्नीस अउ एसएसबी के तीन जवान सामिल हे। उहें, दुर्गकोंदल अउ भानुप्रतापपुर ले घलो दो-दो कोरोना पाॅजिटिव मरीज मिले हे।
उहें, बीजापुर जिला ले सत्रह कोरोना पाॅजिटिव मरीज मनके पहिचान होय हे, जेमा केन्द्रीय सुरक्षा बल के दस अउ सीएएफ के एक झिन जवान सामिल हे।
एखर अलावा, बस्तर ले पांच, सुकमा ले चार, कोंडागांव ले तीन, दंतेवाड़ा ले दू अउ नारायणपुर जिला ले एक झिन मरीज मिले हे।
ओति, दुरूग जिला म आज ग्यारह झिन नवा मरीज मनके पुष्टि होय हे, जेमा ले आठ बीएसएफ के जवान मन हे। उहें, नेवई बस्ती ले एके परिवार के तीन सदस्य कोरोना पाॅजिटिव मिले हे। ए सबो झन ल जिला कोविड अस्पताल म भर्ती कराय जावत हे।
एखर पहिली, काली रतिहा प्रदेस म दू सौ बयालीस कोरोना संक्रमित मरीज मनके पुष्टि होय रिहीस।
स्वास्थ्य मंत्री-बातचीत
स्वास्थ्य मंत्री टी.एस. सिंहदेव ह किहीन हे कि प्रदेस म कोरोना के प्रसार के दर नियंत्रित हे। जउन मन कोरोना पाॅजिटिव पाय गेहे, ओमा ले अस्सी प्रतिसत ले जादा अंतर्राज्यीय यात्रा अउ तीन प्रतिसत अंतर्राष्ट्रीय यात्रा करइया मन सामिल हे। ओमन किहीन कि प्रदेस सरकार ह सरलग कोरोना नियंत्रण के दिसा म काम करत हे।
आज रईपुर म राखे गे एक ठिन पत्रकारवार्ता म स्वास्थ्य मंत्री ह किहीन कि प्रदेस म कोरोना टेस्टिंग के दायरा बढ़ाय जावत हे, जेखर ले मरीज मनके संख्या म बढ़ोतरी होना सामान्य बात हे। ओमन किहीन कि प्रदेस म अभी घलो मृत्युदर दूसर राज्य ले बहुत कम हे।
कोरोना-कार्रवाई
राज्य सरकार ह कोरोना वायरस के रोकथाम बर निरदेस जारी करे हे। ए निरदेस म केहे गेहे कि नियम के उल्लंघन करइया मन ले जुर्माना वसूल करे जाही। एमा सार्वजनिक जघा म मास्क अउ फेस कवर नइ पहिने म अउ सार्वजनिक जघा म थूके म सौ-सौ रूपिया के जुर्माना वसूले जाही। अइसने, दुकान, व्यावसायिक संस्थान के मालिक मन डहार ले सामाजिक दूरी के उल्लंघन करे जाय म दू सौ रूपिया के जुर्माना लगाय जाही। एखर अलावा, होम क्वारेंटाइन के निरदेस के उल्लंघन करे म एक हजार रूपिया के जुर्माना लगाय जाही।
स्वास्थ्य विभाग डहार ले जारी अधिसूचना के अनुसार जुर्माना वसूले के कार्यवाही जिला मजिस्ट्रेट डहार ले प्राधिकृत अधिकारी द्वारा करे जा सकही। जुर्माना के रासि नइ देके स्थिति म संबंधित व्यक्ति के खिलाफ महामारी रोग अधिनियम अउ भारतीय दंड संहिता के तहत दण्डात्मक कार्रवाई करे जाही।
इंद्रावती भवन-प्रवेश
कोरोना संक्रमण ल देखत महानदी मंत्रालय भवन के जइसे इंद्रावती भवन म घलो बाहिरी लोगन के अवई-जवई म रोक लगा दे गे हवय। ए संबंध म सामान्य प्रसासन विभाग डहार ले जारी परिपत्र म केहे गे हवय कि इंद्रावती भवन म सिरिफ विभाग अध्यक्ष के अनुमति ले प्रवेस मिल सकही। जारी परिपत्र म सबो विभाग अध्यक्ष मन ल ए निरदेस के कड़ाई ले पालन करे बर केहे गेहे।
गौठान राशि-मंजूर
राज्य सरकार ह सुराजी गांव योजना म बनाय गौठान मन म पशुधन के रखरखाव के बेवस्था अउ संचालन बर दस करोड़ रूपिया ले जादा के रासि मंजूर करे हे। वित्त विभाग ह ए रासि पंचायत अउ ग्रामीण विकास विभाग अउ नगरीय प्रसासन विभाग ल जारी कर देहे।
राज्य के पच्चीस सौ ले जादा गौठान मन ल चालीस-चालीस हजार रूपिया के मान ले ए रासि मंजूर करे गेहे। जेमा तेईस सौ गौठान गंवई इलाका के हे अउ दू सौ ले जादा गौठान नगरीय क्षेत्र के हवय।
आईआईटी-प्रवेश
भारतीय प्रौद्योगिकी संस्थान-आईआईटी म प्रवेस बर ए बछर बारहवीं के परीक्षा म न्यूनतम पचहत्तर प्रतिसत अंक के सर्त नइ होही। आई.आई.टी. संयुक्त प्रवेस बोर्ड के बइठका म ए फइसला ले गीस कि ए बछर बारहवीं के परीक्षा म पास होवइया सबो विद्यार्थी मन ह आईआईटी म भर्ती होय बर पात्र रइहि, चाहे ओमन ल कतको नंबर मिले होय।
केन्द्रीय मानव संसाधन विकास मंत्री रमेश पोखरियाल निशंक ह किहीन कि कई बोर्ड के बारहवीं के परीक्षा आंशिक रूप ले रद्द करे जाय के सेती ए फइसला करे गीस।
माओवादी-मुठभेड़
राजनांदगांव जिला म आज सुरक्षा बल अउ माओवादी मनके बीच मुठभेड़ होय हे। फेर, ए घटना म कोनों के हताहत होय के खबर नइ हे।
पुलिस अधीक्षक जितेन्द्र शुक्ला ह मुठभेड़ के पुष्टि करत बतईन कि औंधी थाना क्षेत्र के ग्राम बोगाटोला-निडेली-डोडके के जंगल म माओवादी मनके मौजूदगी के सूचना मिले म जिला पुलिस बल, डिस्ट्रिक्ट रिजर्व गार्ड डीआरजी अउ आईटीबीपी के संयुक्त टीम रवाना करे गे रिहीस। ए दउरान जंगल म माओवादी मन ह उंखर मन उपर फायरिंग सुरू कर दीन। जवान मन घलो जवाबी कार्रवाई करीन। फेर ए घटना म कोनों नकसान नइ होय हे।
खरीफ फसल-गिरदावरी
प्रदेस म खरीफ फसल के गिरदावरी अवइया एक अगस्त ले बीस सितंबर तक करे जाही। एखर बाद ग्रामवार फसल क्षेत्र अच्छादन के सुरूवाती प्रकासन इक्कीस सितंबर तक करे जाही। राज्य के सबो गांव म किसानवार, फसल क्षेत्र आच्छादन के प्रकासन करके दावा आपत्ति अट्ठाईस सितंबर तक ले जाही। मिले दावा-आपत्ति के निपटारा करके खसरा, पांचसाला अउ भूईंया साॅफ्टवेयर के प्रविष्टि म चैदह अक्टूबर तक सुधार करे जाही।
मनरेगा-वाटर हार्वेस्टिंग
रेनवाटर हार्वेस्टिंग बर महात्मा गांधी राष्ट्रीय ग्रामीण रोजगार गारंटी योजना-मनरेगा म सरकारी या पंचायत भवन के छत म जरूरी संरचना के निर्माण करे जा सकही। केन्द्र सरकार डहार ले एला मनरेगा म होवइया काम म सामिल करे के बाद राज्य सरकार ह सरकारी भवन मन म रूप-टाॅप वाटर हार्वेस्टिंग के निरदेस दीन हे। ए संबंध म सबो कलेक्टर मन ल परिपत्र जारी कर दे गेहे।
परिपत्र म केहे गे हवय कि वाटर हार्वेस्टिंग बर ड्रिलिंग या नवीन रिचार्ज शाॅफ्ट खनन के काम मनरेगा म नइ कराय जा सकही। फेर, छत ले बरसा के पानी ‘‘फिल्टर मीडिया‘‘ डहार ले रिचार्ज स्ट्रक्चर जइसन रिचार्ज शाॅफ्ट, ट्रेंच, डगवेल, परित्यक्त ट्यूबवेल, हैंडपंप मन म डायवर्ट करे बर जरूरी संरचना के निरमान कराय जा सकत हे।
संक्षिप्त समाचार
अउ अब थोरकुन समाचार सार म-
– स्वतंत्रता संग्राम सेनानी अउ साहित्यकार डाॅक्टर खुबचंद बघेल के काली जयंती हे। ए मउका म राज्यपाल अनुसुईया उइके अउ मुख्यमंत्री भूपेश बघेल ह ओमन ल श्रद्धांजलि दीन हे।
– लाॅकडाउन के बाद छत्तीसगढ़ वापिस लहुटे प्रवासी श्रमिक मन बर उंखर योग्यता के अनुसार रोजगार देवाय बर प्रदेस के सबो जिला म रोजगार कैम्प लगाय जाही। इही कड़ी म दुरूग जिला म विकासखंड स्तर म बाईस ले चैबीस जुलाई तक रोजगार कैम्प लगाय जाही।
– केन्द्रीय स्वास्थ्य मंत्रालय ह राज्य मन ले कोरोना संक्रमण के उपचार के संगेसंग दूसर लोगन बर टीकाकरण अउ मातृ स्वास्थ्य सेवा संघरा आपात सेवा अउ गंभीर रोगी मनके इलाज के बेवस्था करे बर किहीन हे।
– बेमेतरा जिला के थाना देवकर चैकी के पुलिस ह मोटर साइकिल चोर गिरोह के दस झिन सदस्य मन ल गिरफ्तार करे हे। उंखर मन तीर ले पन्द्रह ठिन मोटर साइकिल बरामद करे गेहे।
– उहें, रायगढ़ जिला म तमनार अउ सारंगढ़ पुलिस ह मोटरसाइकिल चोर गिरोह ले चैंतीस ठिन दुपहिया गाड़ी जब्त करे हे।
अउ
– राजनांदगांव पुलिस ह शराब तस्करी के मामला म चार झन ल गिरफ्तार करके उंखर मन तीर ले दू ठन मोटर साइकिल अउ अवैध सराब बरामद करे हे।